Pathian Chauhvin Leilung Hi A Chhanhim Thei

“LUNGHLU PAWL LEH VARA TLE SEP SEP.” Chu chu boruaka zin mi Edgar Mitchell-a’n boruak thim tak nêna kan lei a inan lohzia a thlîr paha kan leilung chanchin a sawi dân a ni.

Pathian chuan leilung hi mihringte in atân nasa takin buatsaih a. Chu chuan vântirhkohte chu lâwma “au” tûrin a chêttîr a ni. (Joba 38:7) He leilung ropuizia kan zir hnuah chuan, keini pawhin lâwma au chhan tûr kan nei ngei ang. Leilunga nunna ṭhan chhohtîr theitu thlai leh rannung inlaichînna kalhmang pêng chi hrang hnawk nuai mai chu tam tak a awm a. Chûng zînga kalhmang pakhat hriat lâr tak mai chu thlai hringin ni êng te, thli aṭanga a dawn carbon dioxide te, leh tui te chaw siam nâna a hmang hi a ni a. Hei hian kan nunna atâna pawimawh êm êm oxygen chu boruakah a pe chhuak leh chhawng a ni.

Bible chuan Pathianin mihring chu leilung enkawl tûrin a ruat tih a târ lang a. (Genesis 1:28; 2:15) Amaherawhchu, leilung thlai leh rannung inlaichînna chu inbûk tâwk taka awm reng tûr chuan, mihringin rilru put hmang dik a neih a ngai a ni. Ani chuan, a lei lam in chu a ngaina tûr a ni a. Mawi taka awm reng tûrin vawn ṭhat a duh tûr a ni bawk. Mahse, mihring chu duhthlan theihna pêk a ni a; chuvângin thil awm thei chu, leilung hi mahni hlâwkna atân chauhva hmangin, hman khaw loh chu a thlang thei a ni. Chutiang chiah chuan a ti ta rêng a. Mihring fîmkhur lohna leh duhâmna rah chhuah chuan chhiatna nasa tak a thlen ta a ni.

Buaina awmte zînga ṭhenkhat chauh lo sawi lang ta ila: (1) Ramngaw tihchhiatna chuan leiin carbon dioxide a hîp theihna chu a tikhaw lo va, chu chuan sik leh sa nasa taka inthlâk thlengna a awmtîr. (2) Rannung thahna hlo (pesticide) hman nasat lutukna chuan thlai chi inthlah pawlh nâna rannung leh thlai inlaichînna atâna hna pawimawh tak thawktu rannungte chu a tirêm zo. (3) Sangha man nasat lutukna leh tuifinriat leh lui tui tihbawlhhlawhna chuan sangha nasa takin a ti mang. (4) Leilung hausakna duhâm taka hmanna chuan chhuan lo awm zêl tûrte hman tûr a zuah tlêm tawh hle a, khawvêl a tilum lehzual nia ngaih a ni. Chhehvêl boruak chanchin zir mi ṭhenkhat chuan hmâr tâwp leh chhim tâwpa hmuh ṭhîn, vûr khâwn tawlh ṭhîn te leh vûr tlang te hmuh tûr a tlêm tawlh tawlhna hi khawvêl lum tawhzia târ langtu a ni tih an sawi.

Leilung chhiatna pun chhoh zêl avângin mi ṭhenkhat chuan leilungin a do lêt a, chu chuan mihringte manganna a thlen an ti mai thei a. Pathian chuan leilung hi a thlâwnin min pe a. A nihna takah chuan, mihring hnênah luah man chawi lovin awmna tûr a pe a ni. (Genesis 1:26-29) Amaherawhchu, tûna khawvêla thilthlengte hian, mi tam takin an lei lam in mawi tak chu ṭha taka enkawl duhna an nei lo tih a târ lang a. Chu ai mah chuan, mihringte chu mahni hmasial taka awmin, hamṭhatna tûr zawngin an buai hle a ni. Anni chuan Thu Puan 11:18-in a sawi lâwk angin ‘lei tichhetu’—a luahtu ṭha lo tak an nihzia an târ lang.

Pathian Engkimtithei Jehova, leilunga nunna châwmtu leh thlai leh rannung inlaichînna Siamtu chuan a luahtu ṭha lote ‘hnawh chhuah’ hun a awm dâwn tih thupêk a chhuah thu Bible hrilh lâwkna chuan a târ lang a. (Zephania 1:14; Thu Puan 19:11-15) Mihringte’n leilung an tihboral hmain, kan beisei aia hma daihin Pathian chu a rawn inrawlh dâwn a ni. * (Matthaia 24:44) Dik takin, Pathian chauhin leilung hi a chhanhim thei a ni. (w09 1/1)

[Footnote]