Sakhaw Dik Chuan Unau Inhmangaihna A Awmtîr

“HMANGAIHNA nei lo chuan Pathian a hre lo; Pathian chu hmangaihna a ni si a,” tiin Bible chuan a sawi a. (1 Johana 4:8) Chuvângin, sakhaw dik chuan unau inhmangaihna a awmtîr tûr a ni.

Sakhaw tam tak chuan damlo te, tar te, leh mi rethei te enkawl chungchângah hna a thawk ṭha êm êm a. A mi leh sate pawh: “Tupawhin khawvêl sum neiin a unau tlachhamin hmu sela, ani chu lainat si suh sela, Pathian hmangaihna chu amahah engtin nge a awm ang? Naute u, thu chauhvin i hmangaih suh ang u khai, lei chauhvin i hmangaih suh ang u, thiltih leh tih tak zetin ni zâwk rawh se,” tih tirhkoh Johana thu hi zâwm tûrin a fuih bawk a ni.—1 Johana 3:17, 18.

Mahse, hnamte an indo hian eng thil nge thleng ṭhîn? “Nangmah i inhmangaih angin i vêngte pawh i hmangaih tûr a ni” tih Pathian thupêk hi, inrem hun lai chauhva hman a, politician emaw, lal emawin ṭhenawm ram do a tum huna hman loh mai tûr a ni em?—Matthaia 22:39.

Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti a. (Johana 13:35) A hnuaia zawhnate hi i chhân pahin heti hian inzâwt rawh, ‘He sakhua hian ṭawngkam chauh ni lo, thiltih pawhin mi zawng zawng chungah engtik lai pawhin hmangaihna a lantîr em?’ tiin.

THUPUI: Indona.

BIBLE-IN A ZIRTIR CHU: Isua chuan a zirtîrte chu: “Kei erawh chuan ka hrilh a che u, In hmêlmate chu hmangaih ula, a tiduhdahtu che u chu ṭawngṭaisak rawh u,” tiin thu a pe.—Matthaia 5:44.

Isua man tûra sipaiho an rawn kal khân, tirhkoh Petera chuan lo hum nân a khandaih a phawi a. Mahse, Isua chuan: “I khandaih kha a dahnaah dah leh rawh, khandaih ruaitute zawng zawng chu khandaih vêkah an thi dâwn si a,” tiin a hrilh a ni.—Matthaia 26:52.

Tirhkoh Johana chuan heti hian a ziak: “He miah hian Pathian fate leh Diabola fate a hriat a ni; tupawh felna ti lo chu Pathiana chhuak a ni lo, a unau hmangaih lova pawh chu Pathiana chhuak a ni hek lo. Hei hi atîr ata thuchah in hriat kha a ni si a, kan inhmangaih tawn ṭheuh tûr a ni, tih hi; Kaina, misual laka mi, mahni unau thattu ang khân awm lovin,” tiin.—1 Johana 3:10-12.

 ZAWHNA: He sakhua hian a mi leh sate chu indonaa tel tûrin a fuih em?

THUPUI: Politics.

BIBLE-IN A ZIRTIR CHU: Isua thilmak tihtheihzia an hmuh hnu chuan, ṭhenkhat chuan tualchhûng politics-a tel tûrin an duh a. Engtin nge a chhân lêt? “Lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a.”—Johana 6:15.

Isua chu man a nih a, sawrkâr do tûra mite thunun anga dik lo taka puh a nih khân: “Ka ram chu he khawvêla mi hi a ni lo; ka ram chu he khawvêla mi hi ni sela, ka ṭhuihruaiten an bei ang, Judate hnêna pêka ka awm loh nân; nimahsela ka ram zawng heta mi hi a ni lo,” tiin a chhâng a ni.—Johana 18:36.

Zirtîrte chungchânga Pathian hnêna a ṭawngṭainaah Isua chuan: “I thu an hnênah ka pe ta e; tin, khawvêlin anni chu an hua a, khawvêla mi an nih loh avângin, kei khawvêla mi ka ni lo ang bawk hian,” tiin a sawi.—Johana 17:14.

ZAWHNA: He sakhua hian, politician ṭhenkhatte huat a hlawh phah dâwn hunah pawh Isua entawn tûr siam chu zuiin politics-a inhnamhnawih loh chu a tum tlat em?

THUPUI: Thlei bîk neihna.

BIBLE-IN A ZIRTIR CHU: Juda mi ni lo serh tan lote Kristiana an lo inleh khân, tirhkoh Petera chuan: “Pathianin mi duhsak bîk a nei lo tih dik takin ka hria e; nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tiin a sawi.—Tirhkohte 10:34, 35.

Kum zabi khatnaa Kristiante hnêna lehkha a thawnnaah Jakoba chuan: “Ka unaute u, kan Lalpa Isua Krista, Ropuina Lalpa chu ring chungin, mi thlei bîk nei suh u. In inkhâwmna inah mi rangkachak zungbun bun, puan mawi tak sin lo lût sela, tin, mi rethei puan chhe tak sin lo lût bawk sela; tin, puan mawi tak sin chu in ngaihsak a, a hnênah chuan, ‘Nang he hmun ṭhaah hian ṭhu rawh,’ in ti a, tin, mi rethei hnênah chuan, ‘Nang chu sawtah sâwn ding la, a nih loh leh ka ke nghahchhan hrûlah hian ṭhu rawh,’ in tih chuan, in rilruah thlei bîk neiin ngaihtuahna sual pua sawisêltute in lo ni dâwn lâwm ni?” tiin a ziak a ni.—Jakoba 2:1-4.

ZAWHNA: He sakhua hian mi zawng zawng chu Pathian mithmuhah an intluk vek tih leh a mi leh sate chu hnam emaw, sum leh pai dinhmun emaw azira tumah thliar hrang lo tûrin a zirtîr em? (w09 8/1)

[Phêk 6-naa thu lâk chhuah]

Eng sakhuain nge a mi leh sate chu politics-a inhnamhnawih lo tûr te, hnam te, leh sum leh pai dinhmun te hmanga thliar hrang lo tûra zirtîr?