Anni Chuan ‘Beram No Kalna Apiangah An Zui Zel’
Anni Chuan ‘Beram No Kalna Apiangah An Zui Zel’
“Chûng chu Berâm No a kalna apianga zuitute chu an ni.”—THUP. 14:4.
1. Isua zirtîr dikte chuan amah zui chu engtin nge an ngaih?
ISUA’N rawng a bâwl ṭanna chu kum hnih leh a chanve vêl a ni tawh a, ani chuan ‘inkhâwmna in, Kapernaum khuaah a zirtîr a.’ A thusawi chu mak an tih êm avângin, a zirtîr “tam tak an kal bo va, amah an pâwl leh ta lo va.” Isua’n a tirhkoh 12-te pawh chu kal bo ve an duh leh duh loh a zawh chuan, Simon Petera chuan: “Lalpa, tu hnênah nge kan kal ang? Nangin chatuana nunna thu i nei alâwm. Nang Pathian mi thinghlim chu i ni tih kan âwih ta a, hriat pawh kan hria e,” tiin a chhâng a ni. (Joh. 6:48, 59, 60, 66-69) Zirtîr dikte chuan Isua zui chu an bansan lo. Thlarau thianghlima hriak thih an nih hnu pawhin, Isua kaihhruaina hnuaiah an la intulût zawm zêl a ni.—Tirh. 16:7-10.
2. (a) Tunge “bawi rinawm, fing tak” a nih loh leh “sum enkawltu rinawm” chu? (b) Engtin nge bâwih chuan ‘Berâm No kalna apianga zuinaah’ hming ṭha tak a neih?
2 Tûn lai hriak thih Kristiante chungchângah eng nge sawi theih awm? “[A] lo kal lehna leh khawvêl tâwpna chhinchhiahna” chungchâng a hrilh lâwknaah, Isua chuan “bawi rinawm, fing tak” a nih loh leh “sum enkawltu rinawm” anga awm, leia thlarauva hriak thih a hnungzuitu pâwl chu a sawi lang a. (Mt. 24:3, Lk. 12:42) A pâwl angin, chu bâwih pâwl chuan ‘Berâm No kalna apianga zuinaah’ hming ṭha tak a nei a ni. (Thu Puan 14:4, 5 chhiar rawh.) Hriak thihte chuan khawvêl sakhaw dik lo lalram, “Babulon Khaw Ropui” thurinte leh thil chînte laka intibawlhhlawh lovin, thlarau lamah nula thianghlim an ni reng a. (Thup. 17:5) “An kâah” thurin dik lo a chhuak lo va, Setana khawêl lakah “sawisêl bo an ni” reng a ni. (Joh. 15:19) Leia hriak thih a la bângte chuan Berâm No chu vânah an la “zui ang.”—Joh. 13:36.
3. Engvângin nge bâwih pâwl kan rin chu a pawimawh?
3 Isua chuan bâwih rinawm leh fing chu a thil ‘neih chunga hotuah’ a ruat a, chu chu bâwih pâwla mite chuan ‘a hun apiangah an chaw chan tûr an semsak” tûr tihna a ni. Ani chuan bâwih chu “a neih zawng zawng chungah hotuah” a ruat bawk a. (Mt. 24:45-47) Hêng a ‘thil neihah’ hian “berâm dang” “mipui tam tak” pung chho zêl chu an tel a ni. (Thup. 7:9; Joh. 10:16) Hriak thih mi mal tinte leh ‘berâm dangte’ chuan an chunga ruatte chu an ring tûr a ni lâwm ni? Bâwih pâwlin kan rin a phu chhan tam tak a awm a. A chhan pawimawh tak pahnihte chu: (1) Jehova’n bâwih pâwl chu a rin vâng leh (2) Isua pawhin bâwih pâwl chu a rin vâng a ni. Pathian Jehova leh Isua Krista’n bâwih rinawm leh fing tak an rinzia târ langtu chu i lo bih chiang ang u.
