“Lo Kal La, Mi Zui Ang Che”
“Lo Kal La, Mi Zui Ang Che”
“Tupawhin mi zui a duh chuan mahni hrehawm pawisa lovin, nî tin a nghaisakna ban puin mi zui . . . rawh se.”—LK. 9:23 New World Translation.
1, 2. Eng sâwmna duhawm tak nge Isua’n a pêk chhuah? (b) Isua sâwmna chu engtin nge i chhân lêt?
ISUA’N leia a rawng bâwl tâwp lamah, Judai ram hmâr chhak, Jordan lui râla awm Perea ramah thu a hril a. Tlangvâl pakhat chuan amah panin, chatuana nunna a chan theih nâna a thiltih ngaite chu a zâwt a ni. Isua chuan chu tlangvâlin Mosia Dân rinawm takin a zâwm tih a hriat hnu chuan, sâwmna ropui tak chu a pe chhuak a ni. Ani chuan: “Kal la i neih apiang hralh la, pachhiate hnênah pe rawh, chutichuan vânah ro i nei ang; tin, lo kal la, mi zui ang che,” a ti a. (Mk. 10:21) Pathian Chungnungbera Fapa neih chhun, Isua hnung zui tûra sâwmna dawn chu a va ropui êm!
2 Tlangvâl chuan chu sâwmna chu a hnâwl a; mahse, mi dangte chuan an pawm a ni. A hma khân, Isua chuan Philipa hnênah: “Mi zui rawh,” a lo ti tawh a. (Joh. 1:43) Philipa chuan chu sâwmna chu pawmin, a hnuah tirhkoh a lo ni a. Isua chuan Matthaia hnênah chutiang bawk sâwmna chu a pe chhuak a, ani pawhin a lo pawm ve bawk a ni. (Mt. 9:9; 10:2-4) Dik takin, Isua chuan: “Tupawhin mi zui a duh chuan mahni hrehawm pawisa lovin, nî tin a nghaisakna ban puin mi zui zêl rawh se,” tia sawiin, felna ngainatu zawng zawng hnênah chu sâwmna bawk chu a tichhuak a ni. (Lk. 9:23, NW) Chuvângin, an duh tak zet chuan mi tupawh chu Isua hnungzuitu an ni thei a. Chutiang duhna chu i nei em? Kan zînga a tam zâwkte chuan Isua sâwmna chu kan pawm tawh a; tin, thlawhhma rawngbâwlnaah, chu sâwmna duhawm tak chu mi dangte hnênah kan pe chhâwng a ni.
3. Engtin nge Isua hnung kan zuina ata tawlh bo chu kan pumpelh theih?
3 Mahse, lungchhiatthlâk takin, Bible thutak ngaihvenna lantîrtu mi ṭhenkhat chuan Bible an zir zawm tawh lo va. Hma sâwn ahnêkin, atâwpah chuan Isua hnung an zuina ata an “tawlh bo” zâwk mah a ni. (Heb. 2:1) Chu mi thang chu engtin nge kan pumpelh ang? Hetianga inzawh hi kan ṭangkaipui ang: ‘Atîra Isua hnung ka zui chhan ber chu eng nge ni? A hnungzui tih awmzia chu eng nge ni?’ tiin. Hêng zawhna pahnihte chhânna rilrua vawn rengna hian, kan kawng thlan finthlâk tak zawh reng kan tumna chu tinghet sauh tûrin min ṭanpui ang a. Mi dangte pawh Isua hnungzui ve tûra fuih tûrin min ṭanpui bawk ang.
Engvângin Nge Isua Hnung Kan Zui?
4, 5. Engvângin nge Isua chu hruaitu atân a tlin?
4 Zâwlnei Jeremia chuan: “Aw LALPA, mihring awm dân chu, mahni thu mai a ni lo tih ka hre ta: tungchhova kal mihringah hian, a pheikhai hruai tûr a awm lo,” a ti a. (Jer. 10:23) Mihring chanchin chuan Jeremia thute dikzia chu a nemnghet tawh a ni. Mihring ṭha famkim lote chu hlawhtling takin an inawp thei lo tih a lo chiang ta telh telh a. Isua chu mihring tumahin an entawn theih loh tûrzâwngin Hruaitu atân a tling tih kan hriat avângin, amah zui tûra min sâwmna chu kan pawm a ni. Isua tlinna ṭhenkhat hi han ngaihtuah teh.
