Tûn Laia Bible A Chhawr Tlâk Chhan

“Pathian Thâwkkhum Lehkha Thu zawng zawng hi . . . nun dân dik inzirtîr nân te a ṭangkai êm êm a ni.”—2 TIMOTHEA 3:16, THE HOLY BIBLE, Mizo (Lushai) - C.L. Re-edited.

KUM zabi tluan chhuakah, Bible chuan mi chi tinte chu a ṭhazâwnga an nun thlâkthleng tûrin a chêttîr a. A chunga Bible châng târ lan khian he mi kawnga Bible a ṭangkai chhan chu Pathian finna a pai vâng niin a sawifiah a ni. Mihringte ziak mah ni se, Bible chuan Pathian ngaihtuahnate min hriattîr a. Heti hian min hrilhfiah a ni: “Miten thlarau thianghlim tirhin Pathian hnên ata an sawi . . . ṭhîn,” tiin.—2 Petera 1:21.

Bible chu a lo berah kawng hnihin kaihruaitu chhawr tlâk tak a ni. A hmasain, chu chuan nun kawng ṭha zâwk siamtu thilte thlîr dân tûr dik a pe a. A dawtah chuan, chu nun kawng ṭha zâwk chu nei tûra insiam ṭhat ngai apiangte insiam ṭha tûrin mite chêttîr theihna a nei a ni. Tûnah chûng kawng hnihte chu lo ngaihtuah ta ila.

Thiltum Chhawr Tlâkte Hriatthiamna

Pathian chuan Bible-ah: “Fing taka awmtîr chein i kalna tûr kawng chu ka entîr ang chia: ka mita en reng chung chein rem ka ruatsak zêl ang che,” tiin min tiam a. (Sâm 32:8) Ani chuan rem min ruatsak, a nih loh leh thurâwn min pêk bâkah, fing taka awm tûrin finna—dinhmun engemaw awmtîrtu thilte hriatthiamna—chu min pe bawk a ni tih chhinchhiah ang che. Thiltum ṭangkai takte hre thei tûra hriatthiamna neihna chuan thil ṭangkai lote ûma kan nun khawhralna ata min vêng thei a ni.

Entîr nân, mi tam tak chuan hmingthan leh hausak chu an nuna thiltum berah an nei a. Hausakna leh hmingthanna neih theih nâna mi dangte fin khalh theih dân chungchâng ziakna, mahnia inzirna lehkhabu pawh hmuh tûr tam tak a awm a ni. Mahse, Bible chuan: “Ṭhenawm elrelna . . . hi engmah lo leh thil lothlâwn mai a ni.” “Tangka sum ngainatu chuan tangka sumah duhtâwk a hmu lo vang,” tiin min hrilh thung a ni. (Thuhriltu 4:4; 5:10) Chu thurâwn chu tûn laiah a chhawr tlâk em?

Bible-a thurâwn kan hmuhte a chhawr tlâkzia târ lan nân, Japan rama mi Akinori-a thiltawn hi lo ngaihtuah ta ila. Akinori-a chuan mi dang nêna nasa taka an inel hnuah a thiltum ber mai, university ṭha ber aṭanga zir chhuakin, company hmingthang takah hna a hmu bawk a ni. Thil engkim mai chu a duhthusâm ang thlapin a kal niin a lang. Mahse, a  hlawhtlinna chuan a beisei angin hlimna a pe lo. Chutih ahnêkin, a rilru hahna leh a taksa chauhna chuan a hrilsêlna a tichhe zâwk mah a. A hnathawhna hmuna a ṭhiante lahin an thlamuan mang meuh si lo. A beidawn êm avângin zu ngawl a vei phah a, mahni intihhlum duhna hial a nei ta a ni. Chutah Jehova Thuhretute’n Bible an zirpui ṭan a. A thu zirte chuan nuna thil pawimawh nia a lo ngaih ṭhinte chu a thlâkthlengtîr ta a ni. A hnu lawkah chuan, a rilru hahna avânga a hrisêl lohna pawh a reh ṭan ta a. Chapona leh tum sânna chîm pila awm ai chuan, Akinori-a chuan Bible thufing: “Rilru dam chu tisa nunna a ni,” tih thu dikzia chu a tawng ta zâwk a ni.—Thufingte 14:30.

