I Rinawmna Chuan Jehova Thinlung A Tilawm
I Rinawmna Chuan Jehova Thinlung A Tilawm
“Ka fapa, fing la, ka thinlung tilâwm rawh; mi sawi chhetute ka chhân theih nân.”—THUF. 27:11.
1, 2. (a) Joba bu chuan Setana chona eng nge a sawi? (b) Joba hun a liam hnuah pawh Setana’n Jehova chu a la sawi chhe zawm zêl tih engin nge târ lang?
JEHOVA chuan A chhiahhlawh rinawm Joba’n Setana fiahna a tawh chu a phal a. Chuvângin, Joba chuan a rante, a fate, leh a hrisêlnate chu a hloh a ni. Mahse, Setana’n Joba rinawmna a cho khân, a rilruah chuan Joba mai a dah lo. Setana chuan: “Vun aiah vun tih a ni a, a ni, miin a neih zawng zawng a nunna atân a pe phal ang chu!” a ti a. He chona hian Joba ni lo mi dangte pawh kaihhnawihtu thu buai a chawk chhuak a, chu chu a thih hnu hun rei takah pawh a la awm chhunzawm zêl a ni.—Job. 2:4.
2 Joba’n fiahna a tawh hnu kum 600 vêlah, Solomona chu: “Ka fapa, fing la, ka thinlung tilâwm rawh; mi sawi chhetute ka chhân theih nân,” tia ziak tûra thlarauva thâwk khum a ni. (Thuf. 27:11) Chutih hun lai pawh chuan Setana’n Jehova chu a la cho reng a ni tih a chiang hle. Chu bâkah, tirhkoh Johana hnêna pêk inlârnaah chuan Setana chu Pathian chhiahhlawhte hêk leh sawichhe ṭhîna hmuh a ni a, kum 1914-a Pathian Ram din a nih hnu khân vân aṭanga paihthlâk a ni. Ni e, he khawvêl suaksual tâwp ṭêp tawhah pawh hian, Setana chuan Pathian chhiahhlawhte rinawmna chu a la cho reng tho zu nia!—Thup. 12:10.
3. Joba bu aṭangin eng zir tûr hlu tak nge kan hmuh theih?
3 A nih chuan, Joba bu aṭanga kan thil zir pawimawh tak pathumte hi ngaihtuah ta ila. A hmasain, Joba tawn fiahna chuan mihringte hmêlma dik tak leh Pathian mite dodâlna lo chhuahna bul ber chu min hriattîr a. Chu hmêlma chu Diabol-Setana a ni. A pahnihna chu, eng ang fiahna pawh tâwk mah ila, Pathian nêna inlaichînna ṭha tak neihna chuan kan rinawmna vawng reng tûrin min ṭanpui tih a ni a. A pathumnaah chuan, fiahna a lo thlena kawng engemaw taka fiah kan nih hian, Pathian chuan Joba a ṭanpui ang chiahin min ṭanpui tih a ni bawk. Pathian Jehova’n tûn laiah chutiang ṭanpuina chu a Thu, a inawpna pâwl, leh a thlarau thianghlim hmangin min pe a ni.
Hmêlma Dik Tak Chu Hre Reng Rawh
4. He khawvêl dinhmunte avânga mawhpuh tûr chu tunge ni?
4 Mi tam tak chuan Setana a awm tih an ring lo va. Chuvângin, khawvêl dinhmunte avângin mangang mah se, anni chuan a awmtîrtu dik tak chu Diabol-Setana a ni tih an hre lo. Mihringte hrehawm tawrh a tam zâwkte lo chhuahna chu anmahni bawk a ni ngei mai. Kan nu leh pa hmasa ber, Adama leh Evi chuan anmahni Siamtu laka inlâk hran chu an lo thlang a. Chuta ṭang chuan chhuan thar lo langte chuan thil finthlâk lo tak takte an ti chho a ni. Chutichung pawh chuan, Pathian laka hel tûra Evi bumtu chu Diabola a ni tho tho. Ani chu mihring ṭha famkim lo leh thih hmabâkte zînga a thununna hnuaia awm khawvêl inawpna kal hmang dintu a ni a. Setana chu “he khawvêl pathian” a nih avângin, mihringte chuan a mizia tlângpui—chapona te, inhnialna te, inelna te, îtsîkna te, duhâmna te, bumna te, leh helna te chu an lantîr ve a ni. (2 Kor. 4:4; 1 Tim. 2:14; 3:6; Jakoba 3:14, 15 chhiar rawh.) Chûng miziate chuan mihringte lungngaihna nasa tak thlentu politics leh sakhaw lama inrem lohna te, inhuatna te, ei rûkna te, leh buainate a awmtîr a ni.
