Leia Chatuana Nunna—Beiseina Hmuh Chhuah Leh Chu

“Aw Daniel, thu chu thup la, . . . tâwpna hun thlengin: mi tam tak an tlân vêl ang a, hriatnate a pung dâwn a ni.”—DAN. 12:4.

1, 2. He thuziakah hian eng zawhnate nge kan ngaihtuah ang?

TUN laia mi maktaduai têlte chuan Bible ṭanchhan lei paradis-a chatuana nun beiseina chu an hre chiang hle a. (Thup. 7:9, 17) Mihringte siam an nih aṭang khân, Pathian chuan anni chu kum tlêm tê chauh nunga thi leh mai tûr ni lovin, chatuana nung tûr an nihzia a târ lang a ni.—Gen. 1:26-28.

² Adama hloh tawh hnu ṭhat famkimnaa mihringte hlân kai leh chu Israelte neih beiseinate zînga pakhat a ni a. Kristian Grik Pathian Lehkha Thu chuan Pathianin lei Paradis-a chatuana nunna mihringte neihtîr leh nâna a thil hman tûr chu a hrilhfiah a ni. A nih chuan engvângin nge mihringte beiseina chu hmuh chhuah leh a ngaih? Engtin nge chu chu laih lan a nih a, mi maktaduai têlte hnêna hriattîr a nih?

Beiseina Khuh Bo Chu

3. Mihringte neih leia chatuan nun beiseina khuh bo a ni chu engvângin nge mak kan tih loh?

³ Isua chuan zâwlnei derte’n a zirtîrna tikhawlovin, mi tam tak chu an hruai bo vang tih a sawi lâwk a. (Mt. 24:11) Tirhkoh Petera chuan Kristiante chu: “In zîngah pawh zirtîrtu derte an la awm ang,” tiin a vaukhân a ni. (2 Pet. 2:1) Tirhkoh Paula pawhin mite’n “zirtîrna dik an ngaih peih loh hun” leh ‘an bengte a zat avânga anmahni duhzâwng anga zirtîrtute an hnêna an khâwm zâwk hun’ a lo thlen tûr chungchâng a sawi bawk. (2 Tim. 4:3, 4) Setana chuan mite hruai sualin, mihring leh leilung tâna Pathian thiltum duhawm tak chungchânga thutak khuh bo tûrin Kristianna kal pêng chu a hmang a ni.—2 Korinth 4:3, 4 chhiar rawh.

4. Sakhaw hruaitu kal pêngte chuan mihringte tâna beiseina eng nge an hnâwl?

⁴ Bible chuan Pathian Ram chu mihringte din chawp rorêlna zawng zawng tikeh sawm a, tiboraltu tûr vân sawrkârna a ni tih a hrilhfiah a. (Dan. 2:44) Krista kum sâng rorêl chhûngin, Setana chu lei lâwtah khung a ni ang a, mitthite chu kaihthawhleh an niin, mihringte chu leiah hian ṭhat famkimnaa hlân kai an ni ang. (Thup. 20:1-3, 6, 12; 21:1-4) Amaherawhchu, Kristianna rama sakhaw hruaitu kal pêngte chuan ngaih dân dang chu pawmin, an zirtîrnaah an telh a. Entîr nân, kum zabi thumnaa Alexandria khaw chhuak Church Father Origen-a chuan Kum Sâng Rorêlnain a thlen tûr lei lam malsâwmna ringtute chu a sawisêl a ni. Hippo khaw chhuak, Catholic theologian Augustine-a (354-430 C.E.) chuan “kum sâng rorêlna a awm lo tih ngaih dân chu a thlâwp” tiin, The Catholic Encyclopedia chuan a sawi. *

5, 6. Engvângin nge Origen-a leh Augustine-a chuan kum sâng rorêlna zirtîrna chu an dodâl?

