Pathian Thiltuma Isua Chanvo Neih Danglam Bîk Tak Chu Hre Thiamin Ngaihlu Rawh
Pathian Thiltuma Isua Chanvo Neih Danglam Bîk Tak Chu Hre Thiamin Ngaihlu Rawh
“Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo.”—JOH. 14:6.
1, 2. Engvângin nge Pathian thiltuma Isua chanvo neih danglam bîk tak chu kan ngaihven ang?
MIHRING chanchin zawng zawngah, mi tam tak chuan an chhehvêla awm mi dangte laka danglam bîk nih chu an tum a; mahse, tlêm tê chauh an hlawhtling a ni. Chûng zînga tlêm tê chauhvin kawng pawimawh taka danglam bîk niah an inchhâl thei a. Mahse, Pathian Fapa Isua Krista chu kawng tam takin a danglam bîk tlat a ni.
2 Engvângin nge Isua chanvo danglam bîk tak chu kan ngaihven ang? Kan Pa vâna mi, Jehova nêna kan inlaichîna nên a inkûngkaih tlat vâng a ni. Isua chuan: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” a ti. (Joh. 14:6; 17:3) Isua danglam bîkna kawng ṭhenkhat i lo bih chiang ang u. Chutianga bih chianna chuan Pathian thiltuma a chanvo neih hre thiama ngaihlu tûrin min ṭanpui ang.
“Fapa Mal Neih Chhun”
3, 4. (a) Engvângin nge Isua chu Fapa mal neih chhun a nihnaah a danglam bîk kan tih theih? (b) Engtin nge thil siamna kawnga Isua chanvo neih chu a danglam bîk?
3 Isua chu “Pathian Fapa” a ni satliah mai lo. Chu chu Setana’n Isua a thlêm laia a koh dân a ni a. (Mt. 4:3, 6) Isua chu Pathian “Fapa mal neih chhun” tia a nihna ngeia koh a ni. (Joh 3:16, 18) Grik thu mala “mal neih chhun” tih chu “tlukpui nei lo, awmchhun,” “pianpui unau nei lo,” a nih loh leh “danglam bîk” tia lehlin a ni a. Jehova chuan thlarau fa maktaduai tam tak a nei a nih si chuan, eng kawngin nge Isua chu “pianpui unau nei lo” a nih?
4 Isua chu a Pa thil siam bil awmchhun a nih avângin, a danglam bîk a. Fapa piang hmasa ber a ni a; dik takin, “thil siam zawng zawnga piang hmasa ber” a ni. (Kol. 1:15) Tin, “Pathian thil siam bula” a ni bawk. (Thup. 3:14) Thil siamna kawnga Fapa mal neih chhun chanvo neih pawh chu a danglam bîk a. Ani chu Siamtu emaw, Bul Ṭantu emaw a ni lo. Mahse, Jehova chuan thil dang zawng zawngte siam nân a hmang a ni. (Johana 1:3 chhiar rawh.) Tirhkoh Paula chuan: “Keini tân erawh chuan Pathian pakhat chauh (Pa chu) a awm a, ama hnên aṭangin engkim a chhuak a, keini pawh ama tâna awm kan ni; Lalpa pakhat chauh (Isua Krista chu) a awm bawk a, amah avângin engkim a awm a, keini pawh amah avâng bawka awm kan ni,” tiin a ziak a ni.—1 Kor. 8:6.
5. Engtin nge Bible chuan Isua danglam bîkna chu a târ lan?
5 Chu bâkah, kawng dang tam takah pawh Isua chu a danglam bîk a. Bible chuan Pathian thiltuma a chanvo neih târ langtu a nihna emaw, a dinhmun emaw tam tak a sawi a. Tûnah chuan Kristian Grik Pathian Lehkha Thua chuang Isua nihna pangate chu i lo bih chiang ang u.
