‘Pathian Khawngaihna Enkawltu’ I Ni Em?
‘Pathian Khawngaihna Enkawltu’ I Ni Em?
“Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula.”—ROM 12:10.
1. Pathian Thu-ah eng tiamkamna nge kan hmuh?
PATHIAN THU chuan kan lunghnual hun leh kan lungchhiat hunah Pathian Jehova’n min ṭanpui dâwn tih min tiam nawn fo va. Entîr nân, hêng thu thlamuanthlâk takte hi chhinchhiah rawh: “LALPA chuan tlute zawng zawng chu a chelh reng ṭhîn a, kûn ngawih ngawiha awm zawng zawngte chu a kaitho ṭhîn,” tih leh, “Lungchhiate chu a tidam a, an hliamnate chu a tuam ṭhîn,” tihte chu. (Sâm 145:14; 147:3) Chu bâkah, kan Pa vâna mi ngei chuan: “Kei LALPA in Pathian hian, ‘Hlau suh u, ka ṭanpui dâwn a che u,’ tiin, in kut ding lam chu ka chelh dâwn si a,” a ti bawk.—Is. 41:13.
2. Engtin nge Pathian Jehova chuan a chhiahhlawhte hnênah ṭanpuina a pêk?
2 Mahse, engtin nge vân hmuh theih lova awm Pathian Jehova chuan ‘kan kut chu a chelh’? Engtin nge lungngaih avânga ‘kun ngawih ngawiha kan awmin min kaih thawh’? Jehova’n chutiang ṭanpuina chu kawng chi hrang hrangin min pe a ni. Entîr nân, a mite chu a thlarau thianghlim hmangin ‘thiltihtheihna nasa tak’ a pe a. (2 Kor. 4:7; Joh. 14:16, 17) Pathian chhiahhlawhte chu, thâwk khum Thu, Bible-a hmuh thuchahte neih thiltihtheihnaa tihchakin an awm bawk a ni. (Heb. 4:12) Pathian Jehova min tihchak dân kawng dang a la awm em? Petera Thawn Khatnaah a chhânna chu kan hmu a ni.
Kawng Chi Hrang Hranga “Pathian Khawngaihna” Lantîrte
3. (a) Tirhkoh Petera chuan thlêmna chungchângah eng nge a sawi? (b) Petera thawn khat tâwpna lamah eng thu nge sawi a nih?
3 Thlarauva hriak thih ringtute hnêna lehkha a thawnnaah, tirhkoh Petera chuan lâwmman nasa takin a hmuah avângin lâwm nachhan tûr ṭha tak an neihzia a ziak tel a ni. Tichuan, ani chuan: “Tûnah (a ṭûl chuan) thlêmna tinrêng avângin lungngai rih mah ula,” tiin a sawi belh a ni. (1 Pet. 1:1-6) He thu mal “tinrêng” tih hi lo chhinchhiah rawh. Hei hian thlêmna chu chi hrang hrang a ni dâwn tih a hril a ni. Amaherawhchu, Petera chuan chuti lai thleng chauh chu sawiin, a unaute chu chutiang fiahnate an tawrh chhuah theih dâwn leh dâwn loh chungchângah hrilhhai takin a dah lo. Kristiante’n eng ang fiahna pawh tâwk mah se, Pathian Jehova chuan hmachhawn thei tûrin a ṭanpui ang tih an rin tlat theih thu a sawi belh zâwk a. Chu chu “thil zawng zawng tâwpna” chungchâng a sawina, Petera lehkha thawn tâwpna lamah a ziak tel a ni.—1 Pet. 4:7.
