Isua Chu Pathian Engkimtitheia A Ni Em?
Isua Chu Pathian Engkimtitheia A Ni Em?
Chhân dân tlângpuite:
▪ “Ni e, Isua chu Pathian Engkimtitheia a ni.”
▪ “Isua chu tisaa Pathian lo lan chhuahna a ni.”
Eng nge Isua’n a sawi?
▪ “Nangnin mi hmangaih ni ulang Pa hnêna ka kal dâwn avângin in lâwm tûr a ni; Pa chu keimah aiin a ropui zâwk si a.” (Johana 14:28) Isua’n a Pa a tluk loh thu a sawi.
▪ “Ka Pa, in Pa, ka Pathian, in Pathian hnênah ka lâwn chho dâwn.” (Johana 20:17) Isua chu Pathian angin a insawi lo va; Pathian chu Mi hrang angin a sawi zâwk.
▪ “Keimaha phuahchawpin ka sawi si lo; Pa mi tîrtu chuan ka sawi tûr leh ka hrilh tûr hi thu mi pe zâwk a ni.” (Johana 12:49) Isua thu zirtîr chu ama phuahchawp a ni lo; a Pa hnêna mi a ni.
ISUA chu Pathian Engkimtitheia ang ni lovin, Pathian Fapaah a inchhâl zâwk a ni. Pathian ni sela chuan, he leia a awm laia a ṭawngṭaina chu tu hnênah nge ni ta ang? (Matthaia 14:23; 26:26-29) Mi dang tuemaw a be der mai mai a ni lo tih a chiang hle!
Isua zirtîr pahnihte’n a Lalrama dinhmun ṭha bîk nei tûra an dîl khân, heti hian a chhâng a ni: “Ka ding lam leh vei lama ṭhut tûr thu chu keia pêk tûr a ni lo va, ka Pa buatsaihsakate tân a ni zâwk ang,” tiin. (Matthaia 20:23) Isua’n an dîlna tihhlawhtlinsak tûrin thuneihna a nei lo tih a sawi khân dâwt a sawi em ni? Sawi lo ve! Ani chuan chutiang thu tlûkna chu Pathian chauhvin a siam thei tih inngaitlâwm takin a pawm zâwk a ni. Isua chuan amah emaw, vântirhkohte emaw pawhin an hriat loh, a Pa chauhvin a hriat thil ṭhenkhat a awm thu a sawi hial bawk.—Marka 13:32.
Isua chu leia a awm chhûng chauhvin em ni, Pathian aia a hniam zâwk? Ni lo ve. A thih a, a thawhleh hnuah pawh Pathian aiin a hnuaihnung zâwk tih Bible chuan a sawi. Tirhkoh Paula chuan: “Krista lû chu Pathian a ni,” tiin min hriatnawntîr a ni. (1 Korinth 11:3) Bible chuan nakina “a hnuaia engkim dahin a awm hun chuan Fapa ngei pawh chu a hnuaia engkim dahtu hnuaiah chuan dahin a awm bawk ang, Pathian chu engkima engkim a nih theihna tûrin,” tiin a sawi bawk.—1 Korinth 15:28.
Isua chu Pathian Engkimtitheia a ni lo tih a chiang hle. Chuvângin, Isua’n a Pa chu “ka Pathian” tiin a ko a ni.—Thu Puan 3:2, 12; 2 Korinth 1:3, 4. * (w09 2/1)
[Footnote]
^ par. 12 He mi chungchâng hriat belh nân, Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu, phêk 201-204-na chu en ang che.
[Phêk 7-naa thu lâk chhuah]
Isua chuan amah emaw, vântirhkohte emaw pawhin an hriat loh, a Pa chauhvin a hriat thil ṭhenkhat a awm thu a sawi