“Pathian Hmangaihnaah Chuan Invawng Ṭha Rawh”
“Pathian Hmangaihnaah Chuan Invawng Ṭha Rawh”
“Chatuan nunna neihtîrna khawp kan Lalpa Isua Krista khawngaihna chu nghâk chungin, Pathian hmangaihnaah chuan invawng ṭha rawh u.”—JUD. 21.
1, 2. Engtin nge Pathian Jehova’n min hmangaihna a lantîr a, engtin nge a hmangaihnaa min vawng reng tûrin kan inring ngawt tûr a ni lo tih kan hriat theih?
PATHIAN JEHOVA chuan kawng tam takin min hmangaihzia a lantîr a. Mahse, min hmangaihzia finfiahna chiang ber chu tlanna inthâwina min pêk hi a ni tih rinhlelh rual a ni lo. Mihringte a hmangaihna a nasat êm avângin kan aia thi tûrin a Fapa duh tak chu he leiah hian a rawn tîr hial a ni. (Joh. 3:16) Pathian Jehova’n chutianga a tih chhan chu chatuana kan nun leh a hmangaihna chatuana kan hlâwkpui a duh vâng a ni.
2 Mahse, eng ang duhthlanna pawh siam ila, Jehova chuan a hmangaihnaa min vawng reng tûrin kan ring ngawt thei ang em? Thei lo vang. Juda 21-ah he fuihna thu: “Chatuan nunna neihtîrna khawp kan Lalpa Isua Krista khawngaihna chu nghâk chungin, Pathian hmangaihnaah chuan invawng ṭha rawh u,” tih hi kan chhiar avângin. “Pathian hmangaihnaah chuan invawng ṭha rawh u,” tih thu hian keimahni lamah tih tûr ṭhenkhat a awm tih a târ lang a. A nih chuan, Pathian hmangaihnaa invawng ṭha tûrin eng nge kan tih ngai?
Engtin Nge Pathian Hmangaihnaa Kan Invawn Ṭhat Theih Ang?
3. Isua’n a Pa hmangaihnaa invawng ṭha tûrin eng nge pawimawh a tih?
3 A chhânna chu he leia a awm tâwp zâna Isua thusawiah ngei chuan kan hmu a. Ani chuan: “Nangnin ka thupêkte in zawm chuan ka hmangaihin in awm reng ang; keiin ka Pa thupêkte ka zâwm a, a hmangaihin ka awm reng ang bawk hian,” a ti. (Joh. 15:10) Isua chuan a Pa, Jehova nêna inlaichînna ṭha neih nân a thupêkte zawm chu a pawimawh tih a hre chiang hle. Pathian Fapa ṭha famkim tân mah chutianga Pathian thupêkte zawm a pawimawh a nih chuan, kan tân pawh a pawimawh hle dâwn lâwm ni?
4, 5. (a) Pathian Jehova kan hmangaihna chu eng kawngin nge kan lantîr deuh ber? (b) Engvângin nge Jehova thupêkte âwih loh chhan tûr emaw, hnâwl chhan tûr emaw kan neih loh?
4 Pathian Jehova kan hmangaihna chu thu âwihna hmangin kan lantîr deuh ber a. Tirhkoh Johana chuan heti hian a sawi: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tiin. (1 Joh. 5:3) Thuâwihna chu tûn lai khawvêlah hian a lâr lo ngei mai. Mahse, he thu: “A thupêkte chu a khirh si lo va,” tih hi lo chhinchhiah ta ila. Pathian Jehova chuan kan tâna thil harsa lutuk tûr chu min phût lo a ni.
5 Entîr nân: I ṭhian duh tak chu thil rit tak, a chawi kân theih loh tûr tih i hriat reng chu i chawitîr ang em? I chawitîr lo tawp ang! Jehova chu keimahni aia ngilnei zâwk leh kan tlin tâwkte hre zâwk a ni a. Bible chuan Pathian Jehova’n ‘vaivut mai kan ni tih a hria,’ tih min hrilh a ni. (Sâm 103:14) Kan tih theih tâwk bâk chu min phût ngai lo vang. Chuvâng chuan Jehova thupêkte kan âwih duh loh chhan tûr emaw, kan hnâwl chhan tûr emaw a awm lo. Chu ai mah chuan, thu âwihna chu a nihna ang takin, kan Pa vâna mi kan hmangaih tak zetzia leh a hmangaihnaa invawn ṭhat kan duhzia lantîr theihna hun remchâng ṭha tak angin kan pawm tlat zâwk a ni.
