Jehova Thu Chu A Nung

Thu Puan Bu Aṭanga Thu Pawimawh Hrilhfiahna—II

PATHIAN Jehova betute leh be lotute hma lawkah eng thil nge lo thleng dâwn? Setana leh a ramhuaite hma bâk tûr chu eng nge ni? Krista Kum Sâng Rorêl chhûngin thuâwih mihringte chuan eng malsâwmnate nge an dawn ang? Hêng zawhnate leh zawhna dang pawimawh takte chhânna chu Thu Puan 13:1–22:21-ah târ lan a ni. * Hêng bungahte hian C.E. kum zabi khatna tâwp dâwn lama tirhkoh Johana dawn inlârna 16-te zînga a tâwp lam 9-te a tel a ni.

“He hrilh lâwkna bu chhiartu leh ngaithlaa a chhûnga thu ziak pawmtute chu an eng a thâwl e; a hun chu a hnai tawh si a,” tiin Johana chuan a ziak a. (Thup. 1:3; 22:7) Thu Puan bu chhiarna leh chuta ṭanga kan zirte nunpuina chuan Pathian rawng kan bâwl chhan chu a thunun thei a, Pathian leh a Fapa, Isua Krista kan rinna chu a tichakin, nakin hun tûr beiseina hlimawm tak min pe bawk a ni. *—Heb. 4:12.

PATHIAN THINURNA BERHBU PASARIH CHU LEIH BUAK A NI

(Thup. 13:1–16:21)

Thu Puan 11:18 chuan: “Hnamte chu an thinur a, tin, [Pathian] thinur chu a lo thleng ve thung a, . . . lei tichhetute tihchhiat ve thung hun chu a lo thleng bawk a,” a ti a. Pathian thinur a lo thlen chhan târ lan nân, inlârna pariatna chuan “sakawlh ki sâwm leh lu sarih nei” thiltih chu a târ lang a ni.—Thup. 13:1.

Inlârna pakuanaah, Johana chuan “Berâm No Zion Tlânga ding” leh a kianga “mi 1,44,000” awm chu a hmu a. Anni chu “mihring zîng ata tlan an ni.” (Thup. 14:1, 4) Vântirhkohte thu puanchhuahna chuan a zui a. A dawta inlârnaah, Johana chuan “vântirhkoh pasarih hremna pasarih kengte” chu a hmu a. Chûng vântirhkohte hnêna “Pathian thinurna berhbute” Setana khawvêl hmun hrang hranga leih baw tûra thu petu chu Jehova ngei a nih a rinawm. Chûng berhbu chhûngah chuan Pathian rorêlna tûr puan chhuahna leh vaukhânna a awm a ni. (Thup. 15:1; 16:1) Hêng inlârna pahnihte hian chungpikna pathumna leh tawtawrâwt pasarihna hamna nêna inkûngkaihna nei Lalram rorêl belhna chanchin kimchang lehzual chu a pe a ni.—Thup. 11:14, 15.

Bible Chungchânga Zawhnate Chhânna:

13:8—‘Berâm No nunna bu’ chu eng nge ni? Chu chu Isua Krista nêna vân Rama rorêl tûrte hming chauh chuanna entîr nei lehkhabu a ni a. Chutah chuan, vân nunna chan beiseina nei, leia la awm hriak thih Kristiante hming pawh a chuang tel a ni.

13:11-13—Engtin nge ki pahnih nei sakawlh chuan drakon anga thil a tih a, vân aṭanga mei a tlâktîr? Ki pahnih nei sakawlhin a entîr Anglo-American Khawvêl Thuneihna drakon anga a ṭawngna chuan a rorêlna mite pawm luihtîr nâna vauna te, nêksâwrna te, leh tharum thawhna te a hmanzia a târ lang a ni. Kum zabi 20-na chhûnga khawvêl indopui pahnihnaah sual thiltihtheihna hneh ang leh Communism chunga hnehna la anga insawiin, zâwlnei thiltih anga vân aṭanga mei tlâktîr niin a inchhâl a ni.

16:17—Berhbu pasarihna leih buakna ‘boruak’ chu eng nge ni? He ‘boruak’ hian  Setana ngaihtuahna, “tûna âwih lo fate chhûnga thâwk mêktu thlarau,” a nih loh leh rilru put hmang chu a entîr a. He boruak tûr hi Setana khawvêl suaksuala awm zawng zawngte’n an hîp lût a ni.—Eph. 2:2.

