Isua Thusawite Chuan I Rilru Put Hmang Thunun Rawh Se
Isua Thusawite Chuan I Rilru Put Hmang Thunun Rawh Se
“Pathian tirh chuanin Pathian thu a sawi ṭhîn.”—JOH. 3:34.
1, 2. Tlâng Chunga Isua Thusawite chu eng nên nge khaikhin theih a nih a, engvângin nge chu chu ‘Pathian thua’ innghat kan tih theih?
TLANG Chunga Isua Thusawi chu lunghlu leh lung man tam eng ai pawhin a hlu zâwk a ni. Krista thusawite chu Jehova hnên aṭanga lo chhuak a nih avângin chu chu a mak lo ve! Ama chungchâng sawiin, Isua chuan: “Pathian tirh chuanin Pathian thu a sawi ṭhîn,” a ti a ni.—Joh. 3:34-36.
2 Tlâng Chunga Thusawi chu darkâr chanve pawh a tling lo mai thei; mahse, chutah chuan Hebrai Pathian Lehkha Thu pariat aṭanga thu lâk chhuah 21 a tel a ni. Chuvângin, “Pathian Thu” liau liauva innghat a ni. Tûnah chuan, he Pathian Fapa duh tak thusawia kan hmuh thu hlu takte zînga ṭhenkhat kan nunpui theih dân chu i lo en ang u.
“I Unau Rem Zet La”
3. Isua’n a zirtîrte hnêna thinurnain a thlen theih chungchâng a vaukhân hnuah, eng zilhna nge a pêk?
3 Kristian kan nih angin, Pathian thlarau thianghlim leh a rah chhuah chu hlimna leh remna pawh tiamin kan nei a; chuvâng chuan, kan hlimin, mi dangte nêna inrema awm kan duh a ni.(Gal. 5:22, 23) Isua chuan a zirtîrte’n inremna leh hlimna an neih chu an hloh a duh loh avângin, thihna hial thlen thei hun rei tak chhûng thinurna chungchângah a vaukhân a. (Matthaia 5:21, 22 chhiar rawh.) Chu mi zawhah chuan heti hian a sawi a ni: “Chutichuan, maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thil pêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh,” tiin.—Mt. 5:23, 24.
4, 5. (a) Matthaia 5:23, 24-a chhinchhiah Isua thusawia “thil pêk” chuan eng nge a kawh? (b) Unau lungni lo nêna inremna siam chu eng ang khawpa pawimawh nge ni?
4 Heta Isua sawi “thil pêk” hian Jerusalem biak ina inthawinaa an hlan eng thil pawh a kâwk a. Entîr nân, rana inthawi chu a mite’n Pathian Jehova an biakna pêng pakhat a nih ṭhin avângin a pawimawh hle. Amaherawhchu, Isua chuan thil pawimawh zâwk tak—Pathian hnêna thil pêk hlan hmaa unau kan tihlungnih loh nêna inremna siam chu a sawi uar a ni.
5 ‘Rem la’ tih awmzia chu ‘inrem leh’ tihna a ni a. Chuvângin, Isua thusawi aṭang hian eng nge kan zir theih? Chu chu mi dangte kan cheibâwl dânin Pathian Jehova nêna kan inlaichînnaah nghawng a nei tih a ni ngei ang. (1 Joh. 4:20) Dik takin, hmân lai chuan miin mi dangte a cheibâwl ṭhat loh chuan Pathian hnêna a inthawina hlan chuan awmzia a nei lo a ni.—Mika 6:6-8 chhiar rawh.
Inngaihtlâwmna A Pawimawh
6, 7. Kan tih lungnih loh unau nêna inlaichînna ṭha neih leh kan tum hunah engvângin nge inngaihtlâwmna neih a ngaih?
