Sum Enkawltu Rinawm leh A Governing Body
Sum Enkawltu Rinawm leh A Governing Body
“Sum enkawltu rinawm, fing tak, a puin a hun apianga an chaw chan tûr semsak tûrin a chhûngte chunga hotua a siam tûr chu tu ber nge ni ang le?—LK. 12:42.
1, 2. Isua’n ni hnuhnûng chhinchhiahna hlâwm a pêk khân, eng zawhna pawimawh tak nge a siam?
ISUA’N ni hnuhnûng chhinchhiahna hlâwm khat a pêk laiin: “Bawi rinawm, fing tak, a puin a hun apianga an chaw chan tûr semsak tûrin a chhûngte chunga hotua a siama chu, tu ber nge ni ang le?” tih chu a zâwt a. Tichuan, Isua chuan chu bâwih chu a rinawmna avângin a Pu neih zawng zawng chunga hotuah siamin lâwmman pêk a ni ang tih a sawi zâwm a ni.—Mt. 24:45-47.
2 Chu mi hma thla engemaw zâtah, Isua chuan chutiang bawk zawhna chu a lo zâwt tawh a. (Luka 12:42-44 chhiar rawh.) Ani chuan bâwih chu “sum enkawltu” tiin a ko va. Sum enkawltu chu chhiahhlawhte chunga dah, in chhûng enkawltu leh hotu lû a ni. Mahse, sum enkawltu pawh chu chhiahhlawh a ni ve tho. Tunge he bâwih, a nih loh leh sum enkawltu chu ni a, engtin nge ‘a hun apianga chaw” a sem? Thlarau lam chaw sem nâna hman hmanrua chu kan hriat ṭheuh a pawimawh a ni.
3. (a) Engtin nge Kristianna rama thusawitute chuan Isua sawi “bawi” chungchâng chu an hrilhfiah? (b) Tunge “sum enkawltu,” a nih loh leh “bawi” chu ni a, tunge “a chhûngte” chu?
3 Kristianna rama thusawitute chuan hêng Isua thusawite hi an sakhaw hruaitute sawinaah an hmehbel fo va. Mahse, chu tehkhin thua “pu,” Isua chuan Kristianna ram pâwl hrang hranga bâwih tam tak awm darh tûr thu a sawi lo. A neih zawng zawng chunga hotua a ruat tûr “sum enkawltu,” a nih loh leh “bawi” pakhat chauh a awm dâwn tih chiang takin a sawi zâwk a ni. He magazine-a thuziakte’n a târ lan fo angin, sum enkawltu chuan zirtîr hriak thih “pâwl tlêmte,” ai chu a awh ngei ang. Chanchin Ṭha Luka ziaka Isua sawi pawh hi hêng mite chungchâng tho hi a ni. (Lk. 12:32) “A chhûngte” tih hian he pâwl tho hi a kâwk a; mahse, a mi mal anga an chanvo chu a sawi uar a ni. Zawhna ngaihven awm tak a chhuak a, He bâwih pâwla mi zawng zawngte hi thlarau lam chaw a hun taka semnaah an tel vek em? tih chu. Bible sawi dân ngun taka kan bih chuan a chhânna kan hmu thei a ni.
Hun Kal Tawha Jehova Chhiahhlawh
4. Eng angin nge Jehova chuan hmân lai Israel hnam chu a sawi a, chu hnam chungchângah chuan eng nge hriat a pawimawh?
4 Pathian Jehova chuan a mite, hmân lai Israel hnam chu chhiahhlawh pâwl pakhat angin a sawi a. “Nangni [a tam sawina] hi mi hriatpuitute [a tam sawina] in ni, ka chhiahhlawh [pakhat sawina] ka thlana pawh chu, LALPAN a ti.” (Is. 43:10) Chu a chhiahhlawh pâwl pakhatah chuan a hnama mi zawng zawngte an tel a. Amaherawhchu, Levia-ho puithiamte leh puithiam ni ve lote chauhvin a hnam chu zirtîr tûrin mawhphurhna an nei tih hriat chu a pawimawh hle.—2 Chro. 35:3; Mal. 2:7.
