Jehova Thu Chu A Nung

Thu Puan Bu Aṭanga Thu Pawimawh Hrilhfiahna—I

TIRHKOH upa tawh tak Johana chuan Patmos thliarkâra a tân laiin, inlârna inzawm 16 lai a dawng a. Chûng inlârnaahte chuan—kum 1914-a Pathian Lalram vâna din a nih aṭanga Krista Kum Sâng Rorêl tâwp thlêng huaptu Lalpa nî chhûnga Pathian Jehova leh Isua Krista te thil hlen chhuah tûr chu a hmu a ni. C.E. 96 vêla Johana ziah Thu Puan bu hi, chûng inlârnate chanchin phûrawm takte a ni.

Tûnah chuan Johana dawn inlârna a hmasa lam pasarih chuanna, Thu Puan 1:1–12:17-a thu pawimawhte chu ilo ngaihtuah ang u. Chûng inlârna chu tûn lai khawvêla thilthlengte chungchâng leh nakin lawka Jehova thil tih tûrte chungchâng a nih avângin, kan ngaihven a ni. Rinna nêna hêng inlârna chanchin chhiartute chu thlamuan leh tihchak an ni ṭhîn.—Heb. 4:12.

“BERAM NO” CHUAN CHHINCHHIAHNA PASARIH ZINGA PARUKTE CHU A PHELH

(Thup. 1:1–7:17)

A hmasain, Johana chuan chawimawia awm Isua Krista chu a hmu a, ‘lehkhabuaa ziak a, kohhranho pâwl sarihte hnêna a thawn’ tûr thuchahte chu a dawng a ni. (Thup. 1:10, 11) Vâna lalṭhutphah lo inhûngna inlârna chuan a zui a ni. Lalṭhutphaha Ṭhua kut ding lamah chuan lehkhabu chhinchhiahna pasariha chhinchhiah tlat chu a awm a. ‘Lehkhabu hawng tlâka’ chu tudang ni lovin, “Sakeibaknei, Juda hnama mi,” a nih loh leh, “Berâm No . . . ki pasarih leh mit pasarih nei” chu a ni.—Thup. 4:2; 5:1, 2, 5, 6.

Inlârna pathumna chuan ‘Berâm Novin’ chhinchhiahna hmasa parukte, a mal mala a phelh laia thilthlengte chu a târ lang a. Chhinchhiahna parukna a han phelh chuan, lîr nasa takin a lo nghîng a, thinurna ni ropui tak chu a lo thleng a ni. (Thup. 6:1, 12, 17) Mahse, a dawta inlârna chuan mi 1,44,000-te chhinchhiah zawh an nih thlenga ‘lei thli pali chelha lei kil lia ding vântirhkoh pali’ a târ lang a. Chhinchhiahna dawng lo “mipui tam tak” chu ‘lalṭhutphah hmaah leh Berâm No hmaah an ding a ni.’—Thup. 7:1, 9.

Bible Chungchânga Zawhnate Chhânna:

1:4, 5; 3:1; 4:5; 5:6—“Thlarau pasarih” tih hian eng nge a kawh? Number pasarih chuan Pathian thlîrna aṭanga famkimna a kâwk a. Chuvângin, “kohhran pasarihte” hnêna thuchah chu a tâwpah chuan khawvêl puma kohhran 1,00,000 aia tama awm khâwm Pathian mi zawng zawngte tân a ni. (Thup. 1:11, 20) Pathian Jehova chuan thlarau thianghlim chu a thil tih tum ang mil zêla a pêk avângin, “thlarau pasarih” hian he hrilh lâwkna ngaihventute hnêna hriatthiamna leh malsâwmna pêkna kawnga thlarauvin a kima hna a thawhzia a entîr a ni. Thu Puan bu chu thil pasarih zêl a indawta sawihona niin a lang. Heta number pasarih hian famkimna a entîr a, lehkhabu chuan “Pathian thurûk” chu a “kim,” a nih loh leh a thlen famkim tûr chungchâng a sawi a ni.—Thup. 10:7.

1:8, 17—“Alpha leh Omega” leh “Hmasabera leh Hnuhnûngbera” tih nihnate hi tu put nge ni? “Alpha leh Omega” tih nihna hi Jehova sawina a ni a, a hmaah Pathian engkimtithei a awm lo va, a hnuah pawh a awm dâwn lo tih sawi uarna a ni. Ani chu “a Bul leh a Tâwp” a ni. (Thup. 21:6; 22:13) Thu Puan 22:13-ah Jehova chu a hma leh a hnua tumah a awm loh avânga “a Hmasaber leh a Hnuhnûngber” anga sawi ni mah se, Thu Puan bung hmasa bera târ lan “Hmasabera leh Hnunghnûngbera” tih hian Isua a kâwk a ni. Ani chu thi thei lo thlarauva kaih thawh hmasak ber leh Pathian Jehova ngeiin a kaih thawh hnuhnûng ber a ni.—Kol. 1:18.

