Bible I Hriat Thiam Theih Dân

1. A Ziaktu Hnênah A Ṭanpuina Dîl Rawh

“Mut dâwna Bible chhiar chu ka lo chîng tawh ṭhîn a. Pathian Thu a ni tih ka hriat vânga chhiar ka ni a, chhiar nuam ti hran lo mah ila, Bible-a Pathian thu ziakte chu hriat ka châk a ni. Chhiar chhuah vek chu ka duh a. Atîrah chuan hriat thiam harsa ka ti lo; mahse, a hnua thu hriat thiam harsa deuh deuh ka’n chhiar thlen tâkah chuan ka chawlhsan ta daih a ni,” tiin Italy rama awm Ninfa-i chuan a sawi.

NINFA-I thiltawn ang hi i tawng ve em? Mi tam tak chuan an tawng a ni. Mahse, thuziak hmasaa kan hmuh angin, Bible Ziaktu, Pathian Jehova chuan a Thu i hriat thiam chu a duh a ni. Mahse, engtin nge chutiang hriatthiamna chu i neih theih ang? A hmasa berin a Ziaktu hnênah ṭanpuina i dîl a ngai a ni.

Isua tirhkohte chu sakhaw lam thil inzirna, rabbi school-a an zir loh avângin, “lehkha thiam lo, mi mâwl tak” anga ngaih an ni a. (Tirhkohte 4:13) Mahse, Isua chuan Pathian Thu an hre thiam thei tih a hrilh a ni. Engtin nge an hriat thiam theih? Isua chuan heti hian a hrilhfiah: “Thlamuantu, thlarau thianghlim, Pain ka hminga a rawn tirh tûr khân, chu mi chuan engkim a zirtîr ang che u,” tiin. (Johana 14:26) Pathian chuan chu thlarau thianghlim, a nih loh leh thiltihtheihna che vêl reng chu lei leh a chhûnga chêng zawng zawngte siam nân pawh a hmang a. (Genesis 1:2) Tin, a ngaihtuahnate Bible-a ziak chhuak tûra mi 40 vêl thâwk khum nân a hmang bawk a ni. (2 Petera 1:20, 21) Bible hriat thiam duhna neite ṭanpui tûrin chu thlarau chu hmuh theih a ni bawk.

Engtin nge Pathian thlarau thianghlim chu i dawn theih? Rinna nêna i dîl a ngai a ni. I dîl ngut ngut pawh a ngai mai thei bawk. “Dîl [reng] rawh u, tichuan an pe ang che u,” tiin Isua chuan a sawi a. “Nangni . . . mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” tiin a sawi belh a ni. (Luka 11:9, 13) Pathian Jehova chuan tih tak zeta dîltu apiang hnênah chuan thlarau thianghlim chu phal takin a pe ang. Chu thiltih theihna che vêl reng chuan kum sâng têl kal taa thlarau thâwk khuma ziak Bible thute awmzia hre thiam tûrin a ṭanpui thei che a. Bible-a thu thiltithei takte i nunpui theih nâna i mamawh finna a pe thei bawk che a ni.—Hebrai 4:12; Jakoba 1:5, 6.

Chuvângin, Bible i chhiar dâwn apiangin, Pathian hnênah a Thu hre thiam tûra ṭanpui tûr chein thlarau thianghlim dîlin ṭawngṭai ṭhîn ang che. (w09 7/1)