Jehova’n Bâwih A Ring
4. Engvângin nge bâwih rinawm leh fing takin a pêk thlarau lam chaw chu kan rin theih?
4 A hun taka bâwih rinawm fing takte thlarau lam chaw ṭha tak pêktîr theitu chu lo ngaihtuah teh. Pathian Jehova chuan: “Fing taka awmtîr chein i kalna tûr kawng chu ka entîr ang chia: ka mita eng reng chung chein rem ka ruatsak zêl ang che,” tiin a sawi a ni. (Sâm 32:8) Ni e, Pathian Jehova chuan bâwih chu a kaihruai a. Chuvângin, bâwih hnên aṭanga Bible hriatthiam theihna, hriatthiamna, leh kaihhruaina kan dawnte chu chu kan ring tlat thei a ni.
5. Pathian thlarauvin bâwih pâwl chu thiltihtheihna a pe tih engin nge târ lang?
5 Jehova chuan bâwih rinawm pâwl chu thlarau thianghlimin mal a sâwm bawk a. Jehova thlarau chu a hmu thei lo mah ila, a dawngtute chunga hna a thawh chu mi dangte’n an hmu thei a ni. Pathian Jehova, a Fapa, leh Lalram chungchâng khawvêl pum huapa hrilhnaa bâwih rinawm leh fing takin an thil hlen chhuah chu han ngaihtuah teh. Jehova betute chuan Lalram chanchin chu ram leh thliarkâr 230 chuangah phûr takin an puang chhuak a. Chu chu, Pathian thlarauvi’n bâwih pâwl thiltihtheihna a pe tih târ langtu hnial rual loh chu a ni lâwm ni? (Tirhkohte 1:8 chhiar rawh.) Khawvêl puma Jehova mite thlarau lam chaw a hun taka pêknaah, bâwih pâwl chuan thutlûkna pawimawh tak tak an siam ngei ang. Chutiang thutlûknate siamna leh kenkawhnaah bâwih chuan hmangaihna te, thuhnuairawlhna te, leh thlarau rah hmêlhmang dangte chu a târ lang a ni.—Gal. 5:22, 23.
6, 7. Jehova’n bâwih rinawm pâwl chu engtiang khawpin nge a rin?
6 Jehova’n bâwih rinawmte a rinzia hriatthiam nân, an hnêna a thutiam hi ngaihtuah rawh. Tirhkoh Paula chuan: “Tawtawrâwt chu a ri dâwn si a, chutichuan mitthite chu ṭawih thei lova kaihthawhin an awm ang a, keini pawh tihdanglamin kan awm tawh ang. He ṭawih thei hian ṭawih theih lohna a sin tûr a ni a, he thi thei pawh hian thih theih lohna a sin bawk tûr a ni,” tiin a ziak a ni. (1 Kor. 15:51-53) Krista zuitu hriak thih, rinawm taka Pathian rawng bâwl a, mihring taksa ṭawih thei thihsan tawhtute chu chatuan nunna neia thlarau thilsiam mai aia ropui zâwka kaihthawh an ni. Anni chu thih theih lohna—tâwp chin nei lo leh tihchhiat theih loh chu pêk an ni a. Chu bâkah, taksa ṭawih thei lo leh mahnia inchâwm chho zêl ni ngei tûr chu an dawng a ni. Thu Puan 4:4 chuan chûng tho lehte chu an lua rangkachak lallukhum khuma lalṭhutphaha ṭhu angin a târ lang a. Hriak thihte chu lal ropui tak nihna chuan a hmuak a. Mahse, Pathianin hriak thihte a rinzia târ langtu dang pawh a la awm a ni.