Kan Zir Tûrte:

13:1-4, 18. Mihring sawrkârna entîrtu “sakawlh” chu mipui buai nuai nuai entîrtu, ‘tuifinriat ata lo chhuak’ a ni. (Is. 17:12, 13; Dan. 7:2-8, 17) He Setana siam chhuah leh thuneihna pêk sakawlh hian number 666 a nei a, chu chuan a ṭhat famkim lohna a sawi uar a. Sakawlh nihna hriatthiamna chuan, mi nâwlpuite tih anga ngaisâng taka zui emaw, chibai bûk emaw lo tûrin min ṭanpui a ni.—Joh. 12:31; 15:19.

13:16, 17. ‘Lei leh hralh’ ang chi, kan nî tin thiltihah chuan harsatna tâwk mah ila, sakawlh chu kan nun kan thununtîr tûr a ni lo. ‘Kan kut emaw, kan chal emawa sakhawlh chhinchhiahna’ neihna chu sakawlh chu kan thiltih emaw, kan ngaihtuahna emaw kan thununtîr tihna tluk a ni.

14:6, 7. Vântirhkoh thu puanchhuah chuan Pathian Ram din a nihna, chanchin ṭha chu hun hmâwr tawhzia hre reng chungin hmanhmawhna nên kan puang chhuak tûr a ni tih min zirtîr a. Kan Bible zirpuite chu Pathian ṭihna ṭha nei a, Pathian Jehova chu chawimawi tûrin kan ṭanpui tûr a ni.

14:14-20. Chhandam ni tûrte sengna, “lei buh” ah zawh a nih hunah chuan, “leia grêp hrui rah” lâk khâwmte chu ‘Pathian thinurna grêp sâwrna khura’ vântirhkohvin a theh luh hun a thleng dâwn a ni. Chuti chuan chu grêp hrui—mihringte chunga hmuh theih Setana sawrkârna bawlhhlawh tak chu an thiltih rah chhuah entîrtu a “bâwrte” nên lam—chatuana tihboral a ni dâwn a. Leia grêp hrui inthununtîr loh chu kan tum tlat tûr a ni.

16:13-16. “Thlarau bawlhhlawh” tih chuan Pathian thinurna berhbu pasarih leih buaknain leia lalte rilru a hneh loh nân leh Jehova do tûra a hruai zâwk theih nâna ramhuaite thu thehdarh chu a entîr a ni.—Mt. 24:42, 44.

16:21. He khawvêl tâwpna a hnaih rual hian, Setana khawvêl suaksual chunga vûrin a entîr Jehova rorêlna puan chhuahnaah chuan, tûn hmaa kan hman ṭhan loh thusawi khauh takte a tel thei a ni. Chutichung chuan, mi tam zâwkte chuan Pathian chu an la sawichhe zawm zêl ang.

HNEHTU LAL CHUAN RO A REL

(Thup. 17:1–22:21)

“Babulon Khaw Ropui,” khawvêl sakhaw dik lo lalram chu Setana khawvêl suaksual pêng tenawm tak pakhat a ni a. Inlârna 11-na chuan ani chu “sakawlh sen tak chunga chuang,” hmeichhe awm ṭha duh lo, “nawhchizuar ropui tak” angin a sawi a ni. Ani chu a chuanna “ki sâwm” nei sakawlh ngei chuan a tiboral ṭhak dâwn. (Thup. 17:1, 3, 5, 16) Nawhchizuar chu “khaw ropui” nêna khaikhinin, a dawta inlârna chuan a tlâwm tûr thu a puang chhuak a, Pathian mite chu hmanhmawh taka “a chhûng ata chhuak” tûrin thu a pe a ni. Khaw ropui tlâwmna chu mi tam takin an sûn a. Amaherawhchu, “Berâm No nupui neih” avângin vânah chuan lâwmna a awm thung. (Thup. 18:4, 9, 10, 15-19; 19:7) Inlârna 13-naah chuan, “sakawr vâr” chunga chuang chu hnamte do tûrin a kal chhuak a. Ani chuan Setana khawvêl suaksual chu a titâwp a ni.—Thup. 19:11-16.

Engtin nge ‘rûlpui tar Diabola leh Setana’ chu a awm tâk ang? Engtikah nge “mei leh kât dîlah chuan an paih” ang? Chu chu inlârna 14-naa a thupuite zînga pakhat a ni. (Thup. 20:2, 10) Inlârna tâwp ber pahnihte chuan Kum Sâng Rorêl chhûnga nun dân tûr hriatthiamna tlêm azâwng min pe a. “Thu puan chhuah” a tâwpnaah, Johana chuan “kawtlai lai taka nunna tui lui” chu a hmu a, “tuihâl a piang” tân sâwmna ropui tak chu tihchhuah a ni bawk.—Thup. 1:1; 22:1, 2, 17.

