“Harhfim Rawh U”
“Harhfim Rawh U”
“Thil zawng zawng tâwpna chu a hnai tawh . . . in ṭawngṭai theih nân . . . fîmkhur [“harhfîm,” NW] rawh u.”—1 PET. 4:7.
1. Isua thu zirtîr ber chu eng nge ni?
ISUA Krista leia a awm laia a thu zirtîr ber chu Pathian Ram a ni a. Chu Lalram hmangin, Pathian Jehova chuan lei leh vâna a lalchungnunna chu thiam chantîrin, a hming pawh a tithianghlim ang. Chuvângin, Isua chuan a zirtîrte chu: “I ram lo thleng rawh se. I duhzâwng vâna an tih angin leia mi’n ti rawh se,” tia Pathian hnêna dîl tûrin a zirtîr a ni. (Mt. 4:17; 6:9, 10) Chu Pathian Ram sawrkârna chuan rei lo têah Setana khawvêl hi a rawn titâwp ang a, tichuan lei pum puia Pathian duhzâwng tihna chu a kaihruai ang. Daniela sawi lâwk angin, Pathian Ram chuan “hêng [tûn lai] ram zawng zawngte hi a tikeh sawmin a tiral zâwk ang a, kumkhuain a ding reng ang.”—Dan. 2:44.
2. (a) Engtin nge Isua’n Lalram thuneihna a chang tawh tih a hnungzuitute chuan an hriat theih? (b) Chhinchhiahna chuan eng dang nge a târ lan ang?
2 Pathian Ram lo thleng tûr chu Isua zirtîrte tâna thil pawimawh tak a nih avângin, a hnênah heti hian an zâwt a ni: “I lo kal lehna leh khawvêl tâwpna chhinchhiahna chu engnge ni ang?” tiin. (Mt. 24:3) Lalram thuneihna nêna Krista lo kal lehna, a nih loh leh a lo awm lehna chu leia mite’n an hmuh theih dâwn loh avângin, hmuh theih tûr chhinchhiahna pêk a ni ang. Chu chhinchhiahnaah chuan Pathian Lehkha Thua sawi lâwk hmêlhmang chi hrang hrangte a tel ang. Chutiang chuan, chu mi huna nung dama awm Isua hnungzuitute chuan ani’n vânah ro a rêl ṭan tawh tih an hre thei a ni. Chu chu tûna leilung thunun tlattu kal hmang suaksuak tân a ‘ni hnuhnûngte’ a inṭan tawh tih chhinchhiahna a ni bawk ang.—2 Tim. 3:1-5; Mt. 24:7-14.
Ni Hnuhnûngah Hian Harhfîm Rawh U
3. Engvângin nge Kristiante chu an harhfîm a ngaih?
3 Tirhkoh Petera chuan: “Thil zawng zawng tâwpna chu a hnai tawh a, chuvângin in ṭawngṭai theih nân rilru fel tak puin fîmkhur [“harhfîm,” NW] rawh u,” tiin a ziak a. (1 Pet. 4:7) Lal anga Isua’n ro a rêl tawhzia târ langtu khawvêla thilthlengte hmu thei tûr chuan a hnungzuitute chu harhfîm reng leh inring renga an awm a ngai dâwn a ni. Tin, he khawvêl suaksual tâwpna a hnaih telh telh hian, an harhfîm lehzual ang. Isua chuan a zirtîrte chu: “Inring rengin awm rawh u; [Setana khawvêl chunga rorêl tûra] in neitupa lo haw hun tûr chu . . . in hre si lo,” tiin a hrilh a ni.—Mk. 13:35, 36.
4. Setana khawvêla awm mite rilru put hmang leh Jehova chhiahhlawhte rilru put hmang chu khaikhin rawh. (Bâwm chhûnga thute telh rawh.)
4 Mipui vântlângte chu Setana thununna hnuaiah an awm a, chuvângin khawvêla thilthlengte awmzia chu an ngaihsak lo va. Krista chuan Lal angin ro a rêl ṭan tawh a ni tih an hre hek lo. Mahse, Krista hnungzuitu dik takte chu harhfîm takin an awm a, kum zabi kal ta chhûnga thilthlengte awmze dik tak chu an hria a ni. Kum 1925 aṭang khân, Jehova Thuhretute chuan Khawvêl Indopui I-na leh a hnua thilthleng zawng zawngte chu kum 1914-ah Krista chu vâna Lala a ṭhut ṭan tawhzia finfiahna chiang tak a ni tih an hria. Chuvângin, Setana khawvêl suaksual tân a ni hnuhnûng chu a inṭan der tawh a ni. Thil chîk mi tam tak chuan a awmzia hre thiam lo mah se, Khawvêl Indopui I-na hma leh chu mi hnu lam hun inthlauhna nasa tak chu an hria a ni.—“ Buaina Hun A Inṭan” tih bâwm chu en rawh.
