Thurin Darh Zau Tak Chu

“Ka mumangah chuan hremhmunah ka lo tla ṭhîn a! Chu meidîlah chuan paih thlâk ka lo niin, ka lo au chhuak tuar tuar ṭhîn a; tichuan, ka harh chhuak hlawl ṭhîn a ni. Thil sual tih loh ka tum ruh hle tih chu sawi kher a ngai âwm lo ve.”—Arline-i.

MI SUALTE hremna tûr hremhmun a awm i ring em? Mi tam takte chuan an ring a. Entîr nân, kum 2005 khân, Scotland rama University of St. Andrews-a scholar pakhat chuan, Scotland mi sakhaw hruaitu hmun thuma ṭhena hmun khatin Pathian hnên aṭanga ṭhen hrana awmte chuan “hremhmunah chatuana rilru hahna” an tawrh an ring tih a hmu chhuak a. Hmun ngaa ṭhena hmun khatte chuan hremhmuna awmte chuan tisa lamah hrehawm tak an tawrh an ring thung a ni.

Ram tam takah chuan, hremhmun a awm rinna chu a lâr hle a. Entîr nân, kum 2007 khân United States-a Gallup poll an tih vântlâng ngaih dân lâk khâwmna pakhatah chuan mi zaa 70 vêl chuan hremhmun a awm an ring a. Sakhuana ngaihsak lo ramahte pawh, hremhmun rinna chu a la awm tho a ni. Kum 2004-a Canada rama Gallup poll-ah chuan mi zaa 42-in hremhmun a awm an ring a. Tin, Great Britain-ah chuan mi zaa 32-te chuan hremhmun a awm ngei tih an ring bawk a ni.

Sakhaw Hruaitute Thu Zirtîr

Sakhaw hruaitu tam takte chuan hremhmun chu mei tak taka innghaisakna hmun a ni tih zirtîrna chu an thlâwp tawh lo va. Anni chuan, kum 1994-a tih chhuah Catechism of the Catholic Church-a hrilhfiahna ang chu an thlâwp tawh zâwk a ni. Chu lehkhabu chuan: “Hremhmuna inhremna lian ber chu Pathian aṭanga chatuana lâk hranna a ni,” a ti.

Chuti chung pawh chuan, mi tam takte chuan hremhmun chu rilru emaw, taksa emawa hrehawm tawrhna hmun ni tûrah an la ngai cheu va. Chu thurin thehdarhtute chuan an thurinin Bible a ṭanchhan niin an sawi. Southern Baptist Theological Seminary-a president R. Albert Mohler-a chuan hremhmun chungchânga a thurin chu: “Hei hi Bible ṭanchhan thurin a ni,” tiin chiang takin a sawi a ni.

Engvângin Nge I Thurin Chu Thil Pawimawh Tak A Nih?

Hremhmun chu a awm tak tak a nih chuan, i hlauh chu a ngai ngei ang. Amaherawhchu, chu zirtîrna chu a dik lo a nih vaih chuan, he thurin zirtîrtu sakhaw hruaitute hian a lo âwihtute chu ṭûl lo takin an rilru an tihrehawm thlâwn a ni ang a. Pathian pawh an tihmingchhia a ni ang.

He mi chungchângah hian Pathian Thu, Bible chuan eng nge a sawi? A dawta thuziak chuan Bible hmangin hêng zawhna pathumte hi a chhâng ang: (1) Mi a thih hian engtin nge a awm chiah? (2) Isua’n hremhmun chungchâng eng nge a zirtîr? (3) Hremhmun chungchânga thu dik hriatna chuan engtin nge a nghawng che? (w08 11/1)