7 “Berâm No nupui neih chu a hun ta si a, a nupui pawh a inpeih tawh . . . puan zai sîn fai tak vâr tak sin an phal a, puan zai sîn chu mi thianghlimte thiltih fel a ni si a,” tiin Thu Puan 19:7, 8 chuan a sawi. Jehova chuan hriak thih Kristiante chu nakina a Fapa nupui tûr atân a thlang a. Ṭawih thei lo, thi thei lo, lal chhûngkua, leh “Berâm No nupui” nih chu thilpêk ropui tak a va ni êm! Chu chu, ‘Berâm No a kalna apianga zuitu,’ hriak thihte Pathianin a rinzia târ langtu phûrawm tak a ni.
Bâwih Chu Isua’n A Ring
8. Engtin nge Isua chuan thlarau lama hriak thihte a rinzia a târ lan?
8 Isua’n a hnungzuitu, thlarauva hriak thihte a ring pumhlûm ṭhak a ni tih târ langtu eng nge awm? Leia a nun tâwp dâwn zân khân, Isua chuan a tirhkoh rinawm 11 te hnênah thu a tiam a. An hnênah chuan: “Thlêmna ka tawh chhûng zawng nangni mi awmpuitu in ni a; tichuan ka rama ka dawhkâna in eia in bâr theihna tûrin, ka Pain ram mi ruatsak angin ram ka ruatsak che u a ni; tichuan Israel hnam sâwm leh hnam hnih rorêlsakin lalṭhutphahah in la ṭhu ang,” a ti a ni. (Lk. 22:28-30) Chutih laia mi 11-te nêna a siam thuthlung chuan mi 1,44,000, Kristian hriak thih zawng zawngte pawh a huam tel dâwn a ni. (Lk. 12:32; Thup. 5:9, 10; 14:1) Isua’n anni chu ring lo ta se chuan, an chan ho tûr thuthlung chu a siam dâwn em ni?
9. Krista thil ‘neih zawng zawngah’ chuan engte nge tel?
9 Chu bâkah, Isua Krista chuan bâwih rinawm fing tak chu “a neih zawng zawng”—leia Lalram hmakhua engkim chunga hotuah a ruat a. (Mt. 24:47) Hêng a thil neihte zîngah hian Jehova Thuhretute hmunpui ber leh chuta thil neih te, khawvêl pum puia branch office-te leh chuta thil neih te, Assembly Hall leh Kingdom Hall te, leh khawvêl pum puia Lalram thu hrilh leh zirtîr hna pawh a tel bawk a ni. Miin a mi rin loh chu a thil neih hlu zawng zawngte a kawltîrin, a hmantîr dâwn em ni?
10. Isua Krista chu hnungzuitu, hriak thihte hnênah a awm tih engin nge târ lang?
10 Vâna a lâwn chhoh hma lawkin, tho leh Isua chu a zirtîr mi rinawmte hnênah a inlâr a, he thu hi a tiam a ni: Ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tih hi. (Mt. 28:20) He thutiam hi hlen a ni em? Kum 15 kal ta chhûng khân, khawvêl puma Jehova Thuhretute kohhhran chu 70,000 vêl aṭangin 1,00,000 aia tamin a ṭhang chho va—zaa 40 aia tamin a pung chho a ni. Zirtîr engzâtin nge belhchhah? Zirtîr maktaduai 4 leh nuai 5 dâwnte chuan kum 15 kalta chhûng khân baptisma an chang a—chu chu chawlhrualin nî tin 800 aia tamin baptisma an chang ang a ni. Hêng pun chhohna mak takte hi Krista chu a hriak thih hnungzuitute kohhran inkhâwmnaah a awmin, an zirtîr siam hna chu a ṭanpui tih târ langtu chiang tak a ni.
Bâwih Chu A Rinawmin, A Fing
11, 12. Engtin nge bâwih chuan a rinawmzia leh a finzia a târ lan?
11 Pathian Jehova leh Isua Krista chuan bâwih rinawm leh fing an rin pumhlûm ṭhak avângin, keini pawhin chutiang chuan kan ring ve tûr a ni lâwm ni? Tihah chuan, bâwih chuan a hna thawk tûra a rinawmzia a târ lang tawh si a. Entîr nân, Vênnainsâng magazine chu kum 130 vêl lai tihchhuah a ni tawh a. Jehova Thuhretute inkhâwm te, inkhâwmpuite chuan thlarau lamah min tichak chhunzawm zêl bawk a ni.