5. Engvângin nge kan harhfîm chhunzawm zêl chu a pawimawh?
5 Kum za dâwn lai chu khawvêl puma thilthleng râpthlâk takte chuan ni hnuhnûnga kan awm tawhzia a finfiah a. Pathian Jehova’n Krista chu Setana khawvêl do tûra vâna sipaihote hruai chhuak tûra thu a pêk hun a lo thleng ṭêp tawh a ni. (Thup. 19:11-21) Kristian dikte chu inring renga awm tûra hrilh an ni a. Chuvângin, he khawvêl tâwpna kan beisei ruala inring renga kan awm chhunzawm zêl chu a pawimawh tak zet a ni. (Mt. 24:42) Kan inring reng tûr a ni a, Krista kaihhruaina hnuaiah khawvêl pum huapa thawh tûr hna pakhat chu kan thawk zo ngei tûr a ni bawk.
Khawvêl Pum Huapa Hnathawh Tûr Chu
6, 7. Ni hnuhnûng chhûngah hian Lalram thu hrilhna chuan engtin nge hma a sâwn?
6 Jehova chhiahhlawhte hnathawh tûr chu he kal hmang suaksual tân a ni hnuhnûnga kan awm tawhzia târ langtu chhinchhiahna hlâwm khat zînga mi anga sawi lâwk a ni a. Isua chuan tâwpna huna lo thleng tûr thil chi hrang hrangte a sawinaah he khawvêl pum huapa hnathawh tûr hi a sawi tel a ni. A hrilh lâwknaah chuan he thu awmze nei tak hi a tel a ni: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu lo thleng ang,” tih hi.—Mt. 24:14.
7 Isua hrilh lâwkna hmêlhmang nêna inkûngkaihna nei thil ṭhenkhat lo ngaihtuah ta la. Kum 1914-a ni hnuhnûngte a inṭan khân, chanchin ṭha puang chhuaktute chu an la tlêm hle a. Tûnah erawh an tam tawh hle a ni. Jehova Thuhretu mi 70,00,000 aia tamte chuan lei pum puiah thu hrilin, kohhran 1,00,000 chuangah an awm tawh a ni. Kum 2008-a Jehova Thuhretute’n Krista thih Hriatrengna an hmannaah mi dang 10,000,000 lai an tel a. Chu chu kum hmasa aiin nasa takin a pung tihna ni.
8. Engvângin nge dodâlna chuan kan thu hrilhna hlawhtlinna tûr a dan theih loh?
8 He khawvêl tâwp hma hian Pathian Ram chanchin chu hnam zawng zawngte hnênah kim chang taka hrilh a va ni tak êm! Chu thu hrilhna chu Setana “he khawvêl pathian” a nihna hnuaia neih a ni. (2 Kor. 4:4) Khawvêla politics lam te, sakhaw lam te, sumdâwnna lam te leh an thil hman chanchin thehdarhnate pawh tiamin, a zavaiin Setana chuan a thunun vek a. A nih chuan, thu hrilhna mak tak maia a hlawhtlin chhan hi eng nge ni ta ang? Pathian Jehova ṭanpuina vâng a ni. Chuvângin, Setana’n tihtâwp a tum reng chung pawhin Lalram thu hrilhna chuan mak tak maiin hma a sâwn chho zêl a ni.
9. Engvângin nge thlarau lama kan hnianghnârna chu thilmak anga sawi theih a nih?
9 Lalram thu hrilhna a hlawhtlinna leh Jehova mite thlarau lama an hnianghnârna chu thilmak anga sawi theih tûr a ni. Pathian ṭanpuinaah chuan a mite a kaihhruaina leh a vênhimna a tel a; a tel lo chuan thu hrilhna chu thawh theih rual a ni lo vang. (Matthaia 19:26 chhiar rawh.) Pathian rawngbâwl duh thinlung harhfîm neite chunga Pathian thlarau thianghlimin hna a thawh avângin, he thu hrilhna hi hlawhtling taka thawh zawh a ni ang a, “chu mi zawhah chuan tâwpna chu a lo thleng ang,” tih kan ring tlat thei a. Chu mi hun chu a lo thleng ṭêp tawh a ni.