 2:7—‘Pathian Paradis’ tih hi eng nge ni? Hêng thute hi hriak thih Kristiante hnêna sawi a nih avângin, heta paradis tih hian Pathian awmna vâna paradis ang dinhmun chu a kâwk ngei ang. Hriak thih mi rinawmte chu “Nunna Thinga mi” eitîr an ni ang a. Ani chuan thih theih lohna an chang ang.—1 Kor. 15:53.

3:7—Engtik khân nge Isua’n “Davida chabi” a dawn a, engtin nge chu chabi chu a hman? C.E. 29-a baptisma a chan khân, Isua chu Davida thlah Lal ni tûra Ruat a ni a. Amaherawhchu, Isua chuan C.E. 33-a vâna Pathian ding lama chawimawi a nih hma chuan Davida chabi chu a dawng lo. Chutah chuan Davida Lalram zawng zawng chu a chang kim ta a ni. Chuta ṭangin, Isua chuan Lalram nêna inkûngkaih rawngbâwlna chanvote hawn nân a chabi chu a hmang a. Kum 1919-ah Isua chuan “Davida chabi” chu “bawi rinawm, fing tak” hnêna kawltîrin, “a neih zawng zawng” chunga hotuah a siam a ni.—Is. 22:22; Mt. 24:45, 47.

3:12—Eng nge Isua “hming thar” chu? He hming hian Isua hna leh chanvo chelh thar nên inkûngkaihna a nei a. (Phil. 2:9-11) Chu hming chu Isua hriatthiam angin tuman hre thiam lo mah se, Isua chuan vân rama a unau rinawmte chungah ziakin, inlaichînna ṭha lehzual a neihpui a ni. (Thup. 19:12) Anni chu a chanvo chan ṭhenkhat a sem hial bawk a ni.

Kan Zir Tûrte:

1:3. “A hun [Setana khawvêl chunga Pathian rorêl hun] chu a hnai tawh” a, chuvângin Thu Puan bua thute chu hriatthiam a, chu mi mila thiltih chu a hmanhmawhthlâk a ni.

3:17, 18. Thlarau lama hausa tûr chuan, Isua hnêna mi “rangkachak meia tihthianghlim” tawh chu kan lei a ngai a. Chu chu, thil ṭha tih ngah kan tum tûr tihna a ni. (1 Tim. 6:17-19) Krista zuitu anga kan nihna târ langtu, ‘puan vârte’ chu kan sin a ngai a, thlarau lam thil hriatthiamna nei tûrin, Vênnainsâng magazine-a tihchhuah zilhna ang chi, “mit na hlo” kan hman a ngai bawk a ni.—Thup. 19:8.

7:13, 14. Upa 24-te chuan an vân lam ropuina chang tawh mi 1,44,000-te ai chu an awh a, chutah chuan lal ang mai ni lovin, puithiam ang pawhin rawng an bâwl a. Anni chu hmân lai Israel puithiam, Lal Davida’n hmun 24-a a ṭhen hrante chuan an lo entîr lâwk a ni. Upa zînga pakhat chuan Johana hnênah mipui tam tak nihna chu a puang chhuak a. Chuvângin, hriak thih Kristiante thawhlehna chu 1935 hma lamah khân a inṭan ngei ang. Engvângin nge? A chhan chu, chu mi kumah chuan leia Pathian chhiahhlawh hriak thihte hnênah mipui tam takte nihna dik tak chu hriattîr a nih vâng a ni.—Lk. 22:28-30, Thup. 4:4; 7:9.

CHHINCHHIAHNA PASARIHNA PHELH A NIH CHUAN TAWTAWRAWT PASARIH HAM A NI

(Thup. 8:1–12:17)

Berâm No chuan chhinchhiahna pasarihna chu a phelh a. Vântirhkoh pasarihte chuan tawtawrâwt pasarih an dawng a. An zînga parukte chuan tawtawrâwt an hâm a, mihring “hmun thuma ṭhena hmun khat”—Kristianna ram—chunga rorêlna chu puan chhuah a ni. (Thup. 8:1, 2, 7-12; 9:15, 18) Chu chu inlârna panganaa Johana hmuh chu a ni. A dawta inlârnaa telin, Johana chuan lehkhabu tê tak tê chu a ei a, biak in chu a teh a. Tawtawrâwt pasarihna ham a nih hnu chuan, aw ring tak chuan: “Khawvêl ram chu kan Lalpa leh a Krista ram a lo ni ta,” tiin a puang chhuak a ni.—Thup. 10:10; 11:1, 15.

Inlârna pasarihna chuan Thu Puan 11:15, 17-a târ lan thute chu a sawi chipchiar lehzual a. Vânah chhinchhiahna ropui tak hmuh a ni a. Vân lam hmeichhia chuan fapa a hring a. Vân aṭang Diabola chu paihthlâk a ni bawk. Vân lam hmeichhe chunga a thinur avângin, “a thlah la awm” chu do tûrin a kal ta a ni.—Thup. 12:1, 5, 9, 17.

