Zirtîr Siamnaah Hlimna Hmu Rawh
Zirtîr Siamnaah Hlimna Hmu Rawh
“Chutichuan kal ula, . . . zirtîrahte siam ula.”—MT. 28:19.
1-3. (a) Engtin nge mi tam tak chuan Bible zirpui neih chungchâng chu an ngaih? (b) Eng zawhnate nge kan ngaihtuah ang?
“PAKISTAN aṭanga lo kal chhûngkaw pakhat chu chawlhkâr 11 chhûng Bible ka zirpui a,” tiin United States-a Hindi ṭawng hmang kohhrana rawngbâwl unaunu pakhat chuan lehkha a ziak a. Heti hian a ziak zawm a ni: “Sawi thui ngai lovin, ṭhian ṭha kan ni nghâl thuai a. An chhûngkuain Pakistan-ah an kîr leh thuai dâwn tih ka ngaihtuah châng chuan ka mittui a lo tling leh mai ṭhîn. Ka mittui chu anmahni nêna kan inṭhianna ka ui vâng mai ni lovin, Jehova chanchin ka zirtîr laia ka neih hlimna avâng pawh a ni tel bawk a ni,” tiin.
2 He unaunu ang hian, tuemaw Bible i zirpuina aṭangin hlimna i tawng tawh ngai em? Isua leh kum zabi khatnaa a zirtîrte chuan zirtîra siamnaah hlimna nasa tak an hmu a. Isua’n zirtîrna a pêk a hnungzuitu 70-te chu an lo kîr a, chanchin hlimawm tak an rawn pêk khân, ani chu “thlarau thianghlimah a lâwm êm êm a.” (Lk. 10:17-21) Chutiang bawkin, tûn laiah mi tam takte chuan zirtîr siamnaah hlimna nasa tak an hmu a ni. Chu chu kum 2007-a, thuchhuahtu thawk rim leh hlim takte’n a chawhruala thla tin Bible zirpui maktaduai ruk leh a chanve an neihna chuan a finfiah chiang hle.
3 Mahse, thuchhuahtu ṭhenkhat chuan Bible zirpui neihna aṭanga lo awm hlimna chu an la tawng hrih lo va. Mi dangte chuan kum hnih khat chhûng Bible zirpui an nei lo pawh a ni mai thei bawk. Bible zirpui pakhat tal neih kan tum ṭâng ṭângnaah hian eng harsatnate nge kan hmachhawn mai theih? Engtin nge chûng harsatnate chu kan hmachhawn theih ang? Tin, Isua thupêk: “Chutichuan kal ula, . . . zirtîrahte siam ula,” tih zâwm tûra theih tâwp kan chhuah hian, eng lâwmmante nge kan dawn ṭhin?—Mt. 28:19.
Kan Hlimna Tibo Thei Harsatnate
4, 5. (a) Khawvêl hmun ṭhenkhatah chuan engtin nge mi tam takin thu hrilhna chu an chhân lêt mai theih? (b) Hmun dang ṭhenkhatah chuan thuchhuahtute’n eng ang harsatnate nge an hmachhawn?
4 Khawvêl hmun ṭhenkhatah chuan, mite chuan kan thu leh hla chhuahte chu châk takin an dawng a, Bible zir pawh an phûr hle a ni. Australia ram aṭanga Zambia rama rei lo tê atâna rawng bâwla kal nupa tuak khat chuan heti hian an ziak a ni: “A chanchin kan hriatte hi a dik ngei a ni. Zambia ram chu thu hrilh nân paradis a ni ringawt. Kawtthlêra thu hrilhna chu âwihawm lo khawp a ni tlat! Mite chuan min rawn pan a, ṭhenkhat phei chuan magazine chhuak engemaw bîk takte chu min dîl a ni,” tiin. Tûn hnai mai kumah khân, Zambia rama unaute chuan Bible zirpui 200,000 aia tam an nei a—chu chu, chawlhrualin thuchhuahtu pakhatin Bible zirna pakhat aia tam an kaihruai tihna a ni.