6 Unau lungni lo nêna inremna siamna chuan kan inngaihtlâwmna a fiah thei a. Mi inngaitlâwmte chuan an dikna sawh ngheh nân an Kristian unaute chu an hnial buai lo vang. Chu chuan boruak ṭha lo a siam dâwn a ni—chutiang thil chu hmân lai Korinth khuaa Kristiante zîngah a thleng a. Chu mi boruak ṭha lo chungchângah, tirhkoh Paula chuan ngaihtuah titam thei tak he thu hi a sawi a ni: “Hei hi in fel zawh zân lohna pakhat chu a ni pang mai, thupawi inneih tawn ṭhin hi. Engati nge dik lo taka tihna chu in tuar zawk loh? Engati nge tihdâwnna chu in tuar zawk loh?” tiin.—1 Kor. 6:7.
7 Isua chuan kan unaute hnênah an dik lohzia leh kan dik zâwkzia pawmtîr tûrin kal rawh u a ti lo va. Kan thiltum ber chu, inlaichîna ṭha tak neih leh hi a ni. Remna siam tûr chuan kan rilru veizâwng chu dik takin kan sawi chhuak tûr a ni a. Mi dang rilru chu a na tih kan pawm a ngai bawk a ni. Tin, a thiam lo zâwk kan nih chuan, inngaitlâwm taka ngaihdam dîl chu kan duh ngei bawk ang.
‘I Mit Ding Lamin A Tihtlûk Che Chuan’
8. Matthaia 5:29, 30-a chhinchhiah Isua thute tawi têin sawi rawh.
8 Tlâng Chunga Thusawiah, Isua chuan nungchang chungchânga zilhna ṭha tak a pe a. Kan taksa pêng ṭha famkim lote hian kan chungah nghawng hlauhawm tak a nei thei tih a hria a ni. Chuvângin, Isua chuan: “I mit ding lamin a tihtlûk che chuan, kher chhuak la, paih daih rawh; i taksa apuma Gehenna-a paih ai chuan, i taksa pêng pakhat boral chu i tân a ṭha zâwk a ni. Tin, i kut ding lamin a tihtlûk che chuan, tan la, paih daih rawh; i taksa apuma Gehenna-a kal ai chuan, i taksa pêng pakhat boral chu i tân a ṭha zâwk a ni,” tiin a sawi a ni.—Mt. 5:29, 30.
9. Engtin nge kan “mit” emaw, kan “kut” emaw chuan min “tihtlûk” theih?
9 Isuan’n a sawi “mit” chuan thil engemawa rilru kan pêk ding theihna a entîr a, “kut” chu kan kuta kan thiltih nên a inkûngkaih a ni. Kan fîmkhur loh chuan hêng kan taksa pêngte hian min ‘tlûktîr’ thei a; tin, ‘Pathian nêna kan lên dunna’ chu a titâwp thei a ni. (Gen. 5:22; 6:9) A nih chuan, Pathian Jehova thuâwih lo tûra thlêma kan awm hunah, mit kher chhuah emaw, bân tan chhum emaw ang maia nasa taka chêt kan thawh a ngai a ni.
10, 11. Engin nge nungchang bawlhhlawhna pumpelh tûra min ṭanpui thei?
10 Engtin nge nungchang bawlhhlawhna lam enna ata kan mit kan lâk kian theih ang? Pathian ṭih mi Joba chuan: “Ka mit atân thuthlung ka siam a, engah nge nula ka melh ang?” tiin a sawi a ni. (Job. 31:1) Joba chu nupui nei, nungchang lama Pathian dânte bawhchhiat loh tum tlattu a ni a. Nupui pasal nei kan ni emaw, nei lo kan ni emaw pawh ni se chu chu kan rilru put hmang tûr a ni. Nungchang bawlhhlawhna pum pelh tûrin, Pathian hmangaihtute insûm theihna petu, Pathian thlarau thianghlim kan inkaihhruaitîr a ngai a ni.—Gal. 5:22-25.