“Thu”
6. Engvângin nge Isua chu “Thu” tia koh a inhmeh?
6 Johana 1:14 chhiar rawh. Engvângin nge Isua chu “Thu” tia koh a nih? He nihna hian finna nei thil siamte an lo pian aṭanga a hnathawh chu a târ lang a ni. Jehova chuan leia mihringte hnêna thu hriattîr nâna a Fapa a hman ang bawkin, a thlarau fa dangte hnêna thu hriattîr nân leh kaihhruaina pêk nân a hmang bawk a ni. Isua chu “Thu,” a nih loh leh Pathian tâna Thusawitu a nihna chu, Krista’n a thu ngaithlatu Judate hnêna: “Ka thu zirtîr hi ka ta a ni lo va, mi tîrtu ta a ni zâwk. Tupawh ama duhzâwng tih duh chuan, ka thu zirtîr hi Pathian tihchhuah nge keima phuahchawpa ka sawi a hria ang,” a tihah hian a lang a ni. (Joh. 7:16, 17) Isua chuan vân ropuina a chan leh hnuah pawh, “Pathian Thua” a nihna chu a chhawm zui zêl a ni.—Thup. 19:11, 13, 16.
7. Engtin nge Isua’n “Thu” a nihna kawnga a târ lan inngaihtlâwmna chu kan entawn theih?
7 He nihnain a kawh tel hi han ngaihtuah lawk teh. Isua chu Jehova thil siamte zînga fing ber mah ni se, ama finnaah a innghat lo. A Pa hrilh angin thu a sawi zâwk a. Mahni lam ni lovin, Jehova lamah mite ngaihsakna a la reng a ni. (Joh. 12:50) Kan tân entawn tûr ṭha a va ni êm! Keini pawh “thil ṭha chanchin lâwmawm” puang chhuak tûra chanvo hlu tak pêk kan ni a. (Rom 10:15) Inngaihtlâwmna kawnga Isua siam entîrna kan pawmna chuan mahni phuahchawpa thu sawi lo tûrin min chêttîr tûr a ni. Bible-a nun chhanhim thei thuchahte kan sawi chhuah hian, ‘thu ziakte khûm,’ a nih loh leh thuziakte piah lama thiltih chu kan duh lo a ni.—1 Kor. 4:6.
“Amena”
8, 9. (a) “Amen” tih thu mal hi eng tihna nge ni a, eng vângin nge Isua chu “Amena” tia koh a nih? (b) Engtin nge Isua chuan “Amena” a nihna chu a hlen?
8 Thu Puan 3:14 chhiar rawh. Engvângin nge Isua chu “Amena” tia koh a nih? “Amen” tih hi Hebrai thu mal lam dân anga ziak a ni a, a awmzia chu “ni rawh se,” a nih loh leh “ni chiang ngei,” tihna a ni a. “Amen” tih thu mal lâk chhuahna Hebrai thu mal awmzia dik tak chu “rinawm rawh,” a nih loh leh “rin tlâk” tihna a ni. Chu thu mal bawk chu Jehova rinawmna sawi nân pawha hman a ni ṭhîn. (Deut. 7:9; Is. 49:7) Chuti a nih chuan, Isua chu “Amena” tia koh a nih hian eng angin nge a danglam bîk? Korinth thawn hnih 1:19, 20-nain a chhân dân hi lo chhinchhiah ang che: “Pathian Fapa Isua Krista, a thu . . . in zînga kan hrilha kha ‘A ni’ leh ‘A ni lo’ a ni ve ve si lo va, amahah chuan ‘A ni’ tih a awm zâwk a ni. Pathian thutiamte chu engzât pawh ni se, amahah chuan ‘A ni’ tih chu a awm si a; chutichuan amah avâng pawhin ‘Amen’ tih chu a awm a ni, . . . Pathian ropuina tûrin,” tih hi.
9 Isua chu Pathian thutiam zawng zawngte “A ni” nihtîrtu “Amena” chu a ni a. Inthawia a thihna pawh tiamin, leia sawisêl bova a nun dân chuan Pathian Jehova thutiam zawng zawng nemnghetin, a thlen famkimtîr thei a ni. Pathian chhiahhlawhte chuan retheihna te, hrehawm tawrhna te, leh fiahna te hnuaiah chuan Pathian an phatsan ang tih chu Joba lehkhabu-a chhihchhiah Setana puhna a ni a. Chu puhna a dik lohzia chu Isua chuan rinawmna vawngin a finfiah a ni. (Job. 1:6-12; 2:2-7) Pathian thil siam zawng zawng zîngah chuan, Fapa piang hmasa ber chuan chu puhna a dik lohzia finfiahna rin tlâk ber chu a pe thei a. Chu bâkah, Isua chuan lei leh vâna Jehova lalchungnunna dikzia finfiahna ṭha ber pein, thu buai lian zâwkah a Pa chu a thlâwp bawk a ni.