5 Mahse, hmun dangah chuan thuchhuahtute chuan thu leh hlate sem chhuah leh Bible zirpui neih ziah chu harsa an ti mai thei. Engvângin nge? Thuchhuahtute an va lên hunah mite chu an ina an lo awm loh ṭhin vâng leh a awmte pawhin sakhuana an ngaihsak loh vâng a ni thei ang a. Anni chu sakhaw nei lo in chhûng khur aṭanga sei lian an nih vâng emaw, sakhaw dik lova awm vervêkna thiltihte an ten vâng emaw a ni thei a. Mi tam tak chu berâm vêngtu derte avângin thlarau lamah an hliam a, tihhrehawm leh tihdarhin an awm a ni. (Mt. 9:36) Chutiang mite chuan Bible sawihona neih an tîm chu a hriatthiam awm hle.
6. Ṭhenkhat chuan tlin lohna eng nge an neih mai theih?
6 Thuchhuahtu rinawm ṭhenkhat chuan an hlimna tibo thei tûr harsatna dang an hmachhawn a. Zirtîr siamnaah tûn hma chuan inhmang nasa hle ṭhîn mah se, tûnah chuan hrisêl lohna emaw, tarna emaw avângin duh angin an tel thei tawh lo va. Tin, mahnia kan insiam chawp tlin lohna dang ṭhenkhat chu han ngaihtuah bawk teh. Entîr nân, Bible zirna kaihruai tûra tling lovah inhriatna i nei em? Pathian Jehova’n Pharaoa hmaa thusawi tûra a tirh laia Mosia ang niin i inhre mai thei. Mosia chuan: “Aw LALPA, kei zawng tûn hma lamahte leh . . . [tûn] hnuah pawh hian mi ṭawnghmang thiam ka ni ve ngai lo a ni,” a ti a. (Ex. 4:10) Tling lo nia inhriatna chu hlawhtlin loh hlauhna nên a inkûngkaih hnai hle a. Zirtîrtu thiam tak kan nih loh avângin mi chu zirtîr ni tûra kan zirtîr theih loh chu kan hlau mai thei. Chutiang thil a thlen loh nân, Bible zirna kaihhruai loh law law chu kan thlang mai thei a ni. Tûna kan sawi tâk harsatnate chu engtin nge kan hneh theih ang?
I Thinlung Buatsaih Rawh
7. Isua chu a rawngbâwlnaah engin nge chêttîr?
7 Rahbi hmasa ber chu kan thinlung buatsaih hi a ni. Isua chuan: “Thinlunga khat liam chu . . . kain a sawi ṭhîn,” a ti a. (Lk. 6:45) Mi dangte ṭhatna tûr a ngaihsakna chuan Isua chu rawngbâwlnaah a chêttîr a. Entîr nân, Juda mipuite thlarau lama an retheihzia a hmuhin, “a khawngaih ta êm êm a.” A zirtîrte hnênah chuan: “Buh seng tûr a tam hle si a, . . . Buh seng tûra thawktu tûrte tîr tûrin buh Neitupa hnênah chuan ngên rawh u,” a ti a ni.—Mt. 9:36, 37.
8. (a) Eng chungchâng nge kan ngaihtuah ang? (b) Bible zirlai pakhat thusawi aṭangin eng nge kan hriat theih?
8 Zirtîr siamnaa kan tel hian, mi tuemawin Bible min zirpui tûra hun a pêk avânga kan hlâwkpui dân ngaihtuah lêt chu a ṭha hle ang. Tin, rawngbâwlnaa mi kan hmuh tûrte leh kan thuchah ken an ngaihthlâka an hlâwkpui dân tûrte ngaihtuah tel pawh a ṭha bawk ang. Nu pakhat chuan a awmna rama branch office-ah lehkha a thawn a: “Ka ina Bible min zirtîrtu Thuhretute chunga ka lâwmzia hrilh che u ka duh a ni. Zawhna tam tak ka zawh avânga ka tâna hun an hman tam ṭhin avângin, tihlunghnual châng ka nei ngei ang tih chu ka hria. Mahse, ka chungah an dawhtheihin, an thil zirte chu phur takin min hrilh ṭhîn a. Hêng mite ka tawn fuh avângin Jehova leh Isua hnênah lâwmthu ka sawi ṭhîn a ni,” tiin.