4. Engvângin nge 1 Petera 4:10 chu kan tân a thlamuanthlâk?
4 Petera chuan: “Mi tinin thilpêk in hmuh ang zêlin Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh rawh u,” a ti a. (1 Pet. 4:10) Petera chuan “tinrêng” tih thu mal hi a hmang leh a. A thusawi chu, ‘Thlêmna chu kawng tinrêngin a lo chhuak thei a; mahse, Pathian khawngaihna pawh kawng tinrênga târ lan a ni ve bawk,’ a tihna a ni. Engvângin nge chu thu chu thlamuanthlâk tak a nih? Chu chu, kan fiahna tawh chu eng ang pawh ni se, chu mi tuar thei tûr tâwka min ṭanpuitu Pathian khawngaihna chu târ lan a ni fo vang tihna a ni. Mahse, Petera thusawiah Jehova khawngaihna târ lan a nih dân chu i lo chhinchhiah em? Chu chu kan Kristian unaute kal tlanga târ lan a ni.
“Rawng Inbâwl Tawn Ṭheuh Rawh U”
5. (a) Kristian tinte chuan eng nge an tih ang? (b) Eng zawhna nge lo chhuak?
5 Petera chuan Kristian kohhrana mi zawng zawngte hnênah: “Eng dang zawng aiin inhmangaih tawn uar rawh u,” a ti a. Tin, ani chuan: “Mi tinin thilpêk in hmuh ang zêlin . . . chûng chuan rawng inbâwl tawn ṭheuh rawh u,” tiin a sawi belh a ni. (1 Pet. 4:8, 10) Chuvângin, kohhrana mi tin chuan a Kristian unaute a tichak ṭheuh tûr a ni a. Jehova neih thil hlu engemaw tak kawltîr kan ni a, chu chu mi dangte hnêna sem tûrin mawhphurhna kan nei a ni. A nih leh, chûng thil hlute chu eng nge ni? Petera chuan chu chu “thilpêk” niin a sawi a. Chu thilpêk chu eng nge ni? Engtin nge ‘chûng chuan rawng kan inbâwlsak tawn ṭheuh’?
6. Eng thilpêk ṭhenkhat nge Kristiante chu kawltîr an nih?
6 Pathian Thu chuan: “Thilpêk ṭha leh thilpêk famkim zawng zawng chu chung lam aṭangin . . . a lo chhuk ṭhîn a ni,” a ti a. (Jak. 1:17) Dik takin, Jehova’n a mite hnêna a pêk thilpêk zawng zawng chu a kawngaihna târ lanna a ni. Jehova min pêk thilpêk langsâr tak chu thlarau thianghlim a ni a. Chu thilpêk chuan Pathian mize ṭha hmangaihna te, ṭhatna te, leh thuhnuairawlhna te min neihtîr thei a ni. Chûng miziate chuan kan unaute chunga rilru tih tak zeta hmangaihna lantîr tûr leh châk taka ṭanpuina pe tûrin min chêttîr leh chhâwng a. Finna dik tak leh hriatna dik chu thlarau thianghlim ṭanpuinaa kan neih thilpêk ṭhate zînga mi a ni bawk. (1 Kor. 2:10-16; Gal. 5:22, 23) Kan tha leh zung te, kan theihna te, leh thiamna bîk zawng zawng te chu kan Pa vâna mi chawimawi leh fak nâna hman tûr thilpêk angin kan thlîr thei a. Kan thiamna leh kan miziate chu kan Kristian unaute hnêna Pathian khawngaih lantîr nâna hmang tûrin Pathian pêk mawhphurhna kan nei a ni.
‘Rawng Inbâwl Tawn Ṭheuh’ Nân Hmang Rawh—Engtin Nge?
7. (a) “Ang zêlin” tih thu mal hian eng nge a târ lan? (b) Eng zawhnate nge kan inzawh ang a, engvângin nge?
