Pathian Hnaih Rawh

“An Lungngaihnate Chu Ka Hre Reng”

Exodus 3:1-10

“LALPA chu a thianghlim e, a thianghlim e, a thianghlim e.” (Isaia 6:3) Thlarauva thâwk khum chûng thute chuan Pathian Jehova chu mi thianghlim ber a ni tih a târ lang. ‘A thianghlimna chuan mite ngaihsak lo leh pan ngam lohvah a siam em? Chutiang khawpa Pathian thianghlim chuan kei—sual nei leh mi ṭha famkim lo hi—min ngaihsak tak tak ang em?’ tiin i zâwt mai thei a. Exodus 3:1-10-a chhinchhiah Pathianin Mosia a biakna thu thlamuanthlâk tak chu ilo bih chiang ang u.

Ni khat chu berâm a vên laiin, Mosia chuan thil dangdai tak—‘kâng ral si lova’ hnim buk kâng lai chu a hmu a. (Châng 2) Mak a tih êm avângin, enfiah tûrin a va pan hnai a. Vântirhkoh pakhat hmangin, Jehova chuan Mosia chu hnim buk kâng aṭang chuan a bia a: “Rawn hnaih suh khai: i kephah ata i pheikhawkte kha phelh rawh, i dinna hmun kha lei thianghlim a ni e,” tiin. (Châng 5) Pathian thianghlim ai awhtu awmna a lei thlenga a lo thianghlim ta mai chu, han ngaihtuah teh!

Pathian thianghlim chuan Mosia chu biak chhan a nei a. Ani chuan: “Aigupta rama ka mi awmte chu an hrehawmzia ka hmu reng asin, anmahni vêngtute avânga an au thâwmte chu ka lo hria a; an lungngaihnate chu ka hre reng si a,” a ti a. (Châng 7) Pathian chuan a mite lungngaih manganna chu a hmuh hmaih lo va; ṭanpui dîla an au thâwmte ngaithla thei lo tûrin a beng a chhêt bawk hek lo. Chutih ahnêkin, an lungngaihna chu ama lungngaihna a lo ni ta zâwk a. Pathianin: “An lungngaihnate chu ka hre reng si a,” tia a sawi hi lo chhinchhiah rawh. “Ka hre reng,” tih ṭawngkam chungchângah lehkhabu pakhat chuan: “He ṭawngkam hian mi mala rilru veina, dimdawihna, leh lainatna a kâwk a ni,” a ti. Mosia hnêna Jehova thusawite chuan mite ngaihtuah tak leh ngaihsak tak Pathian a nihzia a târ lang a ni.

Pathianin a mite lungngaihna a hriat chuan eng nge a tih? Ani chuan khawngaih taka enin, lainat takin an au thâwm a ngaithla mai lo. Thilti tûra chêttîrin a awm zâwk a ni. A mite chu Aigupta aṭanga chhan chhuak a, “hnutetui leh khawizu luanna rama” hruai luh chu a tum a ni. (Châng 8) Chu mi atân, Jehova chuan Mosia hnênah: “Ka mi Israela thlahte chu Aigupta ram ata hruai chhuak . . . ang che,” tiin tih tûr a tuksak a. (Châng 10) Chu a tih tûr chu hlen chhuakin, Mosia chuan Israelte chu B.C.E. 1513 khân Aigupta ata a hruai chhuak a ni.

Jehova chu a inthlâkthleng lo. Tûn laia amah betute pawhin an harsatna tawhte chu Pathianin a hmu a, ṭanpui dîla an au thâwm pawh a ngaithla bawk tih an ring tlat thei a. Ani chuan an lungngaihna tawrh chu a hre bawk a ni. Mahse, Jehova chuan a chhiahhlawh inpe takte chu a khawngaih satliah mai lo. Anni chu ‘a ngaihsak avângin’ lainatna Pathian chu an tân thilti tûra chêttîrin a awm a ni.—1 Petera 5:7.

Pathian khawngaihna chuan beisei tûr min pe a. A ṭanpuina nên, keini mi ṭha famkim lote hi engemaw chenin kan thianghlim thei a, a pawm tlâk kan ni thei a ni. (1 Petera 1:15, 16) Rilru beidawnna leh lunghnualna nei Kristian nu pakhat chuan hnim buka Mosia thiltawn chanchin aṭangin thlamuanna a hmu a. Ani chuan: “Jehova’n leia vaivut pawh a tihthianghlim theih chuan, ka tân beisei tûr chhe tê tal a awm ngei ang tih ngaih dân ka nei a. Chu chuan nasa takin min ṭanpui a ni,” a ti.

Pathian thianghlim, Jehova chanchin zir belh i duh em? Jehova chuan “kan taksa siam dân hi a hriat a, vaivut mai kan ni tih a hriat reng avângin,” amah nêna inlaichînna ṭha tak neih chu thil theih a ni.—Sâm 103:14. (w09 3/1)