Mahni Duhzâwng I Phût Lui Tlat Tûr A Ni Em?

NAUPANG pahnih an infiam a. Pakhat zâwk chuan a ṭhianpa ken lai a duhzâwng tak inkhelhna chu chhuhsakin, “Ka ta a nih kha!” tiin a au chhuak a ni. Mihring ṭha famkim lote hian an naupan têt ata mahni hmasialna engemaw chen an lantîr ṭhîn. (Gen. 8:21; Rom 3:23) Chu bâkah, khawvêl chuan a tlângpuiin mahni hmasialna rilru put hmang a awmtîr a ni. Chu mi pumpelh tûr chuan, mahni hmasial duhna rilru chu kan do fê a ngai ang. Chutianga kan tih chauh loh chuan, awlsam têin mi dangte kan titlu thei a, Jehova nêna kan inlaichînna pawh kan tiderthâwng thei bawk.—Rom 7:21-23.

Kan thiltihin mi dangte a nghawng dân ngaihtuah tûra min fuih nân, tirhkoh Paula chuan: “Thil engkim tih a thiang a, nimahsela thil engkim tih a ṭha kher lo. Thil engkim tih a thiang a, nimahsela thil engkim tihin mi a siam ṭha lo,” tiin a ziak a. Tin, heti hian a sawi bawk: “An tlûk phahna tûr rêng rêng engmah ti suh u,” tiin. (1 Kor. 10:23, 32, 33) Chuti chu, mahni duhzâwnga innghat thilahte hetianga inzawh hi a finthlâk a ni: ‘Kohhrana inremna a derthâwn phah dâwn a nih chuan, ka duhzâwng ti tûra dikna ka neih reng pawh tih loh mai ka inhuam em? A remchân loh hunah pawh, Bible thu bulte nunpui tûrin ka inpeih em?’ tiin.

Hnathawh Tûr Thlanna Kawngah

Mi tam takte chuan an hnathawh tûr thlan chu, mi dangte a nghawng a nih pawha pawi tham lo tûr, mi mal thu tlûkna mai niin an ngai a ni. Mahse, South America ram khaw tê pakhata sumdâwng pa pakhat thiltawn hi han ngaihtuah teh. Ani chu pawisa khelh hmang leh zu ruih hmang nia tlâng hriat a ni. Amaherawhchu, Jehova Thuhretute nêna Bible a zir avângin thlarau lamah hma sâwn chhovin, a nun a thlâk danglam ta a. (2 Kor. 7:1) Vântlâng thu hrilhnaa tel a duh thu a han sawi chuan, upa pakhat chuan a ei zawnna hnathawh lam ngaihtuah tel tûrin thiam takin a fuih a ni. Chu pa chuan a ei zawn nân cane alcohol hralh chhuaktu ber hna chu hun engemawti chhûng a thawk a; chu a thil hralh chu kawng tam taka hman theih ni mah se, mi tam takin thil dang nêna chawhpawlhin ruih nân an hmang ṭhîn a ni.

Chu pa chuan chutiang hna thawk reng chunga thu hrilhnaa a tel chuan, chu chuan kohhran hming a tichhia ang a, Pathian nêna an inlaichînna a tichhe thei bawk ang tih a hre ta a. Chhûngkaw hung tak châwm tûr nei mah se, cane alcohol hralh chu a bânsan ta a ni. Tûnah chuan lehkhaa siam thil chi hrang hrang hralhin a chhûngkua a châwm mêk a. A nupui leh a fa panga-te zînga pahnih nên chuan baptisma an chang tawh a. Tûnah chuan inthlahrung hauh lo leh taima takin chanchin ṭha an hril thei tawh a ni.

Ṭhian Kawm Tûr Thlanna Kawngah

Kan rinna min ṭâwmpui lote nêna inkawm chu mi mal duhthlanna mai nge ni a, chu chuan Bible thu bulte a kalh zâwk? Unaunu pakhat chuan Thuhretu ni lo tlangvâl pakhat nêna party-naa kal chu a duh a. A tâna a hlauhawm theihzia hrilhhriat ni mah se, ama duhthlanna tûr nia a hriat avângin a kal ta tho va. A thlen hnu rei lo têah mut chhuahna damdawi chak tak an pawlh thil in tûr chu pêk a ni a. A hnu dârkâr engemaw zâta a han harh chhuah meuh chuan, a ṭhian anga a ngaiha chuan a lo pâwngsual a ni tih a hre ta a ni.—Genesis 34:2 nên khaikhin rawh.

Ring lotute kawmna chuan chutiang thil râpthlâk tak chu thlen ziah lo mah se, Bible chuan: “Mi fing pâwl la, i lo fing ang a, mi â pâwl erawh chu hrehawm tawrh phahna a ni,” tiin min  vaukhân a ni. (Thuf. 13:20) Ṭhian sual kawm chuan dinhmun hlauhawmah min dah tih chu rinhlelh rual a ni lo! Thufingte 22:3 chuan: “Mi hmanghria chuan thil ṭha lo chu a hmuhin a biru ṭhîn a; mi mâwl erawh chuan a tâwn mai ṭhîn a, a tuar phah ṭhîn,” a ti. Kan ṭhian kawmte chuan keimahni leh Pathian nêna kan inlaichînna a nghawng thei a ni.—1 Kor. 15:33; Jak. 4:4.

