I Dikna I Vuan Tlat Ang Em?
I Dikna I Vuan Tlat Ang Em?
“Ka thih thlengin ka dikna ka dah bo lo vang.”—JOB. 27:5.
1, 2. Eng nge neih kan tum ang a, eng zawhnate nge kan ngaihtuah ang?
IN SAK dân tûr lemziak en angah han inchan la. A design chu ṭha i ti hle mai a. Nangmah leh i chhûngte’n chu in nuam tak in luah theih hun tûr chu hlim takin i ngaihtuah a ni. Mahse, in chu sa tak tak a, in luah a, in enkawl chhoh loh chuan chûng lemziakte leh i lo ngaihtuah engpawh chuan ṭangkaina a nei meuh lo vang tih chu i pawm dâwn lâwm ni?
2 Chutiang bawkin, dikna chu keimahni leh kan hmangaihte tâna ṭangkai êm êm tûr mize pawimawh tak niin kan hre mai thei a. Mahse, dikna hi ṭha ti taka ngaihtuah ringawt a, Kristian dikna nei tûra hma laa kan vawn reng si loh chuan, chu chu kan sâwtpui lo vang. Tûn lai khawvêlah hian, in tak tak sak man chu a to thei hle a. (Lk. 14:28-30) Chutiang bawkin, dikna nei tûr chuan hun leh tha leh zung tam tak sên a ngai a; mahse, neih manhla tak a ni. Chuvângin, hêng zawhna pathumte hi i lo sawiho vang u: Engtin nge dikna lantîrtu kan nih theih ang? Engtin nge kan Kristian dikna chu kan vawn theih ang? Tuemawin, rei lo te chhûng dikna a vawn loh chuan eng nge a tih theih?
Engtin Nge Dikna Lantîrtu Kan Nih Theih Ang?
3, 4. (a) Eng kawngtein nge Jehova chuan dikna nei tûra min ṭanpui? (b) Isua lantîr angin, engtin nge dikna chu kan neih theih?
3 Thuziak hmasaah khân Jehova chuan dikna lantîrtu nih kan duh leh duh loh thlan theihna chanvo pein min chawimawi tih kan hre tawh a. Mahse, he mi chungchânga min thlahthlam mai lo hi a lâwmawm hle. Ani chuan he mize hlu tak neih theih dân min zirtîr a, a zirtîrnate nunpui tûra min ṭanpuitu a thlarau thianghlim chu hnianghnâr takin min pe a ni. (Lk. 11:13) Dik taka awm, a nih loh leh rinawmna vawn tumte hnênah thlarau lam vênhimna a pe hial a ni.—Thuf. 2:7.
4 Engtin nge Jehova’n dikna vawng tûra min zirtîr? A bul berah chuan, a Fapa Isua leiah rawn tîrin min zirtîr a ni. Isua chuan thu a âwih famkim a. Ani chu “thi khawp hiala thu zâwmin a lo awm ta a.” (Phil. 2:8) A harsat hle châng pawhin, Isua chuan a thiltih engkimah a Pa vâna mi thu a zâwm a ni. Ani chuan Jehova hnênah: “Keia thu ni lovin, nangma thu thu ni zâwk rawh se,” a ti. (Lk. 22:42) Heti hian kan inzâwt ṭheuh tûr a ni, ‘Chutiang bawka thuawih duhna ka nei em?’ tiin. Rilru put hmang dik nei chunga thu kan âwih hian, dikna vawngtu kan lo ni ang. Kan nuna thuâwih a pawimawh zualna lai ṭhenkhat lo ngaihtuah ta ila.
5, 6. (a) Davida chuan mi dangin min hmuh loh lai pawha dikna kan vawn a pawimawhzia engtin nge a târ lan? (b) Tûn laia Kristiante’n mahni chauhva an awm laiin dikna vawn chungchângah eng harsatna nge an hmachhawn?
5 Mahni chauhva kan awm lai pawhin, Jehova thu kan âwih a ngai a. Fakna hla phuahtu Davida chuan amah chauhva a awm laia thinlung ṭha famkim, a nih loh leh dikna neih a pawimawhzia chu a hria a ni. (Sâm 101:2 chhiar rawh.) Lal a nih angin, Davida nun chu mipuiin an hre hle a. Vawi tam tak chu thlîrtu a za têl, a sâng têl a neih chu a rinawm a ni. (Sâm 26:12 nên khaikhin rawh.) Lal chuan a khua leh tuite tâna entawn tûr ṭha a siam a ngaih avângin, chutiang huna dikna a vawn chu a pawimawh a. (Deut. 17:18, 19) Amaherawhchu, Davida chuan amah chauhva ‘a in chhûnga’ a awm lai pawhin dikna a vawn a ngai tih a hria a ni. Heta ṭang hian eng nge kan zir theih?