Pathian Jehova Thilpêk Hlu Tak
6, 7. (a) Chhia leh ṭha hriatna chu eng nge ni? (b) Pathian hmangaihnaa invawng ṭha tûra chhia leh ṭha hriatnain min ṭanpui theih dân entîrna pe rawh.
6 Khawvêl buai tak kâra chêng kan ni a, Pathian hnêna kan thu âwihna nêna inzawmna nei thu tlûkna siam tûr tam tak kan nei a ni. Chûng thu tlûkna kan siamte chu Pathian duhzâwng nên a inmil tih engtin nge kan chian theih ang? Pathian Jehova chuan thu âwihna chungchânga nasa taka min ṭanpuitu tûr thilpêk min pe a. Chu chu chhia leh ṭha hriatna a ni. Eng nge chhia leh ṭha hriatna chu? Chu chu mahni nihna inhriatna danglam bîk tak a ni a. Nuna kan hmachhawn duh thlan tûrte min hmuhtîr theitu emaw, kan thiltih tawhte ngaihtuah lêt a, a ṭha emaw, ṭha lo emaw; a dik emaw, dik lo emaw min bûktîrtu a ni a, chhûng lama rorêltu ang mai a ni.—Rom 2:13-16 chhiar rawh.
7 Eng kawngin nge kan chhia leh ṭha hriatna chu kan hman ṭangkai theih? Entîrna pakhat lo ngaihtuah ta ila. Kea zin mi pakhat chuan thlalêr ram zau tak a pal tlang a. Mi dang kalna hnu hma hmuh tûr a awm lo va, kawng bîk a awm loh bâkah kalna tûr kawng kawhhmuhna a awm hek lo. Mahse, a tum ram chu a pan zêl a ni. Engtin nge a pan theih? Ani chuan chhim leh hmâr kâwktu, compass an tih chu a neih vâng a ni a. Chu chuan chhim leh hmar, leh chak leh thlang chhinchhiahna leh eng lai pawha hmâr lam kâwktu thir zum tê a nei a ni. Chu compass tel lo chuan, kawng a bo chiang ngei ang. Chutiang bawkin, chhia leh ṭha hriatna nei lo chu nuna thu tlûkna siam tûrte a hma chhawn hunah kawng a bo ṭhîn ang.
8, 9. (a) Kan chhia leh ṭha hriatna tlin tâwk chungchângah eng nge rilrua kan vawn reng ngai? (b) Kan chhia leh ṭha hriatna chu kan tâna a ṭangkai tak zet theih nân eng nge kan tih ang?
8 Mahse, kan chhia leh ṭha hriatna chuan compass ang bawkin tlin tâwk a nei a. Kea zin mi chuan a compass bulah thîrhîpthei dah ta se chuan, hmâr lam kâwktu thîr zum tê chuan hmun dang a kâwk daih mai ang. Chutiang bawkin, kan thinlung duhzâwngin kan thu tlûkna siam tûrte a thunun chuan, eng nge thleng ang? Mahni hmasialna chuan kan chhia leh ṭha hriatna a tikhaw lo thei a ni. Bible chuan “thinlung hi thil zawng zawng aiin bumhmang ber, chhe lailet dêr a ni,” tiin min vaukhân a ni. (Jer. 17: 9; Thuf. 4:23) Chu bâkah, kea zin mi chuan, map dik leh rin tlâk a neih loh chuan a compass chu a ṭangkaipui vak lo vang a, a chhiatpui hial thei bawk ang. Chutiang bawkin, Pathian Thu, Bible kaihhruaina chiang tak leh inthlâk danglam ngai lova kan innghah loh chuan, kan chhia leh ṭha hriatna chu kan ṭangkaipui lo vang. (Sâm 119:105) Lungchhiatthlâk takin, he khawvêla mi tam takte hian Pathian Thua tehnate chu an ngaihsak mang meuh lo emaw, an ngaihsak lo hulhual emaw a, chutih laiin, an thinlung duhzâwng erawh chu an dah pawimawh hle thung a. (Ephesi 4:17-19 chhiar rawh.) Chuvâng chuan a ni, mi tam takin chhia leh ṭha hriatna nei reng chunga thil râpthlâk tak takte an tih ṭhin ni.—1 Tim. 4:1, 2.