5. Hriatna hlu tak kan neih chu eng anga hman nge kan duh?
5 Keini Jehova chhiahhlawhte neih hriatna hi a va hlu tak êm! Khawvêl dinhmun chhe zual zêlte avânga mawhpuh tûr chu kan hai lo. Chuti chu, mite hnêna buaina siamtu ber nihna hrilh hre tûr hian thlawhhma rawngbâwlnaa tel tûra chêttîrin kan awm a ni lâwm ni? Tin, Pathian dik, Jehova lama ṭan leh Setana leh mihringte chungpikna a tihtâwp dân tûr mi dangte hnêna hrilhfiah chu nuam kan ti a ni lâwm ni?
6, 7. (a) Betu dikte tihduhdahna chunga mawhphurtu chu tunge ni? (b) Engtin nge hmân laia Elihua chu kan entawn theih ang?
6 Setana chuan khawvêla thleng lungngaihna tam tak chungah chauh ni lovin, Pathian mite tawh dodâlna chungah pawh mawh a phur a ni. Ani chuan kan chunga fiahna thlentîr chu a tum tlat a. Isua Krista chuan tirhkoh Petera hnênah: “Simon, Simon, ngai teh, Setanan buh thlei anga a thlei theihna tûr che uin, nangniho hi a dîl che u asin,” a ti a. (Lk. 22:31) Chutiang bawkin, Isua hniak hnung zuitu kan zînga mi tinte hian kawng engemaw takin fiahna kan tâwk ṭheuh dâwn a ni. Petera chuan Diabola chu a ei theih tûr zawng “sakeibaknei rûm ṭhîn” nên a tehkhin a. Tin, Paula pawhin: “Tupawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” a ti bawk.—1 Pet. 5:8; 2 Tim. 3:12.
7 Kan unau tuemaw ber chunga chhiatna a thlen hunah, engtin nge hmêlma dik tak chu rilruah kan dah tih kan târ lan theih? Chhiatna tâwktu hnên aṭanga inlâk hran ai chuan, ṭhian dik tak anga Joba hnêna thusawitu hmân laia Elihua angin thil kan ti a ni. Chu kan unau chu kan zavai atâna hmêlma Setana a donaah kan ṭanpui a. (Thuf. 3:27; 1 Thes. 5:25) Kan tum ber chu, engpawh tih ngai sela, kan unauvin a rinawmna vawnga Jehova thinlung a tihlâwm theihna tûra amah ṭanpui hi a ni.
8. Engvângin nge Setana chuan Joba chu Jehova chawimawi lo tûra a dan theih loh?
8 Setana’n Joba thil neih a chântîr hmasak ber chu a rante a ni a. Chûng rante chu a hluin, a sum lâk luhna ber pawh a ni mai thei. Mahse, Joba chuan chûng rante chu Pathian biak nân pawh a hmang bawk a. Joba’n a fate a then thianghlim hnu chuan, “zîng takah a tho va, an zaa hming kimin hâlral inthawi a hlân a: Joba chuan, ‘Ka fapate hian thil an lo tisualin Pathian an lo sawi chhia a ni mahna,’ a ti a ni. Joba chuan hetiang hian a ti fo ṭhîn a ni,” tiin. (Job. 1:4, 5) Chuvângin, Joba chuan Jehova hnênah rana inthawina a hlân fo va. Fiahna a lo inṭan chuan, chu chu thil tihtheih a ni ta lo. Joba chuan Jehova chawimawi nân thil hlu, a nih loh leh ‘sum’ a nei tawh si lo. (Thuf. 3:9) Mahse, Jehova chu a hmuiin a chawimawi thei a, a chawimawi ngei bawk zu nia!