Nuna thiltum ûm tlâk ber chu eng nge nia i hriat? Eng hlawhtlinnain nge hlimna dik tak pe ang che? Inneihna hlawhtling tak hian em ni? Nge, fate hnêna bul ṭanna ṭha tak pêkin? A nih loh leh, ṭhian tam tak siamnain em ni? Nge, nun hlimawm tak neihna zâwkin? Hêng zawng zawng hi thiltum ûm tlâk a ni ngei mai. Bible pawhin thiltum pawimawh ber ang erawh ni lovin, chutiang thiltumte ûm tûr chuan min fuih a ni. Hriatthiamna chhawr tlâk tak nên, Bible chuan: “Pathian ṭih la, a thupêkte vawng rawh; hei hi mihring zawng zawng tih tûr chu a ni mai,” tiin nun lungâwithlâk neihna bulpui ber chu a sawi. (Thuhriltu 12:13) Chu tih tûr chu kan ngaihthah chuan nun chu tum nei lo, ninawm tak, leh lunghnualthlâk takah a chang thei a ni. Kawng lehlamah chuan: “LALPA ring apiang chu an nihlawh,” tiin Bible chuan min tiam thung.—Thufingte 16:20.

Bible-in Inthlâkthleng Tûra Mite A Chêttîr Dân

Paula chuan: “Pathian thu hi a nung a, thil a tithei,” tiin a ziak a. Khandaih hriam tawn, hriam tak ang maiin, thinlunga ngaihtuah leh tumte pawh a hre thei a ni. (Hebrai 4:12) Bible chuan mite chu mahni an inhriat dân mai ni lovin an nihna dik tak hmu thiam tûra a ṭanpui avângin, an nun thlâkthleng tûrin thiltihtheihna a nei a ni. Chuvângin, rilru dik tak pu mite chuan insiam ṭhat an ngaihna laite chu an hre thei ang. Entîr nân, tirhkoh Paula chuan hmân lai Korinth khuaa Kristian kohhrana awm, tûn hmaa rûk hmang, zu ruih hmang, uirê hmang, leh chutiang thil sual titute chungchângah heti hian a sawi a ni: “Ṭhenkhat chutiang mi in nih ṭhin kha; nimahsela . . . kan Pathian thlarauvah tlenfai in ni tawh,” tiin. (1 Korinth 6:9-11) Pathian Jehova thlarau thianghlim chuan hmân lai ang bawka hnathawkin thil a la ti thei reng a, mite chu a ṭûl ang anga inthlâkthlengna nei tûrin a chêttîr thei a ni.

Europe khaw muala chêng Mario-a chu ganza zu ṭhîn leh zuar ṭhîn, tharum thawh chîng tak a ni a. Ṭum khat chu police pakhatin a ruihhlo a mansak a, Mario-a thinrim lutuk chuan police officer chu a bei a, a car a tihchhiatsak bawk a. Chu bâkah, Mario-a chuan hna thawh nei lovin, lei ba a ngah hle bawk si. A buainate chingfel tûra a mamawh finna a nei lo tih a hriat avângin, Bible zir chu a remti ta a ni. Hma a sâwn chhoh zêl chuan, Mario-a chuan a lan dânte chu a tifel fai ta a, ruihhlo ngaih leh zawrh pawh bânsanin, tharum thawh pawh a chîng ta lo va. A nun hlui hre ṭhangtute chuan mak an ti hle a. A kawng kal laite pawh lo tidingin, “Mario-a kha i ni tiraw?” an lo tichawt mai ṭhîn.

Engin nge Akinori-a leh Mario-a te ang mite chu an nun hlui kalsan a, nun hlim leh lungawina dik tak hmu tûra chêttîr? Bible an zirna aṭanga an chhar chhuah Pathian hriatna vâng a ni tih a chiang hle. Pathian chauhvin, tûn la laa nun hlawhtling nei thei tûr leh nakina chatuan nunna nei thei tûra kan mamawh kaihhruaina chhawr tlâk chu min pe thei a ni. Pa ang maiin, Pathian Jehova chuan Bible hmangin min bia a ni: “Aw ka fapa, ka thu ngaithla la, pawm rawh; tichuan i dam chhûng kum a lo tam ang. . . . I kal laiin i pheichheh a zâng ang a; i tlân pawhin i petek lo vang. Zirtîrna chu vuan tlat la, chhuah suh; vawng tlat rawh, i nunna a ni si a,” tiin. (Thufingte 4:10-13) Min Siamtu kaihhruaina aia thurâwn chhawr tlâk zâwk eng nge awm thei ang? (w09 6/1)

