Mi Tam Takte Hlâwkpui Mi Tlêm Tête Rorêlna

TIRHKOHTE hun lai aṭangin Pathian chuan mihringte zîng ata Kristian rinawm tlêm tête chu thlang ṭanin, fa angin a pawm a. Chûng fa anga a pawmte inthlâkthlengna chu a nasat êm avângin, Pathian Thu chuan piang thar tiin a sawi hial a ni. Chu pian tharnain a tum ber chu chûng Pathian chhiahhlawhte vâna rorêltu ni tûra buatsaih a ni. (2 Timothea 2:12) Chutiang rorêltu ni tûr chuan, anni chu vân nunna changa kaihthawh an ni a. (Rom 6:3-5) Vân aṭangin Krista rualin “leiah chuan ro an rêl” ang.—Thu Puan 5:9, 10; 11:15.

Mahse, Pathian Thu chuan piang thar lo mi dangte pawhin chatuan chhandamna an chang dâwn tih a sawi a. Bible (Thuthlung  Hlui leh Thuthlung Thar) chuan Pathianin mipui chi hnih—vâna rorêlna chang tûr mi tlêm tê leh an rorêlna hnuaia leia awm tûr mipui tam tak—chhan chhuah a tum thu a târ lang a. Entîr nân, amah ang bawka piang thar ringtu dangte hnêna tirhkoh Johana lehkha thawn ziak hi chhinchhiah teh. Isua chungchângah: “Ani chu kan sualte thupha chawina a ni; keimahni [mi tlêm tête] sual chauh ni lovin, khawvêl zawng zawng [mipui tam takte] sual thupha chawina pawh a ni,” a ti.—1 Johana 2:2.

Chutiang bawkin, tirhkoh Paula pawhin: “Thil siam zawng zawngte [mipui tam takte] chuan beisei êm êmin, Pathian fate [mi tlêm tête] lo lanna chu an nghâkhlel hle si a,” tiin a ziak a. (Rom 8:19-21) Engtin nge tirhkoh Johana leh Paula te thusawi hi kan hriatthiam ang? Heti hian kan hre thiam tûr a ni: Piang tharte chuan vânah rorêlna an chang ang. An rorêlna chuan eng nge a thlen ang? Pathian sawrkârna hnuaia he leia a khua leh tui ni tûr mi maktaduai têlte hlâwkna a thlen ang. Chuvângin, Isua chuan a zirtîrte chu: “I ram lo thleng rawh se. I duhzâwng vâna an tih angin leia mi’n ti rawh se,” tia ṭawngṭai tûrin a zirtîr a ni.—Matthaia 6:10.

Chhandamna chu mi chi hnihte hnêna pêk chhuah a nih thu chu Thuthlung Hluiah pawh kan hmu thei a. Entîr nân, Isua pu Abrahama hnêna Pathian Jehova thusawi hi chhinchhiah rawh: “I thlahah [mi tlêm têah] chuan khawvêla chi tin [mipui tam tak] an la thawveng ang,” tih hi. (Genesis 22:18) Ni e, Abrahama ‘thlah’ aṭangin khawvêla chi tinte malsâwm an ni ang.

Chu ‘thlah’ chu tunge ni? Isua Krista a ni a, Pathianin fa anga a pawm piang tharte pawh an tel a ni. Tirhkoh Paula chuan: “Krista ta in nih chuanin, Abrahama thlah . . . in ni,” tiin a hrilhfiah a. (Galatia 3:16, 29) Tin, ‘thlah’ kal tlanga khawvêla chi tinte hnêna lo thleng tûr malsâwmna chu engte nge ni? Pathian duhsakna chan theihna leh lei paradis-a chatuana nunna a ni. Fakna hla phuahtu Davida chuan: “Mi felte chuan ram hi an luah ang a, a chhûngah hian kumkhuain an awm ang,” tiin a hril lâwk a ni.—Sâm 37:29; Isaia 45:18; Thu Puan 21:1-5.

Vâna rorêlna chu mi ṭhenkhat tân a ni a; mahse, chu vân rorêlnain a thlen malsâwmna—leia chatuana nunna leh a dangte—chu mi tam takte tân a ni. Pathian Ramin a rawn thlen tûr chatuan malsâwmna dawngtute zîngah chuan i chhûngte nên tel ve ngei ang che u. (w09 4/1)

[Phêk 12-naa milem]

Mi maktaduai têlte chuan leiah chatuana nunna an chang ang. An zîngah i tel ve ang em?