Jehova Thu Chu A Nung

Johana leh Juda Lehkha Thawnte Aṭanga Thu Pawimawh Hrilhfiahna

THAWK khum Pathian Lehkha Thute zînga ziak hnuhnûn ber tirhkoh Johana lehkha thawn pathumte hi C.E. 98-a Ephesi khua aṭanga a ziah niin a lang a. Lehkha thawn hmasa pahnih hian Kristiante chu ênga awm reng tûrin leh kalpêngte dodâl tûrin a fuih a ni. Lehkha thawn a pathumnaah, Johana chuan thutaka awm chungchâng a sawi mai ni lovin, Kristian thawhhona awm tûr pawhin a fuih tel bawk a ni.

Isua unaupa Juda chuan C.E. 65 vêla Palestina ram aṭanga a ziah ni âwm tak a lehkha thawnah chuan a Kristian unaute chu kohhran chhûnga lo lût mi suaksualte chungchângah a vaukhân a; tin, thununna ṭha lo do dân chungchângah thurâwn a pe bawk a ni. Johana lehkha thawn pathumte leh Juda lehkha thawna thu awmte ngaihsakna chuan harsatna hnuaia rinna chak tak nei reng tûrin min ṭanpui thei a ni.​—⁠Heb. 4:⁠12.

ÊNGAH LEH HMANGAIHNAAH LEH RINNAAH AWM RENG RAWH

(1 Joh. 1:1–5:⁠21)

Kristaa awm unauho zawng zawng tân Johana lehkha thawn pakhatna chuan Kristiante chu kalpêngte do tûr leh thutak leh felna atâna ding nghet tûra ṭanpui tûr zilhna thu ṭha tak a pe a. Ani chuan êngah leh hmangaihnaah leh rinnaa awm reng a ṭûlzia a sawi uar a ni.

Johana chuan: “Amah [Pathian] chu êngah a awm angin keini pawh ênga awm kan nih chuan kan in pâwl tlâng a,” tiin a ziak a. Pathian chu hmangaihna lo Chhuahna Hnâr a nih avângin, tirhkoh chuan: “I inhmangaih tawn ṭheuh ang u,” a ti. “Pathian kan hmangaihna” chuan ‘a thupêkte zâwm’ tûra min chêttîr laiin, khawvêl kan ngamna chu Pathian Jehova, a Thu, leh a Fapa “kan rinna hi” a ni.​—⁠1 Joh. 1:7; 4:7; 5:​3, 4.

Bible Chungchânga Zawhnate Chhânna:

2:2; 4:10​—⁠Engtin nge Isua inthawina chu kan sualte “thupha chawina” a nih? Thupha chawi tih awmizia chu “ngaihdam dîl,” a nih loh leh “tilungawi” tihna a ni a. Isua’n kan sualte tâna thupha chawi nâna a nun a hman dân chu, a inthawina kal tlanga rorêl dikna ṭha famkim tihlungawina hmangin a ni. Chu inthawina ṭanchhanin, Pathian chuan zahngaihna a lantîr thei a, Isua ringtute sualna chu a ngaidam thei a ni.​—⁠Joh. 3:16; Rom 6:⁠23.

2:​7, 8​—⁠Johana chuan eng thupêk “hlui” leh “thar” chungchâng nge a sawi? Johana sawi chu mahni inpêkna tel unaute hmangaihna chungchâng a ni a. (Joh. 13:34) Thupêk “hlui” anga a sawi chhan chu Johana’n thâwk khum lehkha thawn a ziah hma kum 60 aia tamah Isua’n chu thupêk a lo pêk tawh vâng a ni a. Chuvângin, ringtute chuan chu thupêk chu Kristian an nih hun “atîr ata” an nei tawh a ni. Miin ‘amah a inhmangaih ang a, a ṭhenawm a hmangaihna’ bâka hmangaihna leh mahni inpêkna tel hmangaihna neih a  ṭûl avângin chu thupêk chu thupêk “thar” a ni bawk a ni.​—⁠Lev. 19:18; Joh. 15:​12, 13.

3:2​—⁠Hriak thih Kristiante hnêna “la lang rih lo” chu eng nge ni a, tunge “a awm pângngai ang takin” an hmuh ang? An hnêna la lang rih lo chu thlarau taksa neia vâna kaih thawh an nih huna an awm dân tûr hi a ni a. (Phil. 3:​20, 21) Amaherawhchu, an hriat chian chu “[Pathian] a lo inlâr chuan amah angin [an] awm dâwn . . . amah chu a awm pângngai ang takin [an] hmu dâwn” tih hi a ni a, chu chu ‘thlarauvin’ tihna a ni.​—⁠2 Kor. 3:​17, 18.

