Krista Hmangaihna Chuan Hmangaihna Lantir Turin Min Chettir
Krista Hmangaihna Chuan Hmangaihna Lantir Turin Min Chettir
“Isuan . . . amaha mi khawvêla awm a hmangaih ṭhinte chu a tâwp thleng pawhin a hmangaih reng a.”—JOH. 13:1
1, 2. (a) Engtin nge Isua hmangaihna lantîr chu a lan sarh bîk? (b) He thuziakah hian hmangaihna hmêlhmang engte nge kan sawiho vang?
ISUA chuan hmangaihna chungchângah entawn tûr ṭha famkim a siam a. A ṭawngkam te, a nungchang te, a zirtîrna te, leh inthawina atâna a thihna te—a chungchâng engkim mai chuan a hmangaihna chu a târ lang a ni. He leia a nun tâwp thleng ṭhakin, Isua chuan a mi tawhte chungah, a bîk takin a zirtîrte chungah hmangaihna a lantîr a ni.
2 Hmangaihna chungchânga Isua entawn tûr siam langsâr tak chuan a zirtîrte zui tûr tehna sâng tak a siam a. Chu chuan thlarau lama kan unaute leh mi dang zawng zawngte chunga hmangaihna lantîr ve tûrin min chêttîr bawk a ni. He thuziakah hian, thil sual khûnkhân tak pawh tiamin, thil sual titute chunga Isua hmangaihna lantîrna aṭanga kohhran upate thil zir theih chu kan ngaihtuah ang a. Krista neih ang hmangaihnain Kristiante chu sum leh pai lama harsatna, leilung chhiatna, leh hrisêl lohna hmachhawntu an unaute ṭanpui tûra a chêttîr dân kan sawiho bawk ang.
3. Petera chuan tlin lohna nasa tak a nei chung pawhin engtin nge Isua’n a cheibâwl?
3 Isua chu a thih hma zân khân, a tirhkohte zînga mi ngei Petera chuan vawi thum ngawt a phatsan a. (Mk. 14:66-72) Mahse, Isua sawi lâwk ang ngeia Petera chu a rawn hawikîr leh chuan a lo ngaidam a. A hnênah mawhphurhna sâng tak a pe hial a ni. (Lk. 22:32; Tirh. 2:14; 8:14-17; 10:44, 45) Tlin lohna nasa tak neite chunga Isua rilru put hmang aṭangin eng nge kan zir theih?
Thil Sual Titute Chungah Krista Rilru Put Hmang Ang Lantir Rawh
4. Eng dinhmun hnuaiah nge a bîk taka Krista rilru put hmang ang lantîr ngai?
4 Krista rilru put hmang ang lantîr a ṭûlna dinhmun tam tak awmte zînga a hrehawm ber chu chhûngkua emaw, kohhran emawa miin thil sual khûnkhân tak an tih hmachhawn hi a ni. Lungchhiatthlâk takin, Setana awpna ni hnuhnûng vâwrtâwp a thlen dâwn hnaih hian, khawvêl thlarau chuan nungchang lamah nghawng ṭha lo a nei thûk tawlh tawlh a ni. Khawvêl nungchang ṭhat lohna leh pawisak lohna rilru chuan tupawh a hneh thei a, kawngka zîma kal an tum tlatna chu zawi zawiin a tireh thei a ni. Kum zabi khatnaah khân, ṭhenkhat chu Kristian kohhran aṭanga hnawhchhuah an ni a, ṭhenkhat chu zilh an ni bawk a. Tûn laiah pawh chutiang bawk chu a ni. (1 Kor. 5:11-13; 1 Tim. 5:20) Amaherawhchu, chûng dinhmunte chingfeltu upate’n Krista neih ang hmangaihna an lantîr hian, chu chuan thil sual titu chungah nghawng thui tak a nei thei a ni.
5. Engtin nge upate chuan thil sual titute chunga Krista rilru put hmang chu an entawn ang?
5 Isua ang bawkin, upate chuan engtik lai pawhin Pathian Jehova tehna felte an kengkawh tlat tûr a ni a. Chutianga tiin Pathian Jehova thuhnuairawlhna te, ngilneihna te, leh hmangaihna te an lantîr a ni. Mi chuan a sim tak zet a, a thil sual tih avânga ‘thinlunga lungchhe tak’ leh ‘rilrua inchhir taka’ a awm chuan, upate tân ‘thuhnuairawlh taka tun din leh’ chu thil harsa a ni lo vang. (Sâm 34:18; Gal. 6:1) Mahse, a thil sual tih pawiti vak lo emaw, pawiti lo hulhual emawtu mi luhlul tak chu eng anga tih tûr nge ni ang?