⁵ Engvângin nge Origen-a leh Augustine-a chuan kum sâng rorêlna zirtîrna chu an dodâl? Origen-a chu Grik thurochhiah aṭanga thlarau thi thei lo tih ngaih dân pawmtu Alexandria khaw chhuak Clement-a hnêna zir chhuak a ni a. Thlarau chungchânga Plato-a ngaih dânin a thunun hneh êm avângin, Origen-a chuan “Plato zirtîrna aṭanga a lâk thlarau leh  a chunga thilthleng chungchânga ngaih dân chu Kristian thurin nên a chawhpawlh” tih theologian Werner Jaeger-a chuan a sawi. Chuti chuan, Origen-a chuan Kum Sâng rorêlnain a rawn thlen tûr malsâwmnate chu lei lama thleng tûr ni lovin, thlarau rama thleng tûr a ni zâwk tiin a zirtîr ta hial a ni.

⁶ Kum 33 mi a niha “Kristiana” a inleh hmain, Augustine-a chu Neoplatonist an tih mai, kum zabi thumnaa Plotinus-a siam ṭhat chhoh Plato-a philosophy ringtu a lo ni tawh a. Kristiana a inleh hnuah pawh, tûn hmaa a rinna chu a la chhawm zêl a ni. “Ani chu Thuthlung Thar sakhuana [Kristianna] leh Grik mi fing Plato-a zirtîrna chawh pawlhtu ber a ni,” tiin The New Encyclopædia Britannica chuan a sawi. The Catholic Encyclopedia pawhin, Augustine-a chuan Thu Puan bung 20-a târ lan Kum Sâng Rorêlna chu thil dang entîrna ang lek niin a hrilhfiah tih a sawi bawk. “Chu hrilhfiahna chu Khaw Thlang lama theologian-ho chuan an rawn chhawm chho zêl a, a tîra leia kum sâng rorêlna rinna chuan thlâwp pawh a hlawh ta lo a ni,” tiin a sawi zawm bawk a ni.

7. Eng rinna dik lo takin nge he leia mihringte chatuana nun beiseina chu luahlân tial tial a, engtin nge a luahlan?

⁷ Mihringte beisei leia chatuana nunna chu hmân lai Babulon-a lâr tak, tûna khawvêl puma darh ta ngaih dân—mihringin taksa luah mai maitu thlarau thi thei lo a nei tih ngaih dân—chuan a luahlân ta tial tial a. Kristianna ramin chu ngaih dân a chhawm tâkah chuan, theologian-te chuan Bible-a vân lam beiseina târ lante chu mi ṭha apiang vân ram kal tûra zirtîrna nia lang tûrin an vei herh ta a ni. Chu thlîr dân aṭang chuan, mi leia a nunna chu vâna nun a phu leh phu loh enchhin lawkna mai a ni a. Chutiang deuh chu Judate neih leia chatuana nun beiseina chungah pawh a thleng a ni. Judate’n Grik mite thurin, thlarau thi thei lo ngaih dân chu zawi zawia an lo chhawm tâkah chuan, atîra an beisei leia chatuana nunna chu a lo chuai ta. Mihringte awm dân tûr chungchânga Bible sawi dân lakah chuan a va dang lam ta êm! Bible chuan mihringte chu thlarau ni lovin, tisa nei thil siam an ni a. Pathian Jehova chuan mihring hmasa ber hnênah: “Vaivut i ni,” tiin a hrilh a ni. (Gen. 3:19) Mihringte chatuan in tûr chu vân ni lovin, leilung hi a ni.—Sâm 104:5; 115:16 chhiar rawh.

Thim Zîngah Thutak A Eng Chhuak

8. Kum 1600 chho bâwr vêla mi thiam ṭhenkhatte’n mihringte beiseina chungchângah eng nge an sawi?

⁸ Kristiana inchhâl sakhaw zawng zawng deuh thaw chuan leia chatuana nun beiseina chu zirtîr lo mah se, Setana chuan thutak a khuh bo reng thei lo. Hun kal tawhahte khân, ngun taka Bible chhiartu mi tlêm tête chuan Pathianin mihringte ṭhat famkimna a neih lêttîr dân tûr ṭhenkhat hre thiamin, thutak êng chu an lo hmu a. (Sâm 97:11; Mt. 7:13, 14; 13:37-39) Kum 1600 chho bâwr vêl khân, Bible lehlin leh chhut chhuah a nihna chuan Bible chu awlsam taka hmuh theihin a siam a ni. Kum 1651-ah, mi thiam pakhat chuan mihringte’n Adama avânga “Paradis leh Leia Chatuana Nunna an chân” avângin, Krista-ah chuan “mi zawng zawng chu Leia nuntîr tûr a ni; chutilochuan a inbûk tâwk thei lo vang,”  tiin a ziak a. (1 Korinth 15:21, 22 chhiar rawh.) Sâp hla phuah thiam hming thang takte zînga pakhat, John Milton-a (1608-1674) chuan paradis hloh a nih thu sawina, Paradise Lost tih leh chu mi chhun zawmna paradis neih lêtna tihna, Paradise Regained tih chu a phuah a. Chutah chuan Milton-a chuan mi rinawmte’n lei paradis-a an lâwmman dawn tûr chungchâng a târ lang a ni. Milton-a chuan Bible zir nân a hun tam tak hmang mah se, Bible thutak chu Krista lo awmna hun hma loh chuan hriat fiah vek theih a ni dâwn lo tih a hria a ni.

