1 Bible Rin Dân Zir Rawh

“Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te . . . a sâwt bawk a ni.”—2 Timothea 3:16.

ENG NGE A HARSATNA? Mi tam tak chuan Bible chu mi fingte ziah, lehkhabu ṭha tak ang lekah an ngai a. Ṭhenkhat chuan Bible-a chuang hmân lai thilthleng chanchinte chu a dik lo an ti. Mi dangte chuan Bible-a fuihna thute chu a hman tlâk lo emaw, a hmân lai tawh emaw an ti bawk.

ENGTIN NGE HARSATNA CHU I TIHKIAN THEIH? Bible a rin tlâkna leh a ṭangkaina ringhleltute chuan a finfiahna chiang hriat tumin an bei lo fo. Mi dangte sawi an hriat ang chu an sawi chhâwng ve mai a ni. Bible erawh chuan: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tiin min vaukhân a ni.—Thufingte 14:15.

Mi dangte thu sawi finfiahna chiang awm lo va pawm mai ai chuan, kum zabi khatnaa Beroia khua, tûna Grik ram hmâr lama awm Kristiante entawn tûr siam chu engvângin nge i zui loh vang? Anni chuan mi dangte thusawi chu pawm mai lovin, “a dik leh dik loh hriat nân ni tin Pathian Lehkhaah an zawng ṭhîn” zâwk a ni. (Tirhkohte 17:11) Bible chu Pathian thâwk khum Thu a ni tih kan rin tlat theih chhân kawng hnih chu tâwi têin i lo bih chiang ang u.

Bible-in hmân lai chanchin a sawite chu a dik. Kum tam tak chhûng chu Bible dikzia ringhleltute chuan Bible-a chuang mite hming leh a hmunte chu a dik lo tiin an lo hnial tawh thîn a, tûnah pawh an la hnial ta reng a ni. Mahse, finfiahnate chuan Bible dikzia ringhleltute dik lohzia leh Bible-a thuziakte rin tlâkzia a târ lang fo a ni.

Entîr nân, mi thiamte chuan Isaia 20:1-a târ lan Assuria Lal Sargona a awm chu an lo ringhlel ngai tawh a. Amaherawhchu, kum 1840 chho bâwr vêl khân, thil hlui chanchin zir mite chuan chu lal in chu an lai chhuak ta a. Tûnah chuan Sargona chu Assuria lal hriat hlawh berte zînga mi a ni ta hial a ni.

Mi thiamte chuan Isua tihlum tûra thu petu, Rom ram awptu Pontia Pilata awm pawh an ringhlel bawk a. (Matthaia 27:1, 22-24) Mahse, kum 1961 khân Israel ram, Kaisari khawpui bulah chuan Pilata hming leh a nihna chuanna lung chu hmuh chhuah a ni.

Bible-a chuang hmân lai chanchinte dikzia chungchângah, October 25, 1999 chhuak U.S.News & World Report chanchinbu chuan: “Mak tak maiin, tûn laia thil hlui chanchin zirna chuan Thuthlung Hlui leh Thuthlung Thara chuang hmân laia thilthleng chanchin pawimawh takte a thleng ngei tih a nemnghet a ni—Israel thlahtute chanchin te, Aigupta sal tânna aṭanga Israelte chhan chhuahna chanchin te, Davida lal thlah kal zêl chanchin te, leh Isua hun laia mite nun dân chanchin te zînga a pawimawh laite finfiahna pein,” a ti. Bible kan rinna chu thil hlui chanchin zirtute thil hmuh chhuahah a innghat lo nâ a, chutianga thilthleng chanchin a sawi dik chu Pathian thâwk khum lehkhabu laka i thil beisei tûr chu a ni.

Bible-a chuang finna chhawr tlâk tak chu mi chi tinin an hlâwkpui. Mita hmuh tham loh thilnung te tak tê tê leh chûng thilnungte’n natna an kai darh theih dân hmuh chhuah a nih hma daihin, Bible chuan hrisêlna  kawnga invawn thianghlim dân chu a lo sawi diam tawh a, chu chu tûn lai thlengin a chhawr tlâkin a pawimawh êm êm a ni. (Leviticus 11:32-40; Deuteronomy 23:12, 13) Chhûngkuaa mite incheibâwl dân tûr chungchânga Bible thurâwn zâwmtute chu an hlim zâwk a. (Ephesi 5:28–6:4) Bible thu bul zâwmtute chu hnathawktu ṭha zâwk emaw, a ruaitu ṭha zâwk emaw an ni ṭhîn. (Ephesi 4:28; 6:5-9) Bible thu bulte nunpui chu rilru lama hrisêl nân pawh a ṭangkai a ni. (Thufingte 14:30; Ephesi 4:31, 32; Kolossa 3:8-10) Chûng thurâwn chhawr tlâk tak takte chu min Siamtu hnên aṭanga kan beisei tûr chu a ni.

ENG NGE A HLAWKNA? Bible-a finna thute chuan mi mâwl pawh a tifing thei a. (Sâm 19:7) Chu bâkah, Bible kan rin tawh chuan, lehkhabu dangin a tih theih loh rinna nghet lehzual nei tûrin min ṭanpui thei a ni. (w09 5/1)

Hriat belh nân, Bible Zirtîrna Dik Tak Chu Eng Nge Ni?  * tih lehkhabu bung hnihna “Bible—Pathian Min Pêk Lehkhabu Chu” tih chu en rawh.

[Footnote]