5. Isua sawi angin, eng inthlâkthlengna lian tham tak nge awm ngei tûr a nih?
5 Chu Israel hnam chu Isua’n bâwih a tih kha a ni em? Ni lo ve. Isua’n a hun laia Juda mite hnênah: “Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,” tia a sawi avângin a ni lo tih kan hre thei a ni. (Mt. 21:34) Inthlâkthlengna chu a awm ngei tûr a ni a. Pathian Jehova chuan hnam thar a hmang ang. Mahse, thlarau lama zirtîrna kawngah chuan, Isua tehkhin thua bâwih hnathawh chuan hmân lai Israela Pathian “chhiahhlawh” thiltih dân chu a zui a ni.
Bâwih Rinawm A Lo Lang
6. C.E. 33 Pentikost nî khân eng hnam thar nge lo piang a, chutah chuan tute nge tel?
6 Hnam thar, “Pathian Israelte” chu thlarau lam Israelte hmanga din a ni a. (Gal. 6:16; Rom 2:28, 29; 9:6) C.E. 33 Pentikost nia thlarau thianghlim leih a nih khân, chu hnam thar chu a lo piang a ni. Chu mi hnu chuan, thlarauva hriak thih Kristian zawng zawng chu tûna a Pu, Isua Krista’n bâwih pâwl ni tûra a ruat, chu hnama mi chu an lo ni ta a ni. Chu hnama mi tinte chu chanchin ṭha hril leh zirtîra siam hna thawk tûra thupêk an ni a. (Mt. 28:19, 20) Mahse, an vai chuan a hun taka thlarau lam chaw semnaah an tel vek em? Chu zawhna Bible-in a chhân dân chu i lo eng ang u.
7. Atîrah chuan, tirhkohte hnathawh ber chu eng nge ni a, a hnuah eng hna nge an chelh belh?
7 Isua’n a tirhkoh 12-te hnathawh tûr a ruatsakte zîngah chuan mi dangte hnêna chanchin ṭha hril tûra tirh chhuah an nihna pawh a tel a. (Marka 3:13-15 chhiar rawh.) Chu an hna thawh tûr chu, Grik thu mal apostolos tih awmze bul ber nên a inrem a, chu chu thiltih sawina “tirh chhuah” tih aṭanga lâk chhuah a ni. Mahse, hun a liam zêl a, Kristian kohhran din a nih dâwn hnaihah chuan, tirhkohte chuan “hotu” nihna chanvo an lo chelh chho ta a ni.—Tirh. 1:20-26.
8, 9. (a) Tirhkoh 12-te hna ber chu eng nge ni? (b) Governing body pawmpuina angin, mi dang tute hnênah nge mawhphurhna tam zâwk pêk a nih?
8 Tirhkoh 12-te hna ber chu eng nge ni? Pentikost hnua thilthlengahte chuan a chhânna a hmuh theih a. Hmeithaite hnêna nî tina ei tûr sem chungchânga inhnialna a chhuah khân, tirhkoh 12-te chuan zirtîr mipuite chu ko khâwmin: “Pathian thu hril bânsanin, dawhkânahte rawng kan bâwl chuan a ṭha lo vang,” tiin an sawi a. (Tirhkohte 6:1-6 chhiar rawh.) Tichuan, tirhkohte chuan ‘thu rawngbâwla’ an inpêk zawm zêl theih nân, thlarau lama puitling unaupa dangte chu “thil rêltu atân” an ruat a ni. ‘Pathian thu chu a lo darh a; Jerusalem khuaah zirtîrteho an lo pun tâk êm êm’ avângin, chu ruahmanna chu Pathian Jehova’n mal a sâwm tih a chiang hle. (Tirh. 6:7) Chutiang chuan thlarau lama châwmna hna chu tirhkohte kovah a innghat ta a ni.—Tirh. 2:42.