5 A hmasa berin, Jehova ngei chuan Isua chu Hruaitu Messia atân a ruat a ni. Hruaitu atâna ruat tûr chu min Siamtu aiin tuin nge hre zâwk thei tehlul ang? A pahnihnaah, Isua chuan kan entawn tûr leh kan ngaihsân phu miziate a nei a. (Isaia 11:2, 3 chhiar rawh.) Ani chu entawn tûr ṭha famkim a ni. (1 Pet. 2:21) A pathumnaah, Isua chuan a nun pea a lantîr angin, a hnungzuitute chu a ngaihsak hle a. (Johana 10:14, 15 chhiar rawh.) Tin, tûna hlimna leh nakina chatuana nun ropui tak lama min hruai laiin, ani chuan berâm vêngtu ṭha a nihzia a târ lang a ni. (Joh. 10:10, 11; Thup. 7:16, 17) Hêngte leh a chhan dangte avângin, a hnung zui kan thlan hian thutlûkna fing tak kan siam tihna a ni. Mahse, Isua hnung zuinaah hian eng nge tel?
6. Isua hnungzuinaah chuan eng nge tel?
6 Krista hnungzuitu nihnaah chuan, Kristian nia inchhâl mai aia tam a tel a. Tûn laiah, mi tlûklehdingâwn hnih vêl chu Kristian angin an inchhâl a; mahse, an thiltih chuan “thil sual tite” an nihzia a târ lang a ni. (Matthaia 7:21-23 chhiar rawh.) Mite’n Isua hnung zui tûra sâwmna an ngaihven hian, Kristian dikte chuan an nun kawng zawng zawng chu Krista zirtîrnate leh entîrna nên nî tin an inremtîr reng a ni tih kan hrilhfiah a ni. Chu mi awmzia hrilhfiah nân, Isua chanchin kan hriat tawhsa ṭhenkhat ngaihtuah ta ila.
Isua Finna Chu Entawn Rawh
7, 8. (a) Eng nge finna chu ni a, engvângin nge Isua chuan finna nasa tak a neih? (b) Engtin nge Isua chuan finna a târ lan a, engtin nge amah kan entawn theih?
7 Isua chuan mize langsâr tam tak a nei a; mahse, mize pali: a finna te, a inngaihtlâwmna te, a ṭhahnemngaihna te, leh a hmangaihna te chu kan thlûrbing ang. A hmasain, a finna—a hriatna leh hriat thiamnate sâwt taka hman thiamna chu lo ngaihtuah ta ila. Tirhkoh Paula chuan: “Finna leh hriatna ro zawng zawng thuhrûkna Krista chu,” tiin a ziak a. (Kol. 2:2, 3) Isua chuan chutiang finna chu khawi aṭangin nge a neih? Ani chuan: “Pain mi hrilh ang zêlin hêng thu hi ka sawi zâwk a ni,” a ti. (Joh. 8:28) A finna chu Jehova pêk a ni a, chuvângin Isua’n remhriatna a nei chu mak kan ti hran lo.
8 Entîr nân, Isua chuan a nun kawng a thlannaah remhriatna a hmang a. Ani chuan a nun tihsamkhai chu a thlang a, thiltum pakhat chauh—Pathian duhzâwng tih—chu a ngaihsak tlat a ni. Lalram hmakhua tihhmasâwn nân a hun leh a tha leh zung chu fing takin a hmang bawk. Isua entîrna chu kan ‘mit tihfîm’ tum tlatin kan zui a; chutiang chuan, kan tha leh zung leh ngaihsakna tam tak latu thil ṭûl lote atân phurrit kan insiam lo. (Mt. 6:22) Kristian tam tak chuan rawngbâwlnaa an tel tam lehzual theih nâna an nun tisamkhai tûrin hma an la der tawh a. Ṭhenkhat chuan pioneer angin rawng an bâwl thei tawh a ni. Chûng zînga mi i nih chuan, fak i phu hle mai. ‘Pathian ram zawn hmasakna’ chuan hlimna leh lungâwina nasa tak a awmtîr si a.—Mt. 6:33.
Isua Angin Inngaitlâwm Rawh
9, 10. Engtin nge Isua’n a inngaihtlâwmna a lantîr?
