Mari Entîrnain Min Zirtîr Theih Chu

Rin loh taka harsatna a lo thlen thut vâng emaw, mawhphurhna i chunga a tlâk thut vâng emawin i chi-ai tawh ngai em? Nî tin ei chawp zawnna chuan a tichau che em? Râl tlân anga an ram chhuahsan a ngaih avânga a ngaihna hre lo leh hlau leh khûra awm mi maktaduai têlte zîngah i tel ve pawh a ni mai thei. Tin, kan zîngah tuin nge thihnaa hmangaihte chân avânga rilru natna leh nun ruakna tawng lo awm?

ISUA nu, Mari chuan chûng harsatna zawng zawng chu a tawng tih i hria em? Chu mai ni lovin, hlawhtling takin chûng chu a hma chhawn thei vek zu nia! A entîrna aṭangin eng nge kan zir theih?

Mari chu khawvêl huapa mite hriat hlawh tak a ni a. Pathian thiltum hlen chhuahna kawnga chanvo dang lam bîk tak a neih avângin chutianga mite’n an hria pawh chu a mak lo ve. Chu bâkah, Mari chu mi maktaduai tam tak chuan an ngaisângin an zah hle a ni. Katholik Kohhran chuan Nu duhawm tak leh rinna, beiseina, leh thilphalna kawnga entawn tûr anga ngaiin, an ngaisâng hle a. Mari chu mihring leh Pathian inkâra palai angin mi tam takte chuan zirtîrna an dawng a ni.

Isua nu chu engtin nge i thlîr? Tin, a pawimawh zâwkah chuan, engtin nge Pathianin ani chu a thlîr?

Chanvo Danglam Bîk Tak

Helia fanu Mari chu Israel thlah, Juda hnama mi a ni a. Bible-a a chanchin chuang hmasa ber chu thilthleng mak tak nên a inkûngkaih tlat a ni. Vântirhkoh pakhat chuan va tlawhin, a hnênah: “Chibai, Vohbîk! Lalpa i hnênah a awm,” a ti a. Atîrah chuan, Mari chu a mangang hle a, “‘Engtiziaa chibai mi bûk nge ni ang?’ tiin a inngaihtuah a.” Chuvângin, vântirhkoh chuan ani chu chanvo mak tak leh pawimawh tak, Pathian Fapa pai a, hring a, enkawl seilian tûr atâna thlan a nih thu a hrilh ta a ni.—Luka 1:26-33.

Chu nula chunga tla mawhphurhna chu a va pawimawh tak êm! Engtin nge ani chuan a tih? Mari chuan a chanchin chu tuin nge âwih ang, tiin a ngaihtuah mai thei a. Chutianga a naupaina chuan a hmangaih tak a pasal hual, Josefa chu a chântîr emaw, vântlâng hmaa zahna a thlen emaw thei ang em? (Deuteronomy 22:20-24) Ani chuan he chanvo pawimawh tak hi chelh a hreh lo a ni.

A Pathian, Jehova duhzâwng ti tûra Mari intukluhtîrtu chu a rinna chak tak neih chu a ni. Ani chuan Pathianin a enkawl dâwn tih a ring thlap a. Chuvângin: “Ngai teh, Lalpa bawinu ka ni, i thu ang zêlin ka chungah thleng rawh se,” a ti a. Mari chuan chu chavo chu Pathian chawimawi theihna kawng danglam bîk tak a ni tih hriain, harsatna hmachhawn ngaite hmachhawn chu a inhuam a ni.—Luka 1:38.

Mari’n Josefa hnênah nau a pai thu a  han hrilh chuan, ani chuan an inhualna tihtâwp mai chu a tum a. Chutih lai chuan nasa takin an lungngai dûn ngei ang. Bible chuan he hun khirh tak an tawrh reizâwng chu a sawi lang lo va. Mahse, Josefa hnêna Jehova vântirhkoh a inlâr hnu chuan, Mari leh Josefa chu an hahdam huai ngei ang. Pathian mi tirh chuan mak tak maia Mari naupai dân chu a hrilhfiah a, nupui atâna a ina hruai tûrin Josefa hnênah a hrilh a ni.—Matthaia 1:19-24.