Silhfên leh Incheina Kawngah

Thuamhnaw leh inchei dânte chu a inthlâk danglam reng a. Amaherawhchu, silhfên leh incheina kawnga Bible thu bulte erawh chu a ngai reng thung a ni. Paula chuan Kristian hmeichhiate chu “inthlahdah lo leh inbel lutuk lovin, thuam inchawih tâwkin inchei sela,” tiin a fuih a—chu thu bul chu mipate tân pawh a ni. (1 Tim. 2:9) Paula chuan thuamhnaw mâwlmang lutuk inbel tûra a sawina a ni lo va, Kristian zawng zawngte inchei duhzâwng chu a inang vek tûr a ni a tihna lah a ni hek lo. Mahse, eng nge inbel lutuk lo tih chu? Dictionary pakhat sawifiah dân chuan, chu chu “mahni inngaihhlutna emaw, chapona emaw tel lo . . . silhfên lam, ṭawngkam lam, a nih loh leh chêt ze lama mawihnai tak” tihna a ni.

Heti hian kan inzawh a ngai a ni: ‘Mite mit la tûrzâwng thuamhnaw hâk phût lui ta tlat ila, ka inbel lutuk lo ka ti tak zet thei ang em? Ka thuamhnaw hâk dân chuan mite chu ka nihna leh ka nungchang a ṭha lozâwngin a ngaihtuahtîr em?’ tiin. He mi chungchângah hian ‘mahni ta ta mai en lovin, mi dang ta pawh en ṭheuh zâwkin’ “eng kawngah mah tlûk phahna tûr rêng rêng” kan siam lo.—Phil. 2:4; 2 Kor. 6:3.

Sumdâwnna Kawngah

Korinth khua kohhranah thil dik lo emaw, inbumna emaw lama thu buai pawi tak a thlen khân, Paula chuan: “Engati nge dik lo taka tihna chu in tuar zâwk loh? Engati nge tihdâwnna chu in tuar zâwk loh?” tiin a ziak a. Ani chuan Kristiante chu a unau tuemaw rorêlna hmaa thlenpui aia thil engemaw chân mai inhuam zâwk tûrin a zilh a ni. (1 Kor. 6:1-7) United States rama unaupa pakhat chuan he zilhna thu hi a ngai pawimawh hle a. A Kristian unau a hnathawhnapa nên chuan a hlawh chungchângah thu inhmu lovin an awm a ni. Bible kaihhruaina chu zuiin, unau pahnihte chu an buaina chingfel tûrin an inhmu fo va; mahse, an chingfel thei si lo. A tâwpah chuan Kristian upate’n a ai an awh “kohhranho hnênah” an thlen ta a ni.—Mt. 18:15-17.

Lungchhiatthlâk takin, an buaina chu chinfel theih a la ni lo fo va. Vawi tam tak a ṭawngṭai hnuah, hnathawktu chuan a puin a batsak nia a hriat pawisa tam tham tak chân mai chu a titlu ta a ni. Engvângin nge? A hnuah chuan heti hian a sawi: “Kan inrem lohna chuan ka hlimna a ru bo va, thlarau lam thil atâna hman theih tûr hun hlu tam tak a rûk bo vâng a ni,” tiin. Chutiang thutlûkna a siam hnu chuan, chu unaupa chuan hlimna a lo nei leh a, a rawngbâwlna chu Jehova’n mal a sâwm tih a hre thei ta a ni.

Thil Tê Thamah Pawh

Thil tê thamah pawh mahni duhthlannate phût luih tlat lohna chuan malsâwmna a thlen a ni. District inkhâwmpui a inṭan nî chuan, pioneer nupa tuak khat chu hma taka thlengin, an duhna lai tak ṭhutna chu an hauh va. Inkhâwmpui a inṭan chuan, naupang tam tak nei chhûngkaw hung tak pakhat chu mipui tâwt tak zîngah hmanhmawh takin an lo lût a. Chu chhûngkua chuan an ṭhut-ho theihna tûr hmun an zawng tih an han hmuh chuan, an ṭhutna chu an kian ta a. Chuti chuan an chhûngkuain an ṭhu-ho thei ta a ni. Inkhâwmpui a zawh hnu ni tam a liam hmain, chu pioneer nupa chuan lâwmthu sawina lehkha thawn pakhat an dawng a. Chu lehkha-ah chuan an rawn thlen tlai avânga an lunghnualna chu pioneer nupa thiltih chuan lâwmnaa a chantîr nghâl thuai thu a chuang a ni.

Hun remchâng kan neih hian, mi dangte tâna mahni duhzâwng chân chu i inhuam ang u. ‘Mahni hmasial lo’ hmangaihna kan lantîr hian, kohhranah leh kan ṭhenawmte nêna inremna kan awmtîr a. (1 Kor. 13:5) Mahse, a pawimawh ber chu Jehova nêna kan inṭhianna min vawntîr reng thei hi a ni. (w09 2/15)