11 Nungchang bawlhhlawhna pumpelh tûr chuan, heti hian kan inzâwt tûr a ni: ‘Ka mit hian lehkhabu te, TV te, a nih loh leh Internet te hmanga nungchang bawlhhlawhna lama min kaih harh chu ka phal em?’ tiin. Zirtîr Jakoba thusawite pawh hi i hre reng ang u: “Mi tin mahni châknaa hruai bo leh hîpa an awm chuan thlêmna an tâwk a ni zâwk e. Tin, châkna chuan no a pai a, sual a hring ṭhîn a; tin, sual chuan a lo puitlinin thihna a hring ṭhîn,” tihte hi. (Jak. 1:14, 15) A dik a dik chuan, Pathian hnêna inpumpêk tupawh chuan a mipat hmeichhiat pui ni lo tuemaw chu, ngaih châkna mita a “melh” chuan, mit kher chhuaka paih daih anga khaikhin theih khawpa inthlâkthlengna nasa a siam a ngai a ni.—Matthaia 5:27, 28 chhiar rawh.
12. Paula zilhna engin nge nungchang bawlhhlawh châkna do tûrin min ṭanpui thei?
12 Kan kut hman dik lohna chuan nungchang lama Jehova tehnate nasa taka min bawhchhiattîr theih avângin, nungchang thianghlimna vawn reng chu kan tum tlat tûr a ni. Chuvângin, Paula zilhna: “In taksa pêng leia awmte hi tihlum rawh u, inngaihna te, bawlhhlawhna te, hurna te, châkna sual te, duhâmna te hi (duhâmna chu milem biakna a ni si a),” tih hi kan zâwm tûr a ni. (Kol. 3:5) “Tihlum” tih ṭawngkam chuan tisa châkna bawlhhlawh kan do nasat a ngaihzia a sawi uar a ni.
13, 14. Engvângin nge nungchang bawlhhlawhna lam ngaihtuah leh thiltih pumpelh chu a pawimawh?
13 Mi chuan a nun chhanhim nân, a taksa pêng pakhat tan a inhuam ngei ang. Entîr nei ṭawngkama mit leh kut ‘paih bo’ chu Pathian Jehova duhsakna min chântîr theitu nungchang bawlhhlawhna lam ngaihtuahna leh thiltihna pumpelh nân a pawimawh hle a. Kan ngaihtuahna te, nungchang te, leh thlarau lam te vawn thianghlim chu Gehena-in a entîr chatuan boralna pumpelhna kawng awmchhun a ni.
14 Sual leh ṭhat famkim lohna rochunna avângin, nungchang thianghlim vawng tûrin thawh rim a ngai a. Paula chuan: “Ka taksa ka tichhel a, ka thuhnuaiah ka dah tawh a ni, chutilochuan mi dangte hnêna ka tlângaupui hnu pawhin eng emaw tiin keimah ngei hi paih thlâkin ka awm dah ang e,” a ti a ni. (1 Kor. 9:27) Chuvângin, nungchang chungchânga Isua zilhna nunpui chu tum tlatin, a tlanna inthawina chunga lâwmna tlâkchhamna târ langtu thilte chu i ti ngai lo vang u.—Mt. 20:28; Heb. 6:4-6.
“Pe Rawh U”
15, 16. (a) Thilphalna kawngah engtin nge Isua’n entîrna a siam? (b) Luka 6:38-a chhinchhiah Isua thusawi chuan eng awmzia nge a neih?
15 Isua thusawite leh a entîrna ṭha takte chuan thilphalna a awmtîr a. Mihring ṭha famkim lote hlâwkpui atân leia lo kalin, thilphalna nasa tak a lantîr a ni. (2 Korinth 8:9 chhiar rawh.) Ani chuan mi sualte tâna a nun pe tûrin, van lam ropuinate chu kalsan a inhuam a, chûng mi sualte zînga ṭhenkhat chuan Lalram luahpui lo niin vân lam hausaknate an chang ve bawk ang. (Rom 8:16, 17) Isua chuan a hnuaia thu a sawi hian thilphal tûrin a fuih ngei a ni:
16 “Pe rawh u, chutichuan pêkin in awm ang, ṭhahnemngai taka teh a, beng muk a, sawi muk a, liam zawih zawihin, inmal chungah an pe ang che u. In tehna ngai bawkin an tehsak leh dâwn si che u a,” tiin. (Lk. 6:38) ‘Mal chunga pe’ tih chuan Bible hun laia dâwr hmuna thil zuartu ṭhenkhatte thil tih ṭhin dân a kâwk a; nepnawi zuartute chuan thil leitute kawr fual hâk a pawn lama mi zâwk lian tak kâwnghrêna hrên chu thil ken nân an hmang a, chutah chuan thil an chhûng khat a ni. Mahni rilru puak chhuaka kan thilphalna chuan kan mamawh huna ṭha taka rulh lêt min nihtîr thei a ni.—Thur. 11:2.