Mari Nuna Hun Harsat Laite

Tûn laiah, naupai tam tak chuan an fa lo piang tûr atâna inbuatsaih nân a thla têl an hmang ṭhîn a, Mari pawh a inbuatsaih lâwk ngei a rinawm. A fa piang hmasa ber tûr a ni a. Mahse, a ruahmanna chu rin loh taka thil lo thleng chuan a tisukuk ta a. Kaisara Awgusta chuan chhiarpui nei tûrin thupêk a chhuah a, mi zawng zawng chuan an pian leh mûrna hmunah hming an ziak luh a ngai a. Chuvângin, Josefa chuan nau thla kaw mi pai Mari chu hruaiin, mêl 90 vêla hlaah a zinpui a; sabengtung chunga a chuantîr ngei a rinawm! Bethlehem-ah chuan hming ziak tûra kal mipui an zi mur mur a, Mari chuan nau hrin nân hmun fianrial deuh a mamawh bawk si: hmun awmchhun chu ran in a ni mai. Chuta nau hrin chu Mari tân chuan a harsa hle ngei ang a. A zakin a hlau hle bawk ngei ang.

A nuna he hun harsa tak a tawh lai hian, Mari chuan amah leh a fasên chu a enkawl ang tih ring tlat chungin, Pathian Jehova hnênah a thinlung chu a leihbaw ngei bawk ang. A hnuah chuan, berâm vêngtu ṭhenkhat rawn thlengin, nau piang hmuh chu an châk hle a. Anni chuan vântirhkohvin, chu naupang chu “Chhandamtu . . . Lal Krista” tia a koh thu an hrilh a ni. Tichuan, heti hian kan chhiar a ni: “Mari . . . chuan thusawi zawng zawng chu a rilruin a ngaihtuah a, a vawng reng a,” tiin. Ani chuan chûng thute chu ngaihtuahin, chûng aṭang chuan chakna a hmu a ni.—Luka 2:11, 16-19.

Keini ve hi le? Kan nunah hian hrehawm kan tuar mai thei a. Chu bâkah, Bible chuan kan hmaah harsatna chi tinrêng lo thlengin, kan vaia chungah “hun leh khawrêl ang angin a thleng” thei tih a târ lang. (Thuhriltu 9:11) Chutiang chuan lo thleng ta se la chuan, kan thin a urin, Pathian kan mawhpuh mai ang em? Mari entawn a, Pathian Jehova chu A Thu, Bible aṭanga inzira kan thu zirte chhût nguna hnaih chu a ṭha zâwk hle lâwm ni? Chutianga tihna chuan fiahna laka chhel tûrin min ṭanpui ngei ang.

Rethei leh Râl Tlân

Mari chuan harsatna dang tam tak a tâwk bawk a—chûng zîngah chuan rethei taka awmna leh vawi leh khata mahni ram  chhuahsana tlân chhiatna a tel a ni. Chutiang harsatnate chu i tawng ve em? Report pakhatin a sawi dânin, “khawvêla mihring awm zât chanve—mi tlûklehdingâwn thum vêl—chu ni tin dollar hnih aia tlêmin an khawsa a,” mi maktaduai tam tak dangte chu ram hausaah awm mah se, anni chuan nî tin ei chawp an zawng a ni. Chutiang chu i ni ve em? I chhûngkua chu nî tin chaw, silhfên, leh chênna tûr hmun pe thei tûra i thawhrimna chuan a tihah chein, a châng chuan i rilru a tibuai hial em?

Bible chuan Josefa leh Mari chu an rethei tih a târ lang a. Chu chu engtin nge kan hriat theih? Chanchin Ṭha Ziaktu—Matthaia, Marka, Luka, leh Johana—te’n he nupa tuak chanchin an târ lan ṭhenkhat zîngah chuan, Mari’n nau a hrin hnu ni 40-a Josefa nên biak ina kala, hlan ngai inthawina—“ṭhuro tuak khat emaw, pârva no tuak khat emaw”—an hlan thu a tel a ni. * (Luka 2:22-24) He inthawina hi berâm pa tuai hlân thei lo khawpa retheite tân chauhva phalsak a ni a. Chuvângin, Josefa leh Mari tân nî tin ei chawp zawn chu a harsa hle tih kan hre thei a ni. Chuti chung pawh chuan, anni chuan chhûngkaw boruak nuam tak leh hlawhtling tak an siam thei a. Thlarau lam thil an dah pawimawh ber a ni tih chu rinhlelh rual a ni lo.—Deuteronomy 6:6, 7.