9 Isua mizia kan ngaihsak tûr pahnihna chu a inngaihtlâwmna hi a ni a. Mihring ṭha famkim lote hian thu neihna an chan hian, mi aia chungnung zâwk nia inhriatna an nei fo ṭhîn. Isua chu a va dang lam tak êm! Jehova thiltum tihhlawhtlinna kawnga nihna pawimawh tak a chelh chung pawhin, Isua chuan chapona chhe tê mah a nei lo. Tin, a inngaihtlâwmna chu entawn tûra tih kan ni bawk. Trihkoh Paula chuan: “He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlâkhlelh hleih theihah a ruat lo va, mihringte anga lo piangin, bâwih angah a insiam a, amah leh amah a intitlâwm ta zâwk a,” tiin a ziak a ni. (Phil. 2:5-7) Chutah chuan eng nge tel?
10 Isua chuan a Pa nêna vâna awm chu nuam a ti hle a; mahse, châk takin “amah leh amah a intitlâwm” a ni. A nunna chu Juda mi nula thianghlim chhûla sawn a ni a, chutah chuan thingrem siamtu mi rethei chhûngkuaa mi ni tûra ṭanpui ngai nausên anga a pian hmain thla kaw chhûng a awm a ngai a ni. Josefa inah chuan, nausên a nihna ata nautê, nautê a nihna ata naupang a lo ni chho va; tin, a rawn tleirâwl chhuak chho ta a ni. Ani chu sual nei lo a ni a. Mahse, a naupan lai zawngin sual nei mihring a nu leh pate thu chu a âwih a ni. (Lk. 2:51, 52) Inngaihtlâwmna namên lo a va ni êm!
11. Eng kawngtein nge Isua inngaihtlâwmna chu kan entawn theih?
11 Chanvo hniam deuh anga lang hna thawh tûrte inhuam taka kan pawm hian, Isua inngaihtlâwmna kan entawn tihna a ni a. Entîrna atân, chanchin ṭha hril tûra kan hna neih hi han ngaihtuah ta ila. Miin an ngaihsak loh emaw, an nuihzat emaw, a nih loh leh an dodâl emaw hunah chanchin ṭha hrilh chu hna hniam tak niin a lang mai thei. Amaherawhchu, thu hrilhnaa kan thawh ṭâng ṭâng hian, mi dangte chu Isua’n a hnung zui tûra a sâwmna pawm tûrin kan ṭanpui a ni a. Chutiang chuan nun chhanhim tûrin kan ṭanpui a ni. (2 Timothea 4:1-5 chhiar rawh.) Entîrna dang leh chu kan Kingdom Hall enkawlna chungchângah a ni a. Chutah chuan, hna hniam tak anga ngaih theih tûr, bawlhhlawh paih te, chhuat nawh te, leh êk in tihfai te a tel thei ngei ang! Chutichung chuan, kan Kingdom Hall chu tualchhûnga biakna dik hmunpui a ni a, chu mi tihfai chu rawngbâwlna thinghlim zînga mi a ni tih kan hria a ni. Chanvo hniam anga langte chu châk taka thawk zovin, inngaihtlâwmna kan lantîr a, chutiang chuan Krista hniak hnung chu kan zui a ni.
Isua Angin Ṭhahnemngai Rawh
12, 13. (a) Engtin nge Isua chuan ṭhahnemngaihna a lantîr a, engin nge amah chêttîr? (b) Rawngbâwlnaa ṭhahnemngai tûrin engin nge min chêttîr ang?
12 Rawngbâwlnaa Isua ṭhahnemngaihna hi han ngaihtuah teh. Ani chuan leia a awm lai khân, hna tam tak a thawk a. A naupan lai chuan, fa anga pawmtu a pa Josefa nên thingrem an siam dûn ngei ang. A rawngbâwl chhûng chuan, thilmakte a ti a, chutah chuan dam lote tihdam leh mitthi kaihthawh hial pawh a tel a ni. Mahse, a hna pui ber chu a ngaithla duhtute hnêna chanchin ṭha hrilh leh zirtîr hi a ni. (Mt. 4:23) A hnung zuitute kan nih angin, keini pawh chutiang hna thawh tûr chu kan nei a. A nih chuan, engtin nge a entîrna siam chu kan entawn theih? Pakhatah chuan, Isua turtu rilru put hmang ang neih vena hmangin a ni.