17. Engtin nge Jehova chuan thilphalnaah entîrna ṭha ber a siam a, thilphalna eng ang chiin nge hlimna min thlen?
17 Pathian Jehova chuan hlim taka petute chu a hmangaihin, mal a sâwm a. Amah ngei pawhin, a Fapa piang hmasa ber “chu tupawh a ring apiang an boral loh va, chatuana nunna an neih” theih nâna pein entîrna ṭha ber a siam a ni. (Joh. 3:16) Paula chuan heti hian a ziak a ni: “Theh tlêm chuan a ât tlêm bawk ang a, theh tam chuan a ât tam bawk ang. Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin pe ṭheuh rawh se; Pathian chuan hlim taka petu a ni a hmangaih ni,” tiin. (2 Kor. 9:6, 7) Biakna dik tihhmasâwn nâna kan hun, tha leh zung, leh thil neihte pêkna chuan hlimna leh malsâwmna nasa tak min thlen ngei dâwn a ni.—Thufingte 19:17; Luka 16:9 chhiar rawh.
“I Hmaah Tawtawrâwt Hamtîr Suh”
18. Eng dinhmun hnuaiah nge kan Pa vâna mi hnêna ‘lâwmman kan neih loh vang’?
18 “In thil ṭha tihte mi hmuh atân, mihring mithmuha ti lo tûrin fîmkhur rawh u; chutilochuan in Pa vâna mi hnênah chuan lâwmman in nei lo vang.” (Mt. 6:1) Isua’n “in thil ṭha tihte” a tih hian Pathian duhzâwng nêna inmil nungchang a kâwk a ni. Ani chuan a zirtîrte hnênah ‘[an] êng chu mi mit hmuha êntîr’ tûra a lo hrilh tawh avângin, Pathian ngaihsakna thiltihte chu vântlâng hmaa tih ngai loh tûr a tihna a ni lo va. (Mt. 5:14-16) Ennawm chhuahnaa a changtute’n lem an chan angin, “mi hmuh atân” leh ngaihsân hlawh atâna thil kan tih chuan, kan Pa vâna mi hnênah ‘lâwmman kan nei lo vang.’ Chutiang rilru put hmang kan neih chuan, Pathian nêna inlaichînna hnai emaw, Lalram awpna hnuaia malsâwmna emaw chu kan nei lo vang.
19, 20. (a) Isua’n ‘englo pêk’ huna “tawtawrâwt hamtîr” lo tûra a sawi awmzia chu eng nge ni? (b) Engtin nge kut ding lamin a tih chu kut vei lam kan hriattîr loh?
