Isua—Kan Entawn Tûr Ṭha Famkim

MI ṬHA zâwk leh hlim zâwk nih i duh em? Tirhkoh Petera chuan kan nih theih dân tûr min hrilh a ni. Ani chuan: “Krista pawh khân a tuarsak che u . . . a hniaka in zuina tûrin entawn tûr a hnutchhiah che u kha,” tiin a ziak a. (1 Petera 2:21) Isua Krista chuan kan zir theih tûr thil tam tak a ti a ni. Isua chanchin zir leh a nun dân chu zuiin, mi ṭha zâwk leh hlim zâwk kan ni thei ngei ang. He mi ropuiin a neih mize ṭhenkhat chu lo bih chiangin, a entîrna siam kan hlâwkpui theih dân ilo en ang u.

Isua chu a inbûk tâwk. Isua’n ‘lu nghahna a neih loh’ thu sawi mah se, sakhuana avângin a intihrehawm lo va, chutianga nun chu a sawi mawi bawk hek lo. (Matthaia 8:20) Ruai ṭhehnaah a tel a. (Luka 5:29) A thil mak tih chhinchhiahte zînga hmasa ber​—⁠mo lawmnaa ruai ṭhehnaah tui chu uain ṭha taka a chantîrna​—⁠chuan vântlâng hmakhaw ngai lo emaw, sakhuana avânga intihhrehawm chîng emaw a nih lohzia a târ lang a ni. (Johana 2:​1-11) Mahse, Isua chuan atâna thil pawimawh ber chu a tichiang hle a ni: “Mitîrtu duhzâwng tih leh, a hna thawh zawh tûr hi ka chaw a ni,” tiin.​—⁠Johana 4:⁠34.

❑ Sum leh pai leh thlarau lam thil i ûmna i inbûk tâwktîr theih dân hre tûrin, i nun chu i bih chiang tawh em?

Isua chu mi pan nuam tak a ni. Bible chuan Isua chu nêlawm tak leh kawm nuam tak niin a sawi a. Mite’n buainate emaw, zawhna khirh takte emaw nêna an rawn pan hian a lungni lo mai lo. Ṭum khat chu mipuiin an hual laiin, kum 12 chhûng hrehawm tuar hmeichhe pakhat chuan tihdama a awm beiseiin a puan a va dek a. Isua chuan mi ṭhenkhat ngaiha thiltih âwm lo tak nia lang chu a thiltih avângin, chu nu chu a hnâwl mai lo, a hnênah chuan: “Ka fanu, i rinna hi i dampui a ni e,” tiin zahngai takin a hrilh zâwk a ni. (Marka 5:​25-34) Naupangte pawhin ngaihthah nih hlauhna rêng nei lovin, a bula awm chu nuam an ti hle. (Marka 10:​13-16) A zirtîrte chu inhawng tak leh nêlawm takin a titipui ṭhîn a. Anni chuan Isua pan chu an hreh lo.​—⁠Marka 6:​30-32.

❑ Mi dangin pan nuam an ti che em?

Ani chu mi lainat thei leh khawngaih thei tak a ni. Isua mize ṭha tak zînga pakhat chu, mi dangte dinhmuna awm anga mahni a inchan theihna, mi dangte rilru veizâwng tûr hriatthiamsakna, leh thiltih ṭangkai tak hmanga anmahni a ṭanpuina hi a ni. Tirhkoh Johana chuan a nuṭapa Lazara thih avânga ṭap Mari a hmuh laia Isua awm dân chu heti hian a sawi a ni: “[Isua] a rilruin a rûm a, a lungngai a . . . a ṭap ta a,” tiin. A lo thlîrtute chuan Isua’n chu chhûngkua a hmangaihzia chu awlsam takin an hre thei a, a hmangaihna mi dangte hmuha tihlan chu a zahpui lo a ni. Tin, a ṭhianpa a kaihthawh khân, khawngaihna a va lantîr tak êm!​—⁠Johana 11:​33-44.

 Ṭum dangah chuan natna tenawm tak a vei avânga inkulh hran ngai phâr pakhat chuan Isua hnênah: “Lalpa, i duh chuan mi tithianghlim thei e,” tiin a ngên a. Isua’n: “A han ban a, a dek a, ‘Ka duh e, lo thianghlim tawh ang che,’” tia a chhân lêt dân chu a thlamuanthlâk tak zet a ni. (Matthaia 8:​2, 3) Isua chuan hrilh lâwkna thlen famkim nân mite a tidam satliah mai a ni lo va. An mittuite hrûk hulsak a duh a ni. A thiltih apiang chu, a thusawi hriat hlawh takte zînga mi: “Miin in chunga an tiha in duh tûr ang zêlin mi chungah pawh ti ve rawh u,” tih chuan a kaihruai a ni.​—⁠Luka 6:⁠31.