9 Chutiang nih ngai loh chu kan tum tlat tûr a ni a. Chu ai mah chuan, kan chhia leh ṭha hriatna chu kan hman ṭangkai tak zet theih nân, Pathian Thu kaihhruaitîrin, i zirtîr zâwk ang u. Mahni hmasialna inchîm buaitîr ai chuan, Bible zirtîr kan chhia leh ṭha hriatna milin thil kan tih a ngai a. Chutih rual chuan, kan thlarau lam unau duh takte chhia leh ṭha hriatna zahsak pawh kan tum tlat bawk tûr a ni. Kan unaute chhia leh ṭha hriatna chu keimahni chhia leh ṭha hriatna aiin a derthâwng zâwk emaw, thiltih phal loh a ngah zâwk emaw thei a ni tih hre rengin, anmahni tihtlûk loh chu kan tum tlat a ni.—1 Kor. 8:12; 2 Kor. 4:2; 1 Pet. 3:16.
10. Tûnah chuan eng nun kawng pêng pathumte nge kan sawiho vang?
10 Tûnah chuan nun kawng pêng pathuma thu âwihna hmanga Jehova kan hmangaihna lantîr theih dân i lo ngaihtuah ang u. A pathumah hian chhia leh ṭha hriatna chuan hmun a chang ngei mai a; mahse, kan chhia leh ṭha hriatna chu thlarauva thâwk khum Bible-a nungchang tehnate kaihhruaia a awm a ngai a ni. Thu âwihna hmanga Jehova kan hmangaihzia kan lantîr dân kawng thumte chu: (1) Jehova’n a hmangaihte kan hmangaihna, (2) thu neitute zahna kan lantîrna, leh (3) Pathian mithmuha thianghlim kan tum tlatna te a ni.
Jehova’n A Hmangaihte Hmangaih Rawh
11. Engvângin nge Pathian Jehova’n a hmangaihte chu kan hmangaih ve ang?
11 A hmasain, Jehova’n a hmangaihte kan hmangaih ve tûr a ni. Ṭhian kawm chungchângah chuan nawhfê thâwp (sponge) ang kan ni a. Kan bul hnaia awm thil eng pawh kan hîp duh mai ṭhîn a ni. Min Siamtu chuan mi ṭha famkim lote tân, ṭhian kawm a hlauhawmzia—leh a ṭangkaizia—chu a hria a. Chuvâng chuan, he fuihna thu fing tak: “Mi fing pâwl la, i lo fing ang a, mi â pâwl erawh chu hrehawm tuar phahna a ni,” tih hi min pe a ni. (Thuf. 13:20; 1 Kor. 15:33) Tumahin ‘hrehawm tawrh’ chu kan duh lo. “Mi fing” nih erawh kan duh ṭheuh a ni. Jehova chu tûn aia fing zâwka siam theih a ni lo va, tuma tihchhiat theih lah a ni hek lo. Chutichung pawhin, ṭhian kawm chungchângah entawn tûr duhawm tak min hnutchhiah a ni. Hei hi han ngaihtuah teh—mihring ṭha famkim lote zînga tute nge Pathian Jehova’n ṭhian atâna a thlan?.
12. Eng ang mite nge Pathian Jehova’n ṭhian atâna a thlan?
12 Pathian Jehova chuan thlahtu Abrahama chu “ka ṭhian” tiin a ko va. (Is. 41:8) Abrahama chu mi rinawm tak, fel tak, leh thu âwih tak—leh rinna nei mi a ni. (Jak. 2:21-23) Chutiang mi chu a ni, Jehova’n a ṭhian atâna a thlan chu. Tûn laiah pawh chutiang mi chu ṭhian atân a thlang a ni. Pathian Jehova mahin chutiang mite chu ṭhian atâna a thlan chuan, keini pawhin kan lo fin phahna tûra ṭhian kawm tûr ṭha taka kan thlan chu a pawimawh hle a ni lâwm ni?