7 Kan thilpêk dawnte chungchângah, Petera chuan: “Thilpêk in hmuh ang zêlin, . . . chûng chuan rawng inbâwl tawn ṭheuh rawh u,” a ti bawk a. “Ang zêlin” tih ṭawngkam hian mizia leh thiamnate chu a inang lo mai ni lovin, a nasat dân pawh a inang lo thei tih a târ lang a. Chutichung pawhin, mi tinte chu ‘chûng [an thilpêk dawn bîk engpawh] chu rawng inbâwl tawn ṭheuh’ nâna hmang tûra fuih an ni. Chu bâkah, “enkawltu ṭhate angin, chûng chuan rawng inbâwl tawn ṭheuh rawh u,” tih hi thupêk a ni a. Chuvângin, heti hian kan inzâwt tûr a ni: ‘Ka Kristian unaute tihchak nâna ka kawl thilpêk chu kan hmang tak zet em?’ (1 Timothea 5:9, 10 nên khaikhin rawh.) ‘A nih loh leh, Jehova hnên aṭanga ka dawn thiamnate hi mahni hlâwk nân—hausak nân emaw, dinhmun sâng chelh nân emaw—ka hmang deuh ber em?’ tiin. (1 Kor. 4:7) Kan dawn thilpêk chu “rawng inbâwl tawn” nâna kan hman chuan, Jehova kan tilâwm ang.—Thuf. 19:17; Hebrai 13:16 chhiar rawh.
8, 9. (a) Khawvêl puma Kristiante’n an unaute rawng an bâwlna kawng ṭhenkhat chu eng nge ni? (b) Engtin nge in kohhrana unaute an inṭanpui tawn?
8 Pathian Thu chuan kum zabi khatnaa Kristiante rawng an inbâwlsak tawn dân kawng chi hrang hrang chu a târ lang a. (Rom 15:25, 26; 2 Timothea 1:16-18 chhiar rawh.) Chutiang bawkin tûn laiah pawh, miin a Kristian unaute tâna a thilpêk dawn hmang tûra thupêk chu Kristian dikte chuan tih tak zetin an zâwm a ni. Chutianga zawm a nih dân kawng ṭhenkhat ilo ngaihtuah ang u.
9 Unaupa tam tak chuan thla tinin inkhâwm atâna inpuahchah nân hun tam tak an hmang a. Inkhâwmnaah, an Bible zir laia an hmuh thlarau lam thil hlu tak ṭhenkhat an sawi hian, an thusawi thu ṭha takte chuan kohhrana mi zawng zawng chu chhel tûrin a chêttîr a ni. (1 Tim. 5:17) Unau tam takte chu an Kristian unaute chunga an nêlawmna leh khawngaihna an lantîr avânga hriat hlawh an ni a. (Rom 12:15) Ṭhenkhat chuan lunghnualte chu an tlawh ziah a, an ṭawngṭaipui ṭhîn a. (1 Thes. 5:14) Mi dangte chuan harsatna tâwk mêk an Kristian unaute tân fuihna thute chu an ziak a. Mi dang lehte chuan, kalsawn hlei thei lote chu kohhran inkhâwma tel tûrin an ṭanpui bawk a. Thuhretu sâng têlte chuan chhawmdâwl hna an thawkin, leilung chhiatna avânga chhia an Kristian unaute inte chu an sak ṭhatsak a ni. Mi ngaihsak tak hêng unaute ṭanpuina pêk zawng zawng hi “Pathian khawngaihna tinrêng” a lan chhuahna a ni.—1 Petera 4:11 chhiar rawh.
Eng Nge Pawimawh Zâwk?
10. (a) Paula chuan Pathian rawng a bâwlnaah eng thil pahnih nge a ngaihsak? (b) Tûn laiah engtin nge Paula kan entawn?
