Sakhua Zawng Zawng A Dik Vek Em?

Sakhaw hrang tam tak awmna khawvêlah kan chêng a. Tûn hnai maia zir chianna chuan khawvêl pumah hian sakhaw pâwl lian deuh deuh 19 leh pâwl tê 10,000 vêl awm niin a târ lang. Chûng chuan mite hnênah tûn hma zawng aia nasain sakhaw duh thlan tûr a pe a ni. Chuti chu, i sakhaw thlan chuan i tân kawngro a su em?

Mi ṭhenkhat chuan sakhaw hrang hrangte chu tlâng chhîp thlen theihna kawng chi hrang hrang ang niin an sawi a. An tân chuan eng kawng pawhin tlâng chhîp a pawh ṭheuh avângin, an kawng thlan chuan kawngro a su hran lo. An ngaih dân chuan Pathian Engkimtithei pakhat chauh a awm avângin, a tâwpah sakhua zawng zawng chuan a hnênah a hruai thleng vek dâwn a ni.

Sakhua Zawng Zawngin Pathian Hnênah Min Thlen Vek Em?

Khawvêl chanchina sakhaw hruaitu zah kai berte zînga pakhat, Isua Krista chuan he mi chungchângah hian eng nge a sawi? Ani chuan a zirtîrte hnênah: “Kawngka zîmah chuan lût rawh u,” tiin a hrilh a. Engvâng nge? “Boralnaa kalna kawngka chu a zau va, a kawng pawh a zau bawk a, chu mi lama lût chu tam pawh an tam hle a ni; nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni” si a.—Matthaia 7:13, 14.

Isua chuan sakhaw ṭhenkhatin ‘boralnaah’ a hruai a tihna a ni tak zet em? Nge ni a, Pathian ring lotute chauh chu kawngka zauva lûtte an ni a, Pathian ringtu apiangte chu—eng sakhua pawh vuan se—nunna kalna kawngka, kawngka zîmah an lût vek a tihna zâwk?

Kawng chi hnih chauh a awm thu a sawi hnu lawkah, Isua chuan: “Zâwlnei derte lakah fimkhur rawh u; chûng chu berâm vun sinin in hnênah an lo kal ṭhîn a, an chhûng lamah erawh chuan chinghne koham takte an ni si a,” tiin a sawi belh a ni. (Matthaia 7:15) A hnuah chuan: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titu erawh chu an lût ang,” tiin a sawi belh bawk. (Matthaia 7:21) Mi tuemaw chu zâwlnei tia koh a nih emaw, ani chuan Isua chu a “Lalpa” anga a chhâl emaw chuan, chu mi chu Pathian ring lotu ni lovin, sakhaw mi tak nia ngaih chu a inâwm hle ang. Chuti  chu, Isua chuan sakhua zawng zawng a dik vek lohzia leh sakhaw hruaitu zawng zawng chu rin vek tûr an nih lohzia a sawi tih a chiang hle.

Kawngka Zîm Chu Hriat Hran Theih A Ni Em?

Sakhua zawng zawngin Pathian hnêna min hruai thlen loh avângin, engtin nge sakhaw tam tak zîngah nunnaa hruaitu kawngka zîm chu i hmuh chhuah theih ang? He tehkhin thu hi ngaihtuah teh: Khawpui lian tak pakhata kawng bo angah han inchan ta la. Ṭanpuina dîl chu i tum ta a ni. Mi pakhat chuan inring tâwk takin i ding lama kal tûrin a hrilh che a. Mi dang chuan i vei lama kal tûrin a hrilh thung che a. Mi dang leh chuan dik ber nia i hriat chu zawh tawp mai tûrin a râwn thung che a ni. A tâwpah chuan, mi dang pakhat chuan ram lem (map) rin tlâk tak chu phawrhin, kawng dik tak a kawhhmuh ta che a. Tichuan, kawnga i râwn zêl atân chu map chu a pe bawk che a ni. I tum ram thleng thei tûrin i inring tâwk sawt dâwn lâwm ni?

Chutiang bawkin, sakhaw dik thlan nân pawh thlarau lam kawng kawhhmuhtu map rin tlâk tak kan mamawh a ni. Chutiang map chu hmuh tûr a awm em? Awm e. Chu map chu Bible hi a ni a, chu chuan: “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni,” tiin a sawi a ni.—2 Timothea 3:16.

Thlarau lam kawng kawhhmuhtu map anga i hman theih tûr Mizo Bible i neih ngei a rinawm a. He magazine chhuahtu, Jehova Thuhretu pawh hian Bible lehlin rin tlâk tak, New World Translation of the Holy Scriptures tih chu ṭawng chi hrang hrangin an chhuah a ni. Mahse, sakhaw dik leh dik lo i hriat hran theih nân Bible lehlin eng pawh chu i hmang thei ang. Mahse, he thuziak inzawmah hi chuan Mizo Bible chauh hman a ni.

A dawta thuziakte i chhiar hian, i thil lo hriat dân leh Bible sawi dân chu khaikhin rawh. Sakhaw dik leh dik lo thliar hran dân chungchânga Isua thusawite chu rilruah vawng reng ang che. Ani chuan heti hian a sawi: “Thing ṭha apiang a rah ṭha ṭhîn a; thing chhia erawh chu a rah chhe ṭhîn. Thing ṭha a rah chhe thei lo va, thing chhia lah a rah ṭha thei hek lo,” tiin. (Matthaia 7:17, 18) Bible-in “thing ṭha” târ langtu rah ṭha a sawite zînga pathum chauh hi i lo ngaihtuah ang u. (w09 8/1)

[Phêk 3-naa thu lâk chhuah]

Bible chu sakhaw dik hmu tûra mite ṭanpui thei map rin tlâk tak ang a ni