Joba Chuan Jehova Hming A chawimawi
Joba Chuan Jehova Hming A chawimawi
“LALPA [“Jehova,” NW] hming chu fakin awm rawh se.”—JOB. 1:21.
1. Joba bu hi tu ziah nge ni thei a, engtik vêl khân nge ziak a nih?
PHARAOA thinurna pumpelh tûra Aigupta ram ata tlân chhiaa Midian rama a awm lai khân, Mosia chu kum 40 mi vêl a ni a. (Tirh. 7:23, 29) Chu rama a awm chhûng chuan, a bul hnai Uz rama awm Joba tawn fiahnate chungchâng chu a lo hriat ngei a rinawm a ni. Kum tam tak a liam hnu, Mosia leh Israel mite’n thlalêra an zin kawng tâwp lam, Uz ram hnaia an awm lai khân, Mosia chuan Joba hun tâwp lam chanchinte chu a hriat ngei a rinawm bawk. Judate thawnthuin a sawi dânin, Mosia chuan Joba thih hnuah Joba chanchin chu a ziak a ni.
2. Eng kawngin nge Joba bu chu tûn laia Jehova chhiahhlawhte tân rinna tichaktu a nih?
2 Joba bu hian tûn laia Pathian chhiahhlawhte rinna chu a tichak a ni. Eng kawngin nge? Thuziak chuan vâna thilthleng pawimawh tak hriatthiamna min pe a, lei leh vâna Pathian lalchungnunna thu buai pawimawh ber chu uar takin a târ lang a ni. Joba chanchin hian rinawmna vawnnain a kaihhnawih thilte chu min hriatthiamtîr lehzual a, Pathian Jehova chuan a chhiahhlawhte’n engemaw chânga hrehawm an tawrh a phal chhan hre thiam tûrin min ṭanpui bawk. Chu bâkah, Joba bu chuan Diabol-Setana chu Jehova Hmêlma bul ber leh mihringte hmêlma a ni tih a târ lang bawk a. Tin, Joba ang mi ṭha famkim lote’n fiahna nasa tak hnuaiah pawh Jehova lakah an rinawm thei tih a târ lang bawk a ni. Joba bua târ lan thilthleng ṭhenkhat chu ilo bih chiang ang u.
Setana’n Joba A Fiah
3. Joba chungchâng eng nge kan hriat a, engin nge ani chu Setana do ber nihtîr?
3 Joba chu mi hausa leh challang, a chhûngkua ṭha taka kaihruaitu a ni a. Ṭanpui ngaite ṭanpuitu leh thurâwn petu mi zahkai tak a ni. Tin, a pawimawh berah chuan Joba chu Pathian ṭih mi a ni. Joba chu “mi famkim, mi ngîl tak, Pathian ṭih mi, thil ṭha lo laka insûm thei mi” a ni a. Diabol-Setana do ber nihtîrtu chu a hausakna leh a challanna ni lovin, Pathian a ngaihsakna hi a ni.—Job. 1:1; 29:7-16; 31:1.
4. Rinawmna chu eng nge ni?
4 Joba bu a tîr lama chanchin ziak chuan vâna vântirhkohte chu kal khâwmin Jehova hmaa an hmun ṭheuhvah an inlan thu a târ lang a. Chutah chuan Setana pawh a va tel a, Joba chu dik lo takin a puh a ni. (Joba 1:6-11 chhiar rawh.) Setana chuan Joba thil neihte chu sawi lang ve mah se, Joba rinawmna chu a cho deuh ber a ni. “Rinawmna” tih thu mal hian mi ngîl, sawisêl bo, mi fel, leh mi dik nihna a keng tel a. Bible-in a hman dân chuan, mihringte rinawmna chuan thinlung zawng zawnga Jehova hnêna inpumpêkna a kâwk a ni.
