Pathianin Kei Hi Min Ngaihsak Em?

Chhân dân tlângpuite:

▪ “Pathian chu a ropui lutuk a, ka harsatnate chu engah mah a ngai lo vang.”

▪ “Kei tehlul hi min ngaihsak pawh ka ring lo.”

Eng nge Isua’n a sawi?

▪ “Chawngzawng panga dâr tangka pahnihah an hralh ṭhîn lo vem ni? Nimahsela an zînga pakhat mah Pathianin a hmaih ngai si lo. In samzaite lam pawh hi chhiar vek a ni asin. Hlau suh u; chawngzawng tam tak aiin in hlu zâwk a ni.” (Luka 12:6, 7) Isua chuan Pathianin min ngaihsakzia a zirtîr tih a chiang hle.

▪ “‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni.” (Matthaia 6:31, 32) Pathianin kan mi mal mamawhte a hria tih Isua chuan a hre chiang a ni.

BIBLE chuan Pathian min ngaihsakzia a sawi ngei mai. (Sâm 55:22; 1 Petera 5:7) Min ngaihsak a nih chuan, engah nge tûn laiah hian nasa taka hrehawm kan tawrh? Pathian chuan min hmangaih a, engkimtithei a nih bawk si chuan, engvângin nge hrehawm tawrhna titâwp tûra thil engemaw tal a tih loh?

A chhânnaah chuan mi tam takte hriat loh thil pakhat a tel a—chu chu Diabol-Setana hi he khawvêl suaksual tak chunga rorêltu a ni, tih hi a ni. Isua a thlêm laiin, Setana chuan: “Hêng zawng zawng chunga thuneihna leh a ropuina hi ka pe ang che; ka hnêna pêk a ni tawh si a, ka duh apiang hnênah ka pe bawk ṭhîn a ni,” tiin he khawvêl ram zawng zawng hi pêk a tiam a ni.—Luka 4:5-7.

Tuin nge Setana chu he khawvêl chunga rorêltu nihtîr? Kan nu leh pa hmasa ber, Adama leh Evi’n Setana thu zâwm a, Pathian an hnuchhawn khân, Setana chu an chunga rorêltu atân an thlang tihna a ni. Chu helna aṭang chuan, Pathian Jehova chuan Setana rorêlna a hlawhchham ṭhak a ni tih lantîr nân, dawhthei takin hun a pe a ni. Jehova chuan a rawngbâwl tûrin min tilui lo va; mahse, a hnêna kan kîr theihna tûr kawng erawh a hawng zâwk a ni.—Rom 5:10.

Pathianin min ngaihsak avângin, Setana rorêlna ata min chhan chhuah nân Isua hmangin ruahmanna min siamsak a. Nakîn lawkah, Isua chuan ‘thihna thuneitu (Diabola) chu a tiboral’ ang a. (Hebrai 2:14) Chutiang chuan, ‘Diabola hnathawhte chu a tiboral’ dâwn a ni.—1 Johana 3:8.

He lei hi paradis-a chantîr leh a ni ang a. Chutih hunah, Pathian chuan mite “mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh thei tawh lo vang; thil hmasate chu a ral” tawh ang.—Thu Puan 21:4, 5. * (w09 2/1)

[Footnote]

[Phêk 8-naa thu lâk chhuah]

He lei hi paradis-a chantîr leh a ni ang