9. Eng nge Isua’n a ngaihsak a, engtin nge kan entawn theih?
9 Isua zirtîrna chu mi zawng zawngin an pawm lo ngei mai. (Mt. 23:37) Ṭhenkhat chuan engemawti chhûng chu an zui a, a hnuah a zirtîrnate hnâwlin, “amah an pâwl leh ta lo va.” (Joh. 6:66) Amaherawhchu, Isua chuan ṭhenkhatin an chhân lêt ṭhat lohna chu a thuchah kenin hlutna a nei lo tih ngaih dân neih phah nân a hmang lo. A chi theh tam tak chuan rah chhuah lo mah se, a thiltih ṭhate chu a ngaihsak tlat a ni. Ani chuan lote chu seng tûrin a êng a, chu buh seng hnaa telna aṭangin hlimna a hmu a ni. (Johana 4:35, 36 chhiar rawh.) Buh vui kâra lei châr ringawt hmuh ai chuan, keini pawhin kan thu hrilhna bial chhûnga buh seng theih tûrte hmuh chu kan tum tlat zâwk thei ang em? Chutiang beiseina kan neih theih dân chu i lo bih chiang ang u.
Seng Tumin Theh Rawh
10, 11. I hlimna neih vawng reng tûrin eng nge i tih theih?
10 Lo neitu chuan seng tumin buh chi a theh a. Chutiang bawkin, Bible zirpui ṭan tumin thu kan hril tûr a ni. Mahse, thlawhhma rawngbâwlnaa i tel reng chung pawhin, ina tawn fuh i nei tam lo emaw, i tlawhkîr neihte i tawng fuh thei lo emaw a nih chuan engtin nge ni ang? Chu chu a lunghnualthlâk hle thei a. In tina rawngbâwlna chu i tlâwmsan mai tûr a ni em? Ni lo ve! Mi tam takte chu hun rei tak aṭanga hman tawh he thu hrilh dân hmanga biak pawh an la ni reng a ni.
11 Amaherawhchu, hlimna i neih reng theih nân, kawng dang hmanga mite biak pawhna dân pawh tiamin, i thu hrilh dân chu i zauh thei ang em? Entîr nân, mite chu khawtthlêrah emaw, an hnathawhna hmunah emaw thu hrilh chhin i tum tawh em? Telephone hmangin mite chu i be theiin, Lalram thuchah i hrilh tawhte i biak zawm zêl theih nân an phone number-te chu i nei thei ang em? I rawngbâwlnaa tih ṭâng ṭângna leh insiamremna lantîrin, Lalram thuchah ṭha taka dawng duhte zawn hmuh theihna aṭanga lo awm hlimna chu i nei thei ang.
Ngaihsak Lohna Hmachhawnin
12. Kan thu hrilhna biala mi tam tak chuan sakhuana an ngaihsak loh chuan eng nge kan tih theih?
12 I thu hrilhna biala mi tam takin sakhuana an ngaihsak loh chuan engtin nge ni ang? An ngaihsak tûr thute sawiin, i thusawi dân chu i thlâk thei ang em? Tirhkoh Paula chuan Korinth khuaa a Kristian unaute hnênah: “Judate hnênah Juda mi angin ka awm ṭhîn; . . . dân nei lo te hnênah dân nei lo angin ka awm ṭhîn, Pathian dân âwih lo si lovin,” tiin. Eng nge Paula thiltum chu? Ani chuan: “Eng emaw ti tala ṭhenkhatte tal ka chhandam theihna tûrin mi zawng zawng hnênah engkim ka ti tawh,” a ti. (1 Kor. 9:20-22) Chutiang bawkin, kan thu hrilhna biala mite nêna kan pawm tlân theih tûr thute chu kan zawng hmu thei em? Sakhua ngaihsak lo mi tam takte chuan an chhûngkaw inlaichînna tihhmasâwn chu an duh a. Anni chuan an nunin a tum chu an zawng mai thei bawk a ni. Chûng mite ngaihven tûrzâwngin Lalram thuchah chu kan sawi thei ang em?
13, 14. Engtin nge zirtîr siamna aṭanga kan neih hlimna chu kan tihpun theih?
