Jehova Chhiahhlawh A Lawm Em Ema Hi En Teh U!

“Ka chhiahhlawh, . . . ka rilruin a lawm êm êma hi en teh u.”—IS. 42:1.

1. Hriatrêngna a hnaih rualin, Jehova mite chu engti tûra fuih nge an nih bîk a, engvângin nge?

KRISTA thih hriatrengna hman hun a lo hnaih hian, Pathian mite chuan ‘Isua, kan rinna siamtu leh tifamkimtu lam en tlat’ tûra Paula fuihna chu an zâwm tûr a ni. Paula chuan: “In thlarau lamah in inthlahdah a, in lo hah loh nân, anmahni chunga ṭha lo tûrin mi sualte chutianga hnialkalhna tuartu chu ngaihtuah teh u khai,” tiin a sawi belh a ni. (Heb. 12:1-3) Krista inthawinaa a tâwp thlenga rinawmna nun kawng ngaihtuahna chuan, hriak thih Kristiante leh an ṭhian berâm dangte chu Jehova rawng rinawm taka bâwl zawm zêl tûr leh  ‘inthlahdah lo’ tûrin a ṭanpui ang.—Galatia 6:9 nên khaikhin rawh.

2. Pathian Fapa nêna inkûngkaih Isaia hrilh lâwknate aṭangin nge nge kan zir theih?

² Zâwlnei Isaia kal tlangin, Jehova chuan a Fapa nêna inkûngkaih tlat hrilh lâwkna inzawm chu a thâwk khum a. Hêng hrilh lâwknate hian Krista Isua ‘kan rinna siamtu leh tifamkimtu lam chu en tlat’ tûrin min ṭanpui ang. * Chûngte chuan a mizia te, a hrehawm tawrhna te, leh kan Lal leh Chhandamtu anga chawi sân a nihna chanchin chipchiar takte min hrilh a ni. Chûngte chuan tûn kum April 9, Nilaithawhṭanni, ni tlâk hnua neih tûr Hriatrengna kan hriat thiamna chu a belhchhah ngei ang.

Chhiahhlawh Nihna Chu Hriat A Ni Ta

3, 4. (a) Isaia buah, “chhiahhlawh” tih thu mal chu eng atâna hman nge a nih? (b) Engtin nge Bible ngei chuan Isaia bung 42, 49, 50, 52, leh 53-a târ lan Chhiahhlawh nihna chu a târ lan?

³ Isaia bu-ah “chhiahhlawh” tih thu mal chu vawi tam tak a chuang a. A châng chuan, amah Isaia ngei sawi nâna hman a ni a. (Is. 20:3; 44:26) A châng chuan, Israel-ho, a nih loh leh Jakob-ho a hnam pum sawi nâna hman a ni bawk. (Is. 41:8, 9; 44:1, 2, 21) Mahse, Isaia bung 42, 49, 50, 52, leh 53-a chhinchhiah Chhiahhlawh chungchânga hrilh lâwkna langsâr takte hi tu chungchâng sawina nge ni? Kristian Grik Pathian Lehkha Thu chuan chûng Bible bunga lang Jehova Chhiahhlawh nihna chu chiang takin a târ lang a ni. Ngaihven awm takin, Tirhkohte bua târ lan, thlarauvin chanchin ṭha hriltu Philipa chu Ethiopia mi lian pan tûra a kawhhmuh lai khân, ani chuan chûng hrilh lâwknate zînga pakhat chu a lo chhiar a. A chhiar Bible bung leh châng chu tûnah chuan, Isaia 53:7, 8-ah hmuh theihin a awm a, Philipa chuan: “Zâwlneiin hêng thu hi tu thu nge a sawi, ama thu nge mi dang thu? Ka zâwt a che,” a ti a. Philipa chuan Messia, Isua chungchâng Isaia sawi chu a hrilhfiah ta nghâl a ni.—Tirh. 8:26-35.