 [Phêk 7-naa bâwm/milem]

Tûn Lai Atâna Chhawr Tlâk Thurâwn

Bible chuan tûn laia nun kawng tinrênga min kaihruai thei tûr thu bul bulṭhut, chhawr tlâk tak si min pe a. Chûng zînga ṭhenkhatte chu hêngte hi a ni:

• Mi dangte nêna inlaichînna ṭha neih chungchângah

“Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u.”—Matthaia 7:12.

“In zavaia zînga tê ber [anga indahtu] hi a ni, ropui ni.”—Luka 9:48.

“Mikhualte lâwmin awm fo ula.” —Rom 12:13.

• Thil chîn hlauhawm takte bânsan chungchângah

“Mi fing pâwl la, i lo fing ang a, mi â pâwl erawh chu hrehawm tawrh phahna a ni.”—Thufingte 13:20.

“Uain heh mite zîngah leh sa heh mite zîngah tel suh.”—Thufingte 23:20.

“Thinrim hmang mi chu ṭhian suh.” —Thufingte 22:24.

• Inneihna nghet neih chungchângah

“Tupawhin mahni a inhmangaih angin mahni nupui hmangaih ṭheuh sela, nupui pawhin a pasal hlauh thiam rawh se.”—Ephesi 5:33.

“Lainatna thinlung te, ngilneihna te, inngaihtlâwmna te, thuhnuairawlhna te, dawhtheihnate chuan inthuam rawh u, tupawhin tu chungah pawh thupawi nei ang ula indawh tawnin inngaidam tawn ula.”—Kolossa 3:12, 13.

• Fate ṭanpui chungchângah

“Naupang chu a kalna âwm kawngah chuan zirtîr ula, a upat hun pawhin a thlah lo vang.”—Thufingte 22:6.

“Nangni pate u, in fate tithinur suh ula, Lalpa thununaah leh zilhnaah chuan enkawl zâwk rawh u.”—Ephesi 6:4.

• Inhnialna pumpelh chungchângah

“Chhânna nêmin thinur a tikiang ṭhîn a, ṭawng huatthlala erawh chuan thinur a chawk tho ṭhîn.”—Thufingte 15:1.

“Chawimawi kawngah chuan induhsak tawn ṭheuh ula.”—Rom 12:10.

Ṭhian inkârah pawh ni se, intiamna ziaka dah thlapna hmangin sumdâwnna thila inhnialna chu pumpelh theih a ni. Chuvângin, Pathian chhiahhlawh Jeremia chuan: “Lehkha ka ziak a, ka châr a, hretute ka ko va, tangka chu bûknaah ka khai a,” tiin a ziak a ni.—Jeremia 32:10.

• Rilru put hmang ṭha neih chungchângah

“A dik apiang te, . . . a duhawm apiang te, a thangmawi apiangte—ṭhatna rêng a awm a, fakna rêng a awm phawt chuan—chûng chu ngaihtuah rawh u.” —Philippi 4:8.

Bible chuan a ṭha lozâwnga thil ngaihtuah chu sawisêlin, “phunnawitu leh sawisêltute” chu a hau bawk. “Beiseina kawngah chuan lâwm ula,” a ti.—Juda 4, 16; Rom 12:12.

Hêng thu bulte nunpuina chuan tûn la laa remna leh lungawina min neihtîr bâkah, Pathian thil phûtte tlin thei tûr leh a malsâwmnate dawng thei tûrin min ṭanpui bawk a ni. Bible chuan: “Mi felte chuan ram hi an luah ang a, a chhûngah hian kumkhuain an awm ang,” a ti si a. —Sâm 37:29.

[Phêk 5-naa milemte]

Akinori-a sumdâwn lai (vei lam) leh a nupui nêna tûna hlim taka Bible thutak mite an hrilh lai