Bible Chungchânga Zawhnate Chhânna:

8:1-5—Engvângin nge vân chu a reh ṭhuap a, a hnuah leiah eng nge paih thlâk a nih? Leia awm “mi thianghlimho ṭawngṭainate” chu ngaihthlâk a nih theih nân vân chu entîr neiin a reh ṭhuap a. Chu chu khawvêl indopui hmasa tâwp lamah a ni. Hriak thih Kristian tam takin  an lo inbeisei angin, Jentailte Nî a kin chuan anni chu vânah an lâwn lo. Indopui chhûng chuan hun harsa tak an tawng a ni. Chuvângin, kaihhruaina dîlin nasa takin an ṭawngṭai a. An ṭawngṭaina chhân nân, hriak thih Kristiante rawngbâwlnaa tithathotu tûr entîr nei mei chu vântirhkoh chuan leiah a paih thla a ni. Anni chu tlêm hle mah se, khawvêl pumah thu hrilhna beihpui an thlâk a, chu chuan Pathian Ram chu mite sawi hlawh ber a nihtîrin, chu chuan Kristianna ram chu a tikâng a ni. Bible aṭanga vaukhânna kâwlphe te a chhuak a, Bible thutak êng chu hriattîr a ni a; tin, lîrnghîngin inte a tih nghîn ang chiahin sakhaw dik lo chu a lungphum aṭangin a sâwinghîng a ni.

8:6-12; 9:1, 13; 11:15—Engtik khân nge vântirhkoh pasarite chu tawtawrâwt hâm tûra an inbuatsaih a, engtikah leh engtin nge ham a nih? Tawtawrâwt pasarihte hâm tûra inbuatsaihnaah chuan, kum 1919 aṭanga 1922 chhûnga leia Johana ang pâwl tihchak tharte hnêna kaihhruaina pêk a tel a ni. Chutih laia hriak thihte chu thu hrilh rawngbâwlna huaihawt leh tûrin leh lehkha chhutna khâwl leh inte siam ṭha tûrin an buai hle a. (Thup. 12:13, 14) Tawtawrâwt hamna chuan vântirhkohte ruala Pathian mite’n Setana khawvêl chunga Pathian Jehova rorêlna huaisen taka an puan chhuahna a entîr a ni. Chhinchhiah tlâk takin, chu chu kum 1922-a Cedar Point, Ohio-a inkhâwmpuiah a inṭan a, chu chuan hrehawm nasa tak a lo thlen thleng a awh ang.

8:13; 9:12; 11:14—Eng kawngin nge tawtawrâwt hnuhnûng pathumte hamna chu “chungpikna” a nih? Tawtawrâwt hmasa palite hamna chu Kristianna ram thlarau lama a thihna dinhmun hailangtu a nih laiin, a hnuhnûng pathumte chu thilthleng engemaw bîk chungchânga chungpikna nên a inkûngkaih a ni. Tawtawrâwt pangana hamna chu Pathian mite kum 1919-a chechâng lova an awmna “leilâwt khuarkhurum” aṭanga chhuahna leh Kristianna ram chunga hremna hri ang lo ni ta, an thu hrilh hna nên a inkûngkaih a ni. (Thup. 9:1) A parukna chu mihring chanchina sakawr chung chuangho râl beihna ropui ber leh kum 1922-a inṭan khawvêl pum huapa chanchin ṭha hrilhna chungchâng a ni a. Tawtawrâwt tâwpna ber chu Messia Lalram pianna nên a inkûngkaih a ni.

Kan Zir Tûrte:

9:10, 19. “Bawi rinawm, fing tak” tihchhuah Bible ṭanchhan lehkhabua thu awmahte chuan thuchah mi tina thei tak a tel a ni. (Mt. 24:45) He thuchahte hi mi tihnat theihna nei khau-in a neih “khawmualkaikuang mei ang” leh sakawr meia ‘rûl ang’ a ni. Engvângin nge? Hêng lehkhabute hian Jehova “phuba lâk nî” a vaukhân vâng a ni. (Is. 61:2) A sem chhuahnaah i huaisenin, ṭhahnem i ngai ang u.

9:20, 21. Kristian ni lova inchhâl rama awm mi rilru ṭha tam tak chuan kan thu puan chhuah chu ṭha takin an chhâng lêt a. Amaherawhchu, mi “tihhlum bângte” anga sawi Kristianna rama mi ni lote a huhova an inleh chu kan beisei lo. Mahse, rawngbâwlnaah kan bei fan fan a ni.

12:15, 16. “Lei”—Setana khawvêla thilte, a nih loh leh ram hrang hranga sawrkârte—chuan zalên taka Pathian biak theihna chu a keng kawh a ni. Kum 1940 chho bâwr vêl aṭanga inṭanin, chûng sawrkârte chuan “drakon-in a kâ ata a pik chhuah [tihduhdahna ] lui chu a lem zo” a ni. Dik takin, Jehova chuan a duh hunah, a duhzâwng hlen chhuak tûrin sawrkâr thuneitute chu a thunun thei a ni. Chuvângin, Thufingte 21:1 chuan inâwm takin: “Lal thinlung chu LALPA kutah a awm a, tui luanna kawng angin, a duh duhnaah a tikawi ṭhîn,” a ti. Hei hian Pathian kan rinna chu a tichak tûr a ni. (w09 1/15)