6 Sâm 101:3-ah chuan Davida thusawi: “Thil ṭha lo rêng rêng ka mithmuhah chuan ka dah lo vang,” tih chu kan hmu a. Tûn laiah, a bîk takin mahni chauhva kan awm laiin, kan mithmuha thil ṭha lo dah theihna hun tam tak kan nei a ni. Internet neitute chuan he mi chungchângah harsatna tam tak an tâwk a. Thil ṭha lo, zahmawh lam thilte thleng thlenga en châkna neih chu a awlsam hle. Mahse, chutianga enna chu a chunga thute ziak tûra Davida thâwk khumtu Pathian laka thuâwihna thiltih a ni ang em? Zahmawh lam thilte chuan châkna leh îtna ṭha lo tak takte a tichhuak a, chhia leh ṭha hriatna a tichhiain, inneihna a tichhe bawk a, a kaihhnawih mi zawng zawngte chu zak taka a siam theih bawk avângin a hlauhawm hle.—Thuf. 4:23; 2 Kor. 7:1; 1 Thes. 4:3-5.
7. Mahni chauhva kan awm hunah, dikna vawng tûrin eng thu bulin nge min ṭanpui thei?
7 Jehova chhiahhlawhte chu engtik lai pawhin mahni chauhvin an awm ngai lo ngei mai. Hmangaihna ngah tak kan Pa chuan min en reng a ni. (Sâm 11:4 chhiar rawh.) Jehova chu thlêmna i do lai a han hmuh hian a va lâwm dâwn êm! Chutianga i do chuan, Matthaia 5:28-a Isua thusawia hmehbel tel vaukhânna chu i zâwm a ni ang. Chuvângin, thil ṭha lo ti tûra thlêm thei che milem rêng rêng chu en loh tum tlat rawh. Thiltih zahthlâk tak, zahmawh lam thil enin emaw, chhiarin emaw i dikna hlu tak chu hralh phal suh ang che!
8, 9. (a) Daniela leh a ṭhiante chuan an dikna chungchângah harsatna eng nge an hmachhawn? (b) Engtin nge tûn laia Kristian tleirâwlte chuan Jehova leh an unaute an tihlâwm?
8 Ring lotute zînga kan awm hunah pawh Pathian Jehova thu âwihin dikna vawngtu kan ni thei a. Daniela leh a ṭhian pathumte hi han ngaihtuah teh. Tleirâwl an nih laiin, Babulon-ah sala hruai an ni a. Chuta ring lotu Jehova chanchin tlêm tê chauh hria emaw, hre maih lo emawte hual vêlin an awm a; Hebrai tleirâwl palite chu Pathian Dânin a khap lal chaw tuihmêl takte ei tûra nawr an ni. Anni chuan Pathian Dân zawm loh nân chhuanlam tûr tam tak an nei thei ngei ang. Tihah chuan, an nu leh pa te, an aia upa zâwk Juda mi puitling te, leh puithiam te chuan an thil sual tih chu an hmu dâwn si lo. Tuin nge hmu ang? Jehova’n a hmu dâwn a ni. Chuvângin nawrna leh hlauhawm kârah pawh a thu zâwmin an ding nghet tlat a ni.—Dan. 1:3-9.
9 Khawvêl pumah hian, Jehova Thuhretu ṭhalaite chu chutiang bawka dingnghetin leh Kristiante tâna Pathian tehna chu vawngin, an ṭhiante nawrna hlauhawm tak chu an hnâwl a ni. Nangni ṭhalaite’n ruihhlo ngaihna te, tharum thawhna te, in ânkhumna te, nungchang bawlhhlawhna te, leh thil dik lo dangte tihna kawnga in inhnamhnawih loh hian, Jehova thu chu in âwih tihna a ni. Chutianga in tih chuan, dikna in vawng tihna a ni bawk. Chu chu in hlâwkpui a; tin, Jehova leh Kristian unaute in tilâwm a ni.—Sâm 110:3.
10. (a) Inngaihna chungchânga ngaih dân dik lo eng hian nge ṭhalai ṭhenkhatte dikna chu a tihchhiat? (b) Dikna hian inngaihna sual hlauhawmna chungchângah engtin nge min chêttîr?