Isua pian hnu lawkah chuan, Mari nun chu nasa takin a inthlâk danglam leh a. Vântirhkoh chuan Josefa hnênah a chhûngkua chu hruai a, Aigupta rama tlân bo tûrin a hrilh a. (Matthaia 2:13-15) Hei hi Mari’n a lo awm tlângnêl tawhna hmun vawi hnih a chhuahsanna a ni a, he mi ṭumah hi chuan ram dang daiha an kal a ngai a ni. Aigupta ramah chuan Juda mi tam tak an awm a; chuvângin Mari leh Josefa-te chu mahni chipuite zîngah an chêng thei ngei ang. Chutichung pawhin, ram danga awm chu a harsain, a buaithlâk hle thei a ni. Nang leh i chhûngte chu in fate hlâwkpui atân emaw, hlauhawm pumpelh nân emawa awmna ram chhuahsan ngai mi maktaduai tam takte zîngah in tel em? In tel chuan, Mari’n Aigupta rama harsatna a tawh ṭhenkhat chu i hriatthiampui ngei ang.

Nupui leh Nu Nih Tling Tak

Isua pian leh nausên lai chanchinah tih loh chuan, Chanchin Ṭha Ziaktute chuan Mari chanchin an sawi tlêm hle a. Mahse, Mari leh Josefa chuan a lo berah fa dang paruk an nei tih kan hria a ni. Chu chu mak i ti em? Chanchin Ṭha Ziaktute sawi dân hi lo ngaituah ang che.

Josefa chuan Mari neih Pathian Fapa hrin theihna chanvo chu a ngaisâng hle a. Chuvângin, Isua a pian hma chu a pâwl lo. Matthaia 1:25 chuan Josefa’n “fapa a hrin hma loh zawng a pâwl lo,” a ti. He mi chânga “hma loh zawng” tih thu hian Isua pian hnu chuan Josefa leh Mari chuan nupui pasal pângngai angin nupa nun an hmang tih a târ lang a. Chuvângin, Chanchin Ṭha Ziakte chuan, Mari chuan Josefa nêna fapa leh fanute an neih thu a sawi. Jakoba te, Josefa te, Simona te, leh Juda te chu Isua naute an ni a. Mari chuan a lo berah fanu pahnih a nei a ni. (Matthaia 13:55, 56) Mahse, chûng naupangte chu naupai dân pângngaia paite an ni. *

Mari chu thlarau mi tak a ni a. Dân chuan hmeichhiate chu Kalhlên Kût hmang tûrin phût lo mah se, chu mi kût hmang tûr chuan a pasal Josefa rualin kum tin Jerusalem-ah  a kal ṭhîn a ni. (Luka 2:41) Chu mi zin kawng thuizâwng belhkhâwm chu kum tin atân mêl 190 vêl a ni a; chhûngkaw hung tak nên a ni lehnghâl! Mahse, hêng zin kawngte hi chhûngkuaa hun hlimawm tak an neih hun a ni ngei ang.

Tûn laia hmeichhe tam takte chuan Mari entîrna ṭha tak chu an entawn a. Bible-a chuang an tih tûrte hlen tûrin, mahni hmasial lo tak chungin rim takin an thawk a ni. Hêng nupui inpe takte hian dawhtheihna te, chhelna te, leh inngaihtlâwmna te chu an va lantîr nasa tak êm! Mari rilru put hmang an ngaihtuahna chuan anni chu an hahdamna leh nuam tihna aia thlarau lam thil dah hmasa zâwk tûrin a ṭanpui a ni. Anni chuan Mari ang bawkin an pasalte leh an fate nêna Pathian biak tlânna chuan chhûngkua a tinghetin, a inpumkhattîr a ni tih an hre chiang a ni.