9, 10. (a) Engtin nge Isaac Newton-a chuan mihringte beiseina chungchâng a lo ziah? (b) Engvângin nge Newton-a chuan Krista lo awmna hun chu lo thleng lawk lo tûr nia a hriat?

⁹ Chhiarkawp thiam hming thang Sir Isaac Newton-a (1642-1727) pawhin Bible chu a ngaihven hle a. Ani chuan mi thianghlimte chu vân nunna chang tûra kaihthawh an ni ang a, hmuh theih lohvin Krista nên ro an rêl ang tih a hre thiam a. (Thup. 5:9, 10) Chu Lalram khua leh tuite chungchângah, ani chuan: “Phuba lâkna nî zawhah pawh mihringte’n lei hi kum 1000 chhûng atân mai ni lovin, chatuan atân an luah zêl ang,” tiin a ziak a ni.

¹⁰ Newton-a chuan Krista lo awmna chu kum zabi engemaw zât hnu daiha lo awm tûr niin a hria a. “Newton-a’n Pathian ram lo thleng lawk lo tûra a ngaih chhan pakhat chu, Trinity zirtîrna pawmtute kal pênna nasa tak hual vêla a awmnain a tihlungngaih êm vâng a ni,” tiin hmân lai thilthleng chanchin zir mi Stephen Snobelen-a chuan a sawi. Chanchin ṭha chu khuh bo a la ni cheu va. Newton-a chuan chanchin ṭha hril thei tûr Kristiana inchhâl pâwl pakhat mah a hmu lo bawk. Heti hian a ziak a ni: “Daniela leh [Thu Puan bua chhinchhiah] Johana hrilh lâwknate chu tâwpna hun a lo thlen hma loh chuan hriat thiam a ni lo vang,” tiin. Newton-a chuan heti hian a hrilhfiah bawk: “Daniela chuan, ‘Tichuan, mi tam tak an tlân vêl ang a, hriatnate a pung ang’ a ti a. Hrehawmna nasa tak leh khawvêl tâwpna a lo thlen hmain Chanchin Ṭha chu hnam zawng zawng hnêna hrilh tûr a ni si a. Hrehawmna nasa tak a lo thlen hmaa Chanchin Ṭha hrilh chhuah a nih chauh loh chuan, chu mi aṭanga chhuak tûmkau kengtu mipui tam takte chu chhiarsên loh khawpa tam an ni thei lo vang,” tiin.—Dan. 12:4; Mt. 24:14; Thup. 7:9, 10.

11. Milton-a leh Newton-a te hun lai khân, engvângin nge mihringte beiseina chu mi tam takte tân khuh bo a nih?

¹¹ Milton-a leh Newton-a te hun lai khân, sakhaw thurin ber kalhzâwnga ngaih dân sawi chhuah chu a hlauhawm hle a. Chuvângin, Bible chungchânga an thil zir chîk tam takte chu an thih hnuah chauh tihchhuah a ni rêng a ni. Kum zabi 16-naa thleng Siam Ṭhatna (Reformation) chuan thlarau thi thei lo zirtîrna chu a siam ṭha lo va, Protestant kohhran lian tam tak chuan Augustine-a ngaih dân, Kum Sâng Rorêlna chu nakina thleng tûr ni lovin, thilthleng tawh a ni tih chu an zirtîr zawm ta zêl a ni. Tâwpna hunah chuan hriatna chu a pung em?

