Pathian Thiltuma Mari Chanvo

ISUA rawngbâwl chhûng khân, nu pakhat chu: “I paina pum chu a hamṭha e, i hnute hnêk pawh,” tiin mipui zîngah aw ring takin a au chhuak a. Isua chuan a nu chu chawimawi duh se chuan, mite chu a nu be tûra a sawi mawipui theihna hun remchâng ṭha tak a ni. Ani erawh chuan: “Pathian thu hriaa zâwmte hi mi hamṭha an ni zâwk e,” tiin a chhâng hlauh zâwk a ni.—Luka 11:27, 28.

Isua chuan a nu chu chawimawina engemaw bîk tak a pe lo va; chutianga ti tûr chuan a hnungzuitute pawh a hrilh ngai hek lo. Hei hi ringtu tam takte’n nasa taka Mari an chawimawina nên a inmil em? Isua nu chungchânga zirtîrna lâr takte chu Bible hmangin i lo bih chiang ang u.

“Duhawmnaa Khat,” “Hmeichhia Azawnga Engthâwl”

Vântirhkoh Gabriela chuan Mari hnênah Pathian thiltuma a chanvo tûr chu a hrilh a. Chu mi ṭumah chuan, ani chuan: “Chibai, Vohbîk! Lalpa i hnênah a awm,” tiin chibai a bûk a ni. (Luka 1:28) Chu chibaina bawk chu ṭawng lehlin dangah chuan he tiang hian dah a ni: “Chibai, duhawmnaa khat, Lalpa i hnênah a awm,” tiin. Chu mi hnu lâwkah Elizabeti chuan Mari chu: “Nang chu hmeichhia azawnga engthâwl i ni, i rîla rah pawh a engthâwl a ni,” tiin a chibai a ni. (Luka 1:42) Hêng thute hian Mari chuan biak a phu tih a târ lang em?

A nihna takah chuan, chûng thute chuan Mari’n biak a phu tih a târlang lo. Hêng thute hi Katholik-te chuan Mari hnêna ṭawngṭainaah telh mah se, Bible chuan a hnêna ṭawngṭai nachhan tûr engmah a pe lo. Gabriela leh Elizabeti chuan Messia hringtu anga Mari chanvo langsâr tak chu pawm mah se, a hnêna ṭawngṭai an tum thu Bible-ah chuan ziak a ni lo. Mari hnêna ṭawngṭai tûra fuih  ahnêkin, Isua chuan a zirtîrte’n ṭawngṭai dân tûr an zawh khân a Pa hnêna ṭawngṭai tûrin a kawhhmuh a ni. Dik takin, Isua zirtîr Lal ṭawngṭaina lâr tak chu: “Kan Pa vâna mi” tih thuin a inṭan a ni.—Matthaia 6:9.

Rorêltute Zîngah

Mari chungchânga zirtîrna tlânglâwn tak dang leh chu, ani chu tûnah hian “vân Lalnu” a ni, tih hi a ni a. Bible chuan chutiang nihna chu a pe ngai lo. Mahse, Pathian vân lam ruahmannaah dinhmun ṭha bîk tak a chelh tih erawh a târ lang a. Chu chu eng dinhmun nge?

Isua chuan a zirtîr rinawm ṭhenkhat chu a Lalramah ro a rêlpui dâwn tih a sawi a. (Luka 22:28-30) Ani chuan hêng a mi thlante hi ‘kan Pathian tân Puithiamah leh leia rorêltu’ angin rawng a bâwltîr dâwn a ni. (Thu Puan 5:9, 10) Mari chu he chanvo sâng tak pêkte zîngah hian a tel ve tih Bible chuan chiang takin thu tâwp min siamtîr a ni. Chu chu engtin nge kan sawi theih?

Isua thih hnuah, Mari chu Isua zirtîrte leh a unaute nên “ṭhahnemngai taka ṭawngṭaiin” a awm tih i la hre mai thei. Hetianga ṭawngṭai tûr hian “hmeichhia tute emaw” pawh tiamin, mi 120 vêl an inhmu khâwm a ni. (Tirhkohte 1:12-15) “Pentikost nî a lo thlenin, an zain hmun khatah an awm khâwm” a, an chungah Pathian thlarau thianghlim chu leih a ni a, ṭawng danga ṭawng theihna pêk an nih thu Bible chuan a sawi.—Tirhkohte 2:1-4.

He mi kawnga malsâwmna dawngtute zînga mi a nihna chuan Mari leh hmeichhe dang thlarau thianghlim dawngtute chu Isua vân lam Lalrama mi ni tûra thlante an nihzia a târ lang a ni. Chuvâng chuan, tûnah Mari chu Isua nên vân lam ropuinaah an ṭhu dûn tawh tih rin nachhan tûr ṭha tak kan nei a ni. (Rom 8:14-17) Amah leh Isua rorêlpui tûr dangte’n Pathian thiltum hlen chhuahnaa an neih chanvo ṭhenkhat chu lo ngaihtuah teh.

Malsâwmna Ropui Takte Sem Chhuakin

Bible-a Thu Puan bu chuan vân lam ropuinaa kaihthawh mi 1,44,000 chu Isua nêna puithiam, rorêltu leh lal anga rawngbâwl tûrte an ni tih a sawi a. (Thu Puan 14:1, 4; 20:4, 6) Puithiam angin thuâwih mihring zawng zawng chunga Isua inthawina hlutna pêknaah telin, anni chuan thlarau lam, nungchang lam, leh taksa lama ṭhat famkimnaah an hruai lût ang. (Thu Puan 21:1-4) Rinawm taka Jehova betu zawng zawngte tân chu hun ropui tak hmuh chu chanvo hlu a va ni dâwn êm! *

Mari chuan Jehova thiltum hlen chhuahnaah chanvo a lo nei tawh a, a la nei chhunzawm reng bawk a ni. A inngaihtlâwmna te, a rinna te, a thuâwihna te, leh nu a nih anga a inpêkna te bâkah, fiahna hnuaia a chhelna te avângin ani chu entawn tlâk tak a ni. Messia hringtu a nihna leh mihringte hnêna chatuan malsâwmna a pêk chhuah avângin, ani chu kan zah hle tûr a ni bawk.

Amaherawhchu, Mari hnên aṭanga kan thil zir pawimawh ber chu, Pathian chhiahhlawh dang zawng zawngte ruala Pathian Jehova bia a, pathian dang a be lo hi a ni. Vâna Krista rorêlpui mi dangte rualin, Mari chuan: “Lalṭhutphaha ṭhua [Pathian Jehova] leh, Berâm No [Isua Krista] hnênah chuan, malsâwmna te, chawimawina te, ropuina te, rorêlna te, chatuanin awm rawh se,” tia puang chhuak tûrin a aw a chhuah a ni.—Thu Puan 5:13; 19:10. (w09 1/1)

[Footnote]

[Phêk 10-naa thu lâk chhuah]

Mari inngaihtlâwmna te, rinna te, leh thuâwihna te chu entawn tlâk tak a ni