9 Hun a liam zêl chuan, mi dangte pawh mawhphurhna tam zâwk pêk an ni zêl a. Thlarau thianghlim kaihhruaina hnuaiah, Paula leh Barnaba chu Antiokei kohhranin missionary atân an tîr chhuak a ni. Anni chu zirtîr 12-te zîngah tel lo mah se, tirhkoh tia hriat an lo ni ta a. (Tirh. 13:1-3; 14:14; Gal. 1:19) Chutianga ruat an nihna chu a hnuah Jerusalema governing body chuan a pawm a ni. (Gal. 2:7-10) Chu mi hnu lawk chuan, Paula chuan thlarau lam chaw sem chhuahnaah chanvo nei vein, thlarauva thâwk khum a lehkha hmasa ber chu a ziak a ni.
10. Kum zabi khatnaah khân hriak thih Kristiante zawng zawng chu thlarau lam chaw buatsaihnaah an tel vek em? Hrilhfiah rawh.
10 A nih leh hriak thih Kristian zawng zawngte kha thu hrilh hna enkawlnaah leh thlarau lam chaw buatsaihnaah khân an tel vek em? Tel vek lo. Tirhkoh Paula chuan heti hian min hrilh a: “An zain tirhkoh an ni vek em ni? An zain thuhriltu an ni vek em ni? An zain zirtîrtu an ni vek em ni? An zain thilmak titu an ni vek em ni?” tiin. Paula sawi tum chu an ni vek lo tihna a ni. (1 Kor. 12:29) Thlarau fa Kristian zawng zawngte chu thu hrilhnaah tel vek mah se, mi tlêm tê chauh—mi pariat chauh—chu Kristian Grik Pathian Lehkha Thu bu 27 chu ziak tûra hman an ni.
Tûn Laia Bâwih Rinawm
11. Bâwih hnênah eng ‘thil neihte’ nge kawltîr a nih?
11 Matthaia 24:45-a chhinchhiah Isua thute chuan he tâwpna hun chhûngah pawh hian leiah bâwih rinawm leh fing pâwl a awm dâwn tih chiang takin a târ lang a. Thu Puan 12:17 chuan chûng mite chu hmeichhe thlah ‘la awmte,’ a nih loh leh la bângte tiin a sawi a. Chu a la bângte chu a pâwl angin, he leia Krista neih zawng zawng chungah hotu-a ruat a ni. Sum enkawltu rinawm hnêna kawltîr chûng Pu ber ‘thil neihte’ zîngah chuan, lei lama Lalram khua leh tuite leh chanchin ṭha hrilh nâna hman in leh lote a tel a ni.
12, 13. Engtin nge Kristian chuan vân lam kohna a chang tih a hriat theih?
12 Engtin nge Kristian tuemaw chuan vân lam beiseina neiin, thlarau lam Israel a la bângte zînga tel a ni tih a inhriat? A chhânna chu tirhkoh Paula’n a vân lam beiseina ṭâwmpuitute hnêna a thusawiah a hmuh theih a ni: “Pathian thlarau hruaia awm apiangte chu Pathian fate an ni si a. Hlauva awm leh tûrin bâwih nihna thlarau in hmu a ni si lo va; fa nihna thlarau in hmu a ni zâwk e, chu thlarau avâng chuan ‘Abba! (Ka pa!)’ tiin kan au ṭhin hi. Thlarau ngei chuan keimahni thlarau nên Pathian fate kan ni tih min hriattîr thîn; tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnêna chawimawiin kan awm ve theihna tûrin amah kan tuarpui tak zet chuan,” tihah hian.—Rom 8:14-17.