6. Upate’n thil sual titute an dâwrnaah eng nge an pumpelh ang a, engvângin nge?
6 Thil sual tituin Pathian Lehkha Thu aṭanga zilhna a pawm lo emaw, a thil sual tih mi dangte a mawhpuh emaw chuan upate leh mi dangte chu an thin a ur pawh a ni thei a. A thil sual tihin pawi a khawih tawhzia hre rengin, anni chuan a thiltih leh a rilru put hmang chungchânga an ngaih dân sawi chhuah mai chu an châk mai thei. Mahse, thinurna chuan chhiatna a thlen a, “Krista rilru” a lantîr lo. (1 Kor. 2:16; Jakoba 1:19, 20 chhiar rawh.) Isua chuan a hun laia mi ṭhenkhat chu hriat sual theih hauh loh tûr ṭawngkamin a hau ngei mai; mahse, mi a huat vâng emaw, mi rilru tihnat nân emawin thu a sawi ngai lo. (1 Pet. 2:23) Chutih ahnêkin, thil sual titute tân inchhîrna leh Pathian duhsakna neih lêt leh theihna kawng chu a hawng zâwk a ni. Ni e, khawvêla Isua lo kal chhan ber pawh “mi sualte chhandam tûrin” a ni si a.—1 Tim. 1:15.
7, 8. Judicial chungchânga rorêlnaah upate chu engin nge kaihhruai ang?
7 Engtin nge he mi chungchânga Isua entawn tûr siam chuan kohhrana zilh ngaite chunga kan rilru put dân tûr chu a thunun ang? Kohhran chhûnga judicial action la tûra Bible kaihhruaina chuan berâmte a vênghim a, thil sual titu zilhna tâwk pawh chu inlam lêt tûrin a chêttîr thei tih hre reng ang che. (2 Kor. 2:6-8) Ṭhenkhat an inlam lêt duh loh avânga hnawhchhuah an ngai chu a lungchhiatthlâk hle rualin, an zînga a tam zâwk chu a hnuah Pathian Jehova leh a kohhran lamah an lo kîr leh tih hriat chu a lâwmawm hle thung. Upate’n Krista rilru put hmang ang an lantîr hian, chu chuan thil sual titu tân a nun kawng chhût ngun leh a tâwpa lo kîr leh chu a tiawlsam sawt a ni. Nakinah chuan, chûng thil sual ti inlam lêt lehte chuan upate’n Pathian Lehkha Thu fuihna an lo pêk zawng zawngte chu an hre reng kher lo pawh a ni thei; mahse, upate’n zahawm tak leh hmangaih taka an cheibâwl dân chu an hre reng ngei ang.
8 Chuvângin, upate chuan thil sual tituin Bible zilhna a pawm loh hunah pawh “thlarau rah,” a bîk takin Krista neih ang hmangaihna chu an lantîr tûr a ni. (Gal. 5:22, 23) Thil sual titu chu kohhran aṭanga hnawhchhuah an hmanhmawh lutuk tûr a ni lo va. Anni chuan thil sual titute chu Pathian Jehova hnêna an lo kîrleh an duhzia an lantîr tûr a ni. Tichuan, mi tam takte ang bawka thil sual titu chu a inlam lêt hun chuan, Pathian Jehova chungah leh kohhrana kîr leh tiawlsamtu, ‘mihringte hnêna thil pêkte’ chungah a lâwm hle thei ang.—Eph. 4:8, 11-13.