13 Mi a tam zâwkte’n an ngaihsak lohna hmunahte pawh, thuchhuahtu tam takte chuan zirtîr siamna aṭanga an hlimna chu an tipung chho a ni. Engtin nge an tih? Ṭawng dang zirin an tipung a ni. Kum 60 pêl tawh nupa tuak khat chuan China mi zirlai a sâng têlte leh an chhûngte chu an thu hrilhna bial chhûngah an awm tih an hmu chhuak a. A pasal chuan: “He mi avâng hian, China ṭawng zir tûra fuih kan ni a. Nî tin ṭawng zir nân hun sên ngai mah se, kan vêng chhûnga China mi tam takte Bible kan zirpui theih phah a ni,” tiin a sawi.
14 Ṭawng dang i zir thei lo a nih pawhin, ṭawng dang hmangte i tawh hunah chuan Good News for People of All Nations, tih lehkhabutê chu i hmang ṭangkai thei a ni. Tin, i mi tawhte hman ṭawnga tihchhuah thu leh hlate chu i nei thei bawk a. Ṭawng dang hmang leh hnam ze hrang neite be pawp tûr chuan hun sên tam leh thawh rim a ngai ngei mai. Mahse, Pathian thua awm thu bul: “Theh tam chuan a ât tam bawk ang,” tih chu hre reng ang che.—2 Kor 9:6.
Kohhran Chhûnga Mi Zawng Zawng An Tel
15, 16. (a) Engvângin nge zirtîr siamnaah kohhhran chhûnga mi zawng zawngte an tel? (b) Tarte chuan eng chanvo nge an neih?
15 Amaherawhchu, zirtîr siamna chu mi pakhat taihmâk chhuahna chungah a innghat lo. Chu ai mah chuan, kohhrana mi zawng zawngte taihmâk chhuahnaah a innghat zâwk a ni. Engvângin nge? Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti a. (Joh. 13:35) Tin, Bible zirlaite an rawn inkhâwn hian, kan zînga awm inhmangaih tawnna chuan an rilru a la ṭhîn a ni. Bible kan zirpui lai pakhat chuan: “Inkhâwma tel chu nuam ka ti hle mai. Mite chuan min lo lâwm hlawm hlê si a!” tiin a ziak a ni. Isua chuan a hnungzuitute’n an chhûngte dodâlna an tâwk thei tih a sawi a. (Matthaia 10:35-37 chhiar rawh.) Amaherawhchu, kohhran chhûngah thlarau lama “unaupate, farnute, nute, fate” tam tak an chhar dâwn tih Isua’n a tiam a ni.—Mk. 10:30.
16 A bîk takin, kan unau tar tawhte chuan kan Bible zirpuite hmasâwn tûra ṭanpuina kawngah chanvo pawimawh tak an nei a ni. Eng kawngin nge? Tar ṭhenkhat chuan anmahniin mi Bible an zirpui thei tawh lo a nih pawhin, kohhran inkhâwma an chânna pêk mi tichak thei takte chuan lo ngaithlatu zawng zawngte rinna chu a tichak a ni. An ‘felna kawng’ zawhna chanchinte chuan kohhran mawina a belhchhah a, mi rilru ṭhate chu Pathian inawpna pâwl lamah a hîp a ni.—Thuf. 16:31.
Hlauhna Kan Neihte Hnehin
17. Tling lo nia inhriatna hneh tûrin eng nge kan tih theih?
17 Tling lova inhriatna nei ta la engtin nge ni ang? Pathian Jehova’n Mosia chu thlarau thianghlim leh a thawhpui tûr, a unaupa Arona chu pein a ṭanpui tih hre reng ang che. (Ex. 4:10-17) Isua chuan Pathian thlarauvin thu hrilh rawngbâwlna kawngah min ṭanpui dâwn tih min tiam a. (Tirh. 1:8) Chu bâkah, Isua chuan thu hril tûrin mi pahnih zêlin a tîr chhuak a ni. (Lk. 10:1) Chuvângin, Bible zirna kaihhruai harsa i tih chuan, finna pe tûr che-in Pathian thlarau dîlin ṭawngṭai la, nangmah inrin tâwkna pe thei tûr che leh i ṭangkaipui theih tûr thiltawn neite chu thawhpui ang che. Jehova chuan he hna namêm lo thawk tûr hian mi pângngai tak—“khawvêl thil chak lote”—a thlang tih hriatrengna chuan rinna a tichak hle.—1 Kor. 1:26-29.
