Pathian Hnaih Rawh

A Nihna Sawi Chhuaktu Pathian Jehova Chu

Exodus 34:6, 7

ENGTIN nge Pathian—a mizia leh a kawngte—chu i hrilhfiah ang? Pathian hnênah ama chanchin zâwt a, a hrilhfiah lai che ngaithla angah han inchan chhin teh. Chutiang ngei chu zâwlnei Mosia’n a tawng a ni. Chu thilthleng chanchin ziak chhuak tûra thlarauva thâwk khum a ni chu a lâwmawm hle.

Sinai Tlângah khân, Mosia chuan Jehova hnênah: “I ropuina chu khawngaih takin mi han entîr teh,” tiin a ngên a. (Exodus 33:18) A tûkah chuan, zâwlnei chu Pathian ropuina hmuh theihna chanvo hlu tak pêk a ni ta a ni. * Mosia chuan inlârna ropui taka a thil hmuhte chu kimchang takin min hrilh lo. Mahse, thil engemaw pawimawh tak zâwk—Pathian thil sawi—chu a ziak chhuak a ni. Exodus 34:6, 7-a kan hmuh Pathian Jehova thusawi chu ilo bih chiang ang u.

Pathian Jehova’n a chungchâng a sawi hmasak ber chu “Pathian lainatnaa khat, mi khawngaih thei tak,” a ni tih hi a ni. (Châng 6) Mi thiam pakhat sawi dân chuan, Hebrai thu mal “lainatnaa khat” tia lehlin chu “pain a fa chunga a neih ang, Pathian thinlunga khawngaihna,” sawina a ni. “Khawngaih thei tak” tia lehlin thu mal hi “mi dang ṭanpui thei dinhmuna ding tuemawin, thinlunga khawngaihna avânga ṭanpui ngai a ṭanpuina” thiltih nên a inkûngkaih a ni. Pathian Jehova chuan amah chibai bûktute chu nu leh pate’n an fate hmangaih tak leh an mamawhte ngaihsak taka an enkawl anga a enkawlzia hre tûrin min duh a ni.—Sâm 103:8, 13.

A dawtah, Jehova chuan “thin nel tak” a ni tih a sawi leh a. (Châng 6) Ani chu lei lama a chhiahhlawhte chungah a thinur mai mai lo. An chungah a dawhtheiin, an kawng sualte thlâkthleng tûra hun a pêk chhûngin an tlin lohna te chu a ngaihhnathiam a ni.—2 Petera 3:9.

Pathian chuan “ngilneihna leh thu tak ngah” a nih thu a sawi chhunzawm a. (Châng 6) Ngilneihna, a nih loh leh hmangaihna rinawm chu Pathian Jehova’n a mite nêna inzawmna nghet leh chat thei lo siam nâna a hman mize hlu tak a ni. (Deuteronomy 7:9) Pathian chu thutak lo chhuahna bul a ni bawk a. Ani chuan mi a bum thei lo va, mi bumin a awm thei bawk hek lo. “Thutak Pathian” a nih avângin, nakin hun atâna a thutiamte pawh telin, a thusawi apiang kan ring thlap thei a ni.—Sâm 31:5.

Pathian Jehova’n a chungchâng kan hriat a duh pawimawh tak dang leh pakhat chu “khawlohna te, bawhchhiatna te, suahsualna te” a ngaidam ṭhîn hi a ni a. (Châng 7) Ani chuan thil tisual inlamlêtte chu a ‘ngaihdam peih a ni.’ (Sâm 86:5) Chutih rual chuan, sualna a pawmzam ngai lo bawk. Ani chuan “thiam lova ruatte chhuah mai ngai lo,” a nihzia a sawi a. (Châng 7) Pathian thianghlim leh dik chuan duh rêng vânga thil sual titute chu hrem lohvin a chhuah lo vang. Engtik nîah emaw chuan an sual man chu an têl tho tho dâwn a ni.

Pathian Jehova’n a mizia a sawi chhuahte aṭang chuan amah kan hriat a, a mizia leh a kawngte kan hriat chian a duhzia chiang takin kan hre thei a ni. A mize duhawm takte zir belh zêl chu i châk lâwm ni? (w09 5/1)

[Footnote]