10 Mipat hmeihchhiatpui ni lote kan kawm hunah pawh thu kan âwih a ngai bawk a. Pathian Thu chuan inngaih a khap tih kan hria. Amaherawhchu, thuâwihna thinlung chu awlsam takin inphalraina ngaithei takah a chang thei. Entîr nân, ṭhalai ṭhenkhat chuan a ngial a ngana “inpâwlna” a nih loh avângin, kâa châkna inhrîkthlâksak (oral sex) te, mawngkuaa inpâwl (anal sex) te, leh serh inhrawt tawnsakna te chu thil sual lutukah an ngai lo va; chutiang thiltihahte chuan an inhmang a ni. Chutiang ṭhalaite chuan inngaihna sawina Bible thu malah chuan chûng thiltih zawng zawngte a tel tih an theihnghilh—a nih loh leh an haider lui mai thei; chutiang nungchang dik lo chu kohhran aṭanga hnawhchhuah nih theihna thiltih vek a ni. * Chu aia pawi zâwk erawh chu, dikna vawn a pawimawhna an ngaihthah hi a ni. Dikna vawn kan tum tlat avângin, relhrûk theihna tûr kan zawng lo va. Hrem theih chin thleng si lova sual thiltiha tel chu kan tum hek lo. Thil sual tihnain a thlen theih a sawhkhâwkte chauh kan ngaihtuah lo va. Jehova duhzâwng ti a, a rilru tinatu tûr thiltihte pumpelh chu kan tum tlat zâwk a ni. Thil sual ti ni chiah si lova sual lam âwn theih dân zawn aiin, a hla thei ang bera awmin, ‘inngaih hi kan tlânsan’ zâwk a. (1 Kor. 6:18) Chutiang chuan, dikna lantîrtu kan nihzia kan târ lang a ni.
Engtin Nge Dikna Kan Vawn Theih Ang?
11. Engvângin nge kan thuâwihna thiltih tinte chu a pawimawh? Entîrna pe rawh.
11 Thuâwihna hmangin dikna kan nei a; chuvâng chuan thuâwih rengna hmangin dikna chu kan vawng a ni. Vawikhat thuâwihna chu thil pawimawh lo, ho lam tak niin a lang mai thei a. Mahse, chutiang thuâwihna thiltihte inbelhkhâwm chuan hun a liam zêl chuan dikna vawngtuah min siam a ni. Entîr nân: Leirawhchan pakhat mai chu engmah tham ni lovin a lang mai thei; mahse, ṭha taka leirawhchan tam tak kan rem khâwm chuan, in ṭha tak kan sa thei a ni. Chutiang bawkin, kan thuâwihna thiltih inbelhkhâwmte hmangin dikna kan vawng a ni.—Lk. 16:10.
12. Tihretheihna leh rorêl dik lohna hmachhawn huna dikna vawn chungchângah engtin nge Davida chuan entawn tûr a siam?
12 Harsatna te, tihretheihna te, a nih loh leh rorêl dik lohna te kan tawrh hunah kan dikna chu a lang lehzual a. Bible-a Davida entîrna hi han ngaihtuah teh. Tleirâwl a nih laiin, Jehova thuneihna aiawhtu tûr lalber tihduhdahna chu a tuar a. Amaherawhchu, Lal Saula chuan Jehova duhsakna a chân a, Pathianin a pawm Davida chu nasa takin a îtsîk a ni. Mahse, Saula chuan thuneihna chu hun engemaw ti chhûng la chelhin, Davida ûma tithlabâr tûrin Israel sipaite chu a hmang a. Jehova chuan chu rorêl dik lohna chu kum engemaw chen a awm a phal a ni. Davida chu Pathian chungah a lungni lo vem? Chhel man a awm lo tiin thu tlûkna a siam em? Chu mi kalh chiah chu a ti zâwk a ni. Davida chuan Pathian hriak thih a nih anga Saula nihna chu nasa taka zah rengin, hun remchâng a awm hunah pawh Saula chungah kut a thlâk duh lo a ni.—1 Sam. 24:2-7.
13. Miin kan rilru an tihnat hunah leh min tihlungnih loh hunah engtin nge kan dikna chu kan vawn theih ang?
13 Kan tân Davida entîrna chuan thil a va ti thei tak êm! Khawvêl pum huapa mi ṭha famkim lote awmna kohhran zînga mi kan ni a, chûng zînga tuemaw chuan dik lo takin kan chungah thil an ti emaw, an rinawm lo hial emaw pawh a ni thei. Mahse, Jehova mite an zavaia thil ṭha lo tih avânga an chhiat theih lohna hunah kan awm a ni. (Is. 54:17) Chutichung chuan, mi tuemawin min tihlungnih loh va, kan rilru an tihnat chuan engtin nge kan chhân lêt ang? Pathian kan biakpuite chunga lungnih lohna kan pai reng chuan, Pathian chunga kan dikna chu a chhiat mai a hlauhawm thei a ni. Mi dangte nungchang chu Pathian chunga kan lungnih loh nân emaw, rinawmna kawng kan kalsan nân emaw chhuanlam a tling ngai lo. (Sâm 119:165) Fiahna tawh huna chhelna chuan, kan dikna vawng tûrin min ṭanpui ang.