5. Setana’n Joba chungchâng eng nge a sawi?
5 Setana chuan Joba’n Pathian a biak chhan chu a rinawm vâng ni lovin, mahni hma a sial vâng a ni a ti a. Joba chu Pathianin mal a sâwm a, a vênhim chhûng chauhvin Jehova chungah a rinawm ang tiin a ṭang tlat a ni. Setana puhna chhân lêt nân, Pathian Jehova chuan Setana’n chu mi rinawm a beih chu a phal ta a. Chuvâng chuan, ni khat chhûngin Joba rante chu rûk bo emaw, tihboral emaw a ni a, a chhiahhlawhte chu thah an ni bawk a; tin, a fa sâwmte chu an boral vek bawk a ni. (Job. 1:13-19) Setana beihna chuan Joba rinawmna chu a tidanglam em? Thlarauva thâwk khum thuziak chuan Joba’n a vânduaina a chhân lêt dân chu a târ lang a ni: “LALPAN a pe a, LALPAN a la leh ta a; LALPA [“Jehova,” NW] hming chu fakin awm rawh se,” tiin.—Job. 1:21.
6. (a) Vâna inhmuh khâwmna a awm leh khân eng thil nge thleng? (b) Jehova laka Joba rinawmna a cho lai khân, Setana rilruah tunge awm?
6 A hnuah chuan, vânah inhmuh khâwmna dang a awm leh a. Setana chuan: “Vun aiah vun tih a ni a, a ni, miin a neih zawng zawng a nunna atân a pe phal ang chu! Tûnah i kut thawh la, a ruh leh a tisa ngei khawisak teh, i hmaichhan ngeiah a sawichhe mai ang che,” tia sawiin Joba chu a sawi chhe leh a. Setana chuan a sawichhiatnaah mi dangte pawh a telh belh tih hi chhinchhiah ang che. “Miin a neih zawng zawng a nunna a tân a pe phal ang chu!” tia sawiin, Diabola chuan Joba rinawmna chauh ni lovin, Jehova betu ‘mi’ tupawh rinawmna chu a cho a ni. Chu mi hnu chuan, Pathianin Setana chu Joba chunga natna hrehawm tak a thlentîr a phal ta a. (Job. 2:1-8) Mahse, Joba fiahna tawh chu chûng mai a la ni lo.
Joba Rilru Put Hmang Aṭanga Kan Thil Zir Theih
7. Eng kawngin nge a nupui leh amah va tlawhtute chuan Joba chu an nawr?
7 Atîrah chuan, Joba nupui pawhin a pasal tawrh ang chiah chu a tuar ve tho va. A fate thihna leh an chhûngkaw hauhsakna an chânna chuan nasa takin a tilungngai ngei ang. A pasalin natna hrehawm tak a tuar lai a hmuhna pawh chuan a rilru a tihrehawm ngei ang. Joba hnênah: “I ngai rengin em ni i awm dâwn? Pathian chu sawichhia la, thi la a ni mai,” tiin a sawi chhuak a. Tichuan, mi pathum—Elifaza, Bildada, Zofara—te chu Joba hnêm tûrin an lo thleng a. Mahse, hnem ahnêkin, anni chuan chhût dân dik lo hmangin, “thlamuantu tuar hrehawm” an nihzia an târ lang zâwk a ni. Entîr nân, Bildada chuan Joba fate’n thil sual an ti a, an chunga thilthleng chu an phu rêng a ni a ti. Elifaza chuan Joba’n tûn hmaa thil sual a lo tihte avângin hremna a tuar tih lam hawiin thu a sawi a. Pathian tân rinawmna vawngtute chu an hlu lêm lo niin a sawi hial bawk! (Job. 2:9, 11; 4:8; 8:4; 16:2; 22:2, 3) Chutianga nasa taka nawrna hnuaiah, Joba chuan a rinawmna chu a vawng reng a ni. “Pathian ai maha amah thiam a inchantîr” lai khân, Joba chuan thil a tisual ngei mai. (Job. 32:2) Chutichung chuan a rinawm tluan parh a ni.
