Pathianin Hming A Nei Em?

Chhân dân tlângpuite:

▪ “A hming chu Lalpa a ni.”

▪ “Ani chuan hming bîl a nei lo.”

Eng nge Isua’n a sawi?

▪ “Chutichuan nangni chuan hetiang hian ṭawngṭai rawh u:—‘Kan Pa vâna mi, i hming zahawm rawh se.’” (Matthaia 6:9) Isua chuan Pathianin hming a nei tih a ring.

▪ “An hnênah i hming ka hriattîr a, ka hriattîr leh fo vang; nangin kei mi hmangaihna kha anmahniah a awm a, kei pawh anmahnia ka awm theihna tûrin.” (Johana 17:26) Isua chuan Pathian hming a hriattîr.

▪ “‘Lapa [“Jehova,” New World Translation] hminga lo kal chu a eng a thâwl e,’ in tih hma loh chuan mi hmu leh tawh lo vang.” (Luka 13:35; Sâm 118:26) Isua’n Pathian hming a hmang.

PATHIAN ngeiin a hming min hrilh a. Ani chuan chiang takin: “Kei JEHOVA ka ni,” a ti. * (Exodus 6:2) Jehova tih hi Pathianin Hebrai ṭawnga amah leh amah inkoh nâna a hman a hming, Mizo ṭawnga kan lo hriat dân lâr ber a ni a. He Hebrai hming danglam bîk tak hi hmân lai kutziak Bible-ah chuan a sâng têlin a chuang a ni tih i han hriat chuan mak i ti hle ang. Dik takin, Bible-a chuang hming dang zawng aiin Jehova hming chu a chuang hnem zâwk a ni.

“Eng nge Pathian hming?” tih zawhna chu ṭhenkhat chuan “Lalpa,” tiin an chhâng mai thei a. Mahse, chu chhânna chu, “Inthlannaah tunge tling?” tih zawhna chu, “A in-candidate-tu,” tia chhân ang maiin a bengvârthlâk loh ngei ang. “Lalpa” tih leh “candidate-tu” tihte hi hming a nih loh avângin, chutiang chhânna chu a chiang tâwk lo a ni.

Engvângin nge Pathianin a hming min hrilh? Amah kan hriat chian lehzual theih nân a ni. Tehkhin nân, mi pakhat chu dinhmun azirin Pu emaw, Hotupa emaw, a nih loh leh Pa emaw tia koh a ni mai thei. Chûng nihnate chuan a chungchâng ṭhenkhat min hriattîr ngei mai. Mahse, a hming erawh chuan a chungchâng kan hriat tawh zawng zawng min hriat chhuahtîr thung a ni. Chutiang bawkin, Lalpa, Engkimtithei, Pa, leh Siamtu tih nihnate hian Pathian thiltih chi hrang hrangte min hriattîr a. Mahse, a hming Jehova tih erawh chuan, a chungchâng kan hriat tawh zawng zawng chu min hriat chhuahtîr thung a ni. Engtin nge a hming hre si lovin Pathian chu i hriat chian theih ang?

A hming hriat mai ni lovin, kan lam pawh a pawimawh bawk a ni. Engvângin maw? Bible chuan: “Tupawh Lalpa hming lam apiangte chu chhandamin an awm ang,” tih min hrilh avângin.—Rom 10:13; Joela 2:32. (w09 2/1)

[Footnote]

[Phêk 6-naa thu lâk chhuah]

Mi pakhat chu dinhmun azirin Pu emaw, Hotupa emaw, a nih loh leh Pa emaw tia koh a ni mai thei. Mahse, a hming erawh chuan a chungchâng kan hriat tawh zawng zawng min hriat chhuahtîr thung