10 Pathian chhiahhlawhte chu an Kristian unaute tâna an hman tûr thilpêk chauh ni lovin, mi dangte hnêna an hrilh tûr thuchah pawh kawltîr an ni bawk a. Tirhkoh Paula chuan Jehova rawng a bâwlnaah he thil pahnihte hi a hria a ni. Ani chuan Ephesi khuaa kohhran hnênah, “Pathian khawngaih enkawlna hna” an hlâwkpui atâna a hnêna pêk chungchâng chu a ziak a. (Eph. 3:2) Mahse, ani chuan: ‘Chanchin ṭha kawltîra awm tûrin Pathian ṭha tih mi kan ni,’ tiin a sawi bawk a ni. (1 Thes. 2:4) Paula angin, keini pawh Pathian Ram chanchin hriltu anga rawngbâwlna chanvo kawltîr kan ni tih kan hria a. Thu hrilhnaa ṭhahnemngai taka telin, chanchin ṭha hriltu chau thei lo anga Paula siam entîrna chu entawn kan tum tlat a ni. (Tirh. 20:20, 21; 1 Kor. 11:1) Lalram thuchah hrilhna chuan nun a chhanhim thei tih kan hria a. Amaherawhchu, chutih rual chuan Kristian unaute hnêna “thlarau lam thilpêk eng emaw” pêk theihna hun remchâng dapin, Paula entawn chu kan tum tlat bawk a ni.—Rom 1:11, 12; 10:13-15 chhiar rawh.
11. Engtin nge chanchin ṭha hril tûr leh kan Kristian unaute tichak tûra kan mawhphurhna chu kan thlîr ang?
11 He Kristian thiltih pahnihah hian khawi hi nge pawimawh zâwk? Chutiang zawhna zawh chu sava chungchânga: A thla pahnihte zîngah hian a khawi lam hi nge pawimawh zâwk? tia zawh ang deuh a ni. A chhânna chu a chiang sa reng a. Sava chuan ṭha taka a thlawh theih nân a thla pahnih chu a mamawh ve ve si a. Chutiang bawkin, Kristiante anga Pathian hnêna kan rawngbâwlna hlen chhuak thei tûr chuan, a pahniha kan tel a ngai a ni. Chuvângin, chanchin ṭha hril tûr leh kan Kristian unaute tichak tûra kan mawhphurhna pahnihte hi inkûngkaih lo anga ngaih ai chuan, tirhkoh Petera leh Paula te thlîr dân ang chiahin—mawhphurhna in belhbawm tlat angin—kan thlîr zâwk a ni. Eng kawngin nge?
12. Engtin nge Jehova kuta hmanrua ang kan nih theih?
12 Chanchin ṭha hriltu kan nih angin, Pathian Lalram thuchah phûrawm tak nêna kan mihringpuite thinlung khawih kan tumnaah zirtîr thiamna kan neih apiang chu kan hmang a. Chutiang chuan, Krista zirtîr lo ni tûra anmahni ṭanpui theih chu kan inbeisei a ni. Mahse, kan thiamna neih apiang leh thilpêk dang engpawh chu kan Kristian unaute fuih nân ṭawngkam mi tichak thei tak leh ṭanpuina ṭangkai tak pêk nân kan hmang bawk a; chu chu Pathian khawngaihna târ lanna a ni. (Thuf. 3:27; 12:25) Chutiang kawng chuan, Krista zirtîr ni reng tûra anmahni ṭanpui theih chu kan inbeisei a. Thu hrilhna leh ‘rawng inbâwlsak tawnna’ thiltih pahnihah hian, Jehova kuta hmanrua ang nih theihna chanvo ropui tak kan nei a ni.—Gal. 6:10.
“Inlainat Tawn Ṭheuh Rawh U”
13. ‘Rawng kan inbâwl tawn’ loh chuan eng thil nge thleng ang?
13 Paula chuan a Kristian unaute chu: “Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula,” tiin a fuih a ni. (Rom 12:10) Dik takin, unaute kan lainatna chuan Pathian khawngaihna enkawltu anga thinlung zawng zawnga rawng bâwl tûrin min tur a. Setana’n ‘rawng inbâwlsak tawnna’ lakah min dan theih chuan, kan inpumkhatna a tichhe thei tih kan hria a ni. (Kol. 3:14) Inpumkhatna a awm loh chuan, thu hrilhnaah ṭhahnemngaihna kan nei lo vang. Setana chuan sava anga min perhthlâk nân kan thla lehlam chauh a tihnat a ngai tih a hre chiang hle a ni.