8. Tûn laia mi dangte zilhtute tân Elihua’n entawn tûr ṭha eng nge a siam?
8 A dawtah chuan, Joba va tlawh vetu Elihua chanchin chu kan chhiar a. Ani chuan Joba leh a ṭhiante pathum inhnialna thu chu a ngaithla tluan phawt a. An zînga naupang ber mah ni se, Elihua chu a fing ber a ni. Joba chu zah thiam takin a bia a. Elihua chuan Joba chu mi ngîl tak a nih avângin a fak a ni. Mahse, Joba’n a dikzia nasa taka târ lan a tum tih a sawi lang bawk a. Tichuan, Elihua chuan Joba chu Pathian rawng rinawm taka bâwl reng chu thil manhla ber a ni tih a tiam nawn a ni. (Joba 36:1, 11 chhiar rawh.) Tûn laia zilhna petu tûrte tân entawn tûr ṭha a va ni tak êm! Elihua chuan ṭha taka ngaithlain dawhtheihna a lantîr a, a remchân huna fakna thu sawiin, mi tichak thei tak zilhna pawh a pe bawk a ni.—Job. 32:6; 33:32.
9. Engtin nge Jehova’n Joba chu a ṭanpui?
9 A tâwpah, Joba chuan in lêng mak ropui tak a nei ta! Thuziak chuan: “LALPA chuan ṭhâwngaleivir aṭangin Joba chu a chhâng a,” a ti. Pathian Jehova chuan zawhna inzawm tam tak hmangin Joba chu a ngaihtuahna siam ṭha tûrin ngilnei takin a zilh a ni. Joba chuan chu thununna chu lâwm taka pawmin: “Kei mi pawimawh tham lo tê hian . . . vut leh vaivuta ṭhuin ka sim ta e,” tiin a pawm a ni. Pathian Jehova chuan Joba a biak hnuah, A chungchâng thu ‘dik taka’ an sawi loh avânga Joba ṭhian pathumte laka A thinur thu A sawi chhuak bawk a. Joba chuan an tân a ṭawngṭaisak a ngai a ni. Tichuan “Joba chuan a ṭhiante pathum tâna a ṭawngṭai chuan LALPAN Joba chan chu a tiṭha leh ta a; LALPA chuan Joba chu a hmaa a neih lêt hnih a pe leh ta” a ni.—Job. 38:1; 40:4; 42:6-10.
Eng Anga Nasain Nge Jehova Chu Kan Hmangaih?
10. Engvângin nge Jehova chuan Setana chu a ngaihthah emaw, a tihboral emaw mai loh?
10 Jehova chu lei leh vân Siamtu, thil siam zawng zawng chunga Lal chungnungber a ni a. Engvângin nge Diabola chona chu a ngaihthah mai loh? Setana ngaihthah mai emaw, tihboral emawna chuan a chawh chhuah thu buai chu a chingfel dâwn lo tih Pathian chuan a hria a ni. Diabola chuan Jehova chhiahhlawh rinawm tak Joba chu a hausaknate lâk bosak a nih chuan a rinawm reng lo vang a ti tlat a. Mahse, Joba chu fiahna kârah pawh a rinawm tlat a ni. Tichuan, Setana chuan mihring tupawhin tisaa hrehawm an tawrh chuan Pathian an hawisan ang a ti leh a. Joba chuan hrehawm a tuar ngei a; mahse, a rinawmna chu a ngai reng a ni. Chutiang chuan, ṭha famkim lo chung pawha rinawm Joba chungchângah Setana chu dawthei a nihzia a lang ta a ni. Pathian betu dangte chungchângah dawthei a nihzia a lang ve em le?
11. Engtin nge Isua chuan Setana puhnate a dik lohzia chu a târ lan pumhlûm ṭhak?
11 Dik takin, Setana thlentîr thil engpawh laka an rinawmna vawngtu Pathian chhiahhlawh tinte chuan chu hmêlma kum hlunin a siam puhnate a dik lohzia an târ lang a. Isua chuan leia lo kalin, Setana puhnate a dik lohzia chu chiang takin a rawn târ lang a ni. Ani chu kan pa hmasa ber Adama angin mi ṭha famkim a ni a. Thih thlenga Isua rinawmna chuan Setana chu dawthei a nihzia leh a puhnate a dik lohzia chu a târ lang pumhlûm ṭhak a ni.—Thup. 12:10.