5:​5-8​—⁠Engtin nge tui, thisen, leh thlarau chuan “Isua hi Pathian Fapa a ni tih” hriattîr? Isua’n tuia baptisma a chan avângin tui hi hriattîrtu pakhat a ni a, chu mi ṭumah Jehova ngei chuan Isua chu A Fapa anga a pawmzia a sawi chhuak a ni. (Mt. 3:17) Isua thisen, a nih loh leh a nunna chu “mi zawng zawng tlan nâna” pêk a ni a, chu chuan Isua chu Pathian Fapa a nihiza a târ lang bawk. (1 Tim. 2:​5, 6) Tin, Isua’n baptisma a chan a, thlarau thianghlim a chunga lo chhuk chuan Pathian Fapa a nihzia a a hriattîr bawk a, chu thlarau thianghlim chuan ‘mi chunga tiṭha leh diabola tihduhdah zawng zawng tidamin ram a fan vêltîr’ thei a ni.​—⁠Joh. 1:​29-34; Tirh 10:⁠38.

Kan Zir Tûrte:

2:​9-11; 3:15. Kristian chuan thil engpawh emaw, tupawh emaw chu unaute a hmangaihna a tihchhiattîr chuan, thlarau lam thimah a awm a, a kalna pawh a hre lo a ni.

‘THUTAKAH AWM’ RENG RAWH

(2 Joh. 1–13)

Johana chuan a lehkha thawn pahnihna chu: “Upa chuan, hmeichhe ṭha thlan leh a fate hnênah,” tiin a ziak ṭan a. Ani chuan hmeichhe ṭha thlan ‘fa, tute emaw thutaka an awm’ a hmuh avânga a lâwmna chu a târ lang a ni.​—⁠2 Joh. 1, 2, 4.

Hmangaihna nei tûra a fuih hnuah, Johana chuan: “Hei hi hmangaihna a ni, ama thupêk ang zêla kan awm hi,” tiin a ziak a. “Bumtu leh Krista dodâltu” chungchângah a vaukhân bawk a ni.​—⁠Joh. 5-7.

Bible Chungchânga Zawhna Chhânna:

1, 2, 13​—⁠Tunge “hmechhe ṭha thlan” chu? Johana chuan Grik thu mala “hmeichhia” sawina Kyria tih hmangin hmeichhe tuemaw tak a sawina a ni thei a. A nih loh leh, tiduhdahtute’n an hriatthiam loh nân kohhran pakhat sawi nân a hmang pawh a ni thei ang. Hei hi thil nih dân a nih chuan, hmeichhe fate tih chu, chu mi kohhrana mite sawina a ni ang a, ‘laizâwnnu thlana fate’ tih chu kohran danga mite sawina a ni thei ang.

Kan Zir Tûrte:

1, 2, 4. “Thutak”​—⁠Bible-a tel Kristian zirtîrna zawng zawng​—⁠kan hriat leh a thute vawn tlat chu chhandamna atân a pawimawh a ni.​—⁠3 Joh. 3, 4.

8-11. “Pa, Pathian leh Pa Fapa Isua Krista hnên ata khawngaihna te, zahngaihna te, remna te” ruala kan unaute nêna inkawmna nuam tak kan chân duh loh chuan, thlarau lamah kan “invêng ṭha” tûr a ni a, “Krista zirtîrna thua awm reng lova” chu kan hnâwl tûr a ni.​—⁠2 Joh. 3.

“THUTAK THAWHPUITUTE” NI RAWH U

(3 Joh. 1–14)

Johana lehkha thawn pathumna chu a ṭhian Gaia hnêna a thawn a ni a. Ani chuan: “Ka fate thutakah an awm tih ka hriat aliama lâwmna nasa zâwk rêng ka nei lo ve,” tiin a ziak a ni.​—⁠3 Joh. 4.

Gaia chuan unau mikhualte ṭanpuina kawnga ‘rinawm taka a tih’ avângin Johana fak a hlawh a. Tirhkoh chuan: “Thutak thawhpuitute kan nih theih nân chutiang mi chu keinin kan lâwm tûr a ni,” a ti.​—⁠3 Joh. 5-8.

Bible Chungchânga Zawhnate Chhânna:

11​—⁠Engvângin nge mi ṭhenkhatin thil sual an tih? Thlarau lama an chak loh avângin, ṭhenkhat chuan Pathian chu hriatthiamna mitin an hmu lo. Ani chu an mit tak taka  an hmuh theih loh avângin, Pathianin anmahni pawh hmu thei lo ang hrimin thil an ti a ni.​—⁠Ezek. 9:⁠9.