13. Engin nge ṭhian kawm tûr dik thlang tûra min ṭanpui thei?
13 He mi chungchângah hian duh thlanna ṭha siam tûrin engin nge ṭanpui thei che? Bible-a entîrnate zirna chuan a ṭanpui thei dâwn che a ni. Ruthi leh a pasala nu, Naomi inkâra inṭhianna te; Davida leh Jonathana inkâra inṭhianna te; a nih loh leh Timothea leh Paula inkâra inṭhianna te chu ngaihtuah rawh. (Rut. 1:16, 17; 1 Sam. 23:16-18; Phil. 2:19-22) Eng dang zawng aiin, an inṭhianna awmtîrtu chu hei hi a ni: Pathian Jehova hmangaihna dik tak an nei ṭheuh hi. Pathian Jehova i hmangaih ang tluka hmangaih ve ṭhian i hmu thei em? Kristian kohhran chu chutiang ṭhian tûr âwmte hmuh theihna hmun a ni tih ring tlat rawh. Chutiang ṭhiante chu thlarau lama hrehawm i tawrh phahna tûr an ni lo vang. Chu ai mah chuan, Pathian Jehova thu âwih tûr te, amah nêna in inlaichînna ti ṭha sauh tûr te, leh thlarau lama theh tûr tein an ṭanpui zâwk ang che a. (Galatia 6:7, 8 chhiar rawh.) Pathian hmangaihnaa invawng ṭha reng tûrin an ṭanpui ang che.
Thu Neitute Chu Zah Rawh
14. Eng thilte’n nge kan tân thu neitute chunga zahna lantîr tiharsa ṭhîn?
14 Jehova kan hmangaihna lantîr dân kawng hnihnaah chuan thuneihna a tel a. Thu neitute zahna kan lantîr tûr a ni. Engvângin nge chutianga zahna lantîr chu harsa tih hle châng kan neih? A chhan pakhat chu, thu neihna chelh mihringte an ṭhat famkim loh vâng a ni. Chu bâkah, keini ngei pawh hi ṭha famkim kan ni bîk lo. Kan pianpui hel duhna rilru chu kan chai reng a ni.
15, 16. (a) Engvângin nge Pathian Jehova’n a mite enkawl tûra mawhphurhna a pêk mihring ṭha famkim lote kan zah chu thil pawimawh tak a nih? (b) Mosia chunga Israel mite phunnawina chungchâng Pathian Jehova thlîr dân aṭangin eng thil hlu tak nge kan zir?
15 Chuti chu, ‘Kan tân thu neihna zah chu a harsa hle a nih chuan, engvângin nge kan zah kher a ngaih?’ tiin i ngaihtuah mai thei a. A chhânna chuan lal chungnunna nên inkûngkaihna a nei a ni. I chunga lal chungnungber, rorêltu ber atân tunge i thlan ang? Pathian Jehova chu kan Lal chungnungber atân kan thlang a nih chuan, a thu neihna chu kan zah a ngai a. Kan zah loh chuan, amah chu kan chunga Rorêltu ni tûrin kan thlang kan ti thei tak zet ang em? Chu bâkah, Pathian Jehova chuan a mite enkawl tûra mawhphurhna a pêk mihring ṭha famkim lote kal tlangin a thu neihna chu a hmang tlângpui ṭhîn a. Chûng mite laka kan hel chuan, engtin nge Pathian Jehova’n kan thiltihte chu a ngaih ang?—1 Thessalonika 5:12, 13 chhiar rawh.
16 Entîr nân, Israel mite Mosia chunga an phunnawi khân, Pathian Jehova chuan an helna thiltihte chu a chunga tih ang maiin a ngai a. (Num. 14:26, 27) Pathian chu a inthlâk danglam lo. Thu neihna a pêkte laka kan hel chuan, a chunga hel kan ni ang!
