Pathian Hnaih Rawh

Rorêltu Englai Pawha Thil Dik Titu Chu

Genesis 18:22-32

DIK TAKA rorêlna. Dikna. Thleibîk neih lohna. Hêng mize ngaihsân awm takte hian a hîp hle che lo maw? Keini mihringte hi ṭha taka cheibâwl mamawh sain kan lo piang chhuak a. Lungchhiatthlâk takin, tûn lai khawvêlah hian rorêl dik lohna a tam hle mai. Amaherawhchu, kan rin tlat phu Rorêltu—Pathian Jehova chu a awm a ni. Englai pawhin thil dik a ti a. Chu chu Genesis 18:22-32-a chhinchhiah, Pathian Jehova leh Abrahama inbiaknaah chiang takin a lang a ni. *

Pathian Jehova’n Abrahama hnêna Sodom leh Gomorra khaw dinhmun enfiah tûra A thutlûkna a hrilh khân, Abrahama chuan a tupa Lota pawh tiamin chuta awm mi felte an him loh chu a hlau va. Abrahama chuan Jehova hnênah heti hian a ngên a ni: “Mi felte chu mi sualte zîngah i tiboral ve dâwn em ni? Khaw chhûngah chuan mi fel sawmnga tal an awm mahna: a chhûnga mi fel sawmnga awmte avâng chuan . . . i tiboral dâwn em ni?” tiin. (Châng 23, 24) Pathian chuan mi fel 50 chauh pawh awm se khua chu a zuah dâwn tih a sawi a. Sâwm a nih thlenga titlêm tial tialin Abrahama chuan Jehova chu vawi nga lai a ngên zawm zêl a ni. A dîl apiangin, Pathian chuan khaw chhûngah mi fel a dîl zât chu an awm phawt chuan a tiboral lo vang tih a sawi a ni.

Abrahama chuan Pathian a hnial em? Hnial lo ve! A hnial chuan a chapo hle a ni ang. Abrahama aw chhuak chuan zahna leh inngaihtlâwmna dik tak a târ lang a ni. Ani chu “vaivut leh meivâp mai” angin a insawi a. Chu bâkah, Abrahama thusawi chuan Jehova dikna a rin tlatzia a târ lang a ni. Pathianin mi suaksual rualin mi felte a tihboral leh boral loh tûr chungchângah Abrahama chuan “i ti âwm êm si lo” tiin vawikhat chauh pawh ni lo, vawi hnih lai a sawi a. “Lei chung zawng zawng Rorêltu” chuan “fel takin a ti” dâwn tih a rinngheh tlatzia thlahtu rinawm chuan a sawi chhuak a ni.—Châng 25.

Abrahama thusawi chu a dik em? A dik kan tih theih rualin, a dik lo kan ti thei bawk ang. Ani chuan Sodom leh Gomorra-ah mi fel sâwm tal an awm a ring chu a ring sual a. Mahse, Pathianin ‘mi felte chu mi sualte zîngah a tiboral’ ngai dâwn lo tia a sawi chu a sawi dik chiah a. Pathianin a hnua chu khaw suaksual takte a tihboral tâkah chuan mi fel Lota leh a fanute pahnih chu, chu mi hmun ata vântirhkoh ṭanpuinain a tlân chhuahtîr a ni.—2 Petera 2:7-9.

He mi chanchin hian Pathian Jehova chungchâng eng nge min zirtîr? Jehova’n khaw enfiah A duh thu Abrahama a hrilh khân, a nihna takah chuan Abrahama chu a rilru veizâwng sawi chhuak tûrin a sâwm a ni. Tichuan, a ṭhian Abrahama’n a thil vei a sawi chu dawhthei takin a ngaithlâk sak a. (Isaia 41:8) Hei hian Jehova chu Pathian inngaitlâwm, a lei lam chhiahhlawhte chawimawitu leh an chunga zahna lantîrtu a nihzia min va zirtîr chiang tak êm! Rorêltu, englai pawha thil dik titu Pathian Jehova rin pumhlûm tlat chhan tûr kan nei chiang hle a ni. (w09 1/1)

[Footnote]

[Phêk 14-naa milem]

Abrahama chuan Sodom leh Gomorra chungchângah Jehova hnênah a ngên chiam