14​—⁠Tute nge ‘ṭhiante’ tia a sawi chu? Heta ‘ṭhiante’ tih hian ṭhian hnai inkawmngeihna aia tam a kâwk a. Johana chuan a Kristian unau zawng zawngte a sawina a ni.

Kan Zir Tûrte:

4. Kohhrana thlarau lama puitlingte chu naupang zâwkte ‘thutaka an awm’ an hmuh hian an lâwm hle a. Tin, nu leh pate pawhin an fate chu Jehova chhiahhlawh ni tûra an ṭanpuina a hlawhtlin hian an va hlim tak êm!

5-8. Unaute leh Pathian Jehova an hmangaih avânga an unaute tâna thawk rimte zîngah chuan bial kantute, missionary-te, Bethel in emaw, branch office emawa rawngbâwlte, leh pioneer thawkte an tel a. An rinna chu a entawn tlâkin, hmangaih taka kan ṭanpui an phu a ni.

9-12. Sawichhetu, Diotrepha, mi kamtam chu entawn lovin, mi rinawm Demetria chu kan entawn tûr a ni.

“PATHIAN HMANGAIHNAAH CHUAN INVAWNG ṬHA RAWH”

(Jud. 1–25)

Juda chuan kohhran chhûnga a rûka lo lût “phunnawitu leh sawisêltute” chungchâng a sawi a, anni chu “anmahni châkna ang zêlin an awm” a ni. Anni chuan “uan thu pâwr tak [an] sawi a, hlâwkna duh vângin mi an ngaina ṭhîn a ni.”​—⁠Jud. 4, 16.

Engtin nge Kristiante chuan thununna ṭha lo chu an do theih? Juda chuan: “Duh takte u, nangni zawngin kan Lalpa Isua Krista tirhkohten thu an hrilh lâwkte kha hre reng rawh u,” tiin a ziak a. “Pathian hmangaihnaah chuan invawng ṭha rawh u,” tiin a sawi belh a ni.​—⁠Jud. 17-21.

Bible Chungchânga Zawhnate Chhânna:

3, 4​—⁠Engvângin nge Juda chuan Kristiante chu ‘rinna atâna ṭhahnemngai taka bei’ tûra a fuih? Kohhran chhûngah ‘Pathian ngaihsak lo mi arûka lût an awm’ vâng a ni. Hêng mite hian “Pathian khawngaihna chu hurnaah an chantîr” a ni.

20, 21​—⁠Engtin nge ‘Pathian hmangaihnaah chuan kan invawn ṭhat’ theih? Kawng thumin kan invawng ṭha thei a ni: (1) Pathian Thu taima taka zirna leh thu hrilhnaa ṭhahnemngai taka telna hmanga rinna, a nih loh leh “rin chhan thianghlim ber” chunga inrem chhohvin; (2) thlarau thianghlimah, a nih loh leh a thununna nêna inmila ṭawngṭaiin; leh (3) chatuan nunna awmtîr theitu Isua Krista tlanna inthawina ringin.​—⁠Joh. 3:​16, 36.

Kan Zir Tûrte:

5-7. Mi suaksualte chuan Jehova rorêlna an pumpelh thei ang em? Juda târ chhuah vaukhânna entîrna pathum aṭanga a lan dân chuan, chu chu thil theih a ni lo.

8-10. Mikaela, vântirhkoh chungnung ber chu kan entawnin, Pathianin thuneihna a pêkte chungah zahna kan lantîr tûr a ni.

12. Lawng emaw, tuihleuhtute emaw tâna lungpui tuiin a chîm vek a hlauhawm ang bawkin, kalpêngte hmangaihna der chu kan rinna atân a hlauhawm a ni. Zirtîrtu derte chu thilphal tak angin lang mah se, anni chu thlarau lama ruak, chhûm tui pai lo ang an ni a. Chûng mite chu favânga thing rah lo ang an ni. A zung chawpa pawhchhuah thing angin tihboral an ni ang. Kalpêngte pumpelh chu a finthlâk a ni.

22, 23. Kristian dikte chuan sual an hua a. “Ṭhenkhat ringhlela awmte” chu chatuana tihboralna mei ata chhan chhuak tûrin, kohhrana mi puitlingte​—⁠a bîk takin hotua ruatte​—⁠chuan anni chu thlarau lamah ṭanpuina an pe a ni. (w08 12/15)

[Phêk 30-naa milemte]

Tui, thlarau, leh thisen chuan “Isua hi Pathian Fapa a ni,” tih a hriattîr