“Hriatnate A Pung Dâwn A Ni”

12. Hriatna dik chu eng huna pung tûr nge a nih?

¹² “Tâwpna hun” chungchângah, Daniela chuan hmasâwnna ṭha tak pakhat chu a sawi lâwk a. (Daniela 12: 3, 4, 9, 10 chhiar rawh.) “Chu mi hunah chuan mi felte chu . . . ni angin an êng tawh ang,” tiin Isua chuan a sawi a ni. (Mt. 13:43) Engtin nge tâwpna hunah hian hriatna dik chu a pun? Tâwpna inṭanna hun, kum 1914 a thlen hma kum sâwm bi têl chhûnga thilthleng ṭhenkhat chu i lo ngaihtuah ang u.

13. Charles Taze Russell-a chuan mihring ṭhat famkimna neih lêt lehna chungchâng a zir chian hnuah eng nge a ziah?

¹³ Kum 1800 chawhnu lam khân, tih tak zeta Bible chîktu mi tlêm tête chuan “thu dik dân” hriatthiamna chu an zawng a. (2 Tim. 1:13) Chûng zînga pakhat chu Charles Taze Russell-a a ni a. Kum 1870 khân amah leh thutak zawngtu mi dang tlêm tête chuan Bible zir-hona chi khat an din a. Kum 1872-ah chuan mihring ṭhat famkimna neih lêt lehna chungchâng chu an zir chiang a. A hnuah, Russell-a chuan: “Chutih lai thleng chuan tûna fiahna tâwk mêk kohhranho lâwmman dawn tûr leh khawvêla mi rinawmte lâwmman dawn tûr danglamna chu kan hre chiang lo,” tiin a ziak.  Khawvêla mi rinawmte lâwmman dawn tûr chu “anmahni thlahtu leh chhûngkaw lû ber Adama’n Eden huana a lo neih ṭhat famkimna neih lêt leh” chu a ni ang. Russell-a chuan a Bible zirnaah mi dangte’n an ṭanpui tih a sawi a ni. Chûng mite chu tute nge an nih?

14. (a) Engtin nge Henry Dunn-a chuan Tirhkohte 3:21 thu hi a hriat thiam? (b) Dunn-a chuan tute nge leia chatuana nung tûra a sawi?

¹⁴ An zînga pakhat chu Henry Dunn-a a ni a. Ani chuan ‘engkim siamṭhat tûr thu Pathianin leilung pian tirh ata a zâwlnei thianghlim awmte kaa a sawi tawh’ chungchâng a ziak a. (Tirh. 3:21) Dunn-a chuan chu siam ṭhat lehnaah chuan Krista Kum Sâng Rorêl chhûnga leia mihringte ṭhat famkimnaa hlân chhohna a tel tih a hria a ni. Dunn-a chuan mi tam takte tibuaitu zawhna: Leiah hian tute’n nge chatuana nun chên ang? tih chu a zir chiang bawk a. Ani chuan mi maktaduai tam takte chu an lo tho leh ang a, thutak zirtîr an ni ang a, Krista rin theihna hun ṭha pêk leh an ni ang tiin, a hrilhfiah a ni.

15. George Storrs-a chuan thawhlehna chungchâng eng nge a hriat thiam?

¹⁵ Kum 1870-ah chuan, George Storrs-a pawhin mi fel lote chu chatuana nun theih beiseina neiin an lo tho leh ang tih chu a rawn hre thiam a. Ani chuan mitthi tho lehte’n chu an hun remchâng neih chu an chhân lêt ṭhat loh chuan “‘mi sual kum za chauh dam’ pawh ni se a thi ang,” tih chu Bible aṭangin a hre thiam bawk a ni. (Is. 65:20) Storrs-a chu Brooklyn, New York-ah khawsain, Bible Examiner tih magazine chu tihchhuah a nih hmain a lo endik ṭhîn a ni.