Bible Chungchânga Zawhnate Chhânna:

17:16; 18:9, 10—Engvângin nge “leia lal” te chuan anmahni ngeiin an tihchhiat chu an sûn? An sûn chhan chu mahni hmasial  vâng liau liau a ni. Babulon Khaw Ropui tihboral a nih hnuah chuan, leia lalte chuan an tâna a lo ṭangkai ṭhinzia an hre chhuak a ni ngei ang. Ani chuan an hnehchhiahna thiltihte chu a lo thup mawisak ṭhîn si a. Tin, indo tûra ṭhalaite lâkna kawngah pawh Babulon Khaw Ropui chuan anni chu a ṭanpui bawk a. Chu bâkah, mite thununna kawngah hmun pawimawh tak a chang bawk a ni.

19:12—Engtin nge Isua chauhvin a hming târ lan loh chu a hriat theih? He hming hi Isaia 9:6-a târ lan ang chi, Lalpa nî chhûnga Isua neih nihna leh chanvo bîk takte sawina a ni thei ang. A chanvo neihte chu a dang lam bîk hle a, chutiang dinhmun sâng tak chelh awmzia chu amah chauhvin a hriat avângin, a hming chu amah chauh lo chuan tu dang mahin an hre thei lo. Mahse, Isua chuan a chanvo neih ṭhenkhat chu a mo pâwl hnênah a sem ṭhen a, ‘an chungah a hming thar chu a ziak’ a tih theih a ni.—Thup. 3:12.

19:14—Armagedon-ah tute nge Isua nên sakawr chunga chuang ang? Pathian indonaa Isua zuitu “vâna sipaihote” zîngah chuan vântirhkohte leh vân lam lâwmman dawng tawh hriak thihte an tel ang.—Mt. 25:31, 32; Thup. 2:26, 27.

20:11-15—‘Nunna bu-ah’ tute hming nge chuang? He lehkhabu-ah hian chatuana nunna chang tûrte—hriak thih Kristian te, mipui tam tak te, leh ‘mi felte thawhlehnaa’ tholeh tûr Pathian chhiahhlawh mi rinawm te—hming a chuang a ni. (Tirh. 24:15; Thup. 2:10; 7:9) ‘Mi fel lote thawhlehnaa’ tholeh tûrte chuan Kum Sâng Rorêl chhûnga hawn tûr kaihhruaina “lehkhabutea ziak” nêna inmila thil an tih chauhvin, an hming chu ‘nuna bu-ah’ an chuantîr thei ang. Mahse, hmingte chu lehkhatui tihreh theih lohva ziak a ni lo. Hriak thihte hming chu an thih thlenga an rinawm chauhvin nunna bu-ah a awm nghet a. (Thup. 3:5) Leia chatuana nunna dawngtu tûrte hming chu kum sâng rorêl zawha fiahna hnuhnûng ber an pal tlang hnuah a nghet chauh vang.—Thup. 20:7, 8.

Kan Zir Tûrte:

17:3, 5, 7, 16. “Chung lam aṭanga finna lo chhuak” chuan “hmeichhia leh a phurtu sakawlh [sen tak] . . . thurûk” chu hre thiam tûrin min ṭanpui a. (Jak. 3:17) He entîr nei sakawlh hi atîrah chuan League of Nations angin a inṭan a, a hnuah United Nations anga tih nun thar leh a ni. He thurûk laihlanna hian ṭhahnemngai taka Pathian Ram chanchin ṭha hril tûr leh Jehova rorêlna ni puang chhuak tûrin min chêttîr tûr a ni lâwm ni?

21:1-6. Lalram awpna hnuaia malsâwmna sawi lâwkte chu a takin a lo thleng dâwn tih kan ring thlap thei a ni. Engvângin nge? Chûng malsâwmnate chungchângah chuan: “A lo thleng ta,” tia sawi a nih avângin!

22:1, 17. “Nunna tui lui” chuan thuâwih mihringte sual leh thihna aṭanga ngai awh leh tûra Jehova thilpêkte ai a awh a. He tui hi tlêm azâwng chu tûnah hian kan hmu thei a ni. Lo kal a, ‘nunna tui a thlâwna la’ tûra sâwmna chu lâwm taka kan pawm bâkah, mi dangte hnênah pawh chu sâwmna chu phûr takin i pe chhuak ve ang u! (w09 2/15)

[Footnote-te]

[Phêk 13-naa milem]

Thuâwih mihringte’n Lalram awpna hnuaia malsâwmna an dawn tûr chu a va ropui tak em!