Pathian Hnaih Rawh

Jehova Chuan Thuhnuairawlhna A Ngaihlu

Number 12:1-15

CHAPONA, îtsîkna, tumsânna. Hêng miziate hi he khawvêla hlawhtlingte zîngah hmuh tûr a tam hle a. Mahse, chûng miziate chuan Pathian Jehova min hnaihtîr em? Hnaihtîr lo ve, Pathian Jehova chuan amah betute thuhnuairawlhna chu a ngaihlu zâwk a ni. Chutiang a nihzia chu, Number bung 12-a awm thuziak aṭangin kan hmu thei a. Chu thuziak chu Israelte Aigupta aṭanga chhan chhuah an nih hnu, Sinai thlalêra thil thleng chungchâng a ni.

Miriami leh Arona te chuan an nau Mosia chu “an sawichhia a.” (Châng 1) Anni chuan Mosia hnênah sawi mai lovin, amah an sawichhia a ni; chu chu mi dang hnênah an thehdarh a nih ngei a rinawm. A hming sawi hmasak Miriami chu Mosia sawichhiatnaa hma hruaitu niin a lang. Chu phunnawina a lo chhuah chhan hmasa ber chu Mosia’n Kus hmeichhia nupuia a neih vâng a ni. Miriami chuan hmeichhe dang, Israela fanu pawh ni hlei lo hian a aia ngaihsak a hlawh zâwk a hlauh vâng a ni thei ang em?

Chu phunnawina chuan chhan thûk zâwk pawh a nei a. Miriami leh Arona chuan: “Mosia hnênah chauh hian em ni LALPAN thu a sawi bik? Keini hnênah pawh hian a sawi ve lo vem ni?” an ti a. (Châng 2) Chu phunnawina awm chhan ber chu thuneihna neih lehzual a, challan lehzual duh vâng a ni thei ang em?

Chu thuziakah chuan, Mosia’n a chunga phunnawina a chhân lêt thu a lang lo. Sawichhiatna chu ngawi rengin a tuar mai niin a lang. A dawhtheihna chuan Bible-in ani chu lei chunga “mihring zawng zawnga zaidam lâwtlak,” a nih loh leh thuhnuairawlh ber tia a sawi chu a nemnghet a ni. * (Châng 3) Mosia tân thiamthu sawi a ngai lo. Pathian Jehova’n an thusawi chu ngaithlain, Mosia chu a rawn chhan a ni.

Pathian Jehova chuan chu phunnawina chu ama chunga phunnawi angin a ngai a ni. Mosia chu ama ruat ngei a ni si a. Phunnawitute chu hauvin, Pathian chuan Mosia nêna inlaichînna danglam bîk tak an neihzia a hriattîr a ni: “Ani nên zawng ṭawngkain . . . kan inbia,” tiin. Tichuan, Pathian Jehova chuan Miriami leh Arona hnênah chuan: “Chuvângin . . . Mosia hi engtiziaa sawichhe ngam nge in nih?” tiin a zâwt a ni. (Châng 8) A nihna takah chuan, Mosia sawichhia chu Pathian sawichhia an ni tlat. Chutiang zah lohna nasa tak avâng chuan Pathian thinurna an tâwk ngei ang.

Phunnawinaa hma hruaitu anga lang, Miriami chu a phâr ta a. Arona chuan Mosia hnênah Miriami tâna Pathian ngaihdamna dîlsak tûrin a ngên nghâl a. Han ngaihtuah teh—Miriami ṭhat chhuah lehna tûr chu an sawichhiat tâk Mosia ngaihdam dîlsaknaah chauh a innghat ta a nih chu! Mosia chuan Arona ngen ang ngeiin, thuhnuairawlh takin a dîlsak ta a. Chu mi chungchânga a ṭawng hmasak berah, Mosia chuan a farnu tân Pathian Jehova hnênah tih tak zetin a ṭawngṭaisak a ni. Miriami chu tihdamin a awm a; mahse, ni sarih chhûng zahthlâk taka daipâwna a awm a ngai ta a ni.

He thu hian, Pathian Jehova ngaihhlutzâwng mizia leh a huatzâwng miziate hriatthiamna min pe a. Pathian hnaih kan duh chuan chapona te, îtsîkna te, leh tumsânna mizia kan neih engpawh chu paih bo kan tum tlat tûr a ni. Pathian Jehova chuan thuhnuairawlhte chu a hmangaih si a. Ani chuan: “Thuhnuairawlhte erawh chuan ram hi an luah ang a, remna chênin an hmuingîl ang,” tiin a tiam a ni.—Sâm 37:11; Jakoba 4:6. (w09 8/1)

[Footnote]