“Hrehawm Nasa Tak”
10. Engtin nge Isua’n lo thleng tûr hrehawm nasa tak chungchâng a sawi?
10 He khawvêl tâwpna hi “hrehawm nasa tak” tia kan kohvah hian a lo thleng ang a. (Thup. 7:14) Chu mi reizâwng tûr chu Bible chuan a sawi lo; mahse, Isua chuan: “Chu mi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” a ti. (Mt. 24:21) Mi maktaduai 50 aṭanga 60 vêlin nunna an chân anga chhût a nihna Khawvêl Indopui II-na ang chi he khawvêlin a lo tawn tawh hrehawmna te han ngaihtuah hian, lo thleng tûr hrehawm nasa tak chu a râpthlâk hle ang. Chu chuan Armageddon indonaah a vâwrtâwp a thleng ang a. Chu chu lei lama Setana sûl hnu zawng zawng tiboral tûra Jehova’n a rorêlna thlentîr tûr sipai rualte a rawn tirh hun chu a ni.—Thup. 16:14, 16.
11, 12. Hrehawm nasa tak inṭanna hriltu thilthleng chu eng nge ni?
11 Bible hrilh lâwkna chuan hrehawm nasa tak a hmasa lam a inṭan hun tûr chu sawi lang lo mah se, a inṭanna hriltu thilthleng danglam bîk tak chu min hrilh a ni. Chu thilthleng chu politics thiltihtheihnain sakhaw dik lo zawng zawng a tihboralna a ni a. Thu Puan bung 17 leh 18-a kan hmuh Bible hrilh lâwkna chuan, sakaw dik lo chu leia politics kal hmang nêna inngaih hmang nawhchizuar nên a khaikhin a ni. Thu Puan 17:16 chuan politics lam thilte’n “nawhchizuar chu an hua ang a, engmah nei lo leh saruakin an siam ang a, a sa pawh an ei ang a, meiin an hâlral ang,” tia a sawi hun chu a lo thleng ṭêp tawh tih a târ lang a ni.
12 Chu mi atâna hun ruat a lo thlen hunah, sakhaw dik lo zawng zawng tiboral tûrin “Pathianin [politics rorêltute] thinlungah a tîr” ang. (Thup. 17:17) Chuvângin, he tihchhiatna hi Pathian tih anga sawi theih a ni. Chu chu hun rei tak aṭang tawha a duhzâwng nêna inkalh thurinte zirtîrtu leh A chhiahhlawhte tiduhdahtu sakhaw vervêk tak chunga Pathian rorêlna a ni a. Khawvêla mi nâwlpuite chuan sakhaw dik lo tihchhiatna lo thleng tûr chu an beisei lo va. Mahse, Jehova chhiahhlawh rinawmte chuan an beisei tlat a. Tin, hêng ni hnuhnûng chhûng zawng hian chu mi chungchâng chu mite hnênah an hrilh bawk a ni.
13. Sakhuana dik lo tihchhiatna thilthleng chuan rei lo tê chauh a awh dâwn tih engin nge târ lang?
13 Mite chuan sakhaw dik lo tihboralna hmuh chu mak an ti hle ang. Bible hrilh lâwkna chuan “leia lal” ṭhenkhat pawhin chu tihchhiatna chungchângah: “A chung a pik e, a pik e! Dârkâr khat chauhvah i chungah rorêlna chu a lo thleng ta si a,” an la ti dâwn tih a târ lang a. (Thup. 18:9, 10,15-17, 19) Bible-in “dârkâr khat” tih ṭawngkam a hmanna chuan chu thilthleng chuan rei lo tê chauh a awh dâwn tih a târ lang a ni.
14. Jehova hmêlmate’n a tâwpa a chhiahhlawhte an beih hunah, engtin nge Pathianin a chhân lêt ang?
14 Sakhaw dik lo tihchhiat a nih hnuah, Pathian Jehova rorêlna thuchah puang chhuaktu a chhiahhlawhte chu beih an ni ang tih kan hria a. (Ezek. 38:14-16) Chu inbeihna a lo inṭan chuan, a beitute chuan a mi rinawmte vênhim tiamtu Jehova chu an hmachhawn a ngai dâwn a ni. Pathian Jehova chuan: “Ka thin a rima ka thin a ur lai takin . . . ka sawi a nih hi . . . kei hi LALPA ka ni tih an hria ang,” tiin a puang chhuak a ni. (Ezekiela 38:18-23 chhiar rawh.) Pathian chuan a Thu-ah: “Nangni [ka chhiahhlawh rinawmte] khawihtu chuan [ka] mit nautê a khawih a ni mai,” a ti a. (Zak. 2:8) Chuvângin, a hmêlmate’n khawvêl puma a chhiahhlawhte an beih ṭan hunah, Pathian Jehova chuan a chhâng lêt ang. Hrehawm nasa tak a tâwp lam, Armageddon-a a vâwrtâwp thleng tûr chu a rawn thlentîr ang a. Krista thuneihna hnuaiah, vântirhkoh chak takte chuan Setana khawvêl chunga Jehova rorêlna chu an rawn thlen ang.
