Pathian Chu Tunge Ni?

HE ZAWHNA hi engtin nge i chhân ang? Mi ṭhenkhat chuan Pathian chu an ṭhian hnai tak ang maia hre chiangah an inngai a. Mi dangte erawh chuan an hriat vak loh hmun hla taka awm an chhûngkhat angin an ngai thung a ni. Pathian a awm tih chu an ring a; mahse, a chungchâng an hre tlêm hle. Pathian i ring a nih chuan, a hnuaia zawhna târ lante hi engtin nge i chhân ang?

1. Pathian hi mi tak tak a ni em?

2. Pathianin hming a nei em?

3. Isua chu Pathian Engkimtitheia a ni em?

4. Pathianin kei hi min ngaihsak em?

5. Biakna zawng zawng hi Pathianin a pawm em?

 Mi dangte hnênah hêng zawhnate hi i zawh chuan, a chhânna inang lo tak tak i dawng thluah ang. Chuvângin, Pathian chungchânga rin dân leh ngaih dân dik lo a awm pawh hi a mak lo ve.

A Chhânna Hriat A Pawimawh Chhan

Isua Krista’n tuichhunchhuah bula a tawn Pathian ringtu hmeichhia a biak lai khân, Pathian chungchânga thudik hriat a ṭûlzia a sawi uar a ni. He Samari hmeichhia hian Isua chu zâwlnei a ni tih a pawm a. Mahse, thil engemawin a rilru a kam a ni. A sakhaw vawn chu Isua sakhaw vawn nên a inang si lo. Chu thil a han sawi chhuah chuan, Isua chuan a hnênah: “Nangnin in hriat loh chibai in bûk ṭhîn,” tiin tlang takin a hrilh a ni. (Johana 4:19-22) Heta ṭang hian Isua chuan sakhaw ngaihsak apiangin Pathian an hre vek kher lo tih a zirtîrzia kan hre thei a ni.

Isua chuan tuma’n Pathian an hre tak tak thei lo a tihna a ni em? Ni lo ve. Chu hmeichhe hnênah chuan: “Pathian chibai bûktu taktakten thlarau leh tih tak zetin Pa chibai an bûk ang, Pain chutiang mi chu a chibai bûktu tûrin a zawng a ni,” tiin a sawi a ni. (Johana 4:23) ‘Thlarau leh tih tak zeta’ Pathian chibai bûktute zînga mi i ni em?

Chûng zînga mi nih chu i tân thil pawimawh ber a ni. Engvângin nge? Isua ngei chuan hriatna dik a pawimawhzia a ṭawngṭainaah a sawi uar a ni: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin. (Johana 17:3) Ni e, i nakin hun beiseina chu Pathian chungchânga thudik i hriatna nên a inzawm tlat a ni.

Pathian chungchânga thudik chu hriat theih a ni tak zet em? Theih tehrêng mai! A nih chuan engtin nge i hriat theih ang? Isua chuan ama chungchângah heti hian a sawi a: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” tiin. (Johana 14:6) Tichuan: “Pa pawh chu tunge a nih, Fapa leh an hnêna Fapain a puan duhnate chauh lo chuan tuman an hre lo,” tiin a sawi bawk a ni.—Luka 10:22.

Chuvângin Pathian hriat theih dân bul ber chu Pathian Fapa, Isua Krista zirtîrna aṭangin a ni. Dik takin, Isua chuan: “Ka thua in awm reng chuan ka zirtîrte in ni tak tak ang. Tin, thutak in hria ang a, thutak chuan bâwih a bân ang che u,” tiin min tiam a ni.—Johana 8:31, 32.

A nih chuan a hmaa kan târ lan tâk zawhna pangate kha engtin nge Isua’n a chhân ang? (w09 2/1)

[Phêk 4-naa milem]

I hriat chian loh Pathian chu i bia em?