Pian Tharna—Chhandamna Kawng A Ni Em?

“I PIANG thar tawh em?” tih zawhna hi engtin nge i chhân ang? Khawvêl puma ringtu nia inchhâl mi maktaduai têlte chuan “Aw!” tiin an pian thar tawh thu an sawi ngei ang. Anni chuan pian tharna chu Kristian dik zawng zawngte chhinchhiahna leh chhandamna kawng awmchhun niin an hria a ni. Chûng mite chuan, “Mi chu a pian thar loh chuan, . . . Kristian a ni lo,” tia ziaktu theologian Robert C. Sproul-a ang mi sakhaw hruaitute thlîr dân chu an ṭâwmpui a ni.

Pian tharna chu chhandam nih ngei ngeina nia ringtute zînga mi i ni em? I nih chuan, i chhûngkhatte leh i ṭhiante chu piang thar tûra ṭanpui i duh ngei ang. Amaherawhchu, piang thar tûr chuan, piang thar leh piang thar lote inan lohna an hriatthiam phawt a ngai a ni. A nih leh, piang thar tih awmzia chu engtin nge i hrilhfiah ang?

Mi tam tak chuan “piang thar” tih hi Pathian leh Krista rawngbâwl tûra tih tak zeta an intiamna avânga thlarau lama thihna ata nunna niin an hria a. Dictionary tûn lai ber pakhat chuan mi piang thar tih chu “a bîk takin Kristian pakhatin sakhaw lama rilru khawih deuh mai thiltawn a neih hnua a rinna tithartu emaw, nemnghettu emaw a ni tlângpui ṭhîn,” tiin a hrilhfiah a ni.—Merriam-Webster’s Collegiate Dictionary—Eleventh Edition.

Bible-in chu hrilhfiahna a pawm lo tih hriat chu mak i ti ang em? Pian tharna chungchânga Pathian Thu zirtîrna dik tak hriat chu i duh ang em? Piang thar nihna dik tak bih chian chu i hlâwkpui ngei ang. Engvângin nge? A awmze dik tak hriatthiamna chuan i nun leh nakin hun tûr i beiseina a khawih dâwn avângin.

Bible-in Eng Nge A Zirtîr?

‘Piang thar’ tih thu mal chu Johana 3:1-12-a Isua leh Jerusalem khuaa sakhaw hruaitu pakhat inbiakna ngaihvenawm takah chuan kan hmu thei a. Chu Bible thuziak chu he thuziak ruala tel bâwmah hian i hmu ang a. Ngun taka chhiar tûrin kan sâwm che a ni.

Chu thuziakah chuan, Isua’n pian tharna hmêl hmangte chu a sawi nual a. A thusawite chuan hêng zawhna pawimawh tak tak pa-ngate chhâng tûrin min ṭanpui a ni:

▪ Pian thar chu eng ang khawpa pawimawh nge ni?

▪ Pian thar leh thar loh chu mi mal duhthlanna a ni em?

▪ Pian tharnain a tum chu eng nge ni?

▪ Engtin nge mi chu a pian thar?

▪ Chu chuan piang tharte leh Pathian inlaichînna chu engtin nge a thlâk danglam?

Hêng zawhnate hi a mal malin i lo ngaihtuah ang u. (w09 4/1)

 [Phêk 4-naa bâwm/milem]

‘I Piang Thar Tûr A Ni’

“Tin, Pharisaite zînga mi, a hming Nikodema, Judate hotu pakhat a awm: chu mi chu zânah Isua hnênah a lo kal a, a hnênah, ‘Rabbi, Pathian hnên ata zirtîrtua lo kal i ni tih kan hria; Pathian an chunga a awm loh chuan hêng thilmak i tih ang hi tuman an ti thei lo vang,’ a ti a. Tin, Isuan a chhâng a, a hnênah, ‘Tih tak meuhvin, tih tak meuhvin ka hrilh a che, mi tupawh an pian thar loh chuan Pathian ram an hmu thei lo vang,’ a ti a. Nikodeman a hnênah, ‘Mi, a tar hnuin engtin nge a pian theih ang? A nu pumah vawi hnih lûtin a piang thei em ni?’ a ti a. Isuan a chhâng a, ‘Tih tak meuhvin, tih tak meuhvin ka hrilh a che, mi tupawh tuiah leh thlarauva an pian loh chuan Pathian ramah an lût thei lo vang. Tisaa piang apiang tisa a ni; thlarauva piang apiang thlarau a ni. I pian thar tûr ka tih che hi mak ti suh. Thli khawiah pawh a duh duhin a tleh ṭhîn, a ri i hria e, nimahsela khawi aṭanga lo kal nge, khawiah nge a kal dâwn tih pawh i hre si lo; tupawh thlarauva piang chu chutiangin an awm,’ a ti a. Tin, Nikodeman a chhâng a, a hnênah, ‘Chûng thil chu engtin nge a awm theih ang?’ a ti a. Isuan a chhâng a, a hnênah, ‘Israelte zirtîrtu i ni si a, chûng chu i hre lo maw? Tih tak meuhvin, tih tak meuhvin ka hrilh a che, keinin kan hriat chu kan sawi ṭhîn, kan hmuh chu kan hriattîr ṭhîn; nimahsela kan thu hriattîr in âwih si ṭhîn lo. Khawvêla thil ka hrilh che u mah âwih lo che u a, vâna thil hrilh che u ila engtin nge in âwih ang?’”—Johana 3:1-12.