12 Bâwih rinawm chuan inâwm lo takin thil a ti lo va, Pathian Jehova a hma khalh lo va, Pathian kaihhruaina a chian hunah a zawm nghâl vat ṭhin avângin a fing bawk a ni. Entîr nân, sakhaw dik lo hruaitute chuan khawvêl mite nungchang chu ngawi reng chungin an pawm, a nih loh leh thil pangngai ang maiin a lang a pauvin an pawm a; bâwih chuan anni chu Setana khawvel thang lakah vaukhânna a pe a ni. Pathian Jehova leh Isua Krista malsâwmna avângin bâwih chuan vaukhânna fing, a hun takah a pe chhuak thei a. Chuvângin, bâwih chuan kan rin a phu a ni. Mahse, engtin nge bâwih rinawm leh fing kan rinna chu kan târ lan theih ang?
Hriak Thihte’n Berâm No An Zui Rualin “Kal Ve” Rawh
13. Zakaria hrilh lâwkna angin, engtin nge bâwih rinawm leh fing chunga rinna lantîr chu thil theih a nih?
13 Bible-a Zakaria bu chuan “Juda mi” pan a, a hnêna: “I [“in,” NW] hnênah kan kal ve dâwn e,” titu “mi sâwm” te chungchâng chu a sawi a. (Zakaria 8:23 chhiar rawh.) Heta “Juda mi” anga sawi hi “in hnenah” tia biak a nih avângin, chu pa chu mi pakhat chauh sawina ni lovin, pâwl a nih loh leh ho khat sawina a ni. Kan hunah hian, ani chuan Kristian hriak thih la bâng—“Pathian Israelte” zînga mite a entîr a ni. (Gal. 6:16) “Mi sâwm, hnam ze tinrêng aṭanga lo chhuakte” chuan berâm dang mipui tam tak a entîr bawk. Hriak thih Kristiante’n Isua kalna a pianga an zui ang chiahin, mipui tam takte chu bâwih rinawm fing tak rualin an “kal ve,” a nih loh leh anni chuan an zui ve zêl a ni. Mipui tam takte chuan ‘vân kohna changte’ ṭhian anga insawi chu an zahpui ngai tûr a ni lo. (Heb. 3:1) Isua chuan hriak thihte chu “unaute” tia koh a zak lo a ni.—Heb. 2:11.
14. Engtin nge Krista unaute hnêna rinawm taka ṭanpuina pêk theih a nih?
14 Isua Krista chuan a unaute rinawm taka kan ṭanpui hian amah kan pui ang chiahin a ngai a. (Matthaia 25:40 chhiar rawh.) A nih chuan, eng kawngin nge lei lam beiseina neite chuan Krista hriak thih unaute chu an ṭanpui theih? A bul berah chuan Lalram thu hrilh hnaa ṭanpuina hmangin a ni. (Mt. 24:14; Joh. 14:12) Leia hriak thihte chu hêng kum sâwmbi tel chhûng hian an kiam telh telh laiin, berâm dangte chu a pung chho tial tial thung a. Lei lam beiseina neite’n thu hrilh hnaa an tel a, a theih chuan hunbi kima chanchin ṭha hriltu anga rawng an bâwl hian, zirtîr siam hna hlen chhuahnaah thlarauva hriak thihte chu an ṭanpui a ni. (Mt. 28:19, 20) Kawng chi hrang hranga sum leh pai thawha he hna ṭanpui theihna remchâng awm pawh kan hmuh hmaih tûr a ni lo.
15. Bâwih hnên aṭanga a hun taka thlarau lam chaw kan dawn leh inawpna pâwl chhûnga bâwihin thutlûkna a siam chu engtin nge Kristian mi mal tinte’n kan chhân lêt ang?