14. Eng kawngin nge dikna vawngtute chuan inawpna pâwl lama inthlâkthlengnate leh thurin siam ṭhat chhohnate chu an chhân lêt?
14 Mi dangte sual hmuh tumna leh sawisêl duhna rilru put hmang pumpelhin, dikna kan vawng thei bawk a. Chu mi awmzia chu Jehova chunga rinawm hi a ni. Ani chuan a mite chu tûn hma zawng aiin mal a sâwm a. Biakna dik chu mihring chanchinah hetiang rênga chawisân a la ni ngai lo. (Is. 2:2-4) Bible châng hrilhfiah dân emaw, thiltih dân tûr emaw siam ṭhat a nih hunah, chûng chu pawm kan duh a. Thlarau lam êng chu a la êng zual deuh deuh tih finfiahna hmuh chu nuam kan ti a ni. (Thuf. 4:18) Thil inthlâkthlengte hriatthiam harsa kan tih chuan, chu mi hre thiam thei tûrin Jehova ṭanpuina kan dîl a. Chutih chhûng chuan, thuâwihna kawng zawhin, dikna kan vawng a ni.
Mi Tuemawin Dikna Vawng Lo Ta Se?
15. I dikna la bo theitu awmchhun chu tunge ni?
15 Chu chuan ngaihtuah a titam hle a ni lâwm ni? Thuziak hmasaa kan zir tawh ang khân, dikna chu a pawimawh hle a. Chu mi tel lo chuan, Jehova nêna inlaichînna kan nei thei lo va, beisei tûr pawh kan nei lo vang. Hei hi rilruah vawng reng rawh: Lei leh vâna mi pakhat chauhvin, i dikna chu a la bo thei a. Chu chu nangmah i ni, tih hi. Joba chuan chu chu a hre chiang khawp mai. Heti hian a sawi a ni: “Ka thih thlengin ka dikna ka dah bo lo vang,” tiin. (Job. 27:5) Chutiang tum tlatna i neih a, Pathian Jehova i hnaih tlat chuan, i dikna i hloh ngai lo vang.—Jak. 4:8.
16, 17. Miin thil sual pawi tak a tih chuan, eng nge a tih loh tûr chu? (b) Eng nge a zui tûr kawng dik chu?
16 Chuti chung pawhin, ṭhenkhat chuan an dikna an vawng thei lo va. Tirhkohte hun laia a thlen ang bawkin, tûn laiah pawh mi ṭhenkhat chuan sual pawi tak an ti nawn fo ṭhîn. Chutiang mi i nih chuan i tân beisei tûr a awm lo tihna a ni em? Ni kher lo ve. Eng nge tih theih awm? Tih loh tûrte chu i lo ngaihtuah phawt ang u. Mihring rilru put hmang chu an nu leh pate, an Kristian unaute, a nih loh leh upate hnên aṭanga an thil sual tih zêp hi a ni a. Mahse, Bible chuan: “Bawhchhiatna zêptute chu an hmuingîl lo vang a, zêp lova inpuanga hawisantute chuan zahngaihna an hmu ang,” tiin min hrilh a ni. (Thuf. 28:13) Pathian lakah engmah thup theih a nih loh avângin, thil sual tih zêp tumtute chuan nasa takin thil an tisual a ni. (Hebrai 4:13 chhiar rawh.) Ṭhenkhat phei chuan thil sual an tih reng laiin Jehova rawng chu a derin an bâwl a, kawng chi hnihin an nung a ni. Chutiang nunah chuan dikna a tel lo—chu chu dikna ep chiah zâwk chu a ni. Jehova chuan sual pawi tak thuptute chibai bûkna chu a lâwm lo. Chutiang vervêkna chuan amah a tithinur zâwk mah a ni.—Thuf. 21:27; Is. 1:11-16.
