Pian Tharna—Eng Anga Thleng Nge A Nih?

ISUA chuan Nikodema hnênah chuan pian tharna a pawimawhna, a awmtîrtu, leh a tum mai ni lovin, a thlen dân pawh a sawi tel bawk a ni: “Mi tupawh tuiah leh thlarauva an pian loh chuan Pathian ramah an lût thei lo vang,” tiin. (Johana 3:5) Chutiang chuan, mi chu tuiah leh thlarauvah a piang thar a ni. Mahse, ‘tui leh thlarau’ tih chuan eng nge a kawh?

‘Tui leh Thlarau’—Eng Tihna Nge?

Nikodema chu Juda sakhaw lama mi thiam a nih avângin, Hebrai Pathian Lehkha Thu-in “Pathian thlarau”—mite chu thil chhinchhiah tlâk tak takte tihtîr theitu Pathian chakna thahrui che vêl reng—a hman dân chu a hre ngei ang. (Genesis 41:38; Exodus 31:3; 1 Samuela 10:6) Chuvângin, Isua’n “thlarau” tih thu mal a hman chuan, Nikodema chuan thlarau thianghlim, Pathian chakna thahrui che vêl reng a sawina a ni tih a hre thiam ngei ang.

Isua’n tui chungchâng a sawi chu eng nge ni? Nikodema nêna an inbiakna hma leh hnu lama thu awmte chu ngaihtuah rawh. Chûng chuan Baptistu Johana leh Isua zirtîrte’n mite baptisma an chantîr tih a târ lang a ni. (Johana 1:19, 31; 3:22; 4:1-3) Chu an thiltih dân chu Jerusalemah chuan tlâng hriat a lo ni a. Chuvângin, Isua’n tui chungchâng a sawi chuan, Nikodema chuan Isua sawi tum chu tui pângngai satliah mai ni lovin, tuia baptisma channa chungchâng a sawina a ni tih a hre thiam ngei ang.

‘Thlarau Thianghlima’ Baptis

‘Tuia piang’ tih chuan tuia baptisma chan a kawh si chuan, ‘thlarauva piang’ tih chuan eng nge a kawh ve tâk ang? Isua leh Nikodema an inbiak hma khân, Baptistu Johana chuan tui chauh ni lo va, thlarau pawha baptisma chan a ngaih tûr thu a lo puang tawh a. “Kei zawngin tuiin ka baptis ṭhîn che u a; ani [Isua] erawh chuan thlarau thianghlimin a baptis ang che u,” tiin a sawi a ni. (Marka 1:7, 8) Chanchin Ṭha ziaktu Marka chuan chutiang baptisma channa hmasa ber chungchâng chu hetiang hian a ziak a ni: “Chûng nîahte chuan heti hi a lo ni a, Isua chu Galili rama Nazaret khua aṭangin a lo kal a, Jordan luiah chuan Johana hnênah baptisma a chang ta a. Chu veleh tui ata a chhuahin, vân inhawnga thlarau ṭhuro anga a chunga lo chhuk a hmu a,” tiin. (Marka 1:9, 10) Jordan luia Isua hnim phûm a nih khân, tuiah baptisma a chang a. Vân aṭanga thlarau a dawn khân, thlarau thianghlimah baptisma a chang a ni.

Baptisma a chan hnu kum thum vêlah chuan Isua’n a zirtîrte hnênah: “Ni rei lo têan thlarau thianghlimin baptisma in  chang ang,” tiin a hrilh a. (Tirhkohte 1:5) Chu chu engtikah nge a thlen famkim?

C.E. 33 Pentikost nî chuan Isua zirtîr mi 120 vêl chu Jerusalem khuaa in pakhatah an awmkhâwm a. “Thâwklehkhatan vân ata ri, thlipui tleh angin a lo thleng ta phut a. Tin, chu chuan an ṭhutna in chu a tikhat ta vek a, tin, lei te . . . mei angin an hnênah a lo inlâr ta a. . . . An zain thlarau thianghlimin an khat ta vek a.” (Tirhkohte 2:1-4) Chu mi nî vêk chuan, Jerusalem khuaa mi dangte pawh chu tuia baptisma chang tûra fuih an ni a. Tirhkoh Petera chuan mipui pungkhâwm hnênah chuan: “Sim ula, in sual ngaihdam nân Isua Krista hmingin baptisma chang ṭheuh rawh u; tichuan thlarau thianghlim pêk hi in hmu ang,” a ti a. Engtin nge an chhân lêt? “A thu zâwm apiangin baptisma an chang ta a; chu mi niah chuan mi sângthum lai belhchhahin an awm a.”—Tirhkohte 2:38, 41.

Thil Thuah Hnih

Hêng baptisma channate hian pian tharna chungchângah eng nge a târ lan? Chûng chuan pian tharna chu thil thuah hniha thleng a nihzia a târ lang a ni. Isua chuan tuiah baptisma a chang hmasa tih chhinchhiah la. Chutah thlarau thianghlim a dawng leh a ni. Chutiang bawkin, zirtîr hmasate chuan tuiah baptisma an chang hmasa a (ṭhenkhat chu Baptistu Johana chantîr an ni a), a hnuah thlarau thianghlim an dawng a ni. (Johana 1:26-36) Chutiang bawkin, zirtîr thar 3,000-te pawhin tuiah baptisma an chang hmasa a, a hnuah thlarau thianghlim an dawng leh a ni.

C.E. 33, Pentikost nia baptisma channa chu rilrua kan vawn reng chuan, tûn laia pian tharna chu eng anga thleng tûrin nge kan beisei ang? Isua tirhkohte leh zirtîr hmasate chunga a thlen anga a thlen ve chu kan beisei thei a ni. A hmasain, mi chuan a sual a sim ang a, thil sual tih bânsanin, Jehova chibai bûk tûr leh a rawngbâwl tûrin a hnênah a inpumpêk ang; tin, a inpumpêkna chu tuia baptisma changin tlâng hriatah a lantîr ang. Tichuan, Pathianin A Rama rorêl tûra a thlan chuan, thlarau thianghlimin hriak a thih dâwn a ni. He thil thuah hnihte zînga a hmasa zâwk (tuia baptisma channa) chu mi mal hmalâknaa tih tûr a nih laiin, a hnuhnûng zâwk (thlarauva baptisma channa) chu Pathian hmalâknaa tih a ni thung. Chutianga baptisma chi hnih a chan hnuah chauh chuan, mi chu a piang thar a ni.

Mahse, engvângin nge Isua’n Nekodema a biak lai khân “tuiah leh thlarauva an pian loh chuan” tih ṭawngkam a hman? Tui leh thlarauva baptisma changtute chuan inthlâk danglamna nasa tak an nei dâwn tih uar taka târ lan nân a ni. A dawta thuziak chuan pian tharna hmêlhmang chuti lam hawi chu a sawi lang ang. (w09 4/1)

[Phêk 9-naa milem]

Johana chuan sual sim Israelte chu tuiah a baptis