15 Kristiante kan nih angin, Bible ṭanchhan thu leh hlate leh Kristian inkhâwm leh inkhâwmpui te kal tlanga bâwih rinawm fing tak pêk chhuah a hun taka thlarau lam chaw kan dawn chu engtin nge kan thlîr? Lâwm takin kan eiin, kan thil zirte chu kan nunpui em? Inawpna pâwl lama bâwih thutlûkna siamte kan chhân lêt dân chu eng nge ni? Kaihhruaina min pêkte inhuam taka zawmna chuan Jehova ruahmanna kan rinzia a târ lang a ni.—Jak. 3:17.
16. Engvângin nge Kristian zawng zawngin Krista unaute thu chu an ngaihthlâk ang?
16 Isua chuan: “Ka berâmten ka aw an hre ṭhîn, kei pawhin anni chu ka hria, anni chuan mi zui ṭhîn,” a ti a. (Joh. 10:27) Chu chu hriak thih Kristiante chungchângah a dik a ni. Anmahni hnêna “kal ve” te hi eng nge an chanchin ve le? Chûng mite chuan Isua thu an ngaithla ngei tûr a ni a. A unaute thu pawh an ngaithla ngei bawk tûr a ni. Tihah chuan, anni chu Pathian mite thlarau lam ṭhatna enkawl tûra mawhphurhna bul ber pêk an ni si a. Krista unaute thu ngaihthlâknaah chuan eng nge tel?
17. Bâwih pâwl ngaihthlâknaah eng nge tel?
17 Khawvêl pum huapa Lalram thu hrilh hna kaihruai a, huaihawttu, Governing Body chuan tûn laia bâwih rinawm leh fing ai chu a awh a. Governing Body-a member-te chu thiltawn ngah leh thlarauva hriak thih upate an ni a. Anni chu a bîk takin kan zînga “hotu” angin sawi theih an ni. (Heb. 13:7) Lei pum pui-a lalram thuchhuahtu 70,00,000 dâwn lai awmna kohhran 1,00,000 chuangah hêng hriak thih hotute hian ‘Lalpa hna ṭhahnemngai taka thawh’ tûr an nei a. (1 Kor. 15:58) Bâwih pâwl thu ngaihthlâknaah chuan, a Governing Body thlâwp tlat a tel a ni.
Bâwih Ngaithlatute Chu An Nihlawh
18, 19. (a) Bâwih rinawm leh fing thu ngaithlatute chu engtin nge malsâwm an nih? (b) Eng nge tih kan tum tlat tûr chu?
18 Ruat a nih aṭangin, bâwih rinawm leh fing tak chuan mi ‘tam takte chu felnaah’ a hruai lût a. (Dan. 12:3) Chûng zîngah chuan he khawvêl suaksual tihboralnaa dam khawchhuah inbeiseite pawh an tel a ni. Pathian hmaa fel nihna dinhmun chu malsâwmna a va ni êm!
19 Nakina, ‘khaw thianghlim Jerusalem thar [mi 1,44,000 nêna din] chu, mo a pasal ela a inchei anga peih diamin Pathian hnêna mi vân ata a lo chhuk’ hunah chuan bâwih thu ngaithlatute chuan eng nge a chan ang? Bible chuan: “Pathian ngei chu an hnênah a awm ang . . . An mit ata mitui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin a sawi a ni. (Thup. 21:2-4) A nih chuan, Krista leh thlarauva hriak thih a unau rin tlâk takte thu chu i ngaithla ang u. (w09 2/15)
Eng Nge Kan Zir?
• Jehova’n bâwih rinawm leh fing a rinzia târ langtu eng nge awm?
• Engin nge Isua Krista’n bâwih pâwl a rin pumhlûmzia târ lang?
• Engvângin nge sum enkawltu rinawm chuan kan rin a phu?
• Bâwih kan rinzia engtin nge kan lantîr?
[Zirlai Atâna Zawhnate]