Jehova Nêna Inlaichînna Ṭha Nei Rawh
9. Kan thil neih hlu ber chu eng nge ni?
9 Kan hausa emaw, kan rethei emaw; kan ṭhalai emaw, kan tar tawh emaw; kan hrisêlna a ṭha emaw, ṭha lo emaw pawh ni se, Jehova nên hian inlaichînna ṭha tak kan nei thei a. Eng ang fiahna pawh hmachhawn ila, Pathian nêna inlaichînna ṭha kan neihna chuan kan rinawmna vawng tûr leh Jehova thinlung tilâwm tûrin min ṭanpui ang. Thutak hriatna nei tam lo mi ṭhenkhat pawhin huai taka ding nghetin, an rinawmna chu an vawng a ni.
10, 11. (a) Engtin nge unaunu pakhat chuan rinawmna fiahna chu a chhân lêt? (b) He unaunu hian Setana hnênah chhânna thiltithei tak eng nge a pêk?
10 Unaunu Valentina Garnovskaya-i entîrna hi han ngaihtuah ila, ani chu Joba anga fiahna nasa tak tâwk chunga rinawmna vawng tlattu Russia rama Thuhretu tam tak zînga pakhat a ni a. Kum 1945-a kum 20 mi vêl a nih lai khân unaupa pakhat chuan thu a va hrilh a. Unaupa chuan Bible chungchâng sawi tûrin vawi hnih a va tlawh leh a; mahse, a hnuah chuan a hmu leh ta rêng rêng lo mai a. Chuti chung pawh chuan, Valentina-i chuan a ṭhenawmte hnênah thu a hrilh ṭan a ni. Chu mi avâng chuan man a ni a, camp-a kum riat chhûng tântîr a ni ta a ni. Kum 1953-ah chuan chhuah a ni a, a thu hrilhna chu a chhunzawm nghâl a. Mana tântîr a ni leh a—he mi ṭumah hi chuan kum sâwm tâng tûra a chung thu rêl a ni. Camp pakhata kum engemaw zât a tân hnu chuan, a danga sawn a ni a. Chu camp-ah chuan, Bible bu khat nei unaunu ṭhenkhat an awm a ni. Ni khat chu unaunu pakhat chuan Valentina-i hnênah an Bible kawl chu a hmuhtîr a. Chu chuan a va tichak tak êm! Valentina-i tân Bible a hmuh hmasak ber chu kum 1945-a a hnêna thu hrilhtu unaupa hman kha a ni a, tûna a hmuh hi atân chuan Bible bu dang a hmuh awmchhun a ni hi han ngaihtuah teh!
11 Kum 1967-ah chuan Valentina-i chu chhuah zalên a ni a, a tâwpah chuan tuia baptisma changin Jehova hnênah a inpumpêkna chu a lantîr thei ta a ni. Kum 1969 thlengin zalênna a neih chu rawngbâwlnaa ṭhahnemngai taka tel nân a hmang a. Mahse, chu mi kumah chuan man a ni leh a, he mi ṭumah hi chuan kum thum tântîr a ni leh a. Chutichung pawhin, Valentina-i chuan thu a hrilh zawm zêl a ni. Kum 2001-a a boral hma khân, mi 44 chu thutaka awm tûrin a ṭanpui a ni. Tân in leh camp-ah kum 21 lai a hmang a. A rinawmna vawng reng tûrin a zalênna neih pawh tiamin engkim chân a inhuam a ni. A thih dâwn hnaihah, Valentina-i chuan: “Mahni tân awmna tûr takngial pawh ka nei ngai lo. Ka thil neih zawng zawng chu suitcase pakhat khat mawi tâwk lek a ni a; mahse, ka hlimin, Jehova rawngbâwlnaah ka lungawi hle,” a ti. Mihringte’n fiahna hnuaiah Pathian laka an rinawmna an vawng reng lo vang titu Setana hnêna Valentina-i pêk chhânna chuan thil a va tithei tak êm! (Job. 1:9-11) Ani chuan Jehova thinlung a tilâwm tih leh, Pathian chuan Valentina-i leh mi rinawm dang thi tawh zawng zawngte a kaihthawh leh hun tûr chu a nghâkhlel hle tih kan chiang thei a ni.—Job. 14:15.
