Bible I Hriat Thiam Theih Dân

3. Mi Dangte Ṭanpuina Pawm Rawh

Ram thar hmuh chhuah tuma zin mi Edward John Eyre-a chu Nullarbor Phaizâwla kea a zin lai chuan chu mi hmuna lo chêng ṭhang tawh tlâng mite chuan ṭiau mual pâwng aṭang leh eucalyptus kûng aṭanga tui lâk khâwm dân an zirtîr a. A ram awm dân hre chiangtute ṭanpuina a pawmna chu a dam khawchhuahpui a ni.

HE ENTIRNA hian a târ lan angin, thil harsa tak hlawhtling taka hlen chhuak tûr chuan thiltawn ngah zâwk tuemaw hnên aṭanga ṭanpuina dawn a ṭûl fo ṭhîn a. Bible i chhiar ṭan hunah pawh chutiang ṭanpuina chu i mamawh a ni.

Isua chuan a hnungzuitute’n mi dang ṭanpuina tel lova Bible an hriat thiam a beisei lo. Ṭum khat pawh, “Pathian Lehkha Thu hriat nân an thinlung a tifing” a ni. (Luka 24:45) Ani chuan Bible chhiartute’n Pathian Lehkha Thu zirtîrna an hriat thiam theih nân ṭanpuina an mamawh tih a hria a ni.

Tu Ṭanpuina Nge?

Isua chuan a hnungzuitu dik takte chu Pathian Lehkha Thu hriatthiamna nei tûra mite ṭanpui tûrin thu a pe a. Vâna a lâwn hmain Isua chuan: “Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” tiin thu a pe a ni. (Matthaia 28:19, 20) Kristiante hna bul berah chuan zirtîrna a tel a, chutah chuan nî tin nuna Bible thu bulte nunpui theih dân hrilhfiah a tel a. Kristian dikte chuan Bible hre thiam tûrin min dangte an ṭanpui a ni.

Isua’n a hnungzuitute hnêna chu thupêk a pêk hnu rei lo têah chuan thil ngaihven awm tak a thleng a. Bible chuan Isaia hrilh lâwkna chhiartu Ethiopia aṭanga lo kal lal mi lian pakhat chungchâng a sawi a ni. Ani chuan a thil chhiarah hriat thiam lohna lai  a nei a. Bible sawi dân chuan, chu a hriat thiam lohna lai chu: “Talh tûrin berâm angin ani chu an hruai a; berâm no a hmul mêttu hmaa a ngawi reng angin ani pawhin a kâ a âng lo; a tlâwm laiin a chungah thu rêl an phal lo; a thlahte chanchin tuin nge la hril ang? Khawvêl aṭangin a nun an lâksak si a,” tih hi a ni.—Tirhkohte 8:32, 33; Isaia 53:7, 8.

Chu Ethiopia mi lian chuan Kristian thiltawn ngah tak leh Pathian thu hre tak Philipa hnênah: “Zâwlneiin hêng thu hi tu thu nge a sawi, ama thu nge mi dang thu?” tiin a zâwt a. (Tirhkohte 8:34) Chu Ethiopia mi, rilru dik tak pu chu Pathian be tûrin Jerusalem pawh a han thleng hial tawh a, kaihhruaina dîlin a ṭawngṭai pawh a ni ngei ang. A thil chhiar pawh hriat thiam châk tak leh rilru inngaitlâwm tak chungin a chhiar ngei ang tih a rin theih a ni. Mahse, a thil chhiar chu a la hre thiam lo fo va. Inngaitlâwm takin Philipa hnênah ṭanpuina a dîl a. Philipa hrilhfiahna chuan a tihlâwm êm avângin, Kristian a lo nih phah ta a ni.—Tirhkohte 8:35-39.

 Jehova Thuhretute chuan Philipa leh Kristian hmasa dangte hnathawh chu an chhunzawm zêl a. Ram 235 chuangah, Thuhretute chuan mi dangte chu Bible zirtîrna dik tak hre thiam tûrin an ṭanpui a ni. Pathian Lehkha Thu aṭanga thupui engemaw ber thlang chhuak zêlin an zirtîr ṭhîn. Chutianga intahtawl chho zêla Bible zirpuinaah chuan thu engemaw chungchâng bîka Bible zirtîrna chhui chianna a tel a ni. *—“ Bible Chungchâng Zawhnate Chhânna Lungawithlâk Tak” tih bâwm chu en rawh.

‘Ka Zawhna Neih Zawng Zawng Chhân A Ni’

Thuziak hmasa bera târ lan tâk Steven-a, Valvanera-i, leh Jo-Anne-i te chuan Jehova Thuhretute nên Bible an zir ṭan a. Steven-a chuan: “Bible thu bulte leh chanchin ziakte khaikhinna aṭanga ka zawhna neihte chhânna ka hmu fo mai chu a mak ka ti ngawt mai. Bible ka zir hma chuan chutianga tih dân chu tuma’n min kawhhmuh ngai lo. Bible hi inhnialna tâwp thei lo leh ngaih dân inkalh tak awmna a ni lo tih hriat chu a hahdamthlâk ngei mai,” a ti.

Valvanera-i pawhin chutiang tho chuan a sawi. “Engkim mai chu a inmilin, thil inâwm tak a ni vek. Thilte chu ‘Kohhranin’ a dik a tih vâng mai ni lovin, awmze nei taka hrilhfiahna a awm avâng zâwkin a dik a ni,” tiin a sawi a. Jo-Anne-i chuan: “Ka zawhna neih zawng zawng Bible aṭanga chhân a ni chuan a Ziaktu ngaihsânna min neihtîr a ni—mi tin tâna inmil tûr chhânna ziak tûra hmuh lâwk theihna a neih thui êm avângin,” tiin a sawi bawk.

Jehova Thuhretute zînga mi tuemaw hriat i nei em? I neih chuan Bible zirna an neihpui dân entîr tûr che-in i lo ngên dâwn nia. Hriat i nei lo a nih erawh chuan he magazine phêk 2-naa address remchâng berah hian lehkha thawn ang che. Pathian thlarau thianghlim, rilru inhawng tak, leh Bible zirtîrtu tling tak ṭanpuina nên chuan Pathian Thu chu hriat thiam harsa lutuk a ni lo. Bible chu i hre thiam thei ngei a ni! (w09 7/1)

[Footnote]

[Phêk 8-naa bâwm/milem]

 Bible Chungchâng Zawhnate Chhânna Lungawithlâk Tak

Jehova Thuhretute’n Bible an zirpuinaa an ngaihtuah tel thu ṭhenkhat chu hêngte hi a ni.

• Leilung atâna Pathian thiltum chu eng nge ni?

• Mitthite khawiah nge an awm?

• “Ni hnuhnûngahte” kan awm em?

• Engvângin nge Pathianin hrehawm tawrhna awm a phal?

• Engtin nge chhûngkaw hlim ka siam theih ang?

[Phêk 7-naa milemte]

Bible hre thiam tûrin . . . Pathian thlarau dîlin ṭawngṭai la, rilru inhawng tak chunga chhiarin, mi dangte ṭanpuina pawm bawk ang che