17. Kristian kohhrana mawhphurhna chelhtute chungah eng rilru put hmang nei tûrin nge kan thawh rim ang?
17 Tirhkoh Paula chuan Kristian kohhrana mawhphurhna chelhtute chunga neih tûr rilru put hmang dik chu a târ lang a. Ani chuan: “In hotute thu âwih ula, an thu thuin awm rawh u; chanchin sawi tûr an nih avângin, lungngai chunga sawi lova, hlim chunga an sawi theihna tûrin in thlarau an vênsak ṭhîn che u a ni; lungngai chunga sawi chu in tâna pawi tûr a ni si a,” tiin a ziak a ni. (Heb. 13:17) He thu âwihna leh an thu thua awmna, a nih loh leh intukluhna rilru nei tûr hian, kan thawh rim hle a ngai ngei mai a. Mahse, Pathian hmangaihnaa invawng ṭha tûra thawk kan ni tih i hre reng ang u. Chu chuan kan thawh rim hle a phu a ni lâwm ni?
Pathian Jehova Mithmuhah Thianghlim Reng Rawh
18. Engvângin nge Pathian Jehova’n kan thianghlim reng a duh?
18 Pathian Jehova kan hmangaihna lantîr theih dân kawng thumna chu a mithmuha thianghlim reng kan tum tlat hi a ni. Nu leh pate chuan a tlângpui thuin an fate tithianghlim tûr, a nih loh leh tifai tûrin theih tâwp an chhuah ṭhîn. Engvângin nge? Kawng khatah chuan, faina chu naupang hrisêl nân leh ṭhat nân a pawimawh a. Chu bâkah, naupang fai chuan a nu leh pate hmangaihna leh ngaihsakna a dawnzia a târ langin, chhûngkua a chawimawi a ni. Pathian Jehova’n thianghlim tûra min duh chhan pawh chu chutiang vâng tho chu a ni a. Ani chuan thianghlimna chu kan ṭhatna tûrin a pawimawh tih a hria a ni. Kan thianghlimna chuan amah, kan Pa vâna mi hming chu a ti ṭha tih a hre bawk. Mite’n he khawvêl bawlhhlawh tak kâra kan danglamna an hmuh avânga Pathian rawngbâwl an duh mai theih avângin, chutianga thianghlim taka kan awm chu thil pawimawh tak a ni.
19. Engtin nge taksa thianghlimna chu a pawimawh tih kan hriat?
19 Eng kawngahte nge kan thianghlim reng a ngaih? Dik takin, kan nun kawng engkima kan thianghlim a ngai a ni. Hmân lai Israel ramah khân, Pathian Jehova chuan a mite chu taksa lama an thianghlim a pawimawhzia a tilang chiang a. (Lev. 15:31) Mosia Dânah chuan zunram thiar chungchâng te, bungbêl tihfai te, leh kut ke sil leh thawmhnaw sûk chungchângte a tel a ni. (Ex. 30:17-21; Lev. 11:32; Num. 19:17-20; Deut. 23:13, 14) Israelte hnênah chuan an Pathian, Jehova chu a thianghlim tih hriat nawntîr a ni a, chu mi awmzia chu a ‘faiin,’ a ‘bawlhhlawh lo’ tihna a ni. Pathian thianghlim chhiahhlawhte chu amah ang bawkin an thianghlim ve tûr a ni.—Leviticus 11:44, 45 chhiar rawh.
20. Eng kawngahte nge kan thianghlim reng a ngaih?
20 A nih chuan, chhûng lam leh pâwn lamah pawh kan thianghlim a ngai a. Ngaihtuahna thianghlim neih chu kan tum tlat a ni. Mipat hmeichhiatna lama nungchang tlâk hniamna khawvêlin min hual vêl mah se, Pathian Jehova nungchang thianghlim tehnate rinawm takin kan zâwm tlat a. A pawimawh berah, Pathian kan biakna chu kan vawng thianghlim tlat a, biakna dik lo tihbawlhhlawhna rêng rêng chu kan pumpelh a ni. Isaia 52:11-a chhinchhiah thâwk khum vaukhânna thu: “Chhuak rawh u, chhuak rawh u, chuta ṭang chuan chhuak rawh u, thil bawlhhlawh rêng rêng dek suh u; a chhûng ata kal chhuak rawh u; . . . thianghlim takin awm rawh u,” tih chu kan hre reng ṭhîn. Tûn laiah, kan Pa vâna miin sakhaw dik lo anga a thlîrte chu dek pawh dek hlek lovin, thlarau lamah thianghlim takin kan awm a ni. Chu mi avâng chuan, entîr nân, tûn laiah khawvêla lâr êm êm, sakhaw dik lo kût nî leh nî serhahte chuan kan tel lo. Thianghlimna vawn chu thil harsa a ni ngei mai. Mahse, Pathian Jehova mite chuan thianghlim taka an awmnain Pathian hmangaihnaa invawng ṭha tûra a ṭanpui avângin, chutianga awm chu an tum tlat a ni.