13 A bul berah chuan, Pathian a hmangaihna chuan Isua chu thu hril tûr leh zirtîr tûrin a chêttîr a. Mahse, Isua chuan a zirtîr thutak chu a ngaina hle bawk. A tân chuan, chûng thutakte chu ro man to tak ang a ni a, mi dangte hrilh hriat chu a châk hle a ni. Keini zirtîrtute hian chutiang bawkin châkna kan nei a. Pathian Lehkha Thu aṭanga kan zir thutak hlu tak ṭhenkhat hi han ngaihtuah lawk teh! Lei leh vâna lalchungnunna thu buai leh a chinfel dân tûr chu kan hria a. Mitthite dinhmun leh Pathian khawvêl thara lo awm tûr malsâwmnate chungchânga Bible zirtîrna chu kan hre fiah hle a ni. Chutiang thutak chu tûn hnai maiah kan hre chauh emaw, hmânah kan hre daih tawh emaw pawh ni se, a hlut ngaiin a hlu reng a. Chutiang thutak chu a hlui emaw, a thar emaw pawh ni se, ro hlu a tling tho tho a ni. (Matthaia 13:52 chhiar rawh.) Phûr taka thu hrilin, Jehova thu min zirtîrte kan ngainatna chu mi dangte kan hriattîr a ni.
14. Engtin nge Isua zirtîr dân chu kan entawn theih?
14 Isua zirtîr dân hi chhinchhiah bawk ang che. A thu ngaithlatute chu Pathian Lehkha Thu a kawhhmuh fo va. Ani chuan thil pawimawh tak a sawi hunah: “Tih ziak a ni,” tih a sawi tel fo a ni. (Mt. 4:4; 21:13) A thusawi chhinchhiahte zîngah chuan, ani chuan Hebrai Pathian Lehkha Thu-a lekhabu awmte zât ve vêl chu a ngai ngaiin emaw, pehhêl deuhvin emaw a la chhuak a ni. Isua angin, kan rawngbâwlnaah Bible kan hmang nasa a, a theihna apiangah, Bible châng hman kan tum bawk. Chutiang kawng chuan, rilru ṭha pute chu kan thu zirtîr hi keimahnia chhuak ni lovin, Pathian ngaihtuahna a ni tih anmahni ngei kan hmuhtîr a ni. Mi tuemawin Bible aṭanga chhiar a duh a, Pathian Thu hlutna leh a awmziate min sawipui a duh hian kan va lâwm tak êm! Chutiang mite’n Isua hnung zui tûra sâwmna an han pawm hian, nasa takin kan lâwm a ni.
Isua Hnung Zui Tih Awmzia Chu Mi Dangte Hmangaih Hi A Ni
15. Isua mize langsâr tak pakhat chu eng nge ni a, chu mi ngaihtuahna chuan engtin nge kan chungah nghawng a neih theih?
15 Isua nun chanchin kan sawiho tûr hnuhnûng ber chu thil phûrawm ber—mihringte a hmangaihna chungchâng hi a ni. Tirhkoh Paula chuan: “Krista hmangaihna chuan min tîr lui a ni,” tiin a ziak a. (2 Kor. 5:14) Isua’n mihring zawng zawng a hmangaihna leh a mi mala min hmangaihnate kan ngaihtuah hian, chu chuan kan thinlung a khawih a, a entîrna siam chu zui lo thei lo niin kan inhria a ni.
16, 17. Eng kawngin nge Isua chuan mi dangte a hmangaihna chu a lantîr?
16 Engtin nge Isua chuan mi dangte chungah hmangaihna a lantîr? Mihringte tâna a nun pêk a duhna chu min hmangaihzia lantîrna nasa ber a ni. (Joh. 15:13) Mahse, a rawngbâwl chhûng chuan, Isua chuan hmangaihna chu kawng dangin a lantîr bawk. Entîr nân, hrehawm tuarte chu a thawrhpui a. Lazara thih avânga ṭap Mari leh mi dangte a han hmuhin, an lungngaihna chuan a rilru a khawih hle a. Isua chuan Lazara chu kaitho dâwn reng mah se, a rilru a khawih êm avângin, “a ṭap ta” a ni.—Joh. 11:32-35.
