Pian Tharna—Chu Chuan Eng Nge A Hlen Chhuah?

ENGVANGIN nge Isua’n thlarau thianghlima baptisma channa chungchâng sawi nân ‘thlarauva piang’ tih ṭawngkam a hman? (Johana 3:5) ‘Piang’ tih ṭawngkam hi entîr dang neia hman a nih chuan, “bul inṭanna,” tihna a ni a; chu chu “hnam thar a piang” tih ṭawngkamahte hian a lang a ni. Chuvângin, “piang thar” kan tih hian “bul inṭan tharna” a kâwk a ni. Chuvângin, ‘piang’ leh “piang thar” tih entîr nei ṭawngkamte hian Pathian leh thlarau thianghlima baptisma changte inkârah inlaichînna thar a awm ṭan dâwn tih a târ lang chiang hle. Engtin nge chutiang inlaichînna inthlâkthleng thawkna chu a thlen?

Tirhkoh Paula chuan Pathianin mihringte hi vâna rorêltu ni tûra a buatsaih dân chungchâng hrilhfiah nân chhûngkaw nun aṭanga lâk tehkhin thu a hmang a. A hun laia Kristiante hnêna a lehkha thawnah Paula chuan Pathianin ‘fate anga’ a cheibâwl theih nân ‘fa nihna an hmuh,’ a nih loh leh fa anga pawm an nih tûr thu a ziak a ni. (Galatia 4:4, 5; Hebrai 12:7) Fa anga pawmna tehkhin thuin thlarau thianghlima baptisma changte nuna thil inthlâkthleng awmte hre thiam tûra min ṭanpui tûrin, khual khua aṭanga lo kalte tân chauhva luh theihna school-a luh tum mipa naupang tehkhin thu kha ngaihtuah leh ta ila.

Fa Anga Pawmna Avânga Inthlâkthlengna

Chu tehkhin thu-ah chuan, mipa naupang chu thingtlâng mi a nih loh avânga school-a lût thei lo kha a ni a. Mahse, ni khat chu thil awm dân nasa takin a inthlâkthleng phut angah han chan teh. Thingtlâng pa pakhat chuan dân ang takin faah a pawm ta hlauh mai a. Chu chuan chu naupang chu engtin nge a nghawng? Awle, fa anga pawm a nih tâk avângin, tûnah chuan school-a luh theihna pawh tiamin thingtlâng naupang dangte neih ang dikna leh phalnate chu a nei ta. Chutianga fa anga pawmna chuan a nun chu a thlâkthleng thawk a ni.

Hei hian piang tharte nuna inthlâkthlengna sâng zâwk tak awm chu a hrilhfiah chiang hle a ni. A inanna ṭhenkhat lo ngaihtuah ta ila. Tehkhin thua mipa naupang chuan school-a luh theih nâna thil phût—thingtlâng mi a nih theih chauhvin school-ah chuan a lût thei dâwn a. Mahse, mahni duh thu mai chuan chu thil phût chu a tlin thei si lo. Chutiang bawkin, Pathian Ram, a nih loh leh vân sawrkârah chuan mihring ṭhenkhat chu hmun pêk an ni ang; mahse, chutiang ni thei tûra thil phût—“piang thar” an nih chauhvin. Mahse, pian tharna chu Pathian chunga a innghah  avângin, mahni duh thu mai chuan chu thil phût chu an tlin thei lo.

Engin nge kan sawi tâk mipa naupang dinhmun chu thlâkthleng? Dân ang taka faa pawmna chuan a thlâkthleng a ni. Chutianga fa anga pawmna chuan chu naupang mizia chu a thlâkthleng lo ngei mai. Fa anga pawm a nih hnuah pawh a la ngai reng a ni. Mahse, dân ang thlapa faa pawm a nih hnu chuan, naupang chuan nihna thar a nei ta. Bul ṭanna thar a nei a—a piang thar tih theih a ni. Ani chu fa a lo ni a, chu chuan school-a lût tûr leh fa anga pawmtu pa ber chhûngkaw zînga mi nih theihna a pe ta a ni.

Chutiang bawkin, Pathian Jehova chuan mihring ṭha famkim lo ṭhenkhat chu fa anga a pawm theih nâna dân chelek ṭanin, an dinhmun chu a thlâkthleng a. Chûng mite zînga mi tirhkoh Paula chuan a unaute hnênah chuan: “Fa nihna thlarau in hmu . . . e, chu thlarau avâng chuan ‘Abba! (Ka pa!)’ tiin kan au ṭhin hi. Thlarau ngei chuan keimahni thlarau nên Pathian fate kan ni tih min hriattîr ṭhîn,” tiin lehkha a thawn a ni. (Rom 8:15, 16) Ni e, fa anga pawmna hmangin, chûng Kristiante chu Pathian chhûngte, a nih loh leh ‘Pathian fate’ an lo ni ta a ni.—1 Johana 3:1; 2 Korinth 6:18.

Chutianga Pathian fa anga pawmna chuan ṭha famkim lo an la nih cheu avângin an mizia a thlâk thleng lo. (1 Johana 1:8) Amaherawhchu, Paula’n a hrilhfiah belh angin, dân ang taka fa anga pawm an nih hnu chuan, nihna thar an chang a ni. Chutih rual chuan, Pathian thlarau chuan fa anga a pawmte hnênah chuan Krista nên vânah an nung dâwn tih rinna nghet tak a tuh a ni. (1 Johana 3:2) Thlarau thianghlimin a neihtîr, chu rinna hriat sual theih rual loh chuan nunna an thlîr dân chu a thlâkthleng thawk a ni. (2 Korinth 1:21, 22) Ni e, anni chuan bul ṭanna thar an tawng a ni—pian tharna tih theih tûr chu.

Pathianin fa anga a pawmte chungchâng sawiin, Bible chuan: “[Anni chu] Pathian leh Krista puithiamte an ni ang a, amah nên kum sângkhat rorêlin an awm zâwk ang,” a ti. (Thu Puan 20:6) Pathian fa anga pawmte chu Pathian Ram, a nih loh leh vân sawrkârah khian lal anga siam an ni ang. Tirhkoh Petera chuan Kristian unaute hnênah chuan “rochan chhe thei lo, bawlhhlawh kai lo, chuai thei lo vâna [an] tâna khêk” chu an dawng dâwn tih a sawi a ni. (1 Petera 1:3, 4) Rochan ṭha a va ni tak êm!

Amaherawhchu, rorêlna chungchâng chuan zawhna pakhat a chawk chhuak bawk a. Piang tharte chuan vânah lal angin ro an rêl dâwn a nih chuan, tute chungah nge an rêl ang? Chu zawhna chu a dawta thuziakah ngaihtuah a ni ang. (w09 4/1)

[Phêk 10-naa milem]

Fa anga pawmna chungchângah Paula’n eng nge a sawi?