Rinna Chu Eng Nge Ni?

RINNA chu engtin nge i hrilhfiah ang? Ṭhenkhat chuan finfiahna chiang awm lova thil pawmna niin an ngai a. America mi lâr tak pakhat journalist leh lehkha ziak mi ni bawk H. L. Mencken-a chuan rinna chu “thil âwihawm lo tak thleng anga ngaihna inâwm lo tak,” tiin a lo hrilhfiah a.

Bible erawh chuan rinna chu finfiahna chiang awm lova thil pawmna emaw, thil inâwm lo tak thleng anga ngaihna emaw angin a sawi lo thung. Pathian Thu chuan: “Rinna hi thil beiseite awm ngeia hriatna, thil hmuh lohte hriatfiahna a ni,” a ti.—Hebrai 11:1.

Mite chuan rinna chungchângah ngaih dân hrang hrang an neih avângin, a hnuaia zawhnate chhânna hi i lo ngaihtuah ang u:

• Engtin nge rinna chungchâng mi tam takte sawi dân leh Bible hrilhfiah dân chu a inan loh?

• Engvângin nge Bible sawi ang rinna kan neih chu a pawimawh?

• Engtin Nge i rinna chu i tihchak theih?

Tiamkamna Lehkha leh Finfiahna Rin Tlâk

Bible-a Hebrai bu ziah a nih lai khân, “thil beiseite awm ngeia hriatna” tia lehlin Grik thu mal hi hman lâr a ni hle a. Chu chu sumdâwnna thila lehkha pawimawhahte chuan a chuang ṭhîn a, chu chuan mi chu nakinah thil engemaw a nei ngei dâwn tih a tiam tlat a ni. Chuvângin, lehkhabu pakhat chuan Hebrai 11:1 thu hi: “Rinna chu thil beiseite hmu ngei tûra tiamkamna lehkha ang a ni,” tia lehlin theih a nih thu a sawi.

Company rin tlâk tak hnên aṭanga thil leiin, a hmuh hun tûr chu i nghâk tawh ngai a nih chuan, chutiang rinna chu i lantîr tihna a ni. I thil leina lehkha i lo kawl ṭhat chuan chu company chu i rin nachhan tûr a pe che a. Chu lehkha chu i thil lei i dawng ngei dâwn tih tiamkamna lehkha anga sawi theih a ni. Chu lehkha chu i tibo emaw, i paih daih emaw a nih chuan a neitu nihna chu i hloh vang. Chutiang bawkin, Pathianin a thutiamte a hlen chhuak ngei ang tih ringtute chuan an beisei chu an hmu ngei dâwn tih rin nachhan tûr an nei a. Kawng lehlamah chuan chutianga rinna nei ve lotute emaw, an rinna hlohtute emaw chuan Pathian thutiamte hmuh chu an beisei thei lo.—Jakoba 1:5-8.

Hebrai 11:1-a a dawta thu, “thil hmuh lohte hriatfiahna” tia lehlin hian thil ni âwm ang taka langte a nih si loh dân finfiahna hmanga târ lang tih ngaih dân a keng tel a ni. Entîr nân, nî chuan kan leilung hi a hêl niin a lang—khawchhak lam aṭanga lo chhuakin, vân a kal tlang a, khawthlang lamah a tla ṭhîn si a. Amaherawhchu, vân sâng chanchin zirna leh chhiarkawp lam thiamnate’n a târ lan dân chuan nîin leilung hêl ahnêkin leiin nî a hêl zâwk a ni. Chu finfiahna chu i hriat bel a, a dik nia i pawm tawh chuan, mita i hmuh dân ang a nih loh pawhin, leilungin nî a hêl tih i ring ta tlat a ni. I rinna chu finfiahna chiang awm lova thil pawmna mai a ni lo. Thilte chu a lan dân mai ni lovin, a nih dân ang takin a hmuhtîr thei che a ni.

Rinna Chak Tak Chu Engtianga Pawimawh Nge Ni?

Chutiang rinna—kan thurin chu siam ṭhat a ngai a nih pawhin, finfiahna rin tlâk taka innghat rinna chu a ni Bible-in nei tûra min fuih chu. Chutiang rinna chu a pawimawh hle a ni. Tirhkoh Paula chuan: “Rinna lovin ama lâwmzâwng mi nih rual a ni lo; Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni,” tiin a ziak a ni.—Hebrai 11:6.

Rinna chak tak nei tûr chuan harsatna tam tak hmachhawn tûr a awm a. Mahse, a dawta thuziaka târ lan kawng chi lîte hi a taka i hman chuan i hlawhtling thei a ni. (w09 5/1)