Ṭumkhat chu, Mari leh Josefa chu Jerusalema kût an hmanna aṭangin an fa dangte nên an hawng a. Hâwn kawngah chuan an fapa Isua, kum 12 mi chu an rualin a hawng tel ve lo tih an hre chhuak ta thut mai a. An fapa nasa taka ni thum chhûng an zawn laia Mari rilru hah dân tûr chu i suangtuah thei em? Josefa leh Mari’n biak ina an va hmuh chuan, Isua’n: “Ka Pa ina ka awm tûr in hre lo vem ni?” a lo ti a. Chanchin ziak chuan Mari’n “chûng thil zawng zawng chu a rilruah a vawng reng a,” a ti leh a ni. Hei hi Mari’n thlarau lam thil a ngaihhlutzia târ langtu dang leh a ni. Ani chuan Isua nuna thilthleng zawng zawng chu ṭha takin a ngaihtuah a. A hnu kum tam takah chuan, he mi chungchâng leh Isua naupan lai chanchin a hriat fiahte chu Chanchin Ṭha ziaktute hnênah a hrilh châwng niin a lang.—Luka 2:41-52.

 Hrehawm Tawrhna leh Lusûnna Chu Hlawhtling Takin A Hmachhawn

Fa anga Isua pawmtu Josefa chu engtin nge a awm tâk zêl? Isua tleirâwl laia thilthleng pakhatah tâwi têa a chanchin sawi lan a nih hnu chuan, Josefa hming chu Chanchin Ṭha ziakah chuan a lang chhunzawm tawh lo va. Mi ṭhenkhat chuan Josefa chanchin sawi lan chhunzawmna a awm lo hi Isua’n rawngbâwlna a ṭan hma deuhva a thih vâng niin an ngai. * Eng pawh chu lo ni se, Isua rawngbâwlna tâwp lamah chuan Mari chu hmeithai a ni chiang ngei a ni. Isua’n a thih dâwn khân tirhkoh Johana a nu enkawl tûrin a ti si a. (Johana 19:26, 27) Josefa chu la dam se chuan, Isua’n chutianga a tih chu a rinawm lo hle a ni.

Mari leh Josefa te chuan thiltawn an ngah dûn ngei mai! Vântirhkohte’n an tlawh a, rorêltu kawlh tak lakah vên him an ni a, vawi tam tak an insawn kual bawk a; tin, chhûngkaw hung tak an nei a ni. Isua chanchin sawi nân leh nakina a thil la tawh tûrte ngaihtuah a, chûng atâna an zirtîr ṭhat leh ṭhat lohte ngaihtuah nân chuan tlai eng zât tak ṭhu dûn ang maw? A hnu lamah erawh chuan Mari chu a mal ta thut a ni.

I kawppui i sûn tawh em? Kum tam tak a vei hnuah pawh, chutiang lusûnna chuan a tihrehawm chein, ruak nia inhriatna i la nei reng em? Mari chu thawhlehna a awm dâwn tih a rinna leh a hriatna chuan a thlamuan ngei ang. * (Johana 5:28, 29) Mahse, chûng thu thlamuanthlâk takte chuan Mari buaina chu a titâwp lo. Tûn laia nu mal ṭan tam takte ang bawkin, pasal ṭanpuina tel lova fate enkawl thil harsa tak chu a hmachhawn a ni.

Josefa thih hnu chuan Isua chu an chhûngkuaa ei zawngtu ber a ni tih rin chu thil inâwm tak a ni a. Isua unaupate an lo puitlin chhoh chuan, chhûngkaw mawhphurhna chu an chanpui ngei ang. “Kum sawmthum lai” a nih hnuah Isua chuan in chhuahsanin, a rawngbâwlna a ṭan ta a ni. (Luka 3:23) Nu leh  pa tam tak chuan an fa puitling tate’n in an chhuahsan hian an chhuan rual rualin an lungchhe hle ṭhîn bawk a. Fate tân hun, tha leh zung, leh rilru ngaihtuahna tam tak an lo sên tawh avângin, an fate’n in an chhuahsan hun chuan ruak huai nia inhriatna an nei a ni. I fapate emaw, fanute emaw chuan an thiltumte ûm tûrin in an chhuahsan tawh em? Anmahni chu i chhuan rual rualin, i bul hnaia awm tûra duh châng i nei em? A nih chuan, Isua’n in a chhuahsan laia Mari rilru tûr chu i suangtuah thiam ngei ang.