12. Jehova chhiahhlawh tinte chuan eng hun remchâng leh mawhphurhna nge an neih?
12 Amaherawhchu, Setana chuan Jehova betute chu a fiah chhunzawm zêl a. Mi tinte hian mahni hmasial vâng ni lovin, Jehova kan hmangaih avâng zâwkin a rawng kan bâwl tih chu rinawmna vawnga târ lang tûrin hun remchâng leh mawhphurhna kan nei ṭheuh a ni. Chu mawhphurhna chu engtin nge kan ngaih? Jehova chunga rinawm chu chanvo hlu takah kan ruat a. Joba chungchâng ang bawkin, Pathian Jehova chuan chhel tûrin chakna min pêk bâkah, fiahna kan tawh chin tûr a bithliah tih hriat chu a thlamuanthlâk hle bawk a ni.—1 Kor. 10:13.
Setana—Hmêlma Tawrawt leh Kal Pêng
13. Joba bu hian Setana chungchâng eng nge a târ lan belh?
13 Hebrai Pathian Lehkha Thu chuan Jehova a chona leh mihringte a hruai pênna kawnga Setana nihna zahthlâk tak chu kimchang takin a târ lang a. Kristian Grik Pathian Lehkha Thu-ah chuan, Setana’n Jehova a dodâlna chanchin kan hmuh belh a, Thu Puan bu aṭangin Jehova lal chungnunna thiam chantîrna leh a tâwpa Setana tihboralna chanchin chu kan hmuh belh bawk a ni. Joba bu chuan Setana helna kan hriatna chu a belhchhah a. Vân inhmuh khâwmnaa Setana a tel khân, ani chu Jehova chawimawi tuma tel a ni ve lo. Diabola chuan rilru put hmang leh thiltum sual tak a nei a ni. Joba a sawichhiat a, fiah phalna a hmuh hnu chuan, “Setana chu LALPA hma ata a chhuak” a ni.—Job. 1:12; 2:7.
14. Setana chuan Joba lakah eng rilru put hmang nge a lantîr?
14 Chutiang chuan, Joba bu chuan Setana chu khawngaihna nei lo mihringte hmêlma niin a târ lang. Joba 1:6-a târ lan leh Joba 2:1-a târ lan vâna inhmuh khâwmna inkârah a chin hriat loh hun engemaw zât a liam a, chu mi chhûng zawng chuan Joba chuan nunrâwng taka fiahna chu a tâwk a ni. Joba rinawmna avângin Jehova chuan Setana hnênah: “Vâng awm lova mi tihchhiattîr chung pawhin [Joba chu] a ngai reng a la ni,” tiin a sawi theih phah a ni. Mahse, Setana chuan a puhna chu a dik lo tih a la pawm duh chuang lo. Chutih ahnêkin, Joba chu fiahna nasa tak dang tawrhtîr leh a phût tlat ta zâwk a. Chutiang chuan, Diabola chuan Joba chu a neihnun lai leh a mi chhiat lai pawhin a fiah ve ve a ni. Setana chuan mi retheite emaw, chhiatna tâwkte emaw chu a khawngaih lo tih a chiang hle. Mi rinawmte chu a haw tlat a ni. (Job. 2:3-5) Amaherawhchu, Joba rinawmna chuan Setana chu dawthei a nihzia a târ lang a ni.
15. Tûn laia kal pêngte chuan Setana nên inanna eng nge an neih?
15 Setana chu thil siam kal pêng hmasa ber a ni a. Tûn laia kal pêngte pawhin Diabola mizia ang chu an lantîr a ni. Anni chuan kohhrana mite, Kristian upate, a nih loh leh Governing Body chungah rilru khirh tak an nei a ni thei. Kal pêng ṭhenkhat chuan Pathian hming, Jehova tih hman chu an duh lo va. Jehova chanchin zir emaw, a rawngbâwl emaw chu an ngaihsak lo bawk a. An pa Setana angin, kal pêngte chuan mi rinawmte rinna tihchhiahsak chu an tum a ni. (Joh. 8:44) Jehova chhiahhlawhte’n an va pawh duh rêng rêng lo pawh hi a mak lo ve!—2 Joh. 10, 11.
