Mi A Thih Hian Engtin Nge A Awm Chiah?

“Mi suaksualte thlarau pawh tiamin, thlarau zawng zawng chu a thi thei lo . . . Phuba lâkna mei tihmih theih lohva thi thei lo leh tâwp nei lova nghaisak an ni a, an tân chuan an hrehawm tawrhna chu [tihtâwp] theih a ni lo.”—Clement of Alexandria, C.E. kum zabi hnih leh thumnaa lehkha ziaktu.

CLEMENT-A ang bawkin, hremhmun a awm ringtute chuan mihringte hi thi tak tak thei lo tûrah an ngai a. Bible chuan chutiang zirtîrna chu a thlâwp em? A hnuaia zawhnate chhân nâna Pathian Thu-in a sawite hi i lo ngaihtuah ang u.

Mipa hmasa ber, Adama chu a thi tak tak thei lo vem ni? Adama siam a nih hnu lawkah, Pathian chuan a hnênah heti hian thu a pe a ni: “Huana thing tinrêng rahte hi i duh duhin i ei thei e; a chhia leh a ṭha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,” tiin. (Genesis 2:16, 17) Adama chu thi thei lo a ni lo tih a chiang hle.

Adama’n thil sual a tih hnu khân, a chungah eng thil nge thleng? Pathian puan chhuah hremna chu hremhmuna chatuana nghaisakna a ni lo. Ani chuan heti hian a sawi zâwk a ni: “Leia i kîr leh hma loh chuan i hmaia thlantui luang zawih zawihin chaw i ei tawh ang; lei aṭanga lâk chhuah i ni si a: vaivut i ni a, vaivutah i kîr leh tûr a ni,” tiin. (Genesis 3:19) Pathian thu puan chhuah chuan, a thih hnua Adama taksa pêng a khawi lai mah dam chhunzawm zêl a awm tûr thu a sawi hmuh lo.

Keini hi kan thi tak tak thei em? Bible chuan Thuhriltu 3:20-ah heti hian a sawi: “An zain hmun khatah an kal vek a; an zain vaivuta mi an ni vek a, an zain vaivutah an chang leh vek a ni,” tiin. Tin, tirhkoh Paula chuan: “Mi pakhat [Adama] avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin a ziak bawk a ni. (Rom 5:12) Mi zawng zawngin thil kan tihsual avângin, kan thi ta tak tak a ni.

Mitthite hian thil an hre theiin, an ngaihtuah thei em? Pathian Thu chuan: “Mi nung damte chuan an la thi dâwn tih an hre si a, mitthi erawh chuan engmah an hre lo,” a ti. (Thuhriltu 9:5) Mi a thih hnua a awm dân chungchângah, Bible chuan: “Ani chu a leilungah a kîr leh a; chu mi nî ngei chuan a ngaihtuahnate chu a bo nghâl a ni,” a ti bawk. (Sâm 146:4) Mitthite’n ‘engmah an hriat tawh loh va,’ an “ngaihtuahnate chu a bo nghâl” a nih si chuan, engtin nge hremhmuna nghaisakna chu an tawrh theih tehlul ang ni?

Isua Krista chuan thihna chu thil hre theia awmna ni lovin, muthilhna nên a khaikhin a. (Johana 11:11-14) Mahse, mi ṭhenkhat chuan, Isua ngei pawhin hremhmun chu a sat thu leh mi sualte chu hremhmun mei dîla paihthlâk an nih thu a zirtîr nia sawiin an hnial mai thei a. Isua’n hremhmun chungchâng a zirtîr leh tîr loh chu ilo ngaihtuah ang u. (w08 11/1)