⁴ Isua chu nausên mai a la nih lai khân, Isaia 42:6, 7 leh 49:6-a sawi lâwk a nih angin, mi fel Simeona chuan thlarau thianghlim hriattîrin “nausên Isua chu” “Jentailte hnêna . . . êng puang chhuak tûr” a ni dâwn tih a sawi chhuak a ni. (Lk. 2:25-32) Chu bâkah, Isua fiah a nih zâna tihmualpho a nih dân pawh chu Isaia 50:6-9-ah sawi lâwk a ni bawk. (Mt. 26:67; Lk. 22:63) C.E. 33 Pentikost hnuah, tirhkoh Petera chuan Isua chu Jehova “Chhiahhlawh” a nihzia chiang takin a târ lang a. (Is. 52:13; 53:11; Tirhkohte 3:13, 26 chhiar rawh.) Messia hrilh lâwknate aṭangin eng nge kan zir theih.

Jehova Chuan A Chhiahhlawh Chu A Zirtîr

5. Chhiahhlawh chuan eng zirtîrna nge a dawn?

⁵ Pathian Chhiahhlawh chungchânga Isaia hrilh lâwkna zînga pakhatin Fapa chuan mihring a nih hmaa Jehova nêna inlaichînna hnai tak a neih chu a târ lang a. (Isaia 50:4-9 chhiar rawh.) Chhiahhlawh ngei chuan: ‘Ani chuan . . . ka beng hi a kai harh ṭhîn,’ tia sawiin Jehova’n a zirtîr chhunzawm zêl tih a târ lang a ni. (Is. 50:4) Chu mi hun chhûng zawng chuan, Jehova Chhiahhlawh chuan a Pa thu chu ngaithlain a hnênah a zir a, zirtîr intulût tak a lo ni. Lei leh vân Siamtu zirtîra awm chu chanvo danglam bîk tak a va ni êm!

6. Engtin nge Chhiahhlawh chuan a Pa hnuaia a intukluhna ṭha famkim chu a lantîr?

⁶ Chu hrilh lâwknaah chuan, Chhiahhlawh chuan a Pa chu “Lalpa PATHIAN,” a nih loh leh Lal Chungnungber tiin a ko va. Chu chuan Chhiahhlawhin Jehova chu lei leh vâna lal chungnungber anga a pawmzia a târ lang a ni. A Pa lakah a intukluhna ṭha famkim chu târ langin, ani chuan: “Lalpa PATHIAN chuan ka beng mi tihâwngsak a, kei chu ka hel lo va, ka hawi kîr hek lo,” a ti. (Is. 50:5) Ani chu Jehova’n lei leh vân, leh mihring a siam laiin “mi themthiam angin [Jehova] kiangah [a] awm a.” He “mi themthiam” hi “[Jehova] bulah [a] hlim êm êm bawk ṭhîn. Chên theihna a leilungah hlim taka awmin [Pathian Fapa] lâwmna chu mihring fate chungah a ni.”—Thuf. 8:22-31.

7. Chhiahhlawh chuan fiahna a tawn chhûngin a Pa ṭanpuina a rin tlatzia engin nge târ lang?

 ⁷ Chhiahhlawhin a dawn zirtîrna leh mihring fate chunga a lâwmna chuan leia lo kal a, dodâlna nasa tak a hmachhawn hun atân a buatsaih a ni. Tihduhdahna nasa tak a hmachhawn chung pawhin, a Pa duhzâwng tih chu a lâwmna a ni zêl a ni. (Sâm 40:8; Mt. 26:42; Joh. 6:38) Leia fiahna a tawh chhûng zawng khân, Isua chuan a Pa’n a pawmna leh ṭanpuina chu a ring tlat a ni. Isaia hrilh lâwknaa sawi lâwk ang ngeiin, Isua chuan: “Thiam mi chantîrtu chu a hnai e; tuin nge mi do vang? . . . Ngai teh, Lalpa PATHIAN chuan mi ṭanpui ang,” tiin a sawi thei a ni. (Is. 50:8, 9) Isaia hrilh lâwkna dangin a târ lan angin, Jehova chuan a Chhiahhlawh rinawm chu leia a rawngbâwl chhûng zawngin a ṭanpui ngei a ni.