16. Engin nge Bible Zirlaite chu Kristianna Ram laka tihrang nalh?

¹⁶ Russell-a chuan Bible aṭangin chanchin ṭha puan darh hun a ni tih a hre thiam a. Chuvângin, kum 1879-ah, Zion’s Watch Tower and Herald of Christ’s Presence, tûna Vênnainsâng Jehova Lalram Puanchhuahna tia koh tâk chu a chhuah ṭan a ni. Tûn hma chuan, mihringte beiseina chungchânga thudik chu mi tlêm tê chauhvin an hre thiam a; mahse, tûnah chuan ram tam taka Bible Zirlaite chuanVênnainsâng chu dawngin, an zir ta a. Mi tlêm tê chauh vânah an kal ang a, mi maktaduai tam takte erawh chu leiah nun ṭha famkim pêk an ni ang tih thurin chuan Bible Zirlaite chu Kristianna ram sakhaw tam zâwkte lakah a tihrang nalh a ni.

17. Engtin nge hriatna dik chu a lo pun?

 ¹⁷ Sawi lâwk “tâwpna hun” chu kum 1914 khân a inṭan a. Mihringte beiseina chungchânga hriatna dik chu a pung em? (Dan. 12:4) Kum 1913 khân, Russell-a thusawite chu chanchinbu 2,000-ah chhut chhuah a niin, mi 15,000,000 laiin an chhiar a ni. Kum 1914 tâwp lamah chuan, Krista Kum Sâng Rorêlna chungchâng hrilhfiahna lem che thei leh che thei lova siam “Photo-Drama of Creation” tih film chu khawmualpui pathuma mi 9,000,000 chuang chuan an en a. Kum 1918 aṭanga 1925 thlengin, Jehova chhiahhlawhte chuan leia chatuana nun beiseina hrilhfiahtu “Tûna Nung Mi Maktaduai Tam Takte Chuan Thihna An Tem Lo Vang,” tih thupui hmanga thusawi chu khawvêl pumah ṭawng 30 chuangin an sawi a. Kum 1934 vêlah Jehova Thuhretute chuan leia chatuana nun beiseitute’n baptisma an chang tûr a ni tih an hre thiam a ni. Chu hriatthiamna chuan anni chu Lalram chanchin ṭha hril tûra ṭhahnemngaihna a neih thartîr a. Tûn laiah, leia chatuana nun beiseina chuan mi maktaduai tam takte thinlung chu Pathian Jehova chunga lâwmnain a tikhat a ni.

‘Zalênna Ropui’ A Hnai!

18, 19. Isaia 65:21-25-ah eng ang nun nge sawi lâwk a nih?

¹⁸ Zâwlnei Isaia chu Pathian mite’n leia an neih tûr nun chungchâng ziak tûra thlarauva thâwk khum a ni a. (Isaia 65:21-25 chhiar rawh.) Kum 2,700 lai kal ta, Isaia’n chûng thute a ziak laia thing ṭhenkhat chu tûn thleng pawha a la dam a rinawm hle. Chakna leh hrisêlna ṭha tak nei chunga chutiang chen dam tûr chuan i in mitthla thei em?

¹⁹ Nun chuan hun tâwi tê chhûng ni lovin, inte sa a, huante siam a, thil tharte zir thei tûrin hun remchâng min pe kumkhua dâwn a ni. Inṭhianna i siam theih tûrte chu han ngaihtuah bawk teh. Chûng inlaichînna duhawm takte chu chatuan thlengin a ṭhang chho zêl ang. Chu mi huna ‘Pathian fate’n’ leia an neih tûr ‘zalênna chu a va ropui’ dâwn êm!—Rom 8:21. (w09 8/15)

[Footnote]

Kan Hrilhfiah Thei Em?

• Engtin nge mihringte leia nun beiseina chu khuh bo a nih?

• Kum 1600 chho bâwr vêl khân, Bible chhiartu ṭhenkhatte’n eng hriatthiamna nge an neih?

• Kum 1914 a lo hnaih chuan engtin nge mihringte beiseina dik tak chu a lo lan chian?

• Engtin nge lei lam beiseina chungchâng hriatna chu a lo pun?

[Zirlai Atâna Zawhnate]

[Phêk 19-naa milemte]

Hla phuah thiam John Milton-a (vei lam) leh chhiarkawp thiam Isaac Newton-a (ding lam) te chuan leia chatuana nun beiseina chungchâng an hria

[Phêk 21-naa milemte]

Bible Zirlai hmasate chuan Bible aṭangin mihringte beiseina dik tak chu khawvêl puma puan chhuah hun a ni tih an hria