Chanvo Ṭha I Chelh Tawh Ṭhîn Em? I Chelh Leh Thei Ang Em?

KRISTIAN Kohhranah mawhphurhna i chelh tawh ṭhîn em? Kohhranho rawngbâwltu emaw, upa emaw i lo ni tawh mai thei a. Hunbi kima rawngbâwlna a engemaw berah i lo tel tawh pawh a ni thei bawk. I chanvo chelhah chuan hlimna leh lungawina thûk tak pawh i lo hmuh tawh ṭhîn ngei ang; mahse, chhan emaw tak avângin i chawlhsan a ngai ta a ni.

I chanvo neih i chawlhsan chhan chu chhûngkaw enkawl a ṭûl vâng pawh a ni thei a. Kawng leh lamah chuan, kum upatna emaw, hrisêl lohna emaw avâng pawh a ni thei bawk. Chutiang vânga rawngbâwlna chanvo chawlhsan i nih chuan i hlawhchham tihna a ni lo. (1 Tim. 5:8) Kum zabi khatnaah khân, Philipa chuan missionary angin rawng a bâwl a; mahse, a hnuah chuan Kaisari khuaah awm hmun khuarin, chutah chuan a chhûngkua a enkawl a. (Tirh. 21:8, 9) Hmân lai Israel Lal Davida pawh chuan a lo tar tâkah chuan a aia lal tûrin a fapa Solomona chu a ruat a ni. (1 Lal. 1:1, 32-35) Mahse, Pathian Jehova’n Philipa leh Davida te chu a hmangaihin, a hlut reng a, tûn lai hun thlengin mite ngaihsân an hlawh a ni.

Mahse, i rawngbâwlna chanvo chu an hlihsak che pawh a ni mai thei a. Chu chu nungchang fîmkhur tâwk loh vâng a ni em? Nge chhûngkaw buaina i neih vâng zâwk? (1 Tim. 3:2, 4, 10, 12) Chutianga chanvo hlihsak i ni chu pawm harsa i tiin, tûn thleng hian i la lungni lo mai thei bawk.

Chanvo Ṭha I Nei Lêt Thei

I rawngbâwlna chanvo ṭha chân tawh chu neih lêt leh theih miah loh a ni em? Ni hran lo ve. Amaherawhchu, neih lêt leh duhna i neih a ngai a ni. (1 Tim. 3:1) Mahse, engvângin nge i duh ang? Pathian hnêna i inpumpêk chhan—Pathian Jehova leh a rawngbâwltute hmangaihna—nên a inang a ni. Chu hmangaihna chu rawngbâwlna chanvo neih lêt lehna hmanga lantîr i duh chuan, Pathian Jehova chuan chanvo i chân hma leh i chân hnua i thiltawn zawng zawngte chu a la hmang ṭangkai thei reng tho a ni.

Israel hnamte’n an phu rêng vânga rawngbâwlna chanvo hlu tak an chân hnua an hnêna Pathian Jehova thu tiam chu hre chhuak rawh. A Thu chuan heti hian a sawi: “Kei Lalpa hi ka danglam si lo, chuvângin nangni, Aw Jakoba fate u, tihboral in ni lo ve,” tiin. (Mal. 3:6) Pathian Jehova chuan Israel mite chu a hmangaih a, hman chhunzawm zêl a duh a ni. Chutiang bawkin, nang pawh hman chhunzawm che a duh a ni. Tûna i dinhmunah eng nge i tih theih? Theocratic rawngbâwlnaa i inhman theih leh theih loh chu pianpui thiamna leh theihna lam ai mahin, thlarau lama hrisêlnaah a innghat zâwk a ni. Chuvângin, kohhrana mawhphurhna dang i neih belh loh lai hian, thlarau lama chak chhoh chu tum tlat ang che.

Rinnaa ‘chak taka awm’ tûr chuan ‘LALPA leh a chakna chu i zawn’ a ngai a ni. (1 Kor. 16:13; Sâm 105:4) Chutianga i tihtheih dân kawng khat chu tih tak zeta ṭawngṭai hi a ni a. Pathian Jehova hnêna i dinhmun i hrilh pahin a chunga i rilru put dân te hrilh la, a thlarau thianghlim chu dîl ang che. Chutianga i tih chuan, Pathian Jehova chu i lo hnaih sawt ang a, chu chuan a tinghet ang che. (Sâm 62:8; Phil. 4:6, 13) Thlarau lama i chak theih dân kawng dang leh chu Pathian Thu zirna lama hmasâwn hi a ni. Tûna mawhphurhna i neih tlêm deuh lai hian, a hmaa harsa i lo tih ṭhin, mahni leh chhûngkuaa Bible zirna neih ziah nân hun tam zâwk i neih theih a rinawm hle.