Joba’n Jehova Hming A Chawimawi
16. Joba chuan Jehova chungah eng rilru put hmang nge a lantîr?
16 Joba chuan Jehova hming chu hmangin a chawimawi a. A fate an boral vek thu a dawn avânga a lungngaih hle lai pawhin, Pathian chu a mawhchhiat lo a ni. Chûng chu Pathian vânga thleng nia a ngai sual chung pawhin, Jehova hming chu a chawimawi tho va. A hnua a thufing tawi sawi chhuah pakhatah, Joba chuan: “Ngai rawh, Lalpa ṭih hi, hei ngei hi finna a ni, thil ṭha lo kalsan hi hriat thiamna a ni,” tiin a sawi chhuak a ni.—Job. 28:28.
17. Joba chu a rinawmna vawng tûrin engin nge ṭanpui?
17 Joba chu a rinawmna vawng reng tûrin engin nge ṭanpui? Chhiatna a tawh hma khân, Pathian Jehova nên inlaichînna ṭha tak a nei dêr tawh a ni tih a chiang hle. Setana’n Pathian Jehova a cho tih Joba’n a hriat thu târ lanna chiang tak nei lo mah ila, Joba chuan rinawm reng chu a tum tlat a. Ani chuan: “Ka thih thlengin ka dikna [“rinawmna,” NW] ka dah bo lo vang,” a ti. (Job. 27:5) Engtin nge Joba chuan chutianga inlaichînna ṭha tak chu a neih? Joba chuan Abrahama te, Isaaka te, leh Jakoba te chu a chhûngkhat hnai lutuk ni lo mah se, Pathianin anmahni a dâwr dân a hriatte chu a hlut hle ngei ang. Tin, thil siamte a enna aṭang pawhin, Joba chuan Jehova mizia tam tak a hre thei bawk a ni.—Joba 12:7-9, 13, 16 chhiar rawh.
18. (a) Engtin nge Joba chuan Jehova laka a inpêkna chu a târ lan? (b) Eng kawngtein nge Joba entîrna ṭha chu kan entawn?
18 Joba thil hriatte chuan Jehova tihlâwm duhna a neihtîr a. A chhûngte’n Pathian tilâwm lo thil engemaw tak an ti palhin, ‘Pathian an lo sawi chhe’ palh dah lo’ng maw, tiin inthawina a hlân ziah a ni. (Job. 1:5) Nasa taka fiah a nih lai pawh khân, Jehova chungchâng chu a ṭhazâwngin a sawi tho a ni. (Job. 10:12) Entawn tûr ṭha a va ni êm! Keini pawhin Jehova leh a thiltum hriatna dik chu kan la lût ziah tûr a ni a. Inzirna te, inkhâwmna te, ṭawngṭaina te, leh chanchin ṭha hrilhna ang chi thlarau lam thiltih chîn dân ṭha kan nei a. Chu bâkah, Jehova hming hriattîrnaah theih tâwp kan chhuah a ni. Tin, Joba rinawmna chuan Jehova a tihlâwm ang bawkin, tûn laia Pathian chhiahhlawhte rinawmna chuan Jehova thinlung a tilâwm a ni. He mi thu hi a dawta thuziakah sawiho a ni ang. (w09 4/15)
Kan Hre Chhuak Em?
• Engvângin nge Joba chuan Diabol-Setana ngaihven a hlawh?
• Joba’n eng fiahna nge a tawh a, engtin nge a chhân lêt?
• Joba anga rinawmna vawng tûrin engin nge min ṭanpui ang?
• Joba bu aṭangin Setana chungchâng eng nge kan hriat?
[Zirlai Atâna Zawhnate]
[Phêk 12-naa milem]
Joba bua chanchin inziak chuan lei leh vâna Pathian lalchungnunna thu buai pawimawh ber chu min hriattîr
[Phêk 14-naa milem]
Eng dinhmun hnuaiahte nge i rinawmna chu fiah a nih mai theih?