4 Rinhlelhna I Neih Chu Tibo Rawh

“Nang rin tlêm, engah nge i rinhlelh le?” —Matthaia 14: 31.

ENG NGE A HARSATNA? Isua zirtîrte meuh pawhin rinhlelh châng an nei a. (Matthaia 14:30; Luka 24:36-39; Johana 20:24, 25) Bible chuan rinna neih lohna chu ‘min tihnawktu sual keimahnia bet tlat’ angin a sawi a ni. (Hebrai 12:1, 2) Tirhkoh Paula chuan: “Mi zawng zawng chuan rinna an nei vek si lo va,” tiin a ziak a. (2 Thessalonika 3:1, 2) Ṭhenkhatin he mizia hi an lantîr thei lo tihna a ni lo. Neih tumin ṭan an la lo mai zâwk a ni. Pathian chuan chu mizia neih tuma ṭan latute chu mal a sâwm ang.

ENGTIN NGE HARSATNA CHU I TIHKIAN THEIH? I rinhlelhna awmtîrtu chu hriat tum rawh. Entîr nân, zirtîr Thoma chuan zirtîr dangte’n Isua an hmuh thu an sawi pawhin kaihthawh leh a nih chu a ringhlel tlat a, finfiahna hmuh a duh a ni. Eng nge a rah chhuah? Isua chuan rinna  chak tak nei tûra a mamawh finfiahna chu a pe a ni.—Johana 20:24-29.

Pathian Jehova chuan Bible hmangin kan rinhlelhna tibo tûra kan mamawh chhânna chu min pe a. Entîr nân, mi tam tak chuan mihringte tihrehawmtu indona te, tharum thawhna te, leh manganna te chu Pathian awmtîr nia an ngaih avângin amah an rinna chu an hloh phah a ni. He mi chungchângah hian Bible-in eng nge a sawi?

Pathian chuan mihring sawrkârna kal tlangin ro a rêl lo. Isua chuan hmuh theih loh thlarau, Setana chu he “khawvêl lal” a nihzia a sawi a. (Johana 14:30) Setana chuan Isua hnênah vawikhat chibai a bûk chuan leia lalram zawng zawng pêk a tiam a, heti hian a sawi: “Hêng zawng zawng chunga thuneihna leh a ropuina hi ka pe ang che; ka hnêna pêk a ni tawh si a, ka duh apiang hnênah ka pe bawk ṭhîn a ni,” tiin. Isua chuan Setana’n chutiang thuneihna a nei tih chu a pha lo. Ani chuan: “‘Lalpa i Pathian chibai bûk la, ama rawng chauh bâwl rawh,’ tih ziak a ni,” a ti zâwk a ni. (Luka 4:5-8) Khawvêl hrehawm tawrhnaa mawhphurtu chu Pathian ni lovin, Setana leh mihring sawrkârte an ni.—Thu Puan 12:9, 12.

Pathian Jehova chuan hrehawm tawrhna awmtîrtu zawng zawng chu a nuai bo thuai ang. Ani chuan mihringte chunga rorêl tûrin a Fapa, Isua Krista hnuaiah Lalram, a nih loh leh sawrkâr chu a ruahman tawh a. (Matthaia 6:9, 10; 1 Korinth 15:20-28) Bible hrilh lâwkna chu tithleng famkimin, Ram chanchin ṭha chu leilung pum puiah hrilh mêk a ni. (Matthaia 24:14) Chu lalram chuan a dotu zawng zawng tiboralin, mihringte tawrhna thlentu zawng zawng chu a nuai bo thuai ang.—Daniela 2:44; Matthaia 25:31-33, 46; Thu Puan 21:3, 4.

ENG NGE A HLAWKNA? Rinhlelhna nei mite chu ‘mihring fin vervêkna hmanga bum’ leh “zirtîrna thli tinrênga” lehlam lehlama vawrh leh len len ang an ni. (Ephesi 4:14; 2 Petera 2:1) An zawhnate chhânna lungawithlâk tak hmutute erawh chu ‘rinnaah an ding nghet’ thei thung.—1 Korinth 16:13.

He chanchinbu chhuahtu, Jehova Thuhretute chuan i rinna chungchânga zawhna i neih engpawh hmu chhuak tûra ṭanpui che chu an châk a. Anmahni kâwm a, an zirtîrnate bih chiang tûrin an sâwm che a ni. Chutianga i tihna chuan Pathian i rinna chu nasa takin a tichak ang. (w09 5/1)

Hriat belh nân, Bible Zirtîrna Dik Tak Chu Eng Nge?  * tih lehkhabu bung 8-na “Pathian Ram Chu Eng Nge Ni?,” tih leh bung 11-na, “Engvângin Nge Pathianin Hrehawm Tawrhna Awm A Phal?,” tih chu en rawh.

[Footnote]

[Phêk 9-naa milem]

An zawhnate chhânna lungawithlâk tak hmutute chuan rinna nghahchhan nghet tak an nei