Pian Tharna—Mi Mal Duhthlanna A Ni Em?

PIAN tharna chu tu awmtîr nge ni? Thuhriltu ṭhenkhat chuan an thusawi ngaithlatute piang thar tûra an fuih hian, Isua thusawi: ‘I piang thar tûr a ni,’ tih chu an la chhâwng ṭhîn. (Johana 3:7) Chûng rawngbâwltute chuan hêng thute hi thupêk anga sawiin, “Piang thar rawh!” tihna ang tlukin an hmang a ni. Chutiang chuan Isua thu âwiha piang thar tûra a ṭûl ang anga hma lâk chu ringtu tinte chunga innghat niin an sawi. Chutiang chhût dân aṭang chuan, pian thar leh thar loh chu mi mal duhthlanna a ni. Mahse, chu chu Nikodema hnêna Isua thusawi nên a inrem em?

Isua thusawi ngun taka kan chhiar chuan, pian thar leh thar loh chu mi mal duhthlanna niin a zirtîr lo tih a lang. Chu chu engtin nge kan sawi theih? ‘Piang thar’ tia lehlin Grik thu mal chu “chung lam aṭanga piang” ti pawhin a lehlin theih a ni. * Chu lehlin dân dang aṭanga thlîr chuan, pian tharna chu “chung lam” aṭanga lo inṭan a ni a—chu chu vân aṭangin, a nih loh leh “Pa hnên ata” tihna a ni. (Johana 19:11; Jakoba 1:17) Ni e, chutiang pian tharna chu Pathian hrin, a nih loh leh Pathian awmtîr a ni.—1 Johana 3:9.

“Chung lam aṭanga” tih ṭawngkam hi rilrua kan vawn reng chuan, mi a inpian thartîr theih loh chhan chu hriatthiam harsa a ni lo vang. Nu pum chhûng aṭanga i pian chhuah dân kha han ngaihtuah teh. Nangma duhthlanna avânga piang chhuak i ni em? Ni lo ve! I pa avânga piang chhuak i ni. Chutiang bawkin, Pathian, kan Pa vâna miin a awmtîr, a nih loh leh a hrin chauhvin kan piang thar thei a ni. (Johana 1:13) Chuvângin, tirhkoh Petera chuan: “Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zêlin . . . min hring leh a,” tiin dik takin a sawi a ni.—1 Petera 1:3.

Chu Chu Thupêk A Ni Em?

Mahse, ṭhenkhat chuan, ‘Mi tumahin mahni a inpian thartîr thei lo a nih si chuan, engah nge Isua’n: “I piang thar tûr a ni,” tia thu a pêk?’ tiin an ngaihtuah mai  thei. Chu chu zawhna inâwm tak a ni. Tihah chuan, Isua thusawi chu thupêk a nih tak zet chuan, kan tih theih loh thil engemaw ti tûrin thu min pe tihna a ni dâwn si. Chu chu thil inâwm tak zawng a ni thei lo. Chuti chu, ‘I piang thar tûr a ni,’ tih Isua ṭawngkam hi eng anga hriatthiam tûr nge ni ta ang?

Atîra ziakna ṭawngkama Isua thusawi han belh chian chuan, chu chu thupêk anga sawi a ni lo tih a lang a. Thusawi pângngai anga sawi a ni mai zâwk a ni. Kawng danga sawi chuan, Isua’n ‘I piang thar tûr a ni,’ a tih hian thil nih phung tûr pângngai a sawina mai a ni a, thupêk angin a sawi lo. Ani chuan: “Chung lam aṭanga i pian a ngai a ni,” a ti.—Johana 3:7, Modern Young’s Literal Translation.

Thupêk nge nia thusawi pângngai tih hriat hran theih nân, he tehkhin thu hi han ngaihtuah teh. School tam tak awmna khawpui pakhat han ngaihtuah ta la. Chûng zînga pakhat chu khual khua aṭanga lehkha zir tûra lo kal school naupangte tân bîka ruat a ni. Ni khat chu, chu khawpuia chêng naupang pakhat chuan principal hnênah, “I school-a luh ve ka duh,” a rawn ti a. Principal chuan, “He school-a lût thei tûr chuan thingtlâng mi i ni tûr a ni,” tiin a hrilh a ni. Chu principal thusawi chu thupêk a ni lo rêng rêng. Naupang hnênah chuan, “Thingtlâng mi ni rawh!” tia a sawina a ni lo. Principal chuan chu mi school-a luh theih nâna thil ngai chu a sawi chhuak mai zâwk a ni. Chutiang bawkin, Isua’n ‘I piang thar tûr a ni,’ a tih khân ‘Pathian Rama luh’ theih nâna thil ngai chu a sawi chhuak mai a ni.

Chu Pathian Ram chuan pian tharna hmêlhmang dang, Pian tharnain a tum chu eng nge ni? tih zawhna nên pawh inkûngkaihna a nei a. A chhânna hriat chu pian tharna awmze dik tak hriatthiam nân thil pawimawh tak a ni. (w09 4/1)

[Footnote]

[Phêk 6-naa milem]

Pian tharna leh nu pum chhûng aṭanga pian chhuahna chuan inanna eng nge a neih?