14. ‘Rawng inbâwl tawnna’ chu tute’n nge hlâwkpui? Entîrna pe rawh.
14 ‘Rawng inbâwl tawnna’ chu Pathian khawngaihna dawngtute chauh ni lovin, a pe chhuaktute pawhin an hlâwkpui a ni. (Thuf. 11:25) U.S.A. ram Illinois states-a awm nupa tuak khat, Ryan-a leh Roni-i te hi entîr nân han hmang ta ila. Hurricane Katrina thlipuiin Thuhretute in a za têl a nuaichhia tih an hriat khân, unaute an hmangaihna chuan an hna thawh lai bânsan tûrin a chêttîr a, an in hralhin, motor-a hnuh kal theih in hlui chu leiin, an thawm ṭhat hnuah, kilometer 1,400-a hla Louisiana-ah chuan an zin ta a ni. Chutah chuan an unaute ṭanpuiin an hun te, an tha leh zung te, leh an thil neih te pein kum khat ai tam an awm a. Kum 29 mi, Ryan-a chuan: “Chhawmdâwl hnaa telna chuan Pathian min hnaih lehzualtîr a. Jehova’n a mite a enkawl dân ka hmu a ni,” a ti. Ani chuan: “Unaupa upa zâwkte nêna thawh tlânna chuan unaute ngaihsak dân nasa takin min zirtîr a. Jehova inawpna pâwlah hian keini naupang zâwkte tân tih tûr tam tak a awm tih ka hre chhuak bawk,” tiin a sawi belh a ni. Kum 25 mi, Roni-i chuan: “Mi dangte ṭanpuinaa ka tel ve theih avângin ka lâwm hle a. Tûn hma zawng aia hlim zâwk niin ka inhria. Hun lo kal zêl tûrah, he thiltawn ropui tak aṭang hian hlâwkna ka la têl zêl dâwn tih ka hria a ni,” a ti ve bawk.
15. Pathian khawngaih enkawltu nih zawm zêlna tûrin chhan ṭha eng nge kan neih?
15 Dik takin, chanchin ṭha hril tûr leh kan Kristian unaute tichak tûra Pathian thupêk zawmna chuan mi zawng zawng tân malsâwmna a thlen a. Pêk chhuahna chauhvin min neihtîr theih rilru chhûngrila hlimna kan neih laiin kan ṭanpuina dawngtute chu thlarau lama tih chak an ni thung a ni. (Tirh. 20:35) Kohhrana mi tinte chuan mi dangte hmangaih taka an ngaihsak hian, kohhran pumah innêlna a awm chho a ni. Chu bâkah, hmangaihna leh lainatna kan inlantîr tawnna chuan Kristian dik kan nihzia a târ lang bawk. Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti. (Joh. 13:35) Pathian Jehova’n ṭanpui ngaite tihchak a duhna chu lei lama a chhiahhlawhte nuna a lan hian, chu chuan a bul berah min ngaihsaktu kan Pa, Jehova chawimawina a thlen a ni. Chuvângin, kan thilpêk dawn chu “Pathian khawngaihna tinrêng enkawltu ṭhate angin, . . . rawng inbâwl tawn ṭheuh” nâna hman chhan tûr kan va nei ṭha tak êm! Chutiang chuan i hmang zêl ang em?—Hebrai 6:10 chhiar rawh. (w09 1/15)
Kan Hre Chhuak Em?
• Eng kawngin nge Jehova chuan a chhiahhlawhte chu a tihchak?
• Eng nge kawltîr kan nih?
• Kan Kristian unaute rawng kan bâwlsak theih dân kawng ṭhenkhat chu eng nge ni?
• ‘Rawng inbâwl tawnnaah’ kan thilpêk dawn hmang zawm zêl tûrin engin nge min chêttîr ang?
[Zirlai Atâna Zawhnate]