Beisei Hauh Loh Fiahnate

Mari tawh fiahna dang leh chu a chunga thleng atâna a beisei miah loh thil a ni a. Isua’n thu a han hrilh chuan, mi tam takin a hnung an zui a—mahse, a unaute chuan an zui ve hauh lo. “A unaute pawh chuan amah an ring si lo va,” tiin Bible chuan a sawi. (Johana 7:5) Mari chuan vântirhkohvin Isua chu “Pathian Fapa” a ni tih a hrilh thu a fate hnênah a sawi chhâwng ngei ang a. (Luka 1:35) Chuti chung chuan Jakoba te, Josefa te, Simona te, leh Juda te tân chuan Isua chu an unaupa mai a ni. Chuvângin, Mari chu sakhaw thuhmun vawn lohna chhûngkuaah a khawsa a ni.

Chu dinhmun avâng chuan Mari chu a lunghnualin, a bei a dawng mai em? Beidawng mai lo ve! Ṭum khat chu Isua’n Galili rama thu a hrilh laiin, in pakhatah chaw ei tûrin a kal a, mipui chu a thu ngaithla tûrin an pung khâwm a. Isua zawngtute chu tute nge ni? Mari leh Isua unaute an ni. Isua chu a in hnaia a awm lai chuan, Mari’n a zui a, a fa dangte pawh Isua chunga an rilru put hmang an thlâk theih beiseiin a hruai ngei ang.—Matthaia 12:46, 47.

Nang pawhin i chhûngte’n Isua hnung zui an duh loh laia zui i tum tlatna avângin harsatna i tâwk ve pawh a ni thei a. Lunghnual mai lo la, tlâwm bawk hek suh! Mari angin mi tam tak chuan an chhûngte chu an rilru inthlâkthleng tûrin a kum têl dawhthei takin an fuih a ni. Chutianga chhelna chu mi dangin an chhâng lêt emaw, lêt lo emaw pawh ni se, Pathian chuan a hlut a ni.—1 Petera 3:1, 2.

Fiahna Khirh Ber

Bible-a chhinchhiah Mari tawh fiahna hnuhnûng ber chu a râpthlâk ber a ni ngei ang. A fapa hmangaih tak a chipuite’n an hnâwl avânga na tuara thi lai chu a hmu a ni. A la naupang emaw, a puitling tawh emaw pawh ni se, fa thihna chu “chânna tâwp khâwk,” “thihna râpawm ber” tia sawi a ni ṭhîn. A hma kum sâwmthum chuanga sawi lâwk tawh angin,  Mari chuan a thinlunga ngûnhnâm chhun tlang ang maiin a tuar a ni!—Luka 2:34, 35.

Mari chuan he fiahna hnuhnûng ber hi rilru lama nasa taka tawrh nân emaw, Jehova a rin loh phah nân emaw a hmang em? Hmang lo ve. Bible-a Mari hming a lan lehnaah chuan ani chu Isua zirtîrte nên “ṭhahnemngai taka ṭawngṭaiin” a awm a ni. Tin, amah chauhvin a awm lo va. A fapa dang, a hnua an unaupa chunga rinna nei ṭante nên an awm a ni. Chu chuan Mari chu a va thlamuan dâwn tak êm! *—Tirhkohte 1:14.

Mari chuan hmeichhe rinawm, nupui rinawm, leh nu rinawm tak a nih angin, nun lungawithlâk tak chu a nei a. Ani chuan Pathian rawng a bâwlnaah thiltawn lungawithlâk tam tak a nei a ni. Fiahna leh harsatna tam tak a paltlang a. Beisei hauh loh harsatna kan tawn hunah emaw, chhûngkaw buaina avânga kan lungngaih hunah emaw chuan rinawm taka a chhelna aṭangin zir tûr kan nei a ni.—Hebrai 10:36.