10. Engtin nge “Amena” nihna chanvo danglam bîk tak a chelh laia Isua awm dân chu kan entawn theih?
10 Engtin nge “Amena” nihna chanvo danglam bîk tak a chelh laia Isua awm dân chu kan entawn theih? Jehova laka rinawmna vawngin leh lei leh vâna a lalchungnunna thlâwp tlatin kan entawn thei a ni. Chutianga kan tih chuan, Thufingte 27:11-a chhinchhiah: “Ka fapa, fing la, ka thinlung tilâwm rawh; mi sawi chhetute ka chhân theih nân,” tih ngenna chu ṭha takin kan chhâng lêt a lo ni ang.
“Thuthlung Thar Palai”
11, 12. Engtin nge Palai anga Isua chanvo chu a danglam bîk?
11 1 Timothea 2:5, 6 chhiar rawh. Isua chu “Pathian leh mihring inkâra Palai” a ni a. Ani chu “thuthlung thar palai” a ni. (Heb. 9:15; 12:24) Amaherawhchu, Mosia pawh palai—Dân thuthlung palai—anga sawi a ni bawk. (Gal. 3:19) Chuti chu, engtin nge Palai anga Isua chanvo chu a danglam bîk?
12 “Palai” tia lehlin atîra ziak thu mal chu dân lam panga hman ṭhin thu mal a ni a. Isua chu hnam thar, “Pathian Israelte” hrin chhuahtîrtu thuthlung thar dân Palai (a nih loh leh, ukil anga sawi theih) a ni. (Gal. 6:16) Chu hnam chu thlarauva hriak thih Kristian, vân lam “lal puithiamho,” hmanga din a ni. (1 Pet. 2:9; Ex. 19:6) Mosia palai nihna Dân thuthlung chuan chutiang hnam a hring chhuak thei lo.
13. Palai anga Isua chanvo neihah eng nge tel?
13 Palai anga Isua chanvo neihah chuan eng nge tel? Jehova chuan thuthlung thara hruai luhte tân Isua thisen hlutna chu a hmang a. Chutiang chuan, Jehova’n anni chu mi felah ruatin thiam a chantîr a ni. (Rom 3:24; Heb. 9:15) Tichuan, Pathian chuan anni chu vân lam lal leh puithiamte ni tûrin thuthlung tharah a la lût thei a. An Palai a nih angin, Isua chuan Pathian hmaa dinhmun thianghlim nei reng tûrin anni chu a ṭanpui a ni.—Heb. 2:16.
14. An beiseina chu engpawh ni se, engvângin nge Kristian zawng zawngte chuan Palai anga Isua chanvo chelh chu an ngaihhlut ṭheuh vang?
14 A nih leh, vân lam ni lova leia chatuan nun beiseina neitu thuthlung thara tel lote chuan engtin nge Isua Palai nihna chu an hlâwkpui? Thuthlung tharah chuan tel ve lo mah se, anni chu a hlâwkpuitute an ni a. An sualte ngaihdam an niin, Pathian ṭhian anga mi fela ruat an ni. (Jak. 2:23; 1 Joh. 2:1, 2) Kan beiseina chu vân lam emaw, lei lam emaw pawh ni se, thuthlung thar Palai anga Isua chanvo chelh ngaihhlut chhan tûr ṭha tak kan nei ṭheuh a ni.
“Puithiam Lalber”
15. Engtin nge Puithiam Lalber anga Isua chanvo chelh chu puithiam lalber nihna lo chelh tawh zawng zawngte laka a danglam bîk?
15 Hun kal tawhahte khân, mi tam tak chuan puithiam lalber nihna an lo chelh tawh ṭhîn a; mahse, Puithiam Lal anga Isua chanvo chelh chu a danglam bîk tak zet a ni. Engtin nge? Paula chuan: “Ani chuan chûng Puithiam Lalberte hlan ang chuan ni tin, mahni sual avânga inthawina hlan hmasak zeta, chu mi hnua mite sual avânga hlan a ngai lo ve; chu chu vawikhatah a lo titlingtla ta nghâl si a, mahni a inhlan chawp lai khân. Dân thu chuan mihring chak lohna neite chu puithiam lalberah a ruat ṭhîn a; chhechham thu, Dân thu hnua lo awm erawh chuan Fapa, chatuan atân tihfamkim tawha chu a ruat zâwk a ni,” tiin a hrilhfiah a ni.—Heb. 7:27, 28. *
