Pathianin Biakna Zawng Zawng Hi A Pawm Em?

Chhân dân tlângpuite:

▪ “Sakhua zawng zawngin Pathian hnênah min hruai vek alâwm.”

▪ “Rilrua tih tak zetna kan neih phawt chuan engpawh ring ila a pawi lo.”

Eng nge Isua’n a sawi?

▪ “Kawngka zîmah chuan lût rawh u; boralnaa kalna kawngka chu a zau va, a kawng pawh a zau bawk a, chu mi lama lût chu tam pawh an tam hle a ni; nunna kalna kawngka chu a zîm a, a kawng pawh a chêp bawk a, a hmutute pawh tlêmtê an ni.” (Matthaia 7:13, 14) Sakhua zawng zawngin Pathian hnênah min hruai vek tih Isua chuan a ring lo.

▪ “Chu mi nîah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thilmak tam takte kan ti ṭhîn lo vem ni,’ an la ti ang. Chu mi hunah chuan, ‘Nangni thil sual tite u, ka hre ngai lo va che u, ka hnên ata kal bo rawh u,’ tiin an ni chu ka la hrilh ang.” (Matthaia 7:22, 23) Isua chuan amah zui nia inchhâl apiang chu a pawm vek lo.

SAKHAW ngaihsak mi tam takte chuan an thurin leh thurochhiahte chu an ngaina hle a. Mahse, chûng zirtîrnate chu Pathian Thu, Bible nên inmil lo ta se, engtin nge ni ang? Isua chuan: “In thurochhiah avângin Pathian thu chu in bawh bo ta,” tiin a hun laia sakhaw hruaitute hnênah mihringte thurochhiah zui a hlauhawmna a târ lang a ni. Tichuan, Pathian thusawi hêng thute hi a sawi chhâwng a ni: “Hêng miteho hian an kain mi chawimawi a, an thinlung erawh chuan mi hlat si a. Engpawh ni sela, an zirtîrnaah mihring thupêk an zirtîr avângin an mi biak ṭhin hi athlâwn mai a ni,” tiin.—Matthaia 15:1-9; Isaia 29:13.

Thurin mai ni lovin, nungchang pawh a pawimawh bawk. Bible chuan Pathian bia nia inchhâl mi ṭhenkhatte chungchângah: “Pathian hria an inti a, . . . an thiltihin an phatsan si,” tiin a sawi a ni. (Tita 1:16) Dik takin, Bible chuan kan hun laia awm mi a tam zâwkte chungchângah: “Pathian hmangaih aia mahni lâwmna mai hmangaih zâwktu te an ni dâwn si; Pathian ngaihsak anna an nei ang a, nimahsela a thiltihtheihna chu an âwih lo vang; chûng ang chu hawisan rawh,” tiin a sawi a ni.—2 Timothea 3:4, 5.

Rilrua tih tak zetna neih chu a ngai ngei mai a; mahse, chu chu a tâwk mai lo. Engvângin nge? Miin a dik lozâwnga rilrua tih tak zetna, a nih loh leh ṭhahnemngaihna a neih theih vâng a ni. Chuvângin, Pathian chungchâng hriatna famkim, a nih loh leh hriatna dik neih a ngai a ni. (Rom 10:2, 3) Chutiang hriatna neih leh Bible sawi anga thiltihna chuan Pathian tilâwm thei tûrin min ṭanpui ang. (Matthaia 7:21) Chuti chu, sakhaw dikah chuan rilru put hmang dik, thurin dik, leh Bible sawi anga thiltih a tel a ni. Tin, Bible sawi anga thilti tih awmzia chu nî tina Pathian duhzâwng anga thiltih hi a ni.—1 Johana 2:17.

Bible-in Pathian chungchâng a sawite hriat belh i duh chuan, athlâwna Bible zirna neihpui tûr che-in Jehova Thuhretute be pawp ang che. (w09 2/1)

[Phêk 9-naa thu lâk chhuah]

Sakhaw dikah chuan rilru put hmang dik, thurin dik, leh Bible sawi anga thiltih a tel