Min Nghawng Dân Tûr
15. He khawvêl tâwpna a hnai tawh tih hriatna chuan eng anga min nghawng tûr nge a nih?
15 He khawvêl suaksual tâwpna a thleng ṭêp tawh tih kan hriatna chuan eng anga min nghawng tûr nge a nih? Tirhkoh Petera chuan: “Chûng thilte chu chutianga boral vek tûr a ni tih in hriat avângin . . . awm dân thianghlim leh Pathian ngaihsak kawngah chuan mi eng ang nge in nih tûr le?” tiin a ziak a. (2 Pet. 3:11, 12) Hêng thute hian kan nungchangin Pathian thil phûtte a mil a, Jehova kan hmangaihzia târ langtu Pathian ngaihsak thiltihte kan nuna teltîr tûra fîmkhur a pawimawhzia a sawi uar a ni. Chûng thiltihahte chuan tâwpna a lo thlen hmaa Lalram chanchin ṭha theih tâwpa hrilh pawh a tel a. Petera pawhin: “Thil zawng zawng tâwpna chu a hnai tawh a, . . . in ṭawngṭai theih nân . . . fîmkhur [“harhfîm,” NW] rawh u,” tiin a ziak a ni. (1 Pet. 4:7) Pathian Jehova chu ṭawngṭaia pan rengin, a thlarau thianghlim leh khawvêl pum huap a kohhran kal tlanga kaihhruaina min pe tûra dîlin kan hnaih a, chutiang chuan kan hmangaihna kan lantîr a ni.
16. Engvângin nge Pathian fuihna thu chu kan zawm tlat ang?
16 He hun hlauhawm takah hian, Pathian Lehkha Thu-a fuihna thu hi kan zawm tlat a ngai a ni: “Mi fing lote anga awm lovin mi fingte anga awm zâwkin, in awm dânah fîmkhur rawh u; nîte hi a ṭhat loh avângin remchânnate lei zêl rawh u,” tih hi. (Eph. 5:15, 16) Suahsualna chu tûn hma zawng aiin a hluar hle tawh a. Setana chuan mite’n Jehova duhzâwng an tih theih loh nâna dan nân emaw, an tihna ata an rilru lâk pên nân emaw thil tam tak a ruahman a. Pathian chhiahhlawhte kan nih angin, chu chu kan hria a, Pathian laka kan rinawmna chu engmahin a tihchhiat kan phal lo. Tin, nakin lawka thil lo thleng tûr chu kan hre bawk a, Pathian Jehova leh a thiltumte chu kan ring tlat a ni.—1 Johana 2:15-17 chhiar rawh.
17. Thawhlehna a thlen huna Armageddon-a dam khaw chhuakte awm dân tûr chu sawi rawh.
17 Mitthite kaitho leh tûra Pathian thutiam ropui tak chu a lo thleng ang, “mi felte leh fel lote thawhlehna a awm ang,” tih a nih avângin. (Tirh. 24:15) “Thawhlehna a awm ang” tih thutiam rin tlâk tak hi chhinchhiah rawh. Jehova thutiam a nih avângin rinhlelh tûr rêng a awm lo! Isaia 26:19-na chuan: “I mitthite chu an nung leh ang . . . Vaivuta awmte u, harh ula, hlim takin zai rawh u . . . Lei hian mitthite chu a paih chhuak dâwn si a,” tiin a tiam a ni. Hêng thute hian hmân lai Pathian mite an rama an kîr khân, thlen famkimna hmasa zâwk a nei a; chu chuan khawvêl tharah angial anganin a lo thleng famkim dâwn tih min rinnghehtîr a ni. Tholehte chu an hmangaih takte nêna an inhmuh leh hun chuan an va hlim dâwn êm! Ni e, Setana khawvêl tâwpna chu a hnai tawh a, Pathian khawvêl thar chu a lo thleng ṭêp tawh a ni. Harhfîm taka kan awm reng chu a va pawimawh tak êm! (w09 3/15)
Kan Hre Chhuak Em?
• Isua thu zirtîr ber chu eng nge ni?