13 A awlsamzâwnga sawi chuan, chûng mite chu Pathian thlarau thianghlima hriak thih an ni a, vân lam “kohna,” a nih loh leh sâwmna chu an chang a ni. (Heb. 3:1) He sâwmna hi Pathian hnên aṭangin a mi malin an dawng a. Anni chuan chu Pathian fa nihna chu rinhlelhna emaw, hlauhna emaw nei hauh lovin an lo pawm lêt ve nghâl thung a ni. (1 Johana 2:20, 21 chhiar rawh.) Chuvângin, he beiseina hi an thlan a ni lo va, Pathian Jehova’n an chungah a chhinchhiahna, a nih loh leh thlarau thianghlim a pe zâwk a ni.—2 Kor. 1:21, 22; 1 Pet. 1:3, 4.
Thlîr Dân Dik Chu
14. Engtin nge hriak thihte chuan an kohna chan chu an thlîr?
14 Hêng hriak thihte hian an vân lam lâwmman an nghah chhûngin eng anga mahni inthlîr tûr nge an nih? Anni chuan sâwmna ropui tak chu an dawng ngei a—mahse, chu chu sâwmna mai chauh a ni tih an hria a ni. Chu lâwmman hmu tûr chuan thih thlengin an rinawm ngei tûr a ni a. Inngaitlâwm takin, anni chuan Paula thu: “Unaute u, manah ka inngai lo. Amaherawhchu he thil pakhat hi ka ti ṭhîn—hnung lama thil awmte chu theihnghilh a, hma lama thil awmte chu banin, Krista Isuaa Pathian chung lam koh chhan lâwmman hmu tûrin, tiam chin lam ka pan ṭâlh ṭâlh a ni,” tih chu an sawi ve a ni. (Phil. 3:13, 14) Hriak thih a la bângte chuan ‘inngaihtlâwmna leh thuhnuairawlhna zawng zawng nei a, a kohna phua awm tûrin,’ “hlau leh khûr chungin” theih tâwp an chhuah tûr a ni.”—Eph. 4:1-3; Phil. 2:12; 1 Thes. 2:11, 12.
15. Engtin nge Kristiante chuan Hriatrengna entîrnate ei a, in tute chu an thlîr ang a, hriak thihte chu engtin nge an inthlîr?
15 A nih leh Kristian dangte chuan he hriak thihna dawng nia inchhâl a, Hriatrengna entîrnate ei a, in ṭantu chu engtin nge an thlîr ang? A chungthu an rêlsak tûr a ni lo. Chu chu amah leh Pathian Jehova inkâr thil a ni. (Rom 14:12) Amaherawhchu, he hriak thihna dawng tak zettu Kristiante chuan ngaihsak bîk an phût lo. Anni chuan hriak thih an nih mai avângin “mipui tam tak” zînga thiltawn nei ṭhenkhatte ai pawha hriatthiamna nei ṭha zâwkah an inngai lo va. (Thup. 7:9) An ṭhian ‘berâm dangte’ aia thlarau thianghlim dawng nasa zâwk tûrah an indah hek lo. (Joh. 10:16) Mi dangte aia cheibâwl ṭhat bîk an beisei lo va, Hriatrengna entîrnate an ei a, an in avâng maiin kohhran upate chunga lêngah an inchhâl lo bawk.
16-18. (a) Hriak thih zawng zawngte chu thlarau lam thutak hriatthiamna tharte laihlanna kawngah an tel vek em? Entîrna pe rawh. (b) Engvângin nge Governing Body chuan hriak thih nia inchhâl zawng zawngte chu an râwn khâwm kher a ngaih loh?
16 Leilung zawng zawnga awm hêng hriak thihte hi thlarau lam thutak hriatthiamna tharte laihlanna kawngah engtin emaw taka tel tûrin an inzawmkhâwm em? Inzawmkhâwm lo ve. Bâwih pâwl chuan a huhovin thlarau lama a chhûngte châwm tûrin mawhphurhna nei mah se, an zînga mi tinte hian mawhphurhna inang emaw, chanvo inang emaw an chelh lo. (1 Korinth 12:14-14 chhiar rawh.) A tîra kan hriat tawh angin, kum zabi khatnaah khân, thu hrilh hna pawimawh takah chuan mi tin an tel a. Mahse, mi tlêm tê chauhvin Bible ziakin, Kristian kohhran an enkawl a ni.