18. Bible kan zirpuite ṭanpui theih loh kan hlauhna chu engtin nge kan hneh theih ang?
18 Kan Bible zirpuite ṭanpui theih loh hlauhna chu engtin nge kan hneh theih ang? Zirtîr siamna chu, a hlawhtlin leh tlin loh chu mipakhat—a chhûmtu—chunga a innghahna ei rawngbâwl ang a ni ve lo. Zirtîr siamna chu mi pathum thawhhona a ni zâwk mah a ni. Pathian Jehova chuan a lama mi hîpin, hna pawimawh ber chu a thawk a. (Joh. 6:44) Keimahni leh kohhrana mi dangte chuan Bible zirpui chu hmasâwn tûra ṭanpui nân, zirtîr thiamna hmangin theih tâwp kan chhuah bawk a. (2 Timothea 2:15 chhiar rawh.) Tin, a zirtu chuan a thil zirte a nunpui a ngai bawk a ni. (Mt. 7:24-27) Miin a Bible zirna a chawlhsan chuan, kan bei a dawng mai thei. Bible kan zirpuite chuan duhthlanna dik an siam kan beisei a; mahse, mi tin chuan ‘Pathian hnênah mahni chanchin an sawi ṭheuh’ tûr a ni.—Rom 14:12.
Engte Nge A Lâwmman Chu?
19-21. (a) Bible zirpui neihna aṭangin eng hlâwknate nge kan dawn ang? (b) Engtin nge Pathian Jehova chuan thu hrilhnaa tel zawng zawngte chu a thlîr?
19 Bible zirna kaihhruaina chuan Lalram dah hmasa reng tûrin min ṭanpui a. Ka rilru leh thinlungah Pathian Thu, thutak chu a tuh nghet sauh bawk a ni. Engvângin nge chutiang chu a nih? Pioneer thawk mêk Barak-a chuan heti hian a hrilhfiah: “Bible zirna kaihhruaina chuan Pathian Thu zirtu ṭha zâwk a nihtîr che a. Mi tuemaw chu thiam taka ka zirtîr theih hmain, ka rinna chu ka tihchak a ngai tih ka hmu chhuak a ni,” tiin.
20 Bible zirpui i neih loh chuan, i rawngbâwlna chu Pathian hmaah a hlu lo tihna a ni em? Ni lo ve! Pathian Jehova chuan amah chawimawi nâna kan thawh rimna chu a hlut hle a ni. Thu hrilhnaa tel zawng zawngte chu “Pathian hnathawhpuite” an ni a. Amaherawhchu, kan chi theh Pathianin a ṭhantîr dân kan en a, Bible zirna kaihhruaina chuan kan hlimna chu a belhchhah a ni. (1 Kor. 3:6, 9) Pioneer thawk mêk Amy-i chuan, “Ka Bible zirpuiin hma a sâwn tih ka hmuh hian, chu mi hnêna thilpêk ropui tak—Jehova hriat theihna leh chatuana nun neih theihna—pêk chhuah nâna hman ka nih avângin, Pathian Jehova chungah nasa takin ka lâwm a ni,” a ti.
21 Bible zirpui nei tûr leh kaihruai ṭan tûra theih tâwp kan chhuahna chuan tûna Pathian rawngbâwlna ngaihsak reng tûra min ṭanpui bâkah, khawvêl thara dam khawchhuah kan beiseina chu a tinghet bawk ang. Pathian Jehova ṭanpuina nên chuan, kan thu ngaithlatute pawh chu chhandam ni tûrin kan ṭanpui thei bawk ang. (1 Timothea 4:16 chhiar rawh.) Chu chu hlim chhan tûr a va ni dâwn êm! (w09 1/15)
Kan Hre Chhuak Em?
• Eng harsatnate’n nge Bible zirna kaihruai tûrin mi ṭhenkhat chu dang mai thei?
• Kan thu hrilhna biala mi tam takin sakhuana an ngaihsak loh chuan eng nge kan tih ang?
• Bible zirpui neihna aṭangin eng lâwmman nge kan dawn?
[Zirlai Atâna Zawhnate]