• Eng angin nge Lalram thu hrilhna chu tûn laiah a darhzau?
• Engvângin nge kan harhfîm a pawimawh?
• Tirhkohte 24:15-naa thutiam chungchângah eng nge phûrawm i tih?
[Zirlai Atâna Zawhnate]
[Phêk 20, 21-naa bâwm/milem]
Buaina Hun A Inṭan
Buaina Hun: Adventures in a New World tih chu kum 2007-a Alan Greenspan-a lehkhabu ziak thupui a ni a. Kum 20 dâwn lai chu, United States rama central banking system pum pui enkawltu, United States Federal Reserve Board-ah chuan chairman hna a chelh a ni. Greenspan-a chuan kum 1914 hma lam leh a hnu lama khawvêl dinhmun inthlauh dân nasa tak chu heti hian a sawi lang a ni:
“Kum 1914 hma lama khawvêl dinhmun kan hriat theih chinin a târ lan dân chuan, chutih laia khawvêl chuan hnung tawlh thei lo tûr khawpin hma a sâwn chak a; mihringte hi mamawh nei tawh lo tûr an ang ta hial a ni. Kum zabi sâwm pakuana chuan hnehchhiah taka mihring sala inhralhna chu a titâwp a. Nunrâwng taka tharum thawhna chu a tlêm sâwt niin a lang a ni. . . . Kum zabi sâwm pakuana chhûng zawnga khawvêl puma khâwl lam thiamna lama hmasâwnna chuan rêl kawng te, telephone te, electric êng te, cinema te, motor te, leh sawia siak lo tûr khawpa tam in chhûng thil hman tûr remchâng tak takte a awmtîr a. Damdawi lama thiamna pung chho zêl te, ei leh in tûr ṭha zâwk te, leh tui thianghlim in tûr tam tak pêk chhuahte chuan mite dam theih hun chhûng a pawt sei sawt a. . . . Mi zawng zawng chuan hêng hmasâwnna hi a awm chhunzawm zêl an ring a ni,” tiin.
Mahse . . . “Khawvêl Indopui I-na chuan taksa lama nasa taka chhiat zualna thlentu Indopui II-na ai chuan khawvêl hmasâwnna tûr chu a tichhe zual a: chu chuan mihringte ngaihtuahna chu a tichhia a ni. Mihringte’n khuahkhirhna awm hauh lo leh tiam chin nei lova hma an sâwn theih beiseina awm hun, Khawvêl Indopui I-na hma lam kumte chu ka theihnghilh thei lo. Tûn laia kan rilru put hmang hi chutih laia mi nên chuan inlet thawk mah se, kan tûn lai dinhmun nên erawh a inrem zâwk a ni. Khawvêl Indopui I-nain tûn hma khawvêl a lo tihchhiat tawh ang bawkin, tûn laia tharum thawhna te, global warming te, a nih loh leh mipui rilru mila sawrkâr rorêlna te chuan kan tûn lai nun changkâng tak hi a tichhe leh ang em? Tuman dik takin kan sawi thei lo.”
Greenspan-a chuan lehkha a zir laia Economics Professor Benjamin M. Anderson-a (1886-1949) thusawi chu a hre chhuak a ni: “Khawvêl Indopui I-na hmaa khawvêl dinhmun hre pha chin tawh phawt chuan nasa takin nun hlui an ngai a. Chutih hun lai chuan a hnua kan neih theih tawh ngai loh rilrua thlamuanna chu kan nei a ni.”—Economics and the Public Welfare.
G. J. Meyer-a ziak A World Undone tih lehkhabu, kum 2006-a tihchhuah pawhin chutiang deuh tho chu a târ lang a. Chutah chuan heti hian kan chhiar a ni: “Thilthleng chhinchhiah tlâk takte chuan ‘engkim a thlâk danglam vek’ tia sawi a ni ṭhîn a. Indona Ropui [1914-18] chungchângah hi chuan a vawi khatna atân a thleng dik a ni. Chu indona chuan engkim a thlâk danglam tak meuh va: ramri te, sawrkâr leh ramte hmabâk mai ni lovin, chu mi hun aṭanga mite’n khawvêl an thlîr dân leh mahni an inthlîr dân chu a thlâk danglam vek bawk a ni. Chu chu hun kal tluang lai titâwptu ang mai a ni a, indo hnu leh indo hma khawvêl inzawmna tûr chu chatuan atân a tichat ta a ni,” tiin.
[Phêk 22-naa milem]
Armageddon-ah, Jehova chuan vântirhkoh chak takte chu a rawn tîr ang