 Rawngbâwlna chanvo i chelh tawh lo chung pawhin, a Thuhretu pakhat angin Pathian Jehova ai chu i la awh reng ngei mai a. (Is. 43:10-12) Tute tân pawha chanvo ṭha ber kan neih theih chu “Pathian hnathawhpuite” nih hi a ni. (1 Kor. 3:9) Thlawhhma rawngbâwlnaa inhman tam lehzual hi mahni leh kan thawhpuite thlarau lama tihchakna kawng ṭha tak a ni.

I Rilru Veizâwng Chu Thunun Rawh

Rawngbâwlna chanvo ṭha chânna chuan zahna emaw, hrehawm tihna emaw a neihtîr mai thei che a. I thiltihah insawi thiam duhna pawh i nei mai thei a ni. Mahse, mawhphurhna nei unaupate’n an ngaihthlâk hnuah che pawh i chanvo chu chelh chhunzawm lo tûra an tih tho chuan engtin nge ni ang? Lungnih lohna chu i pai zui reng mai thei a, chu chuan i rawngbâwlna chanvo i neih leh theihna tûr chu a dang thei emaw, i thiltawn aṭanga inzir a tiharsa emaw pawh a ni thei. Joba te, Manasea te, leh Josefa te thiltawn chuan mi chu lungnih lohna hmachhawn thei tûra a ṭanpui theih dân chu i lo ngaihtuah ang u.

Joba chu Pathian Jehova hmaah mi dangte ai awhin, thlahtute hun laia upate rorêlnaah upa angin a ṭhu ṭhîn a. (Job. 1:5; 29:7-17, 21-25) Tichuan, a nuna a vânglai takin a hausakna te, a fate, leh a hrisêlna te a chân a ni. Chûngte rual chuan, mi dang hmaa a hming ṭha neih pawh a hloh tel bawk a. Joba chuan: “Ka aia nauten mi nuihzat a,” tiin a sawi a ni.—Job. 30:1.

Joba chuan pawisawi miah lo nia inngaiin, Pathian hmaa insawi thiam a duh a. (Job. 13:15) Mahse, ani chuan Pathian Jehova nghah chu a inhuam a, chu chuan rah ṭha a chhuah a ni. Ani chuan a bîk takin a fiahna tawh a chhân lêt dânah zilh a ngai a ni tih a hria a ni. (Job. 40:6-8; 42:3, 6) Joba inngaihtlâwmna chuan atâwpah chuan Pathian malsâwmna nasa tak a dawntîr ta a ni.—Job. 42:10-13.

Rawngbâwlna chanvo i hloh chhan chu thil sual engemaw i tih vâng a nih chuan, Pathian Jehova leh i Kristian unaute’n an ngaidam tak zet chein, an theihnghilh theih tak tak dâwn leh dâwn loh chu i ngaihtuah mai thei. Aw le, Juda Lal Manasea chungchâng hi ngaihtuah ang che. Ani chuan “LALPA mithmuha thil ṭha lo nasa tak a tithinrim tûrin a ti ṭhîn,” a ni. (2 Lal. 21:6) Mahse, Manasea chu mi rinawm angin lal anga ro a rêl laiin a thi a ni. Chu chu engtin nge a nih?

Manasea chuan a tâwpah zilhna chu a pawm a. Vaukhânna a hnâwl hnu chuan, Jehova’n Assuria lal chu Manasea do tûrin a tîr a, ani chuan khaidiata hlîngin, ram hla tak Babulon-ah a hruai a ni. Chutah chuan, Manasea chuan “LALPA a Pathian chu a zawng a, a pi leh pute Pathian hmaah chuan nasa takin a intihnuai a. A hnênah a ṭawngṭai a.” Thinlung taka a inlamlêtna chu thiltihah a lang a, Manasea chu ngaihdam a ni ta a ni.—2 Chro. 33:12, 13.

Rawngbâwlna chanvo hloh tawhte chu vawi leh khata neih lêt nghâl theih a ni khât hle. Amaherawhchu, a hnu deuhvah chuan mawhphurhna eng emawte pêk i ni mai thei a. Chûng mawhphurhnate pawmna leh theih tâwp chhuaha i tihna chuan chanvo dang pêk belhna a thlen fo vang. I dinhmun chuan i duh anga rang leh awlsamin hma a sâwn lo mai thei a. Lunghnualnate pawh a awm thei a ni. Mahse,  inhuamna leh beih ṭâng ṭângna chuan rah ṭha tak a chhuah ang.