Mahse, Pathian biak nâna Mari an hman chungchângah eng nge sawi tûr awm? Mari chanvo dang lam bîk tak Bible-a chhinchhiah hi amah Pathian anga biak chhan tûr a ni em? (w09 1/1)

[Footnote-te]

[Phêk 5-naa milem]

 Râltlân angin Aigupta ramah an tlân

[Phêk 8-naa milem]

Nu-in thil a tawn theih zînga a chhe ber chu

[Phêk 6-naa bâwm]

Isua’n Pianpui Unau A Nei Em?

 Aw, nei e. Chanchin Ṭha ziakte chuan chu chu vawi tam tak târ lang mah se, theologian ṭhenkhatte chuan chu thutak chu hnial kalh an tum a. (Matthaia 12:46, 47; 13:54-56; Marka 6:3) Amaherawhchu, Bible lama mi thiamte chuan Mari’n fa dang a hring lo tih ngaih dân chungchângah thil pahnih an sawi a. Pakhatnaah chuan, chutiang ngaih dân phênah chuan a turtu a awm a—chu chu kum tam tak hnua lo piang chhuak Mari chu a dam chhûng zawngin nula thianghlim a ni reng tih thurin thlâwp nân a ni. A pahnihna chu, chûng ngaih dânte chuan belhchian a dâwl lo tih a ni bawk.

Entîr nân, chûng ngaih dân pakhat chuan Isua “unaute” anga sawite chu a unau dik tak ni lo—a nupui hmasa laka Josefa fapa neihte an ni, a ti a. He ngaih dân hian Davida lalna changtu tûr anga Isua fatîr nihna a hnâwl dâwn avângin, belhchian a dâwl lo.—2 Samuela 7:12, 13.

Ngaih dân dang leh chu, hêng a unaute hi a nihna takah chuan Isua laichînte an ni, tih a ni leh a; mahse, Grik Pathian Lehkha Thu chuan “unaupa,” “laichîn,” leh “chhûngkhat” sawi nân thu mal hrang ṭheuh a hmang a ni. Chuvâng chuan, mi thiam Frank E. Gaebelein-a chuan hêng ngaih dânte hi a âwihawm lo, a ti a. Ani chuan heti hian thutâwp a siam a ni: “‘Unaupate’ tih ṭawngkam hriatthiam dân phung pângngai ber . . . chuan Mari leh Josefa-te kâra piang nu hmun pa hrang Isua unaupate a kâwk a ni, tih hi a ni,” tiin.

[Phêk 7-naa bâwm]

A Sakhaw Vawn Lai Thlâk Tûrin Huaisenna A Nei

Mari chu Juda chhûngkuaa piang, Juda sakhua zuitu a ni. Juda mite Pathian biakna hmun, tualchhûng biak in synagogue-ah a kal ṭhîn a, Jerusalam biak in pawh a tlawh ṭhîn bawk. Amaherawhchu, Mari’n Pathian thiltum a hriatthiamna a lo pun chhoh zêl chuan, amah thlahtute thurochhiahte chuan Pathian pawm a hlawh tawh lo tih a hmu chhuak a. Juda sakhaw hruaitute chuan a Fapa, Messia chu an tihlum a ni. Chu thil a thlen hma chuan, Isua’n an hnênah: “En teh u, in in chu aruaka hnutchhiah che uin a awm ta,” tiin a puang chhuak a. (Matthaia 23:38) Pathian chuan Mari seilenna sakhaw chungah malsâwmna a vûr tawh lo a ni.—Galatia 2:15, 16.

Kristian kohhran din a nih khân, Mari chu kum 50 emaw, a aia tam emaw a ni tawh mai thei a. Eng nge a tih tûr chu ni ta ang? Ani chuan Juda sakhua vuana piang ka ni a, thlahtute thurochhiah chu rinawm takin ka vuan tlat ang, tiin a ngaihtuah em? Inthlâkthleng tûrin ka tar lutuk tawh a ti em? Ti lo ve! Mari chuan Pathian malsâwmna chu Kristian kohhranah a awm tih a hria a; chuvângin, a sakhaw vawn lai thlâk tûrin rinna leh huaisenna a nei a ni.