Pian Tharna—A Tum Chu Eng Nge Ni?

MI TAM tak chuan chatuan chhandamna chang tûr chuan pian thar a ngai niin an hria a. Mahse, pian tharnain a tum chungchâng Isua sawi ngei hi lo chhinchhiah ang che. Heti hian a sawi a ni: “Mi tupawh an pian thar loh chuan Pathian  ram an hmu thei lo vang,” tiin. (Johana 3:3) Chuvângin, chhandam nih nân ni lovin, Pathian Rama luh nân mi chu an pian thar a ngai a ni. Mi ṭhenkhat chuan, ‘Mahse, Pathian Rama luh leh chhandam nih chu a thuhmun reng a ni lâwm ni?’ an ti mai thei. Chûng chu thil thuhmun a ni lo. A inan lohna hre thiam tûr chuan, “Pathian ram” tih thu mal awmzia hi i lo ngaihtuah hmasa ang u.

Ram tih chu sawrkâr sawina a ni a. Chuvângin, “Pathian ram” tih chu “Pathian sawrkârna” tihna a ni. Bible chuan “mihring fapa” Isua Krista chu Pathian Rama Lalber a nih bâkah rorêlpui tûr a neih thu min zirtîr a. (Daniela 7:1, 13, 14; Matthaia 26:63, 64) Chu bâkah, Krista rorêlpuite chu “chi tina mi te, ṭawng tina mi te, mi tina mi te, hnam tina mi te” aṭanga thlan chhuah an nih thu leh anni chuan “leiah chuan ro an rêl” tûr thu chu tirhkoh Johana hnênah inlârna hmanga hriattîr a ni. (Thu Puan 5:9, 10; 20:6) Pathian Thu chuan lal anga rorêl tûrte chu “lei ata tlan tawh” mi 1,44,000 hmanga din “pâwl tlêmte” an nih thu a târ lan belh bawk.—Thu Puan 14:1, 3; Luka 12:32.

Pathian Ram chuan khawi aṭangin nge ro a rêl? “Pathian ram” chu “vân ram” tia sawi a ni bawk a, chu chuan Isua leh a rorêlpui tûrte’n vân aṭangin ro an rêl dâwn tih a târ lang a ni. (Luka 8:10; Matthaia 13:11) Chuti chuan, Pathian Ram chu Isua Krista leh mihringte zîng ata thlan chhuah a rorêlpui tûr mi ṭhenkhat hmanga din vân sawrkârna a ni.

Chuti chu, Isua’n ‘Pathian rama lût’ tûrte chu an pian thar a ngai a tih khân, eng a tihna nge ni ta ang? A sawi taka chu, vâna Krista nêna rorêl tûr chuan mi chu a pian thar a ngai a tihna a ni. Hriatthiam awlsam thei  tûrzâwnga sawi chuan, pian tharnain a tum chu vâna rorêltu ni tûra mi ṭhenkhat buatsaih hi a ni.

Tûnah chuan, pian tharna chu thil pawimawh tak, Pathian awmtîr, vâna rorêltu ni tûra mi ṭhenkhat buatsaihna a nihzia kan lo hre ta a. Mahse, engtin nge mi chu a pian thar chiah? (w09 4/1)

[Phêk 7-naa thu lâk chhuah]

Pian tharnain a tum chu vâna rorêltu ni tûra mi ṭhenkhat buatsaih hi a ni

[Phêk 7-naa milem]

Pathian Ram chu Isua Krista leh mihringte zîng ata thlan chhuah a rorêlpui tûr mi ṭhenkhat hmanga din a ni