17 Entîr nân: Bible chuan a chângin “kohhran” chu dân anga rorêlna kengkawh angin a sawi a. (Mt. 18:17) Mahse, a nihna takah chuan chutiang rorêlna kengkawhtute chu kohhran aiawhtu upate chauh an ni. Upate chuan thu tlûkna an siam hmain kohhrana mi zawng zawngte ngaih dân an la khâwm kher lo. Theocratic kal hmang ang takin, anni chuan an chanvo a nih angin kohhran pum pui aiawhin ro an rêl a ni.
18 Chutiang bawkin, tûn laiah hriak thihte zînga mipa tlêm tête chauhvin, bâwih pâwl aiawhin mawhphurhna an nei thei a. Anni chu Jehova Thuhretute Governing Body-a din an ni. Hêng thlarauva hriak thihte hian Lalram hna leh thlarau lama châwmna chu an enkawl a. Mahse, kum zabi khatna ang bawkin, Governing Body chuan thu tlûkna a siam hmain bâwih pâwl zînga mi tinte chu a râwn khâwm lo. (Tirhkohte 16:4, 5 chhiar rawh.) Amaherawhchu, hriak thih Thuhretu zawng zawngte chu tûna thawh mêk, buh seng hna pawimawh takah hian an inhmang nasa hle a. A pâwl angin, “bawi rinawm, fing tak” chu taksa pum khat a ni a; mahse, a mi mal ang chuan hnathawh tûr chi hrang hrang an nei a ni.—1 Kor. 12:19-26.
19, 20. “Bawi rinawm, fing tak” leh a Governing Body chungah mipui tam takte chuan eng ang thlîr dân inbûk tâwk nge an neih?
19 Governing Body hnathawh dân kan hriat tâkte chuan leia chatuan nunna beiseina nei mipui tam tak pung chho rengte chungah nghawng eng nge a neih ang? Lal thil neihte zînga mi an nih angin, “bawi rinawm, fing tak” aiawhtu Governing Body siam ruahmannate thlâwp chu nuam an ti a ni. Mipui tam tak zînga mite chuan Governing Body kaihhruaina hnuaia siam thlarau lam chawte chu an hlut hle a. Chutih rual chuan, bâwihho chu a pâwl anga an zah rual rualin, chu bâwih pâwla mi anga inchhâl tuemaw chu chawisâng bîk lo tûrin an fîmkhur tûr a ni. Pathian thlarauva hriak thihna dawng tak zettu tumahin chutianga chawisân bîk chu an duhin, an beisei hauh lo vang.—Tirh. 10:25, 26; 14:14, 15.
20 Hriak thih a la bâng, “a chhûngte” zînga mi emaw, mipui tam tak zînga mi emaw pawh ni ila, sum enkawltu rinawm leh a Governing Body thlâwp tlat chu i tum ang u. Kan zain “ngaihven” reng leh a tâwp thlenga rinawm tlat chu i tum ṭheuh bawk ang u.—Mt. 24:13, 42. (w09 6/15)
Kan La Hria Em?
• Tunge “bawi rinawm, fing tak” chu ni a, tute nge a chhûngte chu?
• Engtin nge mi chuan vân lam kohna a chang tih a hriat theih?
• Thlarau lam chaw thar buatsaih tûrin tuin nge mawhphurhna nei deuh ber?
• Hriak thih tuemaw chu eng angin nge a inthlîr ang?
[Zirlai Atâna Zawhnate]
[Phêk 29-naa milem]
Tûn laiah hian, Governing Body chuan bâwih rinawm leh fing tak pâwl ai chu a awh. Kum zabi khatnaah pawh chutiang ruahmanna chu a awm