17 Kristianin thil sual pawi tak a tih hunah, a zui tûr kawng dik chu a chiang hle. Chu chu Kristian upate hnêna ṭanpuina dîl hun a ni a. Jehova chuan thlarau lama dam lo zualte ṭanpui thei tûrin upate chu a ruat a ni. (Jakoba 5:14 chhiar rawh.) Zilh leh siam ṭhat hlauhna chuan thlarau lama hrisêlna i ûmna chu dang ngai che suh se. Dik takin, mi fing chuan damdawi chiu emaw, inzai emaw avânga rei lo te chhûng na tawrh a hlauh avângin, nunna atâna hlauhawm natna chu a inenkawl lo vang em ni?—Heb. 12:11.
18, 19. (a) Engtin nge Davida entîrna chuan dikna kan nei lêt leh thei tih a târ lan? (b) Nangma dikna chungchânga i tum tlat tûr chu eng nge ni?
18 Ngaiawh leh thlap a beisei awm em? Dikna chu hloh a nih chuan neihkîr leh theih a ni em? Davida entîrna hi ngaihtuah leh rawh. Ani chuan thil sual pawi tak a ti a. Mi dang nupui chu ît takin a thlîr a, a uirê a; tin, a uirêna nu pasal pawi khawih lo chu a thih theih nân ruahmanna a siam a ni. Chutih lai chuan Davida chu dikna vawngtu anga hriat a harsa a ni lâwm ni? Mahse, a dinhmun chu beisei bo a ni em? Davida chuan zilhna khauh tak a mamawh a, a dawng bawk a ni. Tichuan, a inlamlêt tak zet avângin Pathian Jehova’n a chungah zahngaihna a lantîr a. Davida chu zilhna a tawh aṭanga inzirin, eng ang dinhmun hnuaiah pawh Pathian thuâwihin a dikna chu a nei lêt leh a ni. Davida nun chuan Thufingte 24:16-a thu: “Mi fel chu vawi sarih tlu mah sela, a tho leh zêl ṭhîn,” tih chu a takin a rawn târ lang a ni. Eng nge a rah chhuah? Jehova’n Solomona hnênah Davida thih hnuin a chungchâng a sawi chu han ngaihtuah teh. (1 Lalte 9:4 chhiar rawh.) Pathian chuan Davida chu dikna vawng tlattu angin a hre reng a. Jehova chuan tih tak zeta inlamlêtte chu sual pawi tak lak ata pawh a thianfai thei tak zet a ni.—Is. 1:18.
19 Ni e, hmangaihna avânga Pathian thuâwihna lantîrin dikna vawngtu i ni thei a. Rinawm takin chhel rawh, sual pawi tak i tipalh a nih chuan, tih tak zeta inlemlêtna lantîr rawh. Dikna chu a va hlu tak êm! “Kei zawng rilru ṭha [“dik,” NW] puin ka awm ang,” tih Davida thiltum chu i ṭâwmpui ṭheuh vang u.—Sâm 26:11. (w08 12/15)
[Footnote]
Engtin Nge Kan Chhân Ang?
• Engtin nge dikna vawngtu i nih theih?
• Eng kawngtein nge dikna i vawn theih?
• Engtin nge dikna chu neih lêt leh theih a nih?
[Zirlai Atâna Zawhnate]
[Phêk 16-naa bâwm]
“Thiltih Mawi Leh Ṭha A Ni”
Hêng thute hi, nau thla nga mi pai nu pakhatin hmêl hriat loh nula pakhat ngilneihna leh dikna chungchâng a sawina a ni. Chu nu chuan coffee dâwr a chhuahsan hnu dârkâr engemaw zâtah, a pawisa ip a theihnghilh tih a inhre chhuak a. Chu pawisa ipah chuan $2,000 lai a awm a, chu chu ni danga a ken ṭhin aiin a tam fê a ni. A hnua tualchhûng chanchinbu mi pakhat a kawmnaah: “Ka lung a chhe ngawt mai,” tiin a sawi. Amaherawhchu, nula pakhat chuan chu pawisa ip chu a lo chhar a, a neitu pe lêt tûr chuan a zawng nghâl a. A hlawhtlin loh avângin, police station-ah a keng a, a tâwpah police chuan chu naupai nu chu an zawng hmu ta a ni. Pawisa ip neitu nu chu a lâwm êm avângin: “Hei zet hi zawng thiltih mawi leh ṭha a ni tak meuh meuh a ni,” tiin a sawi. Engvângin nge chu nula chuan pawisa pe kîr leh tûra chutiang khawpa ṭan a lâk? Chanchinbu chuan Jehova Thuhretute zînga mi a nih angin, nula chuan “chutianga dikna a vawn chhan chu a lo seilenna sakhua vâng niin a sawi,” a ti.