Tâwpna Hunah Hian Krista Neih Ang Hmangaihna Lantîrin
9. Isua’n a zirtîrte a hmangaihzia târ langtu entîrna pe rawh.
9 Luka chuan Isua hmangaihna târ langtu thilthleng langsâr tak pakhat a chhinchhiah a. Rom sipaite’n chungpikna Jerusalem khawpui chu an hual ang a, tlân chhuah theih miah lohvin an siam dâwn tih a hriat avângin, Isua chuan a zirtîrte chu: “Sipaihoten Jerusalem khua an hual in hmuh hunah, a boral dâwn tih hria ang che u,” tiin hmangaih takin a vaukhân a. Eng nge an tih ang? Isua chuan kaihhruaina fiah leh chiang tak chu a pe lâwk a. “Chutih hunah chuan Judai rama awmte chu tlângahte tlân bo rawh se; a chhûnga awmte chuan chhuahsan rawh se; rama awmte chu a chhûngah lût suh se. Chûng nî chu phuba lâk nî a ni e, thu an ziak zawng zawng a lo thlen theihna tûrin,” tih chu. (Lk. 21:20-22) C.E. 66-a Rom sipaiin Jerusalem an hual hnu chuan, thu âwihte chuan chûng kaihhruainate chu an zâwm a ni.
10, 11. Kristian hmasate Jerusalem aṭanga an tlân chhuah chungchâng ngaihtuahna chuan “hrehawm nasa tak” atâna kan inbuatsaihnaah engtin nge min ṭanpui theih?
10 Jerusalem aṭanga an tlân chhuah lai chuan, Kristiante tân Krista’n an chunga a lantîr ang bawk hmangaihna an inlantîr tawn chu a ngai a. An thil neih apiangte an rin tlân zêl a ngai a ni. Mahse, Isua hrilh lâwkna chuan hmân lai khawpui tihchhiatna bâkah thlen famkimna ropui zâwk pawh a nei a. Heti hian a sawi lâwk a ni: “Hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a awm leh tawh hek lo vang,” tiin. (Mt. 24:17, 18, 21) Kan hmaa “hrehawm nasa tak” a thlen hma leh a thlen chhûngin, keini pawhin harsatna leh retheihna kan tawng mai thei a. Krista rilru put hmang ang neihna chuan chûngte tuar chhuak thei tûrin min ṭanpui ang.
11 Chu tih hunah chuan, Isua entawn tûr siam zuia mahni hmasial lo hmangaihna kan lantîr a ngai ang. He mi chungchângah hian, Paula chuan: “Mahni vêngte tihsâwt nân an ṭhatna tûrin tihlâwm i tum ṭheuh ang u; Krista pawh chuan mahni lâwmna a zawng si lo. . . . Chhelna leh thlamuanna Pathian chuan Krista Isua sawi angin rilru hmun khat pu tawnin [“Krista Isua neih ang rilru put hmang neiin,” NW] awmtîr che u rawh se,” tiin fuihna min pe a ni.—Rom 15:2, 3, 5, 6.
12. Eng ang hmangaihna nge tûnah kan neih ngai a, engvâng nge?
12 Isua hmangaihna dawngtu Petera pawhin Kristiante chu “unaute hmangaih tak tak” tûr leh ‘thutak zâwm’ tûrin a fuih a. Anni chu ‘ṭhahnemngai takin an inhmangaih tawn’ tûr a ni. (1 Pet. 1:22) Tûn laiah hian, chutiang Krista neih ang miziate kan neih chu tûn hma zawng aiin a pawimawh zâwk a. Pathian mi zawng zawngte chunga nêksâwrna chu a nasa chho mêk tawh a. Tumahin he khawvêl thil engah mah hian an rinna an nghat tûr a ni lo. Innghahna tlâk a nih lohzia chu tûn hnai lawka sum leh pai lama khawvêl tlâk chhiatnain fiah takin a târ lang a ni. (1 Johana 2:15-17 chhiar rawh.) Khawvêl thila rinna nghah ahnêkin, he khawvêl tâwpna a hnaih zêl rual hian, kohhranah ṭhian ṭha siam a, Pathian Jehova leh unaute nêna kan inhnaih deuh deuh chu a ngai a ni. Paula chuan: “Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula,” tiin min fuih a ni. (Rom 12:10) Petera pawhin heti hian a sawi belh a ni: “Eng dang zawng aiin inhmangaih tawn uar rawh u; hmangaihnain sual tam tak a khuh si ṭhîn a,” tiin.—1 Pet. 4:8.
13-15. Engtin nge unau ṭhenkhatin chhiatna a thlen hnuah Krista neih ang hmangaihna an lantîr?