Chhiahhlawhin Leia Rawng A Bâwlna

8. Isaia 42:1-a sawi lâwk a nih angin, engin nge Isua chu Jehova “thlan” a nihzia finfiah?

⁸ Bible chanchin chuan C.E. 29-a Isua’n baptisma a chan laia thilthleng chu min hrilh a: “Thlarau thianghlim chu . . . a lo chhuk a, a chungah a fu ta a; tin, vân aṭangin aw a lo chhuak a, ‘Nang ka fapa duh tak i ni; i chungah ka lâwm êm êm e,’ a ti a,” tiin. (Lk. 3:21, 22) Chutiang chuan, Isaia hrilh lâwknaa târ lan angin, Jehova chuan a “thlan” chu chiang takin a rawn sawi lang a ni. (Isaia 42:1-7 chhiar rawh.) Leia a rawng bâwl chhûngin, Isua chuan he hrilh lâwkna hi chhinchhiah tlâk takin a tithleng famkim a. Chanchin Ṭha Ziakah, Matthaia chuan Isaia 42:1-4-a thu awmte chu la chhâwngin, Isuaah a hmehbel a ni.—Mt. 12:15-21.

9, 10. (a) Engtin nge Isua chuan a rawng bâwl chhûngin, Isaia 42:3-na chu a tihfamkim? (b) Krista chuan leia a awm laiin engtin nge ‘rorêlna chu a lâk chhuah’ a, engtikah nge “leiah hian rorêlna [dik] a awmtîr” dâwn?

⁹ Juda mi nâwlpuite chu Juda sakhaw hruaitute chuan an hmusit a. (Joh. 7:47-49) Mite chu dîmdâwihna tel lova cheibâwl an ni a, anni chu “luang sâwp” emaw, mei mit ṭêp tawh “la khu” emaw nêna khaikhin theih an ni a. Mahse, Isua chuan, mi retheite leh tihhrehawma awmte chungah lainatna a lantîr a ni. (Mt. 9:35, 36) Chûng mite hnênah chuan: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u,” tia sawiin ngilnei takin a sâwm a ni. (Mt. 11:28) Chu bâkah, Isua chuan thil dik leh dik lova Jehova tehnate chu zirtîrin, ‘rorêlna chu a la chhuak’ a. (Is. 42:3) Ani chuan Pathian Dân chu inbûk tâwk tak leh zahngaihna nêna hman a ṭûlzia a târ lan belhchhah a ni. (Mt. 23:23) Tin, Isua chuan mi hausa leh retheite hnêna thleibîk nei lova thu hrilhin, rorêl dikna chu a târ lang bawk.—Mt. 11:5; Lk. 18:18-23.

¹⁰ Jehova “thlan” chuan “leiah hian rorêlna [dik] a awmtîr” dâwn tih Isaia hrilh lâwkna chuan a sawi lâwk bawk a. (Is. 42:4) Chu chu Messia Lalrama Lal a nih hnu lawkah a ti ang a, ani chuan politics ram zawng zawng chu nuai bovin, a rorêlna dikin a thlâkthleng ang. Tin, ‘felna awmna,’ khawvêl thar chu a rawn thlentîr bawk ang.—2 Pet. 3:13; Dan. 2:44.

“Tiêngtu” leh “Thuthlung”