12. Jehova nêna kan inlaichînnaah hmangaihna chuan eng chanvo nge a neih?
12 Jehova nêna kan inṭhianna chu amah kan hmangaihnaah a innghat a. Pathian miziate chu kan ngaisângin, a thiltumte nêna inmila nung tûrin kan tihtheih apiang chu kan ti a ni. Diabola puhna nêna inkalhin, mahni duhthuin leh engmah phût lêt nei lovin Jehova hnênah hmangaihna kan hlân a. Chutiang hmangaihna dik chuan fiahna hnuaia rinawmna vawng tûrin min tichak a ni. Tin, Jehova chuan a mi rinawmte, a nih loh leh ‘a mi thianghlimte kawng a vawng ṭha’ ve thung bawk.—Thuf. 2:8; Sâm 97:10.
13. Engtin nge Jehova chuan atâna kan thiltih chu a thlîr?
13 Kan tihtheih chu tlêm hle nia kan hriat pawhin, hmangaihna chuan Jehova hming chawimawi tûrin min chêttîr a. Ani chuan min chêttîrtu ṭha kan neih chu a hmu a, kan duh ang kan tih theih loh hunah pawh min dem lo. Kan thiltih chauh ni lovin, kan tihchhana pawh chu a pawimawh hle. Joba chuan lungngai hlein, nasa takin tuar mah se, amah sawichhetute hnênah Jehova kawngte a ngainatzia chu a sawi chhuak a ni. (Joba 10:12; 28:28 chhiar rawh.) Joba bu bung tâwpna chuan thu dik an sawi loh avânga Elifaza te, Bildada te, leh Zofara te chungah Pathian a thinur thu a târ lang a. Chutih rual chuan, Jehova chuan Joba chu “ka chhiahhlawh” tia vawi li lai kovin leh thil sual titute tâna ṭawngṭaisak tûra hrilhin, Joba a pawmzia a târ lang a ni. (Job. 42:7-9) Jehova duhsak hlawh thei tûrzâwngin thil i ti ve ang u.
Jehova Chuan A Chhiahhlawh Rinawmte Chu A Ṭanpui
14. Engtin nge Jehova’n Joba chu a ngaihtuahna siam ṭha tûra a ṭanpui?
14 Mi ṭha famkim lo a ni chung pawhin, Joba chuan a rinawmna chu a vawng a. Nasa taka hrehawm a tawrh avângin, thlîr dân dik lo neih châng pawh a nei ngei mai. Entîr nân, Jehova hnênah: “Nang ka au che a, mi chhâng lo va. . . . I kut chakin mi tiduhdah a,” a ti a. Chu bâkah, Joba chuan: “Mi suaksual ka ni lo,” tih leh “ka kutah pâwngnêkna a awm lo va, ka ṭawngṭaina a thianghlim,” tia sawiin a thiam thu sawi chhuah chu a ngai pawimawh hle bawk. (Job. 10:7; 16:17; 30:20, 21) Mahse, Jehova chuan Joba lam hawi ni lo zawhna indawt tam tak zâwtin ani chu ngilnei takin a ṭanpui a. Chûng zawhnate chuan Joba chu Pathian chungnunna leh mihringte eng tham mah an nih lohna hmu thiam lehzual tûrin a ṭanpui a. Joba chuan kaihhruaina chu zâwmin, a insiam ṭha ta a ni.—Joba 40:8; 42:2, 6 chhiar rawh.
15, 16. Eng kawngtein nge Pathian Jehova chuan tûn laia a chhiahhlawhte chu a ṭanpui?