❑ Mi dangte i khawngaihna chu i thiltihah a lang em?

Isua chu mi hre thiam tak a ni. Isua chuan thil sual ti ngai lo mah se, mi dangte chu ṭha famkim tûrin a beisei emaw, mi dangte aia ṭha zâwka inlantîr tûr emawin thil a ti ngai lo va; tin, dinhmun zawng zawng hre thiam vek lovin thil a ti ngai hek lo. Ṭum khat chu, “chu mi khuaa hmeichhe sual” tia hriat pakhat chuan a rinna lantîrin, Isua ke chu a mittuiin a far huh a. Isua’n chutianga a tih a phal avângin, a thlengtu chuan mak a ti hle a, a thinlungah chu nu chu a dem a. A thil sual tih a inchhîr tak zetzia a hriat avângin, Isua erawh chuan a dem lo. “I rinna hi chhandam i nih phah a ni, thlamuang takin kal rawh,” a ti zâwk mah a ni. Isua chhân lêt dân avângin, chu nu chuan a nun hlui a bânsan ang tih a rinawm hle.​—⁠Luka 7:​37-50.

❑ Mi dangte fak ngâl ṭhîn a, sawichhe nghâl ṭhîn lo mi i ni em?

Thlei bîk nei lo leh mite zah thiam tak a ni. Isua chuan zirtîr Johana chu a ngaina bîk a, chu chu mize inmil leh inchhûngkhat an nih vâng pawh a ni thei ang. * Mahse, ani chu zirtîr dangte aiin a duhsak bîk chuang lo. (Johana 13:23) Dik tak chuan, Johana leh a unaupa Jakoba’n Pathian Rama dinhmun ṭha ber chan an dîl khân, Isua chuan: “Ka ding lamah emaw, ka vei lamah emawa ṭhut tûr thu chu keia pêk tûr a ni lo,” tiin a chhâng a ni.​—⁠Marka 10:​35-40.

Isua chuan eng lai pawhin mi dangte a zah thiam a. A hun laia mite inpâwng huatna chu a ṭâwmpui ve lo. Entîr nân, hmeichhiate chu a tlângpui thuin mipa aia hnuaihnung zâwka ngaih an ni a. Mahse, Isua chuan hmeichhiate hnênah an phu ang zahna a lantîr a ni. Messia a nih thu tlang taka a insawi chhuahna hmasa ber  chu Juda mi ni lo, Juda mite’n chibai an bûk chu sawi loh an hmuhsit êm êm Samari mi hmeichhia pakhat a ni a. (Johana 4:​7-26) Tin, Isua’n a thawhleh thu chu hmeichhiate hnênah a hriattîr hmasa ber bawk a ni.​—⁠Matthaia 28:​9, 10.

❑ Hnam dang mi, a hmei a pa, ṭawng dang hmangte, a nih loh leh ram dang mite nêna in indâwrnaah duhsak bîk i nei lo vem?

Fapa leh unaupa a nih angin a tih tûr a hlen. Isua fa anga pawmtu Josefa chuan Isua tleirâwl laiin a thihsan niin a lang a. Isua chuan a nu leh a naute chu thingrem siama a châwm a rinawm hle a. (Marka 6:⁠3) A thih dâwn ṭêp khân, a zirtîr Johana hnênah a nu enkawl tûrin mawhphurhna a pe a ni.​—⁠Johana 19:​26, 27.

❑ Isua anga chhûngkaw mawhphurhnate hlenin, amah chu i entawn thei em?

Isua chu ṭhian dik tak a ni. Ṭhian a nihnaah Isua chu a langsâr hle. Engtin nge? Ani chuan a ṭhiante chu thil an tihsual avângin a hnâwl mai lo va, thil pakhat an tihsual nawn ṭhin pawhin a hnâwl hek lo. Isua’n a zirtîrte tih atâna a duhte chu anni chuan an ti ṭhîn hek lo. Mahse, anni chu rilru ṭha lo va puh ai chuan, an ṭhatna laite chu en zâwkin an ṭhian a nihzia a târ lang a. (Marka 9:​33-35; Luka 22:​24-27) A ngaih dân pawm tûra anmahni a tihluih loh rual rualin, an ngaih dân zêp nei lova sawi chhuak tûrin a sâwm zâwk a ni.​—⁠Matthaia 16:​13-15.