11. Eng kawngin nge Isua chu kum zabi khatnaah “Jentailte tiêngtu” a nih a, engtin nge tûn thlengin chutiang chu a nih?

¹¹ Isaia 42:6, 7-na thlen famkim nân, Isua chu “Jentailte tiêngtu” a lo ni tak tak a. Leia a rawngbâwl chhûngin, a bul berah Judate tân thlarau lam êng a rawn thlen a ni. (Mt. 15:24; Tirh. 3:26) Mahse, Isua chuan: “Kei khawvêl êntu ka ni,” a ti. (Joh. 8:12) Ani chu thlarau lam êng a pêk chhuah vâng mai ni lovin, a nun ṭha famkim chu mi zawng zawng tlan nâna a hlan bawk avângin, Judate leh Jentailte tân êng a lo ni. (Mt. 20:28) A thawhleh hnuah, a zirtîrte chu ‘kâwlkil thlenga’ chanchin ṭha hril tûrin thu a pe a. (Tirh. 1:8) Paula leh Barnaba chuan, an rawngbâwl chhûngin “Jentailte tiêngtu” tih thu chu la chhuakin, Jentailte zînga an rawngbâwlna sawi nân an hmang a ni. (Tirh. 13:46-48; Isaia 49:6 nên khaikhin rawh.) Leia Isua unau hriak thihte leh an ṭhiante’n thlarau lam êng an thehdarh a, “Jentailte tiêngtu” Isuaa rinna nei tûra mite an ṭanpui zêl avângin, chu hna chu thawh zawm zêl a la ni.

12. Engtin nge Jehova chuan a Chhiahhlawh chu “mite thuthlung” atâna a pêk?

 ¹² Chu hrilh lâwknaah bawk chuan, Jehova chuan a Chhiahhlawh thlan hnênah: “Ka humhim ang chia, . . . mite thuthlung atân . . . ka ruat ang che,” a ti a. (Is. 42:6, 7) Setana chuan Isua tihboral leh leia a rawngbâwlna tihtâwp tumin a theih tâwp a chhuah reng a; mahse, Isua thih hun a thlen thlengin Jehova’n a humhim tlat a ni. (Mt. 2:13; Joh. 7:30) Tichuan, Jehova chuan Isua chu kaithovin, leia mite “thuthlung,” a nih loh leh intiamkamna atân a pe ta a ni. Chu thutiam urhsûn tak chu Pathian Chhiahhlawh rinawm chuan “Jentailte tiêngtu” angin thlarau lam thima awmte a chhuah zalên zawm zêl dâwn tih tiamkamna a ni.—Isaia 49:8, 9 chhiar rawh. *

13. Eng kawngin nge Isua chuan lei lama a rawngbâwl chhûng khân “thim zînga ṭhute” chu a chhan chhuah a, engtin nge chu chu a tih zawm zêl?

¹³ Chu intiamkamna nêna inmilin, Jehova thlan Chhiahhlawh chuan ‘mitdelte mit a tivârin,’ ‘mi tângte rip chhûng ata a hruai chhuak ang a,’ tin, “thim zînga ṭhute” chu a chhan chhuak bawk ang. (Is. 42:6, 7) Lei lama rawng a bâwl chhûngin, Isua chuan sakhaw dik lo thurochhiahte hai langin, leh Lalram chanchin ṭha hrilin chutiang chuan a ti a ni. (Mt. 15:3; Lk. 8:1) Chutiang chuan a zirtîr lo ni tate chu sakhaw dik lo aṭangin a chhan chhuak a ni. (Joh. 8:31, 32) Chutiang bawkin, Isua chuan Juda mi ni lo mi tam takte chu thutak zir tûrin a ṭanpui bawk a. Ani chuan a hnungzuitute hnênah: “Kal ula, hnam tina mi zirtîrahte siam ula,” tiin thu a pe a, a zirtîrte hnênah “khawvêl tâwp thleng pawhin,” a awm ang tih a tiam a ni. (Mt. 28:19, 20) Vân lama a nihna chu chelhin, Krista Isua chuan khawvêl puma thu hrilhna chu a enkawl mêk a ni.

Jehova Chuan “Chhiahhlawh” Chu A Chawisâng

14, 15. Engvângin nge Jehova’n a Chhiahhlawh chu a chawisân a, engtin nge a chawisân?

¹⁴ A Chhiahhlawh Messia chungchânga hrilh lâwknaah dang lehah, Jehova chuan: “Ngai teh, ka chhiahhlawh chuan fing takin a ti ang a, châwimawi leh chawisânin a awm ang, sâng tak maiin a awm ang,” a ti a. (Is. 52:13) A lalchungnunna  hnuaia a Fapa rinawm taka a intukluhna leh fiahna nasa ber hnuaia a rinawmna avângin, Jehova chuan ani chu a chawisâng a ni.