16. Engvângin nge Isua inthawina chu a danglam bîk tak zet?
16 Isua chu mi ṭha famkim a ni a; thil sual a tih hmaa Adama dinhmun ang chiahah a ding a ni. (1 Kor. 15:45) Chutiang a nih avângin, Isua chu inthawina ṭha famkim—hlan nawn ngai lo inthawina—pe theitu mihring awmchhun a ni. Mosia Dân hnuaiah chuan inthawinate chu nî tina hlan a ni a. Mahse, chûng inthawinate leh puithiam rawngbâwlnate chu Isua hlen chhuah tak tak tûr a hlimthla chauh a ni. (Heb. 8:5; 10:1) Chuvângin, a hlawhtlinna leh a daih reina kawngah Isua Puithiam Lalber nihna chu a danglam bîk a ni.
17. Engvângin nge kan Puithiam Lalber anga Isua chanvo chelh chu kan ngaihhlut ang a, chu chu engtin nge kan lantîr theih?
17 Pathian hmaa dinhmun dik kan neih theih nân Puithiam Lalber anga Isua Krista rawngbâwlna chu kan mamawh a. Kan neih Puithiam Lalber chu a va ropui tak êm! Paula chuan: “Puithiam Lalber kan chak lohnate min hriatpui thei lo nei kan ni si lo; keimahni anga kawng tinrênga thlêmna tâwk tawh, sual erawh chu sual lo, nei kan ni zâwk e,” tiin a ziak a. (Heb. 4:15) Lâwm taka chu mi pawmna chuan ‘mahni tâna nung tawh lo va, kan thih aia thia tâna nung’ tûrin min chêttîr tak zet tûr a ni.—2 Kor. 5:14, 15; Lk. 9:23.
Sawi Lâwk ‘Thlah’ Chu
18. Adama’n thil sual a tih hnu khân, eng hrilh lâwkna nge sawi a nih a, a hnuah chu hrilh lâwkna chungchângah eng nge târ lan a nih?
18 Eden huana mihringte’n an thil neih engkim—Pathian nêna inlaichînna te, chatuan nunna te, hlimna te, leh Paradis te—hloh anga a lan lai khân, Pathian Jehova chuan Chhan Chhuaktu tûr chu a lo sawi lâwk a. Chu chu ‘thlah’ anga târ lan a ni. (Gen. 3:15) A nihna târ lan loh chu Thlah chu hun kal tawh zawng zawga Bible hrilh lâwkna tam takte thupui ber a lo ni a. Ani chu Abrahama te, Isaaka te, leh Jakoba te thlah aṭanga lo lang tûr a ni a. Tin, Lal Davida thlah aṭanga lo lang tûr a ni bawk.—Gen. 21:12; 22:16-18; 28:14; 2 Sam. 7:12-16.
19, 20. (a) Tunge thutiam Thlah chu? (b) Engvângin nge hrilh lâwk thlahah chuan Isua bâkah mi dangte pawh an tel kan tih theih?
19 Tunge chu thutiam Thlah chu? A chhânna chu Galatia 3:16-ah hmuh theih a ni. (Chhiar rawh.) Amaherawhchu, a hnuah tirhkoh Paula chuan bung 3-na vêkah hriak thih Kristiante hnênah chuan: “Krista ta in nih chuanin, Abrahama thlah, thutiam anga roluahtu tûrte in ni,” tiin a hrilh a ni. (Gal. 3:29) Krista chu thutiam Thlah a nih si chuan, engtin nge mi dangte pawh an tel theih?