17 Isua rawngbâwl ṭan tirh lamah, phâr pakhatin amah chu panin: “I duh chuan mi tithianghlim thei e,” a ti a. Isua’n engtin nge a tih? Thu chhinchhiah chuan: “A lo khawngaih êm êm a,” a ti. Tichuan, thil danglam tak a ti a ni. “A han ban a, a dek a, ‘Ka duh e, lo thianghlim tawh ang che,’ a ti a. Tichuan chawplehchilhin a phâr chu a lo reh ta nghâl a, a lo thianghlim ta a.” Mosia Dân hnuaiah chuan, phârte chu an thianghlim lo va; tin, Isua chuan chu pa chu dek kher lo pawhin a tidam thei reng bawk a ni. Chutichung pawhin, Isua chuan phâr tihdam nân a dek a, chu chu kum engemaw zât hnua mi deh a hlawh vawi khatna pawh a ni mai thei. Khawngaihna thiltih ropui tak a va ni êm!—Mk. 1:40-42.
18. Engtin nge ‘inlainat tawnna’ kan lantîr theih?
18 Krista zuitu kan nih angin, ‘inlainat tawn a,’ hmangaihna lantîr tûra tih kan ni a. (1 Pet. 3:8) Kan Kristian unau natna benvawn vei emaw, rilru beidawnna nasa tak nei emawte tawrh dân chu hriat thiam a harsa viau ang a—mahni ngeia kan la tawh ngai loh phei chuan a harsa lehzual ang. Amaherawhchu, Isua chuan na ngai lo mah se, dam lote a khawngaih a ni. Chutiang chi mite khawngaihna chu engtin nge kan neih theih ang? Chutiang harsatna tuarte thusawi chu dawhthei taka ngaihthlâksakin khawngaihna kan nei thei a ni. Heti hian kan inzâwt thei ang, ‘An dinhmunah ding ta ila, engtin nge ka awm ang?’ tiin. Mi dangte ngaih dân kan hriatpui lehzual chuan ‘rilru tête [a nih loh leh, lungngaite] chu kan fuih’ thei lehzual ang. (1 Thes. 5:14) Chutiang chuan, Isua hnung kan zui tihna a ni ang.
19. Eng kawngin nge Isua entîrna chuan min nghawng?
19 Isua Krista ṭawngkam leh thiltihte chu zir a va phûrawm tak êm! A chanchin kan zir tam poh leh amah an chu kan duh lehzual ang a—tin, mi dangte pawh amah ang tûra ṭanpui chu kan duh lehzual bawk ang. Chuti chu, Messia Lal kan zuina aṭangin tûnah leh chatuan thleng pawhin hlimna i hmu chho zêl ang u! (w09 1/15)
Kan Hrilhfiah Thei Em?
• Isua angin, engtin nge finna kan lantîr theih?
• Engkawngtein nge inngaihtlâwmna kan lantîr theih?
• Engtin nge rawngbâwlnaa ṭhahnemngaihna chu kan neih theih?
• Eng kawngtein nge mi dangte chunga hmangaihna lantîrna kawngah Isua kan entawn theih?
[Zirlai Atâna Zawhnate]
[Phêk 11-naa bâwm/milem]
Krista Entawn Tura Min Ṭanpuitu
Kum 2007 district inkhâwmpuiah khân, Sâpṭawnga chhuah, phêk 192 nei lehkhabu thar, “Come Be My Follower” tih chu tlângzarh a ni a. Chu lehkhabu chu Isua leh a mizia leh a thiltih engemaw bîkte ngaihtuah tûra Kristiante ṭanpuitu atâna siam a ni. A ṭanna lam bung pahnihte zawhah chuan, ṭhen hmasa ber chuan Isua mize ṭha chungchuang—a inngaihtlâwmna te, a huaisenna te, a finna te, a thuâwihna te, leh a chhelna te a tlângpuia ennawnna a nei a ni.
Chu mi dawta section-ahte chuan, Isua chu chanchin ṭha zirtîrtu leh hriltu a nih anga a thiltihte leh hmangaihna nasa tak a lan chhuah dân ṭhenkhat a tel a. Lehkhabu pum puiah chuan, Kristian chu Isua entawn tûra ṭanpuitu tûr thute a chuang a ni.
He lehkhabu hian mahni inenfiah a: ‘Isua hnung ka zui tak zet em? Engtin nge ka zui lehzaul theih ang?’ tia inzâwt ṭheuh tûrin min chêttîr ṭheuh chu kan ring tlat a. Tin, chu chuan ‘chatuana nun duhna rilru dik tak nei apiangte’ chu kan ruala Isua hnung zui tûrin a ṭanpui bawk ang.