21. Engtin nge Pathian hmangaihnaa kan invawn ṭhat reng theih?
21 Pathian Jehova chuan a hmangaihnaa chatuana kan invawn ṭhat chu a duh a. Mahse, kan vai hian Pathian hmangaihnaa invawng ṭha reng tûr chuan theih tâwp kan chhuah a ngai a ni. Chu chu Isua entawn tûr siam zuina hmangin leh Pathian Jehova thupêkte zâwma Amah kan hmangaihzia târ lanna hmangin kan ti thei a ni. Chutianga kan tih chuan, engmahin “kan Lalpa Krista Isuaa awm Pathian hmangaihna ata chu mi ṭhen thei lo vang” tih kan chiang thei a ni.—Rom 8:38, 39. (w09 8/15)
Kan Hre Chhuak Em?
• Engtin nge kan chhia leh ṭha hriatna chuan Pathian hmangaihnaa invawng ṭha tûra min ṭanpui theih?
• Engvângin nge Pathian Jehova’n a hmangaihte chu kan hmangaih ve ang?
• Engvângin nge thu neitute zah chu thil pawimawh tak a nih?
• Pathian mite tân thianghlimna chu eng ang taka pawimawh nge a nih?
[Zirlai Atâna Zawhnate]
[Phêk 30-naa bâwm/milem]
Nungchang Ṭha Awmtirtu Lehkhabu Chu
Kum 2008/2009 district inkhâwmpuiah khân, Pathian hmangaihnaa invawng ṭha tûra fuihna “Keep Yourselves in God’s Love” tih lehkhabu phêk 224 nei chu tlângzarh a ni a. Chu lehkhabu buatsaih a nih chhan chu eng nge ni? Kristiante’n Pathian Jehova tehnate, a bîk takin nungchang lama a tehnate an hriat a, an ngainat theih nâna ṭanpuitu atâna buatsaih a ni. “Keep Yourselves in God’s Love” tih lehkhabu ṭha taka zirna chuan Pathian Jehova tehnate mila nun chu tûn atâna nun kawng ṭha ber a ni tih leh nakina chatuana nunnaa min hruaitu a ni tih kan rinna chu a tinghet sauh vang.
Chu bâkah, he lehkhabu hi Pathian Jehova thu âwih chu phurrit a ni lo tih hre thiam tûra min ṭanpuitu atâna buatsaih a ni a. Pathian Jehova hnêna amah kan hmangaihna a nasatzia kan târ lan theihna kawng a ni zâwk mah a ni. Chuvângin, he lehkhabu hian, ‘Engvângin nge Pathian Jehova thu ka âwih?’ tia mahni inzâwt tûrin min chêttîr ang.
Lungchhiatthlâk taka mi tu emawin Pathian Jehova hmangaihna a kalsan hian, thurin chungchâng vâng ni lovin, nungchang ṭhat lohna vâng a ni tlângpui ṭhîn. Chuvângin, kan nî tin nuna min kaihruaitu, Pathian Jehova dân leh thu bulte kan hmangaihna leh hlutna kan tihpun deuh deuh chu a va pawimawh tak êm! He lehkhabu thar hian khawvêl puma Jehova berâmte chu thil ṭhaa ding nghet tûr te, Setana chu dâwtpa a nihzia finfiah tûr te, leh thil pawimawh berah Pathian hmangaihnaa invawng ṭha reng tûr tein a ṭanpui ang tih kan ring tlat a ni.—Juda 21.
[Phêk 28-naa milem]
“Nangnin ka thupêkte in zawm chuan ka hmangaihin in awm reng ang; keiin ka Pa thupêkte ka zâwm a, a hmangaihin ka awm reng ang bawk hian”