19 Rilru put hmang dik kan neih chuan, Isua fuihna: “Chutichuan, mi hnêna englo i pêkin, mi vervêkten mi fak an hlawh theihna tûra, inkhâwmna inahte, kawtthlêrahte an tih ṭhin ang hian, i hmaah tawtawrâwt hamtîr suh. Tih tak meuhvin ka hrilh a che u, an lâwmman chu an hmu zo tawh,” tih hi kan zâwm ang. (Mt. 6:2) ‘Englo pêk’ te chu retheite ṭanpui nâna siam thawhlâwm a ni. (Isaia 58:6, 7 chhiar rawh.) Isua leh a tirhkohte chuan mi retheite ṭanpuinaa hman tûr sum inṭâwm an nei a. (Joh. 12:5-8; 13:29) Mi retheite ṭanpuina neih hmaa a ngial a ngana tawtawrâwt ham hmasak a nih loh avângin, Isua’n ‘englo pêk’ huna kan hmaa “tawtawrâwt hamtîr” lo tûra a sawi hian thu uarna a hmang a ni ngei ang. Juda mi Pharisaite tih angin, chûng thilpêk chu kan puangzâr tûr a ni lo. An thil pêkte chu “inkhâwmna inahte, kawtthlêrahte” an puanzâr ṭhin avângin, Isua chuan anni chu mi vervêkte tiin a ko va. Hêng mi vervêkte hian “an lâwmman chu an hmu zo tawh” a ni. Pathian Jehova’n engmah a pêk dâwn loh avângin, mite chawimawina leh inkhâwmna ina rabi-ho ruala a hma lam tlara ṭhutphah langsâr ber chan theihnate chu an lâwmman hmuh tûr zawng chu a ni. (Mt. 23:6) A nih chuan Krista zirtîrte chu engtianga thil ti tûr nge an nih? Isua chuan anni leh keini chu heti hian min hrilh a ni:
20 “Nang erawh chuan mi hnêna englo i pêkin, i kut ding lamin a tih chu i kut vei lamin hre suh se, i englo pêk chu arûkin a awm theih nân; chutichuan, i Pa arûka hmu thîntu chuan a rûl ang che.” (Mt. 6:3, 4) A tlângpui thuin kan kut chuan hna a thawk dûn ṭhîn a. Chuvângin, kut ding lamin a tih chu kut vei lamin hre suh se tih awmzia chu kan thilphalna thiltih chu kan vei lam leh kan ding lam inhnaih ang khawpa kan hnaih mite hnênah pawh kan puangzâr lo tihna a ni.
21. “Arûka hmu thîntu” hnên aṭanga rulhnaah chuan engte nge tel?
21 Mi dangte hnêna kan thilpêk kan uanpui loh chuan kan ‘eng lo pêk’ chu a rûkin a awm ang a. Tichuan kan Pa “arûka hmu thîntu” chuan min rûl ang. Vâna awm a, mihring mita hmuh theih loh, kan Pa vâna mi chu mihringte chungchângah chuan “arûkin” a awm a. (Joh. 1:18) “Arûka hmu thîntu” hnên aṭanga rulhnaah chuan Pathian Jehova’n amah nêna inlaichînna hnai tak min neihtîrna te, kan sual min ngaihdamna te, leh chatuana nunna min pêk te a tel a ni. (Thuf. 3:32; Joh. 17:3; Eph. 1:7) Chu chu mihringte fak nih ai chuan a ṭha zâwk fê a ni.
Ngaihhlut Tûr Thusawite
22, 23. Engvângin nge Isua thusawite chu kan ngaihhlut ang?
22 Tlâng Chunga Thusawi chu hmai chi hrang duhawm tam tak nei thlarau lam lunghlutein a khat tlat a. He buaina khawvêl ngeiah pawh hian, kan hlimna min thlentu thu hlu takte chu hnial rual lohvin a tel a ni. Ni e, Isua thufingte kan ngaihhlut a, kan rilru put hmang leh nun dân kan thununtîr chuan kan eng a thâwl ang.
23 Isua zirtîrna “hriaa” “zâwm” apiang chu malsâwm an ni ang. (Matthaia 7:24, 25 chhiar rawh.) Chuvângin, Isua zilhna zawm chu i tum tlat ang u. Tlâng Chunga Thusawi a tam zâwkte chu he thuziak inzawma a tâwp berah hian sawiho a ni ang. (w09 2/15)
Engtin Nge Kan Chhân Ang?
• Engvângin nge unau kan tihlungnih loh nêna inremna siam a pawimawh?
• Engtin nge kan “mit ding lamin” min tihtlûkna tûr chu kan pumpelh theih ang?
• Thilphalna chungchângah eng rilru nge kan put?
[Zirlai Atâna Zawhnate]
[Phêk 21-naa milem]
Unau kan tihlungnih loh nêna ‘remna’ siam chu a va ṭha tak êm!
[Phêk 22, 23-naa milem]
Jehova chuan hlim taka petute chu mal a sâwm