¹⁵ Isua chungchângah tirhkoh Petera chuan: “Isua Krista chu vânah kalin Pathian ding lamah a awm a; vântirhkohho te, thuneihna te, thiltihtheihna te ama thu thua awmtîrin an awm a,” tiin a ziak a. (1 Pet. 3:22) Chutiang bawk chuan, tirhkoh Paula pawh chuan: “A inngaitlâwm a, thi khawp hiala thu zâwmin a lo awm ta a, [nghaisakna bana] thihna ngei chu. Chu mi avâng chuan Isua hmingin mi tin—vâna mite, leia mite, lei hnuaia mite nên—an ṭhingṭhit nân leh Pa Pathian tihropuina tûrin, ‘Isua Krista chu Lal a ni,’ tiin lei tinrêngin a puan nân, Pathianin ani chu nasa takin a chawimawi ve ta thung a, hming zawng zawnga hming chungnung ber chu a pe ta a,” tiin a ziak a ni.—Phil. 2:8-11.

16. Engtin nge Isua chu kum 1914 khân, “sâng tak maiin a awm”?

¹⁶ Kum 1914 khân, Jehova chuan Isua chu a chawisân belh a. Messia Lalrama Lala ṭhuttîrin, ani chu “sâng tak maiin a awm” a ni. (Sâm 2:6; Dan. 7:13, 14) Chuta ṭang chuan, Krista chuan ‘amah dotute zîngah ro a rêl’ ṭan a ni. (Sâm 110:2) Ani chuan Setana leh a ramhuaite chu tlâwmtîr hmasain, leiah a paih thla a. (Thup. 12:7-12) Tichuan, Kura Ropui Zâwk anga thil tiin, Krista chuan leia a unau hriak thih a la bângte chu “Babulon Khaw Ropui” aṭangin a chhan chhuak ta a ni. (Thup. 18:2; Is. 44:28) Khawvêl puma thu hrilhna a kaihhruaina chuan thlarau lama a unau ‘la awmte’ lâk khâwmna leh, a hnuah “pâwl tlêmte” ṭhian rinawm, “berâm dang” maktaduai têlte lâk khâwmna chu a thlen a ni.—Thup. 12:17; Lk. 12:32; Joh. 10:16.

17. “Chhiahhlawh” chungchânga Isaia hrilh lâwknate kan zirna aṭangin eng nge kan hriat?

¹⁷ Isaia bua hêng hrilh lâwkna chhinchhiahtlâk takte zirna chuan, kan Lal leh Chhandamtu, Krista Isua kan ngaih hlutna chu a tipung ngei mai. Leia a rawngbâwl chhûnga fapa anga a intukluhna chuan leia a lo kal hmaa a Pa bula a dawn zirtîrna chu a târ lang a ni. A rawngbâwlna leh tûn thlenga thu hrilhna enkawlin, “Jentailte tiêngtu” a nihzia a finfiah a. A dawta thuziaka kan la hmuh tûr angin, Chhiahhlawh Messia chungchâng hrilh lâwkna dang chuan hrehawm a tuarin, kan hlâwkpui atân a nun a pe dâwn tih a târ lang a; chu chu a thih Hriatrengna kan hnaih rualin, kan “ngaihtuah” tlat tûr a ni.—Heb. 12:1-3. (w09 1/15)

[Footnote-te]

Ennawn Nân

• Isaia hrilh lâwknaa târ lan “chhiahhlawh” chu tunge ni a, chu chu engtin nge kan hriat?

• Chhiahhlawh chuan Jehova hnên aṭangin eng zirtîrna nge a dawn?

• Engtin nge Isua chu “Jentailte tiêngtu” a nih?

• Engtin nge Chhiahhlawh chu chawisân a nih?

[Zirlai Atâna Zawhnate]

[Phêk 24-naa milem]

Isua chu a Pa chawisânin a awm a, Messia Lalrama Lal atâna ṭhuttîr a ni