Jakoba fapa Josefa chu entîr nân lo hmang ta ila. Josefa chu kum 17 mi a nihin a unaute’n dik lo takin salah an hralh a. (Gen. 37:2, 26-28) Chutianga cheibâwlna chu a unaute hnên aṭangin a beisei hauh lo vang. Mahse, chûng dinhmunte hmachhawn chu a inhuam a, Jehova malsâwmnain “a pu .. inah chuan a awm” a ni. (Gen. 39:2) A hnuah chuan Josefa chu tân ina khung a ni a. Mahse, rinawm takin a awm a, Jehova chu a hnênah a awm zêl a, a tâwpah phei chuan tângho chunga hotua siam a ni hial a ni.—Gen. 39:21-23.

Josefa chuan chûng thil zawng zawngte chuan tum a nei tih rêng a hre lo. A tih theih apiang chu a ti zêl ringawt mai zâwk a ni. Chuvângin, Pathian Jehova chuan chi Thlah lo pianna tûr thlahte humhalhnaah a hman theih phah ta a ni. (Gen. 3:15; 45:5-8) Kan zînga tumah hian Josefa chanvo ang kher chang tûrah inbeisei thei lo mah ila, Pathian Jehova chhiahhlawhte chanvo chelhah hian Pathian a inrawlh zêl tih thâwk khum thu chuan a târ lang. Josefa entawnin, chanvo neih theihna kawng chu hawng reng ang che.

Thiltawn Khirh Takte Aṭanga Zirin

Joba te, Manassea te, leh Josefa te chuan thiltawn beidawnthlâk tak tak an tawng a ni. An pathum chuan Pathian Jehova’n an chunga thleng tûra a phal dinhmunte chu an pawm a, thil hlu tak an zir ṭheuh bawk a ni. I chanvo chân tâk aṭangin eng nge i zir ve theih?

Pathian Jehova’n zirtîr che a tum chu hriat tum rawh. Joba chu a beidawn êm avângin, mahni chauh a inngaihtuah ṭan a, thil pawimawh zâwk a hmuh hmaih ta a ni. Amaherawhchu, hmangaih taka Pathian Jehova siam ṭhatna chu pawmin, Joba chu a lo inbûk tâwk leh ta a: “Ka hriat loh thilte ka sawi,” tiin a sawi chhuak ta hial a ni. (Job. 42:3) Rawngbâwlna chanvo ṭha i chân avângin i rilru a na a nih chuan, ‘inngaihhlut tâwk aliama inngaihlu lovin, . . . fel takin ngaihtuah zâwk’ ang che. (Rom 12:3) Pathian Jehova chuan i hriat thiam vek kher loh kawngzâwngin siam ṭhat che a tum a ni mai thei asin.

Thununna pawm rawh. Manassea chuan atîrah chuan chutianga zilhna khauh dawng tûr khawpa thil sual tiah a inngai lo mai thei. Mahse, zilhna chu pawmin, a inlamlêt a, a thil sual tih chu a bânsan ta a ni. Zilhna i dawn chungchânga i ngaih dân chu eng pawh ni se, ‘Lalpa mithmuhin inngaitlâwm rawh, tichuan a chawimawi ang che.’—Jak. 4:10; 1 Pet. 5:6.

Dawhtheihna nei la, inhuam rawh. Josefa thiltawnte chuan huatna leh phuba lâk duhna chu âwlsam takin a neihtîr thei a. Ani chuan hriat thiamna leh zahngaihna a neih phah zâwk a ni. (Gen. 50:15-21) I lunghnual a nih chuan, dawhthei ang che. Pathian Jehova zirtîra awm chu duh bawk ang che.

Kristian kohhranah mawhphurhna i chelh tawh ṭhîn em? Pathian Jehova chu nakina mawhphurhna pe tûr chein hun remchâng pe ang che. Thlarau lamah intichak rawh. I rilru chu dawhtheihna leh inngaihtlâwmnain thunun rawh. Chanvo i chan apiang chu lâwm takin pawm rawh. Pathian Jehova chuan “dik taka awmte lakah chuan thil ṭha rêng rêng a ui lo vang,” tih chu ring tlat ang che.—Sâm 84:11. (w09 8/15)

[Phêk 25-naa thu lâk chhuah]

Tih tak zeta ṭawngṭaiin rinnaah chak takin awm rawh

[Phêk 26-naa milem]

Thlawhhma rawngbâwlnaa inhman tam lehzual hi thlarau lama mahni intih chak theihna kawng ṭha tak a ni

[Phêk 27-naa milem]

Pathian Jehova chu nakina mawhphurhna pe tûr chein hun remchâng pe ang che