A pawimawh ber chu, Isua’n a ṭhiante a hmangaih hi a ni a. (Johana 13:⁠1) Engtiang khawpin nge a hmangaih? Ani chuan: “Mihringin a ṭhian aia a nun a paih aliama hmangaihna nasa zâwk tuman an nei lo,” a ti. (Johana 15:13) Miin a ṭhiante tân a nunna aia hlu zâwk pêk theih a nei em?

❑ Mi dangte’n an tihlâwm loh che a, an tihthinur hunah che pawh an ṭhian i la ni zêl em?

Ani chu a huaisenin, a danglam bîk hle. Isua chu lemziaktu ṭhenkhatin chak lo leh dawldâng taka an ziah chhuah nên chuan a inang lo hle a. Chanchin Ṭha ziaktute chuan mi chak tak leh thahrui ngah tak angin an sawi zâwk mah a ni. Isua chuan sumdâwngtute chu biak in aṭangin an thil zawrhte nên lam vawi hnih lai a hnawt chhuak a. (Marka 11:​15-17; Johana 2:​14-17) Mipui pungkhâwmin “Nazaret Isua” man an tum khân, ani chuan amah an hriat hran theih nân leh a zirtîrte vênhim nân huaisen taka pên chhuakin: “Keimah hi ka ni . . . kei mi zawng in nih chuan hêngho hi thlah ṭha rawh u,” tiin a sawi a ni. (Johana 18:​4-9) Pilata’n man leh sawisakna kâra Isua huaisenna a hmuh khân, Isua chu mi huaisen tak leh danglam bîk tak a ni tih a pawm pawh hi thilmak a ni hran lo.​—⁠Johana 19:​4, 5.

❑ I tih ngei tûr thil i hriat hunah huaisen tak leh i-hê lovin i ti vat em?

Hêngte leh a mize dang langsâr takte hian Isua chu kan entawn tûr ṭha famkim a nihtîr a. A nungchang kan inthununtîr chuan, mi ṭha zâwk leh hlim zâwk kan ni ang. Hei vâng hian a ni, tirhkoh Petera’n Kristiante chu Isua hniak hnung zui tlat tûra a fuih chhan chu. Isua hniak hnung chu i theih ang tâwka zui tlat i tum em?

Entawn Tûr Satliah Mai A Ni Lo

Isua chu entawn tûr satliah mai a ni lo va. Ani chuan: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” a ti a. (Johana 14:⁠6) Pathian chungchânga thutak hriattîra Amah hnaih theihna kawng a hawn mai bâkah, Isua chuan mi rinawmte tân nunna chu neih theihin a siam a ni.​—⁠Johana 3:⁠16.

 Leia a lo kal chhante zînga he mi chungchângah, Isua chuan: “Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zâwka a lo kal ang khân,” tiin a sawi a. (Matthaia 20:28) Isua chuan a nun chu inthawi nâna hlânin, mihringte’n chatuana nunna an neih theih nân lungphûm a phûm a. Chu mi hlâwkpui thei tûrin a mi malin eng nge kan tih ang? Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a hrilhfiah a ni.​—⁠Johana 17:⁠3.

Ni e, Isua hriatna neih a, a nun kawng entawn a, inthawina atâna a thihna rin chu chatuana nunna neih nân a ṭûl a ni. Chu hriatna lo chhuahna Bible chu hun pea zir tûr leh, Isua ang bawka Bible thusawite nunpui tum tûrin kan sâwm a che. *

Isua nun entawn tlâk tak chuan kan neih tûr miziate min zirtîr a. Inthawina atâna a thihna chuan sual leh chu mi rah chhuah, thihna ata chu min tizalên thei a ni. (Rom 6:23) Isua Krista kaihhruaina thiltithei tak tel lo chuan, kan nun chu a va lungchhiatthlâk dâwn êm! Nuna rilru luahkhattu thilte leh lungkhamnate chuan nung dam tawh zawng zawng zînga mi ropui ber​—⁠Isua Krista​—⁠entîrna kan ngaihtuahna tûr leh zui theihna hun remchâng i neih a rûk bo chu phal ngai suh ang che. (w08 12/1)

[Footnote-te]

[Phêk 7-naa bâwm/milemte]

▪ Isua chuan duhsak bîk a nei lo va, mi zawng zawng a zah thiam

▪ A tâwp thleng pawhin ṭhian dik tak a ni

▪ A huaisen hle

Isua hniak hnung chu i theih ang tâwka hnaiin zui tlat i tum em?

[Phêk 5-naa milemte]

Isua chu inbûk tâwk tak . . .

mi pan nuam tak . . .

mi khawngaih thei tak a ni