15 Jehova chuan tûn lai a chhiahhlawhte hnênah kaihhruaina ngilnei tak leh zilhna thute a pe a, chu chu nasa takin kan hlâwkpui a ni. Entîr nân, Isua Krista chuan tlanna inthawina hlânin, sual ngaihdamna ṭanchhan tûr a siam a. Chu tlanna zârah, ṭha famkim ni lo mah ila Pathian nêna inlaichînna ṭha kan nei thei a ni. (Jak. 4:8; 1 Joh. 2:1) Fiahnate kan tawh hunah, min ṭanpui tûr leh min tichak tûrin Pathian thlarau thianghlim kan dîl a. Chu bâkah, Bible a bu pumin kan nei a, kan chhiara a thute kan chhût ngun hian, rinna fiahnate atân kan inbuatsaih tihna a ni. Chutianga inzirna chuan lei leh vâna lalchungnunna thu buai leh mi mala rinawmna hre thiam tûrin min ṭanpui bawk.
16 Chu bâkah, Pathian Jehova’n “bawi rinawm, fing tak” hmanga thlarau lam chaw a pêkna khawvêl pum huap inunaunaa telna chu nasa takin kan hlâwkpui a ni. (Mt. 24:45-47) Jehova Thuhretute kohhran 1,00,000 aia tamah chuan, rinna fiahna lo awm theite hmachhawn thei tûra min zirtîrtu leh min tichaktu inkhâwmte chu neih a ni a. Chu chu German rama Thuhretu tleirâwl Sheila-i thiltawn chuan a târ lang a ni.
17. Hmeichhe naupang pakhat thiltawn chuan Kristian inkhâwmnaa tel ziah a finthlâkzia engtin nge a târ lan?
17 Ni khat chu school-a Sheila-i te class chu rei vak lo chhûng zirtîrtu awm lovin a awm a. A zirpuite chuan nakin hun tûr hriat theihna tûra ai en nâna an hman thil chi khat, Ouija board an tih chu hman chhin an tum a. Sheila-i chuan classroom chu a chhuahsan vat a, a hnua a thil hriat avângin a lo chhuahsan ta chu a lâwm hle. Chutianga Ouija board an hman lai chuan zirlai ṭhenkhat chuan ramhuai a awm tih an hria a, thlabâr chi-aiin an tlân chhia a ni. Sheila-i chu an classroom chhuahsan vat tûrin engin nge ṭanpui? Ani chuan: “Chu thil a thlen hma lawk chuan, Kingdom Hall-ah Ouija board hman a hlauhawmzia sawiho a ni a. Chuvângin, ka tih tûr chu ka hre nghâl mai. Bible-a Thufingte 27:11-in a sawi ang ngeiin, Jehova tihlâwm chu ka duh a ni,” tiin a sawi a ni. Sheila-i’n inkhâwmnaa tel a, thusawite ngun taka a lo ngaihthla chu a va ṭha tak êm!
18. A mi mal takin eng nge tih i tum tlat?
18 Kan zavai hian Pathian inawpna pâwl pêk kaihhruainate zui chu i tum tlat ang u. Inkhâwma tel ziahna te, Bible chhiarna te, Bible ṭanchhan thu leh hla chhuah zirna te, ṭawngṭai te, Kristian puitlingte nêna inkawmna te aṭangin kan mamawh kaihhruaina leh ṭanpuina kan hmu. Pathian Jehova chuan hnehna kan chan a duh a, kan rinawm zui zêl dâwn tih a ring tlat bawk a ni. Jehova hming chawimawi tûr te, rinawmna vawng tûr te, leh Jehova thinlung tilâwm tûr tea kan neih chanvo chu a va ropui tak êm! (w09 4/15)
Kan Hre Chhuak Em?
• Setana chuan eng ang dinhmun leh fiahnate nge a awmtîr?
• Kan thil neih hlu ber chu eng nge ni?
• Jehova nêna kan inṭhianna chuan eng nge a ṭanchhan?
• Tûn laia Jehova’n min ṭanpui dân kawng ṭhenkhat chu engte nge ni?
[Zirlai Atâna Zawhnate]
[Phêk 16-naa milem]
Hriatna hlu tak i neih chu mi dangte hnêna hrilh tûra chêttîrin i awm em?
[Phêk 17-naa milem]
Kan unaute chu an rinawmna vawng tûrin kan ṭanpui thei
[Phêk 18-naa milem]
Valentina-i chuan a rinawmna vawng tûrin thil engkim chân a inhuam