20 Mi maktaduai tam takte chu Abrahama thlah niin an inchhâl a, ṭhenkhat phei chuan zâwlnei angin thu an sawi hial a ni. Sakhaw ṭhenkhat phei chuan Abrahama thlah nia an zâwlneite inchhâlna chu an ngai pawimawh hle. Mahse, chûng mite zawng zawng chu thutiam Thlah an ni em? Ni lo ve. Thlarau thâwk khuma awm tirhkoh Paula sawi angin, Abrahama thlah zawng zawngte chu thutiam Thlah angin an inchhâl thei lo. Abrahama fapa dangte chu mihringte malsâwm nâna hman an ni lo. Malsâwmna thlah chu Isaaka kal tlang chauhva lo lang tûr a ni. (Heb. 11:18) A tâwpah chuan, mi pakhat chauh, Bible-a Abrahama thlah a nihzia chhinchhiah Isua Krista chauh chu sawi lâwk thlah bulpui ber a lo ni a. * A hnua Abrahama thlah zawmpuitu lo ni tate chu “Krista ta” an nih vânga chutiang chanvo nei chu an ni. Ni e, he hrilh lâwkna thlen famkimna kawnga Isua chanvo chelh chu a danglam bîk tak zet a ni.
21. Isua’n Jehova thiltuma a chanvo chelh danglam bîk takte a hlen chhuah dânah engin nge i rilru la ber?
21 Jehova thiltuma Isua chanvo chelh danglam bîk takte tâwi têa en nawnna aṭang hian eng nge kan zir? A thil siam hun aṭangin, Pathian Fapa mal neih chhun chu a danglam bîkin, tlukpui nei lo a ni tak zet a. Amaherawhchu, Isua lo ni ta he Pathian Fapa danglam bîk tak hian englai pawhin a Pa duhzâwng milin rawng a bâwl a, mahni ropuina tûr a zawng ngai lo. (Joh. 5:41; 8:50) Tûn laia kan tân entawn tûr ṭha langsâr tak a va ni êm! Isua angin, ‘Pathian ropuina tûr hlîra’ thil tih chu i tum tlat ang u.—1 Kor. 10:31. (w08 12/15)
[Footnote-te]
^ par. 15 Bible zirmi mi thiam pakhat sawi dân chuan, “vawikhatah a lo titlingtla” tia lehlin thu hian “Krista a thih ngeina, a thihna a danglam bîkna, a nih loh leh vawikhat chauh a thihna kâwktu” Bible zirtîrna pawimawh tak a târ lang a ni.
^ par. 20 C.E. kum zabi khatnaa Judate chuan Abrahama fa tak tak, a nih loh leh thlah an nih angin duhsak bîk hlawh tûrah inngai mah se, Messia, a nih loh leh Krista anga lo kal tûr mi pakhat chu an beisei a ni.—Joh. 1:25; 7:41, 42; 8:39-41.
Kan Hre Chhuak Em?
• Isua nihna aṭangin a chanvo chelh danglam bîk tak chungchâng eng nge i zir? (Bâwm en rawh.)
• Engtin nge Jehova Fapa danglam bîk tak chu i entawn theih?
[Zirlai Atâna Zawhnate]
[Phêk 19-naa bâwm/milem]
Pathian Thiltuma Isua Chanvo Neih Danglam Bîk Tak Târ Langtu A Nihna Ṭhenkhat
▪ Fapa Mal Neih Chhun. (Joh. 1:3) Isua chu a Pa thil siam bil awmchhun a nih avângin, a danglam bîk a ni.
▪ Thu. (Joh. 1:14) Jehova chuan a Fapa chu thil siam dangte hnêna thu hriattîr nân leh kaihhruaina pêk nân a hmang a ni.
▪ Amena. (Thup. 3:14) Isua inthawina anga a thihna pawh tiamin, leia sawisêl bova a nun dân chuan Pathian Jehova thutiam zawng zawng nemnghetin, a thlen famkimtîr thei a ni.
▪ Thuthlung Thar Palai. (1 Tim. 2:5, 6) Isua chu thlarauva hriak thih Kristian, vân lam “lal puithiamho” hmanga din hnam thar, “Pathian Israelte” hrin chhuahtîrtu thuthlung thar dân Palai a ni.—1 Pet. 2:9; Gal. 6:16.
▪ Puithiam Lalber. (Heb. 7:27, 28) Isua chu hlan nawn ngai lo inthawina ṭha famkim pe theitu mihring awmchhun a ni a. Ani chuan kan sualna leh chu mi rah chhuah thihna ata mi thianfai thei a ni.
▪ Thutiam ‘Thlah’ Chu. (Gen. 3:15) Mi pakhat, Isua Krista chauh chu sawi lâwk thlah bulpui ber a lo ni a. A hnua Abrahama thlah zawmpuitu lo ni tate chu “Krista ta” an ni.—Gal. 3:29.