Isua—A Chanchin Mite Sawi Dân
Isua—A Chanchin Mite Sawi Dân
“Nazaret Isua . . . chu mihring chanchina mi langsâr ber a ni tih rinhlelh rual a ni lo.”—H. G. Wells, Sâp mi thilthleng chanchin ziaktu.
“Krista chu . . . mihring chanchina pasalṭha zawng zawng zîngah a lawr lak a ni.”—Philip Schaff, Switzerland rama piang theologian leh thilthleng chanchin ziaktu.
NUNG dam tawh phawt zînga mi ropui ber tia koh ni tûrin tunge tling? Mihring ropuina hi eng anga teh tûr nge ni? A ral do thiamna hmanga teh tûr nge ni a, a chakna hmangin? A rilru lam chakna hmangin em ni zâwk? A nih loh leh, a thusawi leh thiltihin mite a nghawng dân leh an tâna a entawn tûr siam hmanga teh tûr a ni em?
Hmân lai chanchin ziak mi te, scientis te, scholar te, lehkha ziaktu te, politic hruaitu te, leh mi dang—tûn hma leh tûn laia mi—te’n Nazaret Isua Krista chanchin an sawi dân hi lo chhinchhiah ang che.
“He kum sângbi hnih mai ni lo, mihring chanchin zawng zawnga mi ropui ber chu Nazaret Isua a ni lo tih finfiah tûr chuan, thil nih phung dik takte nasa taka i herh danglam a ngai ngei ang.”—Reynolds Price, America mi ziaktu leh Bible lama mi thiam.
“Mi pakhat pawisawi miah lo chu a hmêlmate pawh tiamin, mi dangte ṭhatna tûrin a inpe a, khawvêl tlantu a lo ni. Chu chu thiltih ṭha famkim a ni.”—Mohandas K. Gandhi, India ram politics leh thlarau lama hruaitu.
“Naupang ka nih laiin, Bible leh Talmud aṭangin zirtîrna ka dawng a. Juda mi ni mah i la, Nazaret mi lâr tak chuan ka rilru a hneh hle a ni.—Albert Einstein, German rama piang scientist.
“Ka tân chuan Isua Krista chu Pathian Fapa leh Mihring Fapa angin, engtik lai pawha, mihring chanchin zawng zawnga mi lângsâr ber a ni. A thusawi emaw, a thiltih emaw engkim mai chuan tûn laiah kan tân hlutna a nei a, chutiang ṭawngkam chu mi nung emaw, mitthi emaw tân pawh ni se, mi dang rêng rêng tân hman theih a ni lo.”—Sholem Asch, Poland rama piang thuziaktu thusawi Christian Herald chanchinbua chuang; hawrawp âwnte chu anmahni tihâwn a ni.
“Ka nuna kum sawmthum panga chhûng chu . . . engmah ka ring lo va. Kum nga kal ta khân Isua ka ring ta a. Isua Krista zirtîrna chu ka ringin, ka nun pum chu a inthlâkthleng thut a ni.”—Count Leo Tolstoy, Russian mi thawnthu ziaktu leh mi fing.
“[Isua] aia mi nun khawih thei zâwk mi dang tumah an awm lo va, mite nun chu a la khawih chho zêl a ni.”—Kenneth Scott Latourette, America mi thilthleng chanchin ziaktu leh ziakmi.
“Isua nun chanchin hi phuahchawp thil maiah kan chan dâwn em ni? Ṭhiante u, phuahchawp mai zawng a ang lo. Chutih ahnêkin, tumahin rinhleh tûr pawha an ngaih loh Socrates-a chuan Isua Krista ai pawhin finfiahna a tlachham zâwk a ni.”—Jean-Jacques Rousseau, French mi fing.
Kan nuna kan entawn phu tuemaw a awm a nih ngai chuan, chu chu Isua Krista a ni tih a chiang hle. Isua’n A hnungzuitu tûr leh hnamte hnêna A chanchin sawi tûra a thlan, kum zabi khatnaa lehkha thiam Paula chuan Isua chu ‘en tlat’ tûrin min fuih a. (Hebrai 12:1, 2; Tirhkohte 9:3) Isua’n kan nun dân tûr chungchângah eng nge min zirtîr theih? Engtin nge a nun chu i hlâwkpui theih? (w08 12/1)