13 Khawvêl pumah hian, Jehova Thuhretute chu Krista neih ang hmangaihna lantîrtute anga hriat an ni a. Kum 2005-a United States chhim lam hurricane thlipuiin a nuai chhiat vak ṭuma ṭanpuina pe tûra tlâwmngaia inpe Thuhretute hi han ngaihtuah teh. Isua entawn tûr siamin a chêttîr avângin, mi 20,000 aia tam chuan mahni in nuam tak leh hna ṭha tak chelhte kalsanin, an unau chhiat tâwkte ṭanpui tûrin an inpe a ni.
14 Hmun khatah phei chuan, thlipui avânga tui lian chuan khawmual lam mêl 50 chin chu fit 30 laia sângin a chîm a. Tui a han kam meuh chuan, chu mi huam chhûnga chênna in leh in dang awm zawng zawngte hmun thuma ṭhena hmun khat chu a chhe fai vek a ni. Ram hrang hrang aṭanga tlâwmngaia inpe Thuhretute chuan an thiamna te, hmanrua te, leh insakna bungrua te rawn thawh chhuahpuiin, a ṭul apiang thawh chu an inhuam a ni. Pianpui unau pahnih, hmeithai ve vete chuan an unaute ṭanpui tûrin an bungruate chu pickup truck-ah hlângin, mêl 2,000 chuang lai an khalh a. A pakhat zâwk chu tûn thlenga la awm rengin, tual chhûng chhiatna tuarte chhawmdâwltu pâwl a la ṭanpui zêl a, regular pioneer a thawk pah bawk a ni.
15 Chu mi hmuna Thuhretute leh mi dangte in 5,600 chuang chu sak ṭhat emaw, siam ṭhatsak emaw a ni. Engtin nge tualchhûng Thuhretute chuan chu hmangaihna nasa tak chu an lo dawn sawn? A in a chhiat vek avângin unaunu pakhat chu nawrsawn theih in tetaktê, a chung phui lovah chuan a insawn a, chaw chhumna stove chhe tawh tak chu a hmang a ni. Unaute chuan in pângngai tak, nuam tak pakhat chu an saksak a. Unaunu chu a in thar, fel fai tak kawtah chuan dingin, Pathian Jehova leh a unaute chunga a lâwm avângin a ṭap ta hial a ni. An in leh lo kalsan ngai tualchhûng Thuhretu tam takte chuan an in thar sak zawh a nih hnuah pawh kum khat emaw, a aia rei emaw chu in sawn lût lovin an awm a ni. Engvângin nge? Chhawndâwlna hna thawktute’n an in thar an hman zêl theih nân a ni. Krista rilru put hmang ang lantîrna kawnga entawn tûr ṭha a va ni êm!
Dam Lote Chungah Krista Rilru Put Hmang Ang Lantîrin
16, 17. Eng kawngin nge dam lote chungah Krista neih ang rilru put hmang chu kan lantîr theih?
16 Kan zîngah hian leilung chhiatna lian tham tâwk kan tam vak lo vang. Mahse, mi tin deuh thaw hian anmahni emaw, an chhûngte emaw hrisêl lohna chu an hmachhawn a ni. Dam lote chunga Isua rilru put hmang chu kan tân entawn tûr ṭha a ni. A hmangaihna chuan anmahni chu khawngaih tûrin a chêttîr a. Mite’n a hnêna dam lote an rawn hruaiin, “dam lo zawng zawngte chu a tidam” a ni.—Mt. 8:16; 14:14.
17 Tûn laiah, Kristiante chuan Isua neih ang mak taka mite tihdam theihna chu an nei lo va; mahse, dam lote chunga Isua khawngaihna rilru put hmang ang chu an ṭâwmpui a ni. Chu chu eng anga târ lan nge a nih? A nih dân kawng khat chu, upate chuan Matthaia 25:39, 40-a târ lan thiltiha lang thu bul chu zuiin, kohhrana dam lote ṭanpui tûrin ruahmanna an siam a, chu ṭanpuina chu pêk ngei a nih nân an bawhzui bawk a, chutiang chuan Krista rilru ang an neihzia an târ lang a ni. * (Chhiar rawh.)
18. Engtin nge unaunu pahnihte chuan unaunu pakhat chunga hmangaihna dik tak an lantîr a, chu chuan eng nge a rah chhuah?
18 Mi dangte chunga thil ṭha ti tûrin mi chu upa a nih kher a ngai lo ngei mai. Kum 44 mi cancer natna vei a, nî sâwm chauh dam tûra hrilh Charlene-i chungchâng hi han ngaihtuah teh. Ṭanpui a mamawh tih leh a enkawltu a pasal rimzia an hmuh chuan, kohhrana unaunu pahnih Sharon-i leh Nicolette-i chu a hun tâwp chhûng zawng enkawl tûrin an inpe chawt mai a. Chawlhkâr ruk lai a dam tâkah pawh chuan, unaunute chuan a thih thlengin hmangaihna an lantîr a ni. Shoron-i chuan: “Mi tuemaw a dam chhuak dâwn lo tih hriat chu tawrh thiam a har hle. Mahse, Jehova chuan min tichak a. Kan thiltawn hian Pathian Jehova leh unaute min hnaih zualtîr a ni,” a ti. Charlene-i pasal chuan: “Hêng unaunu duh tak pahnihte ngilneihna leh ṭanpuina ṭangkai tak hi ka theihnghilh ngai hauh lo vang. An rilru put hmang thianghlim leh ṭha tak chuan ka nupui rinawm tak Charlene-i tâna he fiahna hnuhnûng ber hi tawrh a tiawlsam zual a, ka mamawh êm êm taksa lam leh rilru lama hahdamna chu min pe a ni. Chatuanin an chungah ka lâwm reng ang. An inpêkna chuan Pathian Jehova ka rinna a tichakin, kan unauho ka hmangaihna a tizual sawt a ni,” tiin a sawi a ni.
19, 20. (a) Krista rilru put hmang chi nga engte nge kan zir? (b) Eng tih nge kan tum tlat ang?
19 He thuziak inzawm pathumah hian, Isua rilru put hmang chi nga leh amah anga thil kan tih a, kan ngaihtuah theih dân chu kan zir tawh a. Isua angin “thuhnuairawlh leh rilrua inngaitlâwm tak” i ni ve ang u. (Mt. 11:29) Mi dangte chu an ṭhat famkim lohna leh tlin lohna chiang taka a lan hunah pawh, ngilnei taka cheibâwl chu i tum tlat bawk ang u. Fiahna hnuaiah pawh Pathian Jehova thil phût zawng zawngte chu huaisen takin i zâwm ang u.
20 A tâwp berah chuan, Krista’n ‘a tâwp thleng pawha’ a hmangaih angin, unau zawng zawngte chungah Krista neih ang hmangaihna i lantîr ve ang u. Chutiang hmangaihna chuan Isua hnungzuitu dik tak kan nihzia a finfiah si a. (Joh. 13:1, 34, 35) Ni e, “unau inhmangaihna hi awm zêl rawh se.” (Heb. 13:1) Chu hmangaihna chu lantîr lovin awm suh! I nun chu Pathian Jehova chawimawi nân leh mi dangte ṭanpui nân hmang rawh! Tichuan, Pathian Jehova’n i thawhrimna chu mal a sâwm ngei ang. (w09 9/15)
[Footnote]
^ par. 17 Vênnainsâng, October 15, 1986 (English) chhuak, “Ṭawngkama: ‘Lum Tak Leh Puar Takin Awm Rawh’ Tih Aia Tam Ti Rawh” tih thuziak chu en rawh.
Kan Hrilhfiah Thei Em?
• Engtin nge upate chuan thil sual titu chungah Krista rilru put hmang ang an lantîr theih?
• Engvângin nge he tâwpna hunah hian Krista hmangaihna entawn chu a pawimawh bîk?
• Engtin nge dam lote chungah Krista rilru put hmang ang chu kan lantîr theih?
[Zirlai Atâna Zawhnate]
[Phêk 20-naa milem]
Upate chuan thil sual titute Pathian Jehova hnêna an lo kîr leh chu an duh
[Phêk 21-naa milem]
Engtin nge Jerusalem chhuahsantu Kristiante chuan Krista rilru put hmang ang an lantîr?
[Phêk 22-naa milem]
Jehova